𐴃𐴝𐴔𐴦𐴝𐴔𐴢 𐴃𐴝𐴌𐴞𐴉𐴢 𐴀𐴥𐴡 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴧𐴘 𐴎𐴞𐴁𐴝 𐴃𐴝𐴔𐴦𐴝𐴔𐴢 𐴅𐴝𐴇𐴝𐴕𐴡𐴌 𐴌𐴡𐴁𐴢| 𐴀𐴡 𐴀𐴝𐴓𐴧𐴝𐴤! 𐴀𐴝𐴣𐴀𐴌𐴝𐴌 𐴕𐴡𐴁𐴞 𐴔𐴟𐴇𐴝𐴔𐴧𐴝𐴊𐴢 (𐴏𐴓𐴢) 𐴀𐴝𐴊𐴧𐴠 𐴃𐴝𐴌 𐴀𐴝𐴇𐴓𐴡 𐴀𐴝𐴘𐴝𐴓𐴡𐴌 𐴖𐴝𐴌𐴠 𐴐𐴥𐴝𐴕𐴃𐴞 𐴀𐴝𐴊𐴧𐴠 𐴌𐴡𐴇𐴔𐴝𐴃𐴢 𐴕𐴝𐴎𐴞𐴓𐴢 𐴒𐴡𐴌𐴡|| 𐴘𐴦𐴝𐴀𐴝𐴌 𐴁𐴦𐴝𐴊𐴠 𐴈𐴡𐴃𐴝 𐴀𐴡𐴘𐴓𐴊𐴠…

𐴔𐴝𐴐𐴥𐴖𐴝𐴌𐴝 𐴊𐴞𐴕𐴡𐴌 𐴀𐴠𐴑 𐴇𐴥𐴞𐴏𐴧𐴝| 𐴘𐴝𐴀𐴝𐴕 𐴀𐴥𐴠𐴀𐴕 𐴀𐴞𐴁𐴝𐴊𐴡𐴃𐴢 𐴎𐴝𐴌 𐴊𐴥𐴝𐴌𐴝 𐴀𐴝𐴣𐴀𐴌𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴑𐴟𐴌𐴁𐴝𐴃𐴢 𐴇𐴝𐴏𐴞𐴓𐴢 𐴒𐴡𐴌𐴞 𐴉𐴝𐴌𐴞| 𐴔𐴝𐴐𐴥𐴖𐴝𐴌𐴝 𐴑𐴞⸮ 𐴔𐴝𐴐𐴥𐴝𐴖𐴝𐴌𐴝 𐴌𐴠 𐴀𐴝𐴣𐴀𐴌𐴝 𐴖𐴝𐴅𐴞𐴁𐴢 𐴑𐴞𐴚𐴁𐴥𐴝 𐴔𐴟𐴏𐴃𐴝𐴇𐴝𐴁𐴢 𐴎𐴦𐴝 𐴈𐴡𐴘, 𐴀𐴝𐴈𐴠𐴌 𐴈𐴡𐴃𐴝 𐴀𐴡𐴘𐴓𐴊𐴠 𐴔𐴝𐴐𐴥𐴖𐴝𐴌𐴝𐴌 𐴊𐴥𐴝𐴌𐴝𐴘 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴔𐴡𐴇𐴝𐴁𐴧𐴝𐴃𐴢 𐴉𐴡𐴘𐴊𐴝 𐴀𐴡𐴘| 𐴀𐴠𐴒𐴞𐴕 𐴏𐴥𐴝𐴌𐴝 “𐴔𐴝𐴐𐴥𐴖𐴝𐴌𐴝” 𐴕𐴡𐴁𐴞 𐴔𐴟𐴇𐴝𐴔𐴧𐴝𐴊𐴢 (𐴏𐴓𐴢) 𐴀𐴝𐴊𐴧𐴠 𐴈𐴟𐴓𐴝𐴉𐴝 𐴌𐴝𐴐𐴠𐴊𐴞𐴕𐴡𐴌 𐴏𐴟𐴕𐴧𐴝𐴃𐴢||

