𐴃𐴝𐴔𐴦𐴝𐴔 𐴃𐴝𐴌𐴦𐴞𐴉𐴢 𐴀𐴥𐴡 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌 𐴓𐴧𐴝𐴘 𐴎𐴞𐴁𐴤𐴝 𐴃𐴝𐴔𐴦𐴝𐴔 𐴅𐴝𐴇𐴝𐴕𐴡𐴌 𐴌𐴥𐴡𐴁𐴢| 𐴏𐴝𐴓𐴝𐴃𐴢 𐴀𐴝𐴊𐴧𐴠 𐴌𐴡𐴇𐴔𐴡𐴃𐴢 𐴕𐴝𐴎𐴞𐴓𐴢 𐴀𐴡𐴗𐴑 𐴀𐴝𐴣𐴀𐴌𐴝𐴌 𐴕𐴡𐴁𐴥𐴞 𐴔𐴟𐴇𐴝𐴔𐴧𐴝𐴊𐴢 (𐴏𐴓𐴢( 𐴀𐴝𐴊𐴧𐴠 𐴃𐴝𐴀𐴛𐴌 𐴀𐴝𐴇𐴓𐴡 𐴀𐴝𐴘𐴝𐴓𐴢 𐴀𐴝𐴊𐴧𐴠 𐴏𐴝𐴇𐴝𐴁𐴝 𐴑𐴠𐴌𐴝𐴔𐴡𐴌 𐴖𐴝𐴌𐴠||

𐴎𐴞𐴁𐴤𐴝𐴌𐴠 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝 𐴘𐴠 𐴊𐴞𐴕𐴡𐴌 𐴈𐴡𐴕𐴡 𐴎𐴞𐴔𐴧𐴝𐴊𐴝𐴌𐴞 𐴀𐴡𐴃𐴡𐴁𐴝 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴈𐴡𐴕𐴡 𐴈𐴝𐴔𐴡𐴌 𐴎𐴞𐴔𐴧𐴝𐴊𐴝𐴌𐴞 𐴊𐴝𐴕 𐴒𐴡𐴌𐴥𐴠 𐴃𐴡𐴘𐴓𐴠 𐴇𐴥𐴞𐴁𐴤𐴝𐴌 𐴈𐴡𐴃𐴝 𐴉𐴥𐴟𐴕𐴡𐴕 𐴀𐴝𐴊𐴧𐴠 𐴔𐴝𐴕𐴡𐴕 𐴀𐴦𐴠𐴕 𐴀𐴠𐴃𐴝𐴀𐴝𐴃𐴢 𐴎𐴞𐴘𐴝𐴕𐴡𐴌 𐴎𐴡𐴌𐴞𐴘𐴝 𐴀𐴝𐴓𐴧𐴝𐴦𐴇 𐴃𐴝𐴀𐴝𐴓𐴝𐴌 𐴑𐴟𐴌𐴁𐴡𐴃𐴢 𐴇𐴝𐴏𐴞𐴓𐴢 𐴀𐴡𐴘𐴢|𐴃𐴡𐴀𐴡𐴘𐴓𐴠 𐴀𐴝𐴔𐴞𐴌𐴡𐴌 𐴈𐴡𐴃𐴝 𐴉𐴥𐴟𐴕𐴡𐴕 𐴀𐴝𐴊𐴧𐴠 𐴔𐴝𐴕𐴡𐴕 𐴀𐴦𐴠𐴕 𐴀𐴠𐴑𐴧𐴝𐴕 𐴀𐴠𐴁𐴝𐴊𐴡𐴃𐴢 𐴎𐴞𐴘𐴝𐴕𐴡𐴌 𐴎𐴡𐴌𐴞𐴘𐴝 𐴀𐴝𐴣𐴌𐴝 𐴀𐴝𐴓𐴧𐴝𐴤𐴌 𐴈𐴝𐴣𐴏𐴠 𐴀𐴥𐴡𐴘 𐴉𐴝𐴙𐴅𐴧𐴟𐴔||