𐴔𐴝𐴐𐴥𐴖𐴝𐴌𐴝 𐴀𐴡𐴘𐴓𐴊𐴠 𐴀𐴠𐴑 𐴀𐴞𐴁𐴝𐴊𐴡𐴃𐴢 𐴀𐴝𐴊𐴧𐴠 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴑𐴟𐴌𐴁𐴝𐴃𐴢 𐴇𐴝𐴏𐴞𐴓𐴡𐴌 𐴎𐴡𐴌𐴞𐴘𐴝| 𐴘𐴝𐴀𐴝𐴌 𐴔𐴧𐴝𐴎𐴠 𐴁𐴦𐴡𐴃𐴢 𐴉𐴝𐴘𐴊𐴝 𐴀𐴝𐴏𐴠| 𐴀𐴞𐴁𐴕𐴟𐴓𐴢 𐴀𐴝𐴌𐴡𐴁𐴞 (𐴌𐴡𐴇) 𐴈𐴡𐴀𐴠𐴑𐴧𐴝𐴕 𐴉𐴝𐴘𐴊𐴝𐴌 𐴈𐴡𐴃𐴝” 𐴀𐴝𐴇𐴑𐴝𐴔𐴟𐴓𐴢 𐴑𐴟𐴌𐴀𐴦𐴝𐴕” 𐴀𐴡𐴃𐴢 𐴎𐴞𐴑𐴞𐴌 𐴒𐴡𐴙𐴅𐴧𐴠| 𐴃𐴝𐴀𐴝𐴛 𐴈𐴡𐴘𐴧𐴠𐴊𐴠- 𐴔𐴝𐴐𐴥𐴖𐴝𐴌𐴝 𐴅𐴡𐴔𐴝𐴃𐴡𐴌 𐴔𐴧𐴝𐴎𐴠 𐴔𐴡𐴇𐴝𐴁𐴧𐴡𐴃𐴢 𐴉𐴡𐴘𐴊𐴝 𐴒𐴡𐴌𐴥𐴠 | 𐴔𐴝𐴐𐴥𐴖𐴝𐴌𐴝 𐴀𐴝𐴑𐴡𐴓𐴁𐴡𐴕 𐴔𐴝𐴕𐴟𐴙𐴐𐴡𐴓𐴧𐴝 𐴀𐴠𐴔𐴃𐴝𐴕 𐴀𐴝𐴌 𐴏𐴡𐴀𐴞 𐴉𐴡𐴘𐴏𐴝𐴓𐴝 𐴓𐴡𐴀𐴕𐴡𐴌 𐴎𐴡𐴌𐴞𐴘𐴝| 𐴎𐴠 𐴎𐴝𐴃𐴞 𐴔𐴡𐴐𐴥𐴖𐴝𐴌𐴝 𐴒𐴡𐴌𐴥𐴠 𐴃𐴝𐴌𐴝 𐴏𐴡𐴀𐴞 𐴌𐴝𐴏𐴧𐴝 𐴉𐴝𐴘𐴎𐴝𐴦| 𐴈𐴡𐴕𐴡 𐴇𐴡𐴑𐴟𐴔𐴡𐴃𐴢, 𐴊𐴠𐴐𐴢, 𐴀𐴞𐴕𐴞𐴐𐴄𐴞𐴄𐴟𐴐𐴥𐴡𐴕 𐴘𐴦𐴝𐴃𐴡 𐴀𐴞𐴔𐴝𐴌𐴤𐴝 𐴔𐴡𐴐𐴥𐴖𐴝𐴌𐴝 𐴏𐴥𐴝𐴌𐴝 𐴏𐴥𐴡𐴓𐴃𐴠 𐴕𐴡 𐴉𐴝𐴌𐴠| 𐴎𐴡𐴊𐴞 𐴔𐴡𐴐𐴥𐴖𐴝𐴌𐴝 𐴒𐴡𐴌𐴡𐴕 𐴏𐴥𐴝𐴌𐴞 𐴊𐴠𐴖𐴝 𐴎𐴝𐴀 𐴃𐴡𐴘𐴓𐴊𐴠 𐴇𐴡𐴑𐴟𐴔𐴡𐴃𐴢, 𐴏𐴡𐴌𐴑𐴝𐴌, 𐴊𐴠𐴐𐴢 𐴀𐴝𐴊𐴧𐴠 𐴀𐴞𐴔𐴝𐴌𐴤𐴝 𐴁𐴠𐴒𐴧𐴟𐴕 𐴇𐴝𐴓𐴝𐴑 𐴀𐴡𐴘𐴎𐴝𐴘𐴁𐴡| 𐴔𐴡𐴐𐴥𐴖𐴝𐴌𐴝 𐴏𐴥𐴝𐴌𐴝 𐴈𐴡𐴕𐴡 𐴈𐴝𐴔𐴢 𐴏𐴡𐴀𐴞𐴁𐴤𐴝𐴉𐴠 𐴉𐴟𐴌𐴝 𐴕𐴡 𐴒𐴡𐴌𐴝 𐴎𐴝𐴘 𐴀𐴝𐴌 𐴔𐴝𐴕𐴟𐴙𐴐𐴢 𐴏𐴝𐴊𐴧𐴠 𐴇𐴥𐴞 𐴉𐴡𐴘𐴏𐴝𐴓𐴝 𐴘𐴥𐴡 𐴕𐴡 𐴉𐴦𐴝 𐴎𐴝𐴘||

𐴔𐴡𐴐𐴥𐴖𐴝𐴌𐴝𐴌 𐴁𐴠𐴒𐴧𐴟𐴕𐴡𐴃𐴧𐴟𐴕 𐴋𐴡𐴣𐴀𐴌 𐴉𐴝𐴘𐴊𐴝 𐴀𐴡𐴘𐴓𐴊𐴠- 𐴕𐴡𐴁𐴞 (𐴏𐴓𐴢) 𐴕𐴞𐴎𐴠 𐴏𐴝𐴇𐴝𐴁𐴝 𐴑𐴠𐴌𐴝𐴔𐴡𐴌 𐴏𐴝𐴀𐴃𐴠 𐴔𐴡𐴐𐴥𐴖𐴝𐴌𐴝 𐴒𐴡𐴙𐴅𐴧𐴠| 𐴌𐴝𐴏𐴟𐴓𐴢 (𐴏𐴓𐴢) 𐴕𐴞𐴎𐴠 𐴔𐴝𐴀𐴏𐴟𐴔𐴢 𐴀𐴝𐴙𐴐𐴧𐴞𐴓𐴢 𐴇𐴥𐴞𐴘𐴝𐴌 𐴁𐴦𐴝𐴊𐴠𐴘𐴥𐴡 𐴃𐴝𐴀𐴛 𐴏𐴝𐴇𐴝𐴁𐴝 𐴑𐴠𐴌𐴝𐴔𐴡𐴌 𐴏𐴝𐴀𐴃𐴠 𐴔𐴡𐴐𐴥𐴖𐴝𐴌𐴝 𐴒𐴡𐴙𐴃𐴡||

𐴃𐴝𐴀𐴛 𐴁𐴡𐴊𐴡𐴌, 𐴀𐴡𐴇𐴟𐴊𐴢 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴓𐴝𐴌𐴥𐴝𐴘𐴡𐴌 𐴁𐴝𐴁𐴡𐴃𐴠 𐴏𐴝𐴁𐴝𐴇𐴝 𐴑𐴠𐴌𐴝𐴔𐴡𐴌 𐴏𐴝𐴀𐴃𐴠 𐴔𐴡𐴐𐴥𐴖𐴝𐴌𐴝 𐴒𐴡𐴙𐴅𐴧𐴠| 𐴀𐴝𐴌 𐴏𐴝𐴇𐴝𐴁𐴝 𐴑𐴠𐴌𐴝𐴔𐴥𐴡 𐴁𐴦𐴡𐴃𐴢 𐴋𐴡𐴙𐴓𐴧𐴝 𐴔𐴡𐴐𐴥𐴝𐴖𐴝 𐴒𐴡𐴙𐴃𐴧𐴡 𐴃𐴝𐴀𐴛𐴌 𐴏𐴝𐴀𐴃𐴠||