𐴀𐴝𐴔𐴞𐴌𐴡𐴌 𐴈𐴡𐴃𐴝 𐴉𐴥𐴟𐴕𐴡𐴕 𐴀𐴝𐴊𐴧𐴠 𐴔𐴝𐴕𐴡𐴕 𐴀𐴞𐴁𐴝𐴊𐴡𐴃𐴢 𐴀𐴡𐴕𐴡𐴌 𐴁𐴝𐴁𐴡𐴃𐴠 𐴁𐴦𐴡𐴃𐴢 𐴀𐴝𐴘𐴦𐴝𐴃𐴢 𐴀𐴝𐴊𐴧𐴠 𐴇𐴝𐴊𐴞𐴏𐴢 𐴀𐴥𐴡𐴑𐴧𐴡𐴓𐴢 𐴀𐴝𐴏𐴠 𐴉𐴟𐴣𐴖𐴝𐴣𐴃𐴞 𐴉𐴟𐴣𐴖𐴝𐴣𐴃𐴞 𐴀𐴟𐴔𐴧𐴡𐴃𐴡𐴌 𐴀𐴞𐴅𐴔𐴝𐴀 𐴘𐴥𐴡 𐴀𐴝𐴏𐴠| 𐴀𐴞𐴔𐴝𐴔 𐴕𐴡𐴁𐴡𐴖𐴞 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴁𐴦𐴡𐴃𐴢 𐴀𐴞𐴔𐴝𐴔 𐴀𐴦𐴡𐴓𐴡𐴃𐴧𐴠 𐴘𐴝𐴀𐴝𐴕 𐴀𐴠𐴅𐴔𐴝 𐴀𐴡𐴀𐴕𐴡𐴌 𐴁𐴝𐴁𐴡𐴃𐴠 𐴕𐴡𐴑𐴡𐴓𐴢 𐴒𐴡𐴌𐴝 𐴒𐴞𐴘𐴧𐴠 𐴑𐴞 𐴎𐴞𐴔𐴧𐴝𐴊𐴝𐴌𐴡𐴌 𐴈𐴡𐴃𐴝 𐴉𐴥𐴟𐴕𐴡𐴕 𐴀𐴝𐴊𐴧𐴠 𐴔𐴝𐴕𐴡𐴕 𐴔𐴟𐴏𐴡𐴓𐴔𐴝𐴕𐴡𐴌 𐴖𐴡𐴌𐴠 𐴀𐴞𐴁𐴝𐴊𐴡𐴃𐴢 𐴎𐴝𐴌 𐴎𐴡𐴌𐴞𐴘𐴝 𐴀𐴝𐴓𐴧𐴝𐴤 𐴉𐴡𐴙𐴅𐴧𐴡𐴕𐴃𐴡 𐴉𐴦𐴡𐴣𐴏𐴞𐴃𐴢 𐴉𐴝𐴌𐴠||

𐴀𐴞𐴔𐴝𐴔 𐴁𐴟𐴈𐴝𐴌𐴞 𐴀𐴝𐴊𐴧𐴠 𐴀𐴝𐴊𐴧𐴠 𐴀𐴞𐴔𐴝𐴔 𐴔𐴟𐴏𐴓𐴞𐴔 (𐴌𐴇) 𐴀𐴞𐴁𐴕𐴠 𐴀𐴟𐴔𐴡𐴌 (𐴌𐴡) 𐴃𐴧𐴠 𐴁𐴡𐴘𐴝𐴕 𐴒𐴡𐴌𐴠𐴌| 𐴃𐴝𐴀𐴛 𐴌𐴝𐴏𐴟𐴓𐴢 (𐴏𐴓𐴢)𐴃𐴧𐴞 𐴁𐴡𐴘𐴝𐴕 𐴒𐴡𐴌𐴠𐴌-