𐴀𐴞𐴔𐴝𐴔𐴢 𐴁𐴟𐴈𐴝𐴌𐴞 (𐴌𐴡𐴇) 𐴈𐴡𐴘𐴧𐴠𐴊𐴠- 𐴕𐴡𐴁𐴞 𐴑𐴡𐴌𐴞𐴔𐴢 (𐴏𐴓𐴢)𐴀𐴡𐴌 𐴁𐴦𐴝𐴊𐴠 𐴀𐴞𐴔𐴝𐴔𐴢 𐴀𐴥𐴡𐴑𐴧𐴡𐴓𐴢 𐴔𐴦𐴝𐴕𐴞 𐴈𐴡𐴓𐴞𐴉𐴝 𐴀𐴥𐴡𐴑𐴧𐴡𐴓𐴠 𐴅𐴝𐴀𐴠𐴎 𐴏𐴦𐴞𐴏𐴡𐴌 𐴁𐴝𐴁𐴡𐴃𐴠 𐴀𐴝𐴇𐴓𐴠 𐴀𐴞𐴓𐴡𐴔𐴡 𐴔𐴧𐴝𐴎𐴠𐴃𐴧𐴟𐴕 𐴀𐴝𐴔𐴝𐴕𐴡𐴃𐴊𐴝𐴌 𐴀𐴥𐴡𐴑𐴧𐴡𐴓𐴡𐴌 𐴏𐴝𐴀𐴃𐴠 𐴔𐴡𐴐𐴥𐴖𐴝𐴌𐴝 𐴒𐴡𐴙𐴃𐴧𐴡| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴃𐴝𐴌𐴝𐴃𐴧𐴟𐴕 𐴃𐴝𐴔𐴦𐴝𐴔𐴢 𐴃𐴡𐴉𐴏𐴞𐴓𐴞 𐴔𐴡𐴏𐴀𐴝𐴓𐴝 𐴎𐴝𐴕𐴞 𐴓𐴡𐴘 𐴉𐴝𐴌𐴠𐴉𐴝𐴕||

𐴀𐴞𐴔𐴝𐴔𐴢 𐴏𐴟𐴉𐴞𐴘𐴝𐴕 𐴏𐴝𐴖𐴌𐴞 (𐴌𐴡𐴇) 𐴈𐴡𐴘𐴧𐴠𐴊𐴠- 𐴃𐴟𐴖𐴝𐴣𐴌 𐴔𐴡𐴐𐴥𐴖𐴝𐴌𐴝 𐴊𐴠𐴀𐴡𐴘𐴧𐴝𐴌 𐴀𐴝𐴔𐴝𐴕𐴡𐴃𐴊𐴝𐴌 𐴀𐴝𐴊𐴧𐴠 𐴃𐴝𐴑𐴖𐴝 𐴀𐴦𐴡𐴓𐴝 𐴀𐴡𐴀𐴕 𐴎𐴡𐴌𐴟𐴌𐴞| 𐴎𐴝𐴌𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌𐴠 𐴋𐴡𐴌𐴠||