“𐴀𐴠𐴑𐴎𐴡𐴕 𐴔𐴟𐴏𐴡𐴓𐴔𐴝𐴕𐴡𐴌 𐴖𐴡𐴌𐴠 𐴉𐴤𐴡𐴏𐴤𐴡𐴕 𐴀𐴡𐴉𐴤𐴡𐴏𐴤𐴡𐴕 𐴇𐴝𐴌 𐴏𐴞𐴏𐴡𐴔𐴧𐴝𐴎𐴠 𐴀𐴝𐴔𐴞𐴌𐴡𐴌 𐴈𐴡𐴃𐴝 𐴔𐴝𐴕𐴡𐴕 𐴎𐴡𐴌𐴟𐴌𐴞 𐴎𐴠𐴃𐴡𐴑𐴧𐴥𐴟𐴕 𐴉𐴡𐴙𐴅𐴧𐴡𐴕𐴃𐴡 𐴈𐴡𐴕𐴡 𐴒𐴟𐴕𐴥𐴝𐴌 𐴈𐴝𐴔𐴡𐴌 𐴇𐴡𐴑𐴟𐴔 𐴕𐴡 𐴊𐴠𐴀| 𐴎𐴡𐴊𐴞 𐴈𐴡𐴕𐴡 𐴒𐴤𐴟𐴕𐴡𐴌 𐴈𐴝𐴔𐴡𐴌 𐴇𐴡𐴑𐴟𐴔 𐴒𐴡𐴌𐴥𐴠 𐴃𐴡𐴘𐴓𐴠 𐴇𐴞𐴁𐴥𐴝𐴌 𐴖𐴡𐴌𐴠 𐴀𐴝𐴔𐴞𐴌𐴡𐴌 𐴇𐴡𐴑𐴟𐴔 𐴔𐴝𐴕𐴡𐴕 𐴎𐴡𐴌𐴟𐴌𐴞 𐴕𐴡𐴀||”

𐴀𐴥𐴠 𐴇𐴝𐴊𐴞𐴏𐴢 𐴀𐴝𐴊𐴧𐴠 𐴀𐴝𐴌𐴥𐴡 𐴁𐴦𐴡𐴃𐴢 𐴇𐴝𐴊𐴞𐴏𐴥𐴡𐴃𐴧𐴠 𐴈𐴡𐴀𐴠𐴑𐴧𐴝𐴤𐴕 𐴀𐴟𐴏𐴟𐴓𐴢 𐴉𐴦𐴝 𐴎𐴝𐴘| 𐴔𐴦𐴝𐴕𐴞 𐴀𐴝𐴔𐴞𐴌𐴡𐴌 𐴀𐴠𐴃𐴡𐴀𐴝𐴃𐴡𐴌 𐴁𐴦𐴝𐴁𐴡𐴃𐴠 𐴑𐴞𐴏𐴧𐴟 𐴀𐴟𐴏𐴟𐴓𐴢 𐴀𐴝𐴊𐴧𐴠 𐴕𐴞𐴘𐴡𐴔 𐴀𐴝𐴏𐴠| 𐴀𐴥𐴠𐴍𐴠𐴌 𐴁𐴤𐴟𐴃𐴡𐴌𐴠 𐴀𐴠𐴑𐴧𐴝𐴕 𐴀𐴡𐴘𐴓𐴊𐴠- 𐴀𐴠𐴃𐴡𐴀𐴝𐴃𐴢 𐴒𐴡𐴌𐴝 𐴎𐴝𐴘𐴁𐴡𐴊𐴠 𐴁𐴤𐴝𐴓𐴝 𐴈𐴝𐴔𐴡𐴃𐴢||

قال النبي ﷺ كما في صحيح البخاري عن علي ابن أبي طالب -رضي الله عنه-: (إنما الطاعة في المعروف)

𐴏𐴡𐴀𐴞 𐴁𐴟𐴈𐴝𐴌𐴞𐴌 𐴔𐴧𐴝𐴎𐴠 𐴀𐴝𐴙𐴐𐴧𐴠 𐴇𐴥𐴡𐴎𐴌𐴡𐴃𐴢 𐴀𐴝𐴓𐴞 𐴀𐴞𐴁𐴕𐴠 𐴀𐴝𐴁𐴞 𐴃𐴝𐴓𐴠𐴁𐴢 (𐴌𐴡) 𐴃𐴧𐴟𐴕 𐴌𐴠𐴖𐴝𐴘𐴡𐴃𐴢| 𐴌𐴡𐴏𐴟𐴓𐴢 (𐴏𐴓𐴢) 𐴘𐴠 𐴈𐴡𐴘𐴧𐴠𐴊𐴠- “𐴀𐴞𐴃𐴡𐴀𐴝𐴃𐴢 𐴒𐴡𐴌𐴝 𐴎𐴝𐴘𐴁𐴡𐴊𐴠 𐴏𐴠𐴌𐴠𐴉𐴢 𐴁𐴤𐴝𐴓𐴝 𐴈𐴝𐴔𐴡𐴃𐴢||”

𐴘𐴝𐴀𐴝𐴕 𐴀𐴥𐴡𐴘𐴓𐴊𐴠 𐴀𐴠𐴑 𐴓𐴡𐴔𐴁𐴡𐴌 𐴀𐴟𐴏𐴟𐴓𐴢| 𐴔𐴦𐴝𐴕𐴞 𐴀𐴠𐴃𐴡𐴀𐴝𐴃𐴢 𐴁𐴤𐴝𐴓𐴝 𐴈𐴝𐴔𐴡𐴌 𐴔𐴧𐴝𐴎𐴠 𐴀𐴡𐴘𐴁𐴡 𐴈𐴡𐴕𐴡 𐴔𐴝𐴏𐴞𐴘𐴡𐴃𐴢 𐴀𐴝𐴊𐴧𐴠 𐴒𐴤𐴟𐴕𐴝𐴌 𐴈𐴝𐴔𐴡 𐴔𐴧𐴝𐴎𐴠 𐴕𐴡| 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴕𐴡𐴉𐴝𐴌𐴔𐴝𐴕𐴞𐴃𐴢 𐴈𐴡𐴕𐴡 𐴁𐴡𐴕𐴊𐴝𐴌 𐴀𐴞𐴃𐴡𐴀𐴝𐴃𐴢 𐴕𐴥𐴝𐴘||

𐴊𐴟𐴘𐴡𐴔 𐴀𐴟𐴏𐴟𐴓𐴢 𐴀𐴥𐴡𐴘𐴓𐴊𐴠: 𐴎𐴠 𐴏𐴦𐴞𐴏𐴡𐴌 𐴁𐴝𐴁𐴡𐴃𐴠 𐴇𐴡𐴑𐴟𐴔 𐴒𐴡𐴌𐴥𐴝 𐴒𐴞𐴘𐴧𐴠 𐴘𐴝𐴀𐴝𐴕 𐴔𐴝𐴀𐴔𐴟𐴌𐴡𐴌 𐴃𐴝𐴑𐴡𐴃𐴡𐴌 𐴁𐴤𐴟𐴃𐴡𐴌𐴠 𐴃𐴝𐴑𐴡𐴕 𐴉𐴡𐴌𐴞𐴁𐴡| 𐴀𐴥𐴠𐴃𐴡𐴓𐴧𐴝 𐴁𐴡𐴓𐴞 𐴎𐴠 𐴏𐴦𐴞𐴏𐴢 𐴀𐴡𐴕𐴡𐴌 𐴃𐴝𐴑𐴡𐴃𐴡𐴌 𐴁𐴤𐴟𐴃𐴡𐴌𐴠 𐴕𐴥𐴝𐴘 𐴘𐴝𐴀𐴝𐴕 𐴀𐴡𐴕𐴡𐴌 𐴎𐴞𐴔𐴧𐴝𐴊𐴝𐴌𐴞 𐴔𐴧𐴝𐴎𐴠 𐴘𐴥𐴡 𐴕𐴝𐴘||

𐴀𐴟𐴏𐴟𐴓𐴢 𐴘𐴝𐴀𐴝𐴕 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴑𐴞𐴃𐴝𐴁𐴡𐴌 𐴔𐴡𐴃𐴓𐴡𐴑 𐴊𐴡𐴓𐴞𐴓𐴢 𐴀𐴥𐴡𐴑𐴧𐴡𐴓𐴡𐴃𐴧𐴠 𐴏𐴝𐴁𐴠𐴃𐴢 𐴀𐴝𐴏𐴠| 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴘𐴠 𐴀𐴠𐴌𐴐𐴥𐴝𐴊𐴢 𐴒𐴡𐴌𐴠𐴕-