𐴀𐴝𐴇𐴓𐴟𐴐𐴢 𐴐𐴥𐴟𐴌𐴝 𐴔𐴦𐴝𐴕𐴞 𐴔𐴡𐴐𐴥𐴖𐴝𐴌𐴝 𐴊𐴠𐴀𐴡𐴘𐴧𐴝 𐴇𐴡𐴀𐴕 𐴇𐴡𐴀𐴕⸮ 𐴅𐴟𐴖𐴝𐴁𐴢 𐴀𐴡𐴘𐴓𐴊𐴠- 𐴀𐴝𐴇𐴓𐴟𐴐𐴢 𐴐𐴥𐴟𐴌𐴝 𐴀𐴡𐴘𐴓𐴊𐴠 𐴎𐴝𐴌𐴝𐴌 𐴈𐴝𐴣𐴏𐴠 𐴔𐴝𐴕𐴟𐴙𐴐𐴢 𐴔𐴡𐴐𐴥𐴖𐴝𐴌𐴝 𐴏𐴝𐴘𐴓𐴠 𐴃𐴝𐴌𐴝 𐴇𐴥𐴡𐴑 𐴀𐴝𐴊𐴧𐴠 𐴏𐴡𐴀𐴞 𐴔𐴡𐴐𐴥𐴖𐴝𐴌𐴝 𐴊𐴠𐴀| 𐴔𐴦𐴝𐴕𐴞 𐴃𐴝𐴌𐴝 𐴀𐴡𐴘𐴓𐴊𐴠 𐴀𐴝𐴏𐴇𐴝𐴁𐴟𐴌 𐴌𐴥𐴝𐴘, 𐴊𐴞𐴕𐴊𐴝𐴌, 𐴀𐴝𐴔𐴝𐴕𐴡𐴃𐴊𐴝𐴌 𐴀𐴝𐴊𐴧𐴠 𐴔𐴟𐴃𐴝𐴑𐴧𐴞 𐴔𐴝𐴕𐴟𐴙𐴐𐴢| 𐴃𐴝𐴌𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌𐴠 𐴋𐴡𐴌𐴝𐴘, 𐴇𐴡𐴀𐴕𐴞𐴙𐴑𐴧𐴝𐴌𐴠 𐴊𐴤𐴡𐴑𐴝 𐴕𐴡 𐴊𐴠𐴀 𐴀𐴝𐴊𐴧𐴠 𐴔𐴝𐴕𐴟𐴙𐴐𐴡𐴌𐴠 𐴔𐴟𐴈𐴝𐴓𐴠𐴉𐴞 𐴔𐴡𐴐𐴥𐴖𐴝𐴌𐴝 𐴕𐴡 𐴊𐴠𐴘| 𐴀𐴝𐴇𐴓𐴟𐴐𐴢 𐴐𐴟𐴌𐴝 𐴀𐴦𐴡𐴓𐴢 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌𐴠 𐴋𐴡𐴌𐴝𐴘, 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴏𐴝𐴀𐴔𐴠 𐴃𐴞𐴛𐴡𐴕 𐴌𐴠 𐴋𐴡𐴌𐴝𐴘- 𐴀𐴞𐴃𐴡𐴓𐴧𐴝 𐴇𐴥𐴝𐴔𐴠𐴐𐴝 𐴃𐴝𐴌 𐴋𐴡𐴌 𐴀𐴝𐴊𐴧𐴠 𐴃𐴝𐴑𐴖𐴝 𐴃𐴝𐴌𐴠 𐴇𐴥𐴝𐴏𐴝 𐴈𐴡𐴃𐴝 𐴈𐴡𐴀𐴕 𐴀𐴝𐴊𐴧𐴠 𐴀𐴝𐴔𐴝𐴕𐴡𐴃𐴢 𐴇𐴠𐴉𐴝𐴎𐴡𐴃𐴢 𐴒𐴡𐴌𐴡𐴕𐴡𐴌 𐴖𐴝𐴌𐴠 𐴇𐴥𐴡𐴏𐴠𐴓𐴝 𐴊𐴠𐴘| 𐴀𐴝𐴌 𐴎𐴡𐴊𐴞 𐴈𐴡𐴕𐴡 𐴏𐴦𐴞𐴏𐴡𐴌 𐴁𐴝𐴁𐴡𐴃𐴠 𐴃𐴝𐴌 𐴎𐴝𐴕𐴝 𐴕𐴡 𐴃𐴝𐴑𐴠 𐴃𐴡𐴘𐴓𐴠 𐴃𐴝𐴘 𐴁𐴠𐴐𐴥𐴡𐴑 𐴀𐴥𐴠 𐴈𐴡𐴃𐴝 𐴈𐴡𐴘𐴁𐴡 𐴑𐴞 𐴘𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴀𐴝𐴣𐴀𐴌 𐴎𐴝𐴕𐴝 𐴕𐴝𐴘| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴇𐴥𐴠𐴁𐴤𐴝 𐴃𐴡 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴌𐴠 𐴋𐴡𐴌𐴝 𐴀𐴝𐴌 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴏𐴝𐴀𐴔𐴕𐴠 𐴃𐴞𐴛𐴝𐴕𐴡𐴌𐴠 𐴘𐴥𐴡 𐴋𐴡𐴌𐴝𐴘| 𐴇𐴥𐴞𐴁𐴤𐴝𐴘𐴠 𐴀𐴥𐴞𐴀𐴕 𐴈𐴡𐴕𐴡 𐴔𐴡𐴐𐴥𐴖𐴝𐴌𐴝 𐴕𐴡 𐴊𐴠𐴀 𐴎𐴞𐴘𐴝𐴕𐴡𐴌 𐴊𐴥𐴝𐴌𐴝𐴘 𐴉𐴝𐴏𐴝𐴊𐴢 𐴀𐴝𐴊𐴧𐴠 𐴈𐴝𐴙𐴎𐴧𐴝 𐴀𐴡𐴘𐴁𐴡| 𐴑𐴞𐴘𐴡𐴓𐴧𐴝 𐴇𐴥𐴞𐴁𐴤𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴌𐴠 𐴋𐴡𐴌𐴝𐴘 𐴀𐴝𐴌 𐴀𐴝𐴈𐴠𐴌𐴡𐴃𐴡𐴃𐴢 𐴁𐴤𐴝𐴓𐴝𐴘𐴌 𐴀𐴝𐴐𐴤𐴝 𐴒𐴡𐴌𐴥𐴠||

𐴀𐴞𐴃𐴡𐴓𐴧𐴝 𐴁𐴡𐴓𐴞 𐴀𐴝𐴇𐴓𐴟𐴐𐴢 𐴐𐴟𐴌𐴝 𐴔𐴦𐴝𐴕𐴞 𐴔𐴡𐴐𐴥𐴖𐴝𐴌𐴝 𐴊𐴝𐴕 𐴒𐴡𐴌𐴡𐴘𐴧𐴝𐴓𐴧𐴝 𐴀𐴝𐴇𐴝𐴔𐴢 𐴐𐴡𐴌𐴡𐴃𐴡 𐴀𐴡𐴘𐴓𐴊𐴞- 𐴇𐴞𐴁𐴤𐴝 𐴀𐴝𐴔𐴝𐴕𐴡𐴃𐴊𐴝𐴌, 𐴀𐴝𐴓𐴧𐴝𐴤 𐴌𐴠 𐴋𐴡𐴌𐴝𐴘 𐴀𐴝𐴊𐴧𐴠 𐴃𐴡𐴅𐴌𐴠𐴁𐴝 𐴀𐴦𐴡𐴓𐴝 𐴀𐴡𐴀𐴕| 𐴃𐴡𐴅𐴌𐴠𐴁𐴝 𐴀𐴦𐴡𐴓𐴝 𐴔𐴕𐴟𐴙𐴐𐴢 𐴀𐴝𐴊𐴧𐴠 𐴉𐴡𐴘𐴏𐴝𐴓𐴝 𐴊𐴠𐴀𐴕𐴡𐴌 𐴃𐴝𐴑𐴡𐴃𐴢 𐴀𐴝𐴏𐴠𐴊𐴞 𐴔𐴝𐴕𐴟𐴙𐴐𐴢 𐴀𐴦𐴡𐴓𐴢 𐴔𐴡𐴐𐴥𐴖𐴝𐴌𐴝 𐴒𐴡𐴌𐴥𐴞 𐴈𐴝𐴔𐴢 𐴒𐴡𐴌𐴞| 𐴑𐴞𐴕𐴃𐴟 𐴀𐴥𐴠𐴀𐴕 𐴁𐴦𐴡𐴃𐴢 𐴔𐴝𐴕𐴟𐴙𐴐𐴢 𐴀𐴝𐴏𐴠 𐴎𐴝𐴌𐴝 𐴃𐴡𐴅𐴌𐴠𐴁𐴝 𐴀𐴦𐴡𐴓𐴝 𐴕𐴡𐴀 𐴀𐴝𐴁𐴝𐴌 𐴉𐴡𐴘𐴏𐴝𐴓𐴝 𐴒𐴡𐴌𐴡𐴕𐴡𐴌 𐴃𐴝𐴑𐴡𐴃𐴡 𐴕𐴝𐴘 𐴃𐴝𐴌𐴝𐴃𐴧𐴟 𐴈𐴡𐴕𐴞𐴙𐴑𐴧𐴝𐴘 𐴔𐴡𐴐𐴥𐴖𐴝𐴌𐴝 𐴕𐴞𐴁𐴡⸮ 𐴃𐴝𐴌𐴝 𐴑𐴞 𐴇𐴤𐴡𐴕𐴞𐴙𐴑𐴧𐴝𐴌𐴠 𐴔𐴡𐴐𐴥𐴖𐴝𐴌𐴝 𐴊𐴞𐴁𐴡⸮ 𐴀𐴥𐴠 𐴔𐴡𐴖𐴎𐴟𐴌 𐴖𐴝𐴌𐴠 𐴀𐴝𐴀𐴛 𐴀𐴝𐴇𐴑𐴝𐴔𐴟𐴓𐴢 𐴀𐴞𐴔𐴝𐴌𐴤𐴝 𐴑𐴞𐴃𐴝𐴁𐴡𐴃𐴢 𐴃𐴡𐴉𐴏𐴞𐴓𐴞 𐴁𐴡𐴘𐴝𐴕 𐴒𐴡𐴙𐴅𐴧𐴞| 𐴇𐴥𐴠 𐴑𐴞𐴃𐴝𐴁𐴡𐴌 𐴊𐴥𐴡𐴌𐴏𐴠 𐴀𐴝𐴇𐴑𐴝𐴔𐴟𐴐𐴢 𐴐𐴤𐴟𐴌𐴝 𐴔𐴧𐴝𐴎𐴠 𐴉𐴟𐴌𐴝 𐴁𐴡𐴘𐴝𐴕 𐴀𐴝𐴘𐴒𐴞𐴘𐴡𐴘| 𐴀𐴝𐴔𐴞𐴌, 𐴀𐴔𐴝𐴞𐴌𐴟𐴓𐴢 𐴔𐴟𐴀𐴔𐴞𐴕𐴞𐴕, 𐴈𐴡𐴓𐴞𐴉𐴝 𐴀𐴥𐴡𐴃𐴡𐴁𐴝 𐴈𐴡𐴕𐴡 𐴃𐴡𐴕𐴅𐴞𐴔𐴡𐴌 𐴓𐴞𐴋𐴝𐴌 𐴁𐴠𐴒𐴧𐴟𐴕𐴡𐴓𐴧𐴝 𐴇𐴥𐴠𐴘𐴝𐴕𐴡𐴃𐴢 𐴎𐴡𐴌𐴟𐴌𐴞 𐴀𐴝𐴇𐴑𐴝𐴔𐴢 𐴁𐴡𐴘𐴝𐴕 𐴒𐴡𐴌𐴝 𐴀𐴡𐴘𐴧𐴠||

𐴀𐴟𐴏𐴃𐴝𐴊𐴢 𐴀𐴝𐴁𐴊𐴟𐴓𐴧𐴝𐴤 𐴀𐴝𐴊𐴇𐴝𐴔𐴢 𐴈𐴡𐴘𐴧𐴠𐴊𐴠- 𐴈𐴡𐴁𐴥𐴡𐴌𐴊𐴝𐴌! 𐴁𐴡𐴙𐴐𐴢 𐴈𐴡𐴔𐴢 𐴀𐴥𐴞𐴀𐴕 𐴔𐴝𐴕𐴟𐴙𐴐𐴥𐴡𐴌𐴠 𐴔𐴡𐴐𐴥𐴖𐴝𐴌𐴝 𐴊𐴠𐴀𐴕𐴡𐴃𐴧𐴟𐴕 𐴌𐴟𐴑𐴞 𐴌𐴝𐴑𐴝 𐴕𐴡 𐴎𐴝𐴘𐴁𐴡| 𐴔𐴦𐴝𐴕𐴞 𐴎𐴝𐴌𐴝𐴌 𐴁𐴡𐴙𐴐𐴥𐴢 𐴈𐴡𐴔𐴢 𐴀𐴡𐴃𐴡𐴁𐴝 𐴕𐴟𐴖𐴝 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴌𐴠 𐴔𐴡𐴐𐴥𐴖𐴝𐴌𐴝 𐴊𐴠𐴀𐴕𐴡𐴃𐴧𐴟𐴕 𐴊𐴥𐴟𐴌𐴞 𐴌𐴝𐴑𐴡𐴕 𐴄𐴞𐴑 𐴕𐴡| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴐𐴤𐴡𐴣𐴍𐴡- 𐴁𐴡𐴌𐴡, 𐴅𐴟𐴖𐴝𐴕-𐴁𐴟𐴌𐴝 𐴇𐴥𐴝𐴌 𐴑𐴠𐴏𐴞𐴙𐴔𐴧𐴝 𐴀𐴝𐴓𐴠𐴔𐴢-𐴀𐴟𐴓𐴝𐴔𐴝𐴌 𐴊𐴥𐴝𐴌𐴝𐴘 𐴇𐴥𐴡𐴎𐴌𐴡𐴃𐴢 𐴀𐴡𐴔𐴡𐴌 (𐴌𐴡𐴎) 𐴔𐴡𐴅𐴓𐴞𐴏𐴢 𐴁𐴤𐴡𐴌𐴥𐴝 𐴀𐴝𐴙𐴐𐴧𐴞𐴓𐴢| 𐴇𐴥𐴡𐴎𐴌𐴡𐴃𐴢 𐴀𐴡𐴔𐴡𐴌 (𐴌𐴡𐴎) 𐴀𐴡𐴌 𐴁𐴝𐴁𐴡𐴃𐴠 𐴈𐴡𐴃𐴝 𐴘𐴝𐴀𐴝𐴕 𐴔𐴡𐴐𐴟𐴌 𐴀𐴝𐴏𐴠 𐴑𐴞 𐴃𐴝𐴀𐴛 𐴏𐴝𐴇𐴝𐴁𐴝 𐴑𐴠𐴌𐴝𐴔𐴡𐴌 𐴏𐴝𐴀𐴃𐴠 𐴔𐴡𐴐𐴥𐴖𐴝𐴌𐴝 𐴒𐴡𐴙𐴃𐴧𐴡| 𐴇𐴥𐴞𐴕𐴋𐴞𐴓𐴧𐴝 𐴃𐴝𐴀𐴛 𐴊𐴞𐴕𐴊𐴝𐴌 𐴀𐴝𐴊𐴧𐴠 𐴀𐴝𐴔𐴝𐴕𐴡𐴃𐴊𐴝𐴌 𐴔𐴝𐴕𐴟𐴙𐴐𐴢 𐴀𐴦𐴡𐴓𐴡𐴌 𐴏𐴝𐴧𐴀𐴃𐴠 𐴔𐴡𐴐𐴥𐴖𐴝𐴌𐴝 𐴒𐴡𐴙𐴃𐴧𐴡 𐴇𐴞𐴁𐴤𐴝 𐴐𐴤𐴡𐴣𐴍𐴡 𐴀𐴡𐴗𐴑 𐴁𐴡𐴌𐴡 𐴀𐴡𐴗𐴑 𐴅𐴟𐴖𐴝𐴕 𐴀𐴡𐴗𐴑 𐴀𐴝𐴌 𐴁𐴟𐴌𐴝 𐴀𐴡𐴗𐴑||