لَا يُكَلِّفُ اللَّهُ نَفْسًا إِلَّا وُسْعَهَا

“𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴘𐴠 𐴈𐴡𐴕𐴥𐴞𐴙𐴑𐴧𐴤𐴝𐴌 𐴖𐴡𐴌𐴠 𐴀𐴦𐴠𐴕 𐴁𐴟𐴎𐴥𐴝 𐴕𐴡 𐴊𐴠𐴀 𐴎𐴞𐴘𐴝𐴕𐴡𐴌𐴠 𐴇𐴞𐴁𐴤𐴝𐴘𐴠 𐴇𐴝𐴔𐴡𐴓𐴢 𐴒𐴡𐴌𐴞𐴃𐴢 𐴕𐴡 𐴉𐴝𐴌𐴠|” (𐴁𐴝𐴑𐴡𐴌𐴝𐴤 -𐴲𐴸𐴶)

𐴎𐴡𐴈𐴡𐴕 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴃𐴡𐴌𐴉𐴡𐴃𐴧𐴟 𐴁𐴡𐴕𐴊𐴝𐴌𐴠 𐴏𐴠𐴌𐴠𐴉𐴢 𐴀𐴦𐴠𐴕 𐴈𐴝𐴔𐴡𐴌 𐴇𐴡𐴑𐴟𐴔 𐴒𐴡𐴌𐴝 𐴎𐴝𐴦 𐴎𐴞𐴘𐴝𐴕 𐴒𐴡𐴌𐴡𐴕𐴡𐴌 𐴃𐴝𐴑𐴡𐴃𐴢 𐴁𐴡𐴕𐴊𐴝𐴌 𐴀𐴝𐴏𐴠| 𐴃𐴡𐴘𐴓𐴠 𐴔𐴝𐴕𐴟𐴙𐴐𐴥𐴢 𐴀𐴥𐴡𐴑𐴧𐴡𐴓𐴡𐴌 𐴀𐴝𐴉𐴡𐴏𐴡𐴔𐴧𐴝𐴎𐴠 𐴘𐴥𐴡 𐴀𐴥𐴠 𐴀𐴟𐴏𐴟𐴓𐴡𐴌 𐴁𐴝𐴁𐴡𐴃𐴠 𐴇𐴡𐴑𐴟𐴔𐴡𐴌 𐴀𐴠𐴀𐴃𐴠𐴁𐴝𐴌 𐴒𐴡𐴌𐴥𐴡𐴕 𐴉𐴡𐴌𐴞𐴁𐴡| 𐴔𐴦𐴝𐴕𐴞 𐴕𐴝𐴔𐴟𐴔𐴑𐴞𐴕 𐴘𐴦𐴝𐴃𐴡 𐴃𐴝𐴑𐴡𐴃𐴢 𐴕𐴡𐴌𐴝𐴑𐴠𐴊𐴠 𐴀𐴥𐴞𐴀𐴕 𐴏𐴦𐴞𐴏𐴡𐴃𐴢 𐴀𐴞𐴃𐴡𐴀𐴝𐴃𐴢 𐴒𐴡𐴌𐴡𐴕 𐴎𐴟𐴌𐴞𐴌𐴞 𐴕𐴡||