𐴀𐴟𐴏𐴃𐴝𐴊𐴢 𐴀𐴝𐴁𐴊𐴟𐴓𐴧𐴝𐴤 𐴀𐴝𐴊𐴇𐴝𐴔𐴢 𐴀𐴝𐴌𐴡 𐴈𐴡𐴘𐴧𐴠𐴊𐴠- 𐴀𐴡𐴔𐴡𐴌 (𐴌𐴡𐴎) 𐴀𐴡𐴌 𐴔𐴡𐴅𐴓𐴞𐴏𐴡𐴌 𐴊𐴟𐴖𐴝𐴌 𐴀𐴝𐴓𐴠𐴔𐴢 𐴀𐴡𐴓𐴝𐴔𐴝𐴓𐴧𐴝 𐴇𐴝𐴔𐴠𐴐𐴥𐴝 𐴑𐴥𐴟𐴓𐴝 𐴃𐴤𐴝𐴑𐴞𐴃𐴡| 𐴅𐴟𐴖𐴝𐴕- 𐴁𐴟𐴌𐴝 𐴁𐴠𐴒𐴧𐴟𐴕𐴡𐴌 𐴏𐴝𐴀𐴃𐴠 𐴃𐴝𐴀𐴛 𐴔𐴡𐴐𐴥𐴖𐴝𐴌𐴝 𐴒𐴡𐴙𐴃𐴧𐴡| 𐴎𐴠𐴀𐴕 𐴕𐴠𐴑𐴞 𐴀𐴞𐴔𐴝𐴔𐴢 𐴎𐴥𐴟𐴇𐴌𐴞 (𐴌𐴡𐴇)𐴃𐴧𐴟 𐴌𐴝𐴠𐴖𐴝𐴘𐴠𐴃𐴢 𐴀𐴝𐴏𐴠 𐴑𐴞 𐴇𐴥𐴡𐴎𐴌𐴡𐴃𐴢 𐴀𐴡𐴔𐴡𐴌 (𐴌𐴡𐴎) 𐴈𐴡𐴘𐴃𐴡- 𐴈𐴡𐴔𐴢 𐴁𐴡𐴙𐴐𐴥𐴢 𐴀𐴡𐴕𐴡𐴌 𐴎𐴡𐴌𐴞𐴘𐴝 𐴃𐴟𐴖𐴝𐴣𐴌𐴝𐴌 𐴇𐴤𐴡𐴕𐴞𐴙𐴑𐴧𐴝𐴌𐴠 𐴔𐴡𐴐𐴥𐴖𐴝𐴌𐴝 𐴀𐴝𐴊𐴧𐴠 𐴌𐴝𐴘 𐴎𐴡𐴇𐴠𐴌𐴡𐴃𐴧𐴟𐴕 𐴌𐴟𐴑𐴝 𐴕𐴡 𐴎𐴝𐴘𐴉𐴝𐴕| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴔𐴡𐴐𐴥𐴖𐴝𐴌𐴝 𐴀𐴝𐴊𐴧𐴠 𐴌𐴝𐴘 𐴁𐴡𐴙𐴐𐴥𐴢 𐴈𐴡𐴔𐴢- 𐴁𐴠𐴐𐴥𐴞𐴌 𐴖𐴝𐴌𐴠 𐴕𐴡 𐴀𐴡𐴘| 𐴁𐴡𐴓𐴑𐴠 𐴘𐴝𐴀𐴝𐴕 𐴀𐴥𐴞𐴀𐴕 𐴀𐴟𐴒𐴧𐴗𐴝 𐴔𐴡𐴖𐴎𐴟 𐴎𐴦𐴝 𐴏𐴠𐴌𐴠𐴉𐴢 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴎𐴝𐴌 𐴔𐴟𐴦𐴣𐴃𐴧𐴟𐴕 𐴁𐴝𐴙𐴌 𐴒𐴡𐴌𐴡𐴕𐴡𐴌 𐴀𐴞𐴏𐴧𐴝 𐴒𐴡𐴌𐴥𐴠 𐴇𐴠𐴁𐴤𐴝𐴃𐴧𐴟𐴕 𐴕𐴠𐴘𐴓𐴝𐴘||

𐴀𐴞𐴔𐴝𐴔𐴢 𐴁𐴟𐴈𐴝𐴌𐴞 (𐴌𐴡𐴇) 𐴈𐴡𐴘𐴧𐴠𐴊𐴠- 𐴑𐴥𐴝𐴌𐴞 𐴀𐴦𐴡𐴓 𐴅𐴟𐴖𐴝𐴕 𐴀𐴡𐴗𐴑 𐴁𐴟𐴌𐴝 𐴀𐴡𐴗𐴑 𐴃𐴝𐴌𐴝 𐴀𐴡𐴔𐴡𐴌 (𐴌𐴡𐴎) 𐴀𐴡𐴌 𐴔𐴡𐴅𐴓𐴞𐴏𐴡𐴃𐴢 𐴀𐴝𐴇𐴓𐴟𐴐𐴢 𐴐𐴟𐴥𐴌𐴝 𐴔𐴧𐴝𐴎𐴠 𐴐𐴝𐴔𐴞𐴓𐴢 𐴀𐴝𐴙𐴐𐴧𐴞𐴓𐴢| 𐴑𐴞𐴘𐴡𐴓𐴧𐴝 𐴃𐴝𐴌𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴑𐴞𐴃𐴝𐴁𐴡𐴌 𐴁𐴝𐴁𐴡𐴃𐴠 𐴁𐴠𐴐𐴥𐴞 𐴀𐴞𐴓𐴡𐴔𐴢 𐴌𐴝𐴑𐴞𐴃𐴡| 𐴀𐴡𐴔𐴡𐴌 (𐴌𐴡𐴎) 𐴀𐴥𐴠 𐴏𐴠𐴉𐴝𐴃𐴡𐴌 𐴁𐴝𐴁𐴡𐴃𐴠 𐴀𐴞𐴔𐴝𐴔𐴢 ( 𐴌𐴡𐴇) 𐴀𐴥𐴞𐴀𐴕𐴋𐴞𐴓𐴧𐴝 𐴁𐴡𐴘𐴝𐴕 𐴒𐴡𐴙𐴅𐴧𐴠||

𐴈𐴡𐴓𐴝𐴏𐴝 𐴈𐴡𐴃𐴝 𐴀𐴡𐴘𐴓𐴊𐴠 𐴔𐴡𐴐𐴥𐴖𐴝𐴌𐴝 𐴀𐴡𐴘𐴓𐴊𐴠 𐴀𐴟𐴔𐴧𐴝𐴃𐴠 𐴔𐴟𐴏𐴓𐴞𐴔𐴝𐴌 𐴀𐴟𐴒𐴧𐴗𐴝 𐴋𐴡𐴣𐴀𐴌 𐴕𐴞𐴐𐴥𐴝𐴕𐴝| 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴔𐴟𐴀𐴔𐴞𐴕𐴡𐴌 𐴃𐴝𐴌𐴞𐴉𐴢 𐴒𐴡𐴌𐴥𐴞 𐴈𐴡𐴘𐴧𐴠, 𐴔𐴟𐴀𐴔𐴞𐴕 𐴀𐴦𐴡𐴓𐴢 𐴃𐴝𐴌𐴝𐴌 𐴃𐴝𐴔𐴦𐴝𐴔𐴢 𐴔𐴡𐴖𐴎𐴟𐴌 𐴁𐴝𐴁𐴡𐴃𐴠 𐴔𐴡𐴐𐴥𐴖𐴝𐴌𐴝 𐴒𐴡𐴌𐴥𐴠| 𐴎𐴠𐴀𐴕 𐴕𐴠𐴑𐴞 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴘𐴠 𐴈𐴡𐴘𐴧𐴠𐴊𐴠-

وَأَمْرُهُمْ شُورَى بَيْنَهُمْ

(𐴔𐴟𐴀𐴔𐴞𐴕 𐴀𐴦𐴡𐴓𐴢) 𐴎𐴝𐴌𐴝 𐴀𐴦𐴝𐴉𐴡𐴏𐴡𐴃𐴢 𐴔𐴡𐴐𐴥𐴖𐴝𐴌𐴝 𐴒𐴡𐴌𐴥𐴞 𐴈𐴝𐴔𐴢 𐴒𐴡𐴌𐴠| 𐴏𐴟𐴌𐴝 𐴐𐴟𐴌𐴝- 𐴳𐴸

𐴔𐴝𐴐𐴥𐴖𐴝𐴌𐴝𐴌 𐴁𐴝𐴁𐴡𐴃𐴠 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴀𐴠𐴌𐴐𐴥𐴝𐴊𐴢 𐴒𐴡𐴙𐴅𐴧𐴠-

وَشَاوِرْهُمْ فِي الأَمْرِ
𐴕𐴡𐴁𐴞 (𐴏𐴓𐴢) 𐴀𐴡𐴌𐴠 𐴈𐴠𐴃𐴝𐴁𐴢 𐴒𐴡𐴌𐴥𐴞 𐴈𐴡𐴖𐴝 𐴀𐴡𐴘𐴧𐴠𐴊𐴠- 𐴈𐴝𐴔𐴢 𐴈𐴝𐴙𐴎𐴡𐴃𐴢 𐴃𐴝𐴌𐴝𐴌 𐴏𐴝𐴀𐴃𐴠 𐴔𐴡𐴐𐴥𐴖𐴝𐴌𐴝 𐴒𐴡𐴌𐴡| 𐴏𐴟𐴌𐴝 𐴀𐴝𐴓𐴢 𐴀𐴞𐴔𐴌𐴝𐴕- 𐴱𐴵𐴹