𐴀𐴝𐴔𐴞𐴌𐴡𐴌 𐴈𐴡𐴃𐴝 𐴉𐴥𐴟𐴕𐴡𐴕 𐴀𐴝𐴊𐴧𐴠 𐴔𐴝𐴕𐴡𐴕𐴡𐴌 𐴁𐴝𐴁𐴡𐴃𐴠 𐴀𐴝𐴌𐴠𐴒𐴧𐴗𐴝 𐴀𐴝𐴇𐴝𐴔 𐴔𐴡𐴖𐴎𐴟 𐴀𐴡𐴘𐴓𐴊𐴠 𐴀𐴠𐴅𐴃𐴠𐴇𐴝𐴊𐴞 𐴔𐴝𐴏𐴀𐴝𐴓𐴝𐴔𐴧𐴝𐴎𐴠 𐴘𐴥𐴡 𐴃𐴝𐴌 𐴀𐴠𐴃𐴡𐴀𐴝𐴃𐴢 𐴒𐴡𐴌𐴡𐴕| 𐴀𐴝𐴌 𐴇𐴟𐴑𐴟𐴔𐴧𐴝𐴕 𐴐𐴡𐴌𐴞𐴀𐴞 𐴇𐴟𐴑𐴟𐴔 𐴀𐴡𐴀𐴕 𐴎𐴡𐴌𐴟𐴌𐴞 𐴕𐴡| 𐴔𐴦𐴝𐴕𐴞 𐴀𐴝𐴔𐴠𐴌𐴠 𐴎𐴡𐴊𐴞 𐴖𐴝𐴅𐴞𐴁𐴢 𐴕𐴡 𐴁𐴡𐴓𐴑𐴠 𐴔𐴟𐴏𐴃𐴝𐴇𐴝𐴁𐴢 𐴈𐴡𐴕𐴡 𐴏𐴞𐴏𐴡𐴌 𐴁𐴝𐴁𐴡𐴃𐴠 𐴇𐴡𐴑𐴟𐴔 𐴒𐴡𐴌𐴥𐴞 𐴀𐴡𐴃𐴥𐴡𐴁𐴝 𐴔𐴟𐴁𐴝𐴤 𐴏𐴦𐴞𐴏𐴡𐴌 𐴁𐴝𐴁𐴡𐴃𐴠 𐴇𐴡𐴑𐴟𐴔 𐴒𐴡𐴌𐴠, 𐴃𐴡𐴈𐴡𐴕 𐴑𐴞 𐴃𐴝𐴌 𐴇𐴡𐴑𐴟𐴔 𐴔𐴝𐴕𐴡𐴕 𐴖𐴝𐴅𐴞𐴁𐴢 𐴀𐴡𐴘𐴁𐴡⸮ 𐴅𐴟𐴖𐴝𐴁𐴢 𐴀𐴡𐴘𐴓𐴊𐴠 𐴇𐴦𐴝𐴣!| 𐴔𐴟𐴁𐴤𐴝 𐴀𐴝𐴊𐴧𐴠 𐴔𐴟𐴏𐴃𐴝𐴇𐴝𐴁𐴡𐴌 𐴔𐴧𐴝𐴎𐴠 𐴘𐴥𐴡 𐴀𐴝𐴔𐴞𐴌𐴡𐴌 𐴇𐴡𐴑𐴟𐴔 𐴔𐴝𐴕𐴡𐴕 𐴖𐴝𐴅𐴞𐴁𐴢 𐴀𐴡𐴘𐴁𐴡| 𐴀𐴝𐴁𐴝𐴌 𐴎𐴡𐴊𐴞 𐴈𐴡𐴕𐴡 𐴀𐴞𐴅𐴥𐴃𐴠𐴇𐴝𐴊𐴞 𐴔𐴡𐴏𐴝𐴓𐴝𐴃𐴢 𐴔𐴝𐴀𐴔𐴟𐴌𐴡𐴌 𐴀𐴞𐴅𐴥𐴃𐴠𐴇𐴝𐴊𐴢 𐴀𐴝𐴔𐴞𐴌𐴡𐴌 𐴀𐴞𐴅𐴥𐴃𐴠𐴇𐴝𐴊𐴡𐴌 𐴔𐴟𐴈𐴝𐴓𐴠𐴉𐴢 𐴀𐴡𐴘𐴢| 𐴎𐴠𐴀𐴕 𐴕𐴠𐴑𐴞 𐴔𐴝𐴀𐴔𐴟𐴌𐴠 𐴔𐴡𐴏𐴀𐴝𐴓𐴝𐴒𐴝𐴕 𐴔𐴟𐴏𐴃𐴝𐴇𐴝𐴁𐴢 𐴕𐴡 𐴁𐴡𐴓𐴑𐴠 𐴖𐴝𐴅𐴞𐴁𐴢 𐴁𐴡𐴓𐴥𐴞 𐴒𐴟𐴔𐴝𐴕 𐴒𐴡𐴙𐴓𐴧𐴡 𐴑𐴞𐴕𐴃𐴟 𐴀𐴝𐴔𐴞𐴌𐴠 𐴔𐴟𐴏𐴃𐴝𐴇𐴝𐴁𐴢 𐴁𐴡𐴓𐴞 𐴒𐴟𐴔𐴝𐴕 𐴒𐴡𐴙𐴓𐴧𐴡 𐴃𐴡𐴘𐴓𐴠𐴘𐴥𐴡 𐴔𐴝𐴀𐴔𐴟𐴌𐴡𐴌 𐴀𐴞𐴅𐴥𐴃𐴠𐴇𐴝𐴊𐴢 𐴌𐴡𐴊𐴥𐴢 𐴒𐴡𐴌𐴝 𐴎𐴝𐴘𐴁𐴡| 𐴀𐴝𐴌 𐴀𐴝𐴔𐴞𐴌𐴡𐴌 𐴈𐴡𐴃𐴝 𐴉𐴟𐴕𐴥𐴡𐴕 𐴀𐴝𐴊𐴧𐴠 𐴔𐴝𐴕𐴝 𐴉𐴡𐴌𐴞𐴁𐴡||