𐴇𐴥𐴝𐴌 𐴀𐴟𐴒𐴧𐴗𐴝 𐴈𐴝𐴔𐴡𐴓𐴧𐴝 𐴔𐴡𐴐𐴥𐴖𐴝𐴌𐴝 𐴖𐴝𐴅𐴞𐴁𐴢 𐴀𐴡𐴃𐴡𐴁𐴝 𐴔𐴟𐴏𐴃𐴝𐴇𐴝𐴁𐴢 | 𐴘𐴝𐴀𐴝𐴕 𐴏𐴥𐴝𐴌𐴝 𐴔𐴡𐴐𐴥𐴖𐴝𐴌𐴝 𐴇𐴡𐴑𐴟𐴔𐴡𐴃𐴢 𐴀𐴠𐴕𐴃𐴠𐴎𐴝𐴔𐴡𐴌 𐴕𐴞𐴘𐴡𐴔𐴡| 𐴎𐴠𐴀𐴕 𐴕𐴠𐴑𐴞 𐴀𐴝𐴣𐴀𐴌𐴝 𐴀𐴝𐴒𐴠 𐴁𐴡𐴘𐴝𐴕 𐴒𐴡𐴙𐴅𐴧𐴞| 𐴀𐴞𐴃𐴡𐴓𐴧𐴝 𐴔𐴡𐴐𐴥𐴖𐴝𐴌𐴝 𐴀𐴟𐴒𐴧𐴗𐴝 𐴀𐴝𐴇𐴝𐴔𐴢 𐴏𐴟𐴕𐴧𐴝𐴃𐴢 𐴀𐴝𐴊𐴧𐴠 𐴀𐴞𐴏𐴓𐴝𐴔𐴡𐴌 𐴀𐴝𐴊𐴡𐴁𐴢| 𐴎𐴡𐴈𐴡𐴕 𐴔𐴡𐴐𐴥𐴖𐴝𐴌𐴝 𐴏𐴝𐴌𐴠 𐴊𐴠𐴀𐴕 𐴀𐴡𐴘 𐴃𐴡𐴈𐴡𐴕 𐴔𐴝𐴕𐴟𐴙𐴐𐴢 𐴃𐴡𐴉𐴌𐴞𐴑 𐴀𐴡𐴘𐴎𐴝𐴘| 𐴎𐴝 𐴔𐴡𐴐𐴥𐴖𐴝𐴌𐴝 𐴏𐴝𐴌𐴝 𐴀𐴠𐴏𐴓𐴝𐴇 𐴕𐴡 𐴀𐴡𐴘| 𐴀𐴞𐴀𐴋𐴞𐴓𐴧𐴝 𐴇𐴡𐴑𐴟𐴔𐴡𐴃𐴢 𐴊𐴠𐴐𐴢 𐴀𐴝𐴊𐴧𐴠 𐴀𐴞𐴔𐴝𐴌𐴝 𐴔𐴡𐴐𐴥𐴖𐴝𐴌𐴝 𐴏𐴥𐴝𐴌𐴝 𐴏𐴡𐴀𐴞 𐴁𐴤𐴝𐴉𐴠 𐴕𐴡 𐴏𐴥𐴡𐴓𐴠| 𐴀𐴞𐴃𐴡𐴓𐴧𐴝 𐴀𐴝𐴔𐴞𐴌 𐴀𐴝𐴊𐴧𐴠 𐴓𐴞𐴋𐴝𐴌𐴡𐴓𐴧𐴝 𐴎𐴡𐴌𐴟𐴌𐴞 𐴀𐴡𐴘𐴓𐴊𐴠 𐴊𐴞𐴕𐴊𐴝𐴌 𐴀𐴝𐴔𐴝𐴕𐴡𐴃𐴊𐴝𐴌 𐴀𐴝𐴊𐴧𐴠 𐴈𐴝𐴘𐴠𐴌𐴈𐴤𐴝 𐴔𐴝𐴕𐴟𐴙𐴐𐴥𐴡𐴌 𐴏𐴝𐴀𐴝𐴃𐴠 𐴔𐴡𐴐𐴥𐴖𐴝𐴌𐴝 𐴒𐴡𐴌𐴡𐴕||

𐴀𐴝𐴣𐴀𐴌𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴈𐴝𐴣𐴏𐴠 𐴊𐴟𐴀𐴦𐴝 𐴒𐴡𐴌𐴥𐴞 𐴃𐴝𐴀𐴛 𐴀𐴝𐴣𐴀𐴌𐴝𐴌𐴠 𐴃𐴝𐴌 𐴀𐴞𐴃𐴡𐴀𐴝𐴃𐴢 𐴒𐴡𐴌𐴕𐴡𐴌 𐴃𐴡𐴖𐴉𐴞𐴑 𐴊𐴝𐴕 𐴒𐴡𐴌𐴟𐴑 𐴀𐴝𐴊𐴧𐴠 𐴀𐴝𐴣𐴀𐴌𐴝𐴌𐴠 𐴃𐴝𐴌 𐴕𐴡𐴉𐴝𐴌𐴔𐴝𐴕𐴞𐴃𐴧𐴟𐴕 𐴊𐴥𐴟𐴌𐴞 𐴌𐴝𐴑𐴟𐴑| 𐴀𐴦𐴔𐴞𐴕

والسلام عليكم ورحمة الله وبركاته

𐴀𐴝𐴌𐴥𐴡 𐴉𐴡𐴌𐴞𐴁𐴡𐴓𐴧𐴝
𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴀𐴠𐴑𐴡𐴔 𐴀𐴥𐴞𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴊𐴟𐴘𐴡𐴔 𐴀𐴥𐴞𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴃𐴞𐴕𐴡𐴔 𐴇𐴥𐴞𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴏𐴦𐴝𐴙𐴌𐴡𐴔 𐴇𐴥𐴠𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴉𐴝𐴣𐴏𐴀𐴡𐴔𐴢 𐴁𐴤𐴝𐴑

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴏𐴡 𐴓𐴡𐴔𐴁𐴝𐴌 𐴇𐴥𐴠𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴢 𐴇𐴥𐴝𐴣𐴃𐴢 𐴓𐴡𐴔𐴁𐴝𐴌 𐴇𐴥𐴠𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴢 𐴀𐴝𐴣𐴐𐴄𐴥𐴡 𐴓𐴡𐴔𐴁𐴝𐴌 𐴇𐴥𐴠𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴢 𐴕𐴡 𐴓𐴡𐴔𐴁𐴝𐴌 𐴇𐴥𐴠𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴢 𐴊𐴡𐴐𐴢 𐴓𐴡𐴔𐴁𐴝𐴌 𐴇𐴥𐴞𐴏𐴧𐴝