𐴀𐴥𐴞𐴃𐴡𐴓𐴧𐴝 𐴁𐴡𐴓𐴞 𐴔𐴝𐴀𐴔𐴟𐴌𐴡𐴌 𐴖𐴡𐴌𐴠 𐴀𐴞𐴅𐴥𐴃𐴠𐴇𐴝𐴊𐴞 𐴔𐴡𐴖𐴎𐴟 𐴔𐴦𐴝𐴕𐴞 𐴎𐴥𐴞𐴀𐴕𐴡𐴌 𐴔𐴟𐴃𐴝𐴀𐴓𐴧𐴠𐴑 𐴏𐴦𐴝𐴉𐴢 𐴈𐴡𐴕𐴡 𐴊𐴡𐴓𐴞𐴓𐴢 𐴕𐴥𐴝𐴘 𐴀𐴥𐴠𐴍𐴠 𐴀𐴝𐴔𐴞𐴌𐴡𐴌𐴡 𐴈𐴡𐴃𐴝 𐴔𐴝𐴕𐴡𐴕 𐴖𐴝𐴅𐴞𐴁𐴢| 𐴑𐴞𐴕𐴃𐴟 𐴎𐴝𐴌 𐴔𐴟𐴃𐴝𐴀𐴓𐴧𐴠𐴑 𐴏𐴦𐴝𐴉𐴢 𐴊𐴡𐴓𐴞𐴓𐴢 𐴀𐴝𐴏𐴠 𐴇𐴠𐴒𐴥𐴞𐴕𐴡𐴃𐴢 𐴀𐴟𐴏𐴟𐴓𐴢 𐴘𐴝𐴀𐴝𐴕 𐴀𐴝𐴌 𐴀𐴠 𐴔𐴦𐴝𐴕𐴞 𐴀𐴦𐴡𐴓𐴝 𐴀𐴡𐴙𐴕𐴧𐴡 𐴇𐴝𐴊𐴞𐴏𐴒𐴞𐴕 𐴑𐴝𐴁𐴠𐴓𐴠 𐴀𐴞𐴃𐴓𐴝𐴑 𐴀𐴡𐴘𐴁𐴡| 𐴀𐴟𐴏𐴟𐴓𐴧𐴝𐴕 𐴀𐴡𐴘𐴓𐴊𐴠 لا طاعة لمخلوق في معصية الخالق 𐴔𐴦𐴝𐴕𐴞 “𐴀𐴝𐴓𐴧𐴝𐴦𐴇 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴕𐴡𐴉𐴝𐴌𐴔𐴝𐴕𐴞 𐴒𐴡𐴌𐴞 𐴈𐴡𐴕𐴡 𐴔𐴝𐴈𐴓𐴟𐴑𐴡𐴌 𐴀𐴠𐴃𐴡𐴀𐴝𐴃𐴢 𐴒𐴡𐴌𐴝 𐴕𐴡 𐴎𐴝𐴘𐴁𐴡||”

𐴀𐴝𐴔𐴞𐴌𐴡𐴌 𐴀𐴞𐴃𐴡𐴀𐴝𐴃𐴡𐴌 𐴇𐴝𐴑𐴞𐴑𐴡𐴃𐴢 𐴃𐴡𐴈𐴡𐴕 𐴁𐴟𐴎𐴝 𐴎𐴝𐴘𐴁𐴡 𐴎𐴡𐴈𐴡𐴕 𐴔𐴝𐴙𐴕𐴐𐴥𐴡𐴌 𐴀𐴡𐴉𐴤𐴡𐴏𐴤𐴡𐴕𐴢 𐴏𐴦𐴞𐴏𐴡𐴌 𐴁𐴝𐴁𐴡𐴃𐴠 𐴇𐴡𐴑𐴟𐴔 𐴊𐴞𐴘𐴝𐴎𐴝𐴘𐴁𐴡| 𐴀𐴞𐴃𐴡𐴓𐴧𐴝 𐴁𐴡𐴓𐴞 𐴉𐴤𐴡𐴏𐴡𐴤𐴕 𐴀𐴝𐴌 𐴕𐴝𐴉𐴡𐴏𐴡𐴕 𐴏𐴞𐴏𐴡𐴔𐴧𐴝𐴎𐴠 𐴉𐴥𐴟𐴕𐴡𐴕 𐴀𐴝𐴌 𐴔𐴝𐴕𐴡𐴕 𐴀𐴥𐴡𐴘𐴓𐴊𐴠 𐴀𐴝𐴔𐴞𐴌𐴡𐴌 𐴀𐴠𐴃𐴡𐴀𐴝𐴃𐴢||

𐴏𐴡𐴀𐴞 𐴔𐴟𐴏𐴓𐴞𐴔 𐴐𐴡𐴌𐴞𐴉𐴡𐴃𐴢 𐴇𐴥𐴡𐴎𐴌𐴡𐴃𐴢 𐴀𐴝𐴁𐴟 𐴇𐴟𐴌𐴝𐴘𐴌𐴝 (𐴌𐴡)𐴃𐴧𐴟 𐴌𐴠𐴖𐴝𐴘𐴠𐴃𐴢| 𐴌𐴡𐴏𐴟𐴓𐴢 (𐴏𐴓𐴢)𐴔𐴠 𐴀𐴠𐴌𐴐𐴝𐴊𐴢 𐴒𐴡𐴙𐴅𐴧𐴠-

عليك السمع والطاعة في عسرك ويسرك ومنشطك ومكرهك وأثَرة عليك

“𐴃𐴟𐴖𐴝𐴣𐴌 𐴖𐴡𐴌𐴠 𐴉𐴠𐴌𐴠𐴐𐴝𐴕𐴞 𐴀𐴝𐴊𐴧𐴠 𐴑𐴟𐴐𐴤𐴞, 𐴉𐴡𐴏𐴡𐴕 𐴀𐴝𐴊𐴧𐴠 𐴕𐴝 𐴉𐴡𐴏𐴥𐴡𐴕𐴡 𐴔𐴧𐴝𐴎𐴠 𐴀𐴝𐴌 𐴕𐴞𐴎𐴡𐴌 𐴖𐴡𐴌𐴠 𐴀𐴡𐴙𐴕𐴧𐴡 𐴑𐴞𐴙𐴌𐴠 𐴃𐴥𐴡𐴌𐴅𐴞 𐴊𐴠𐴀𐴕𐴡𐴌 𐴁𐴝𐴁𐴡𐴃𐴠 𐴀𐴝𐴔𐴞𐴌𐴡𐴌 𐴈𐴡𐴃𐴝 𐴉𐴟𐴕𐴥𐴡𐴕 𐴀𐴝𐴊𐴧𐴠 𐴔𐴝𐴕𐴡𐴕 𐴖𐴝𐴅𐴞𐴁𐴢||”

𐴕𐴞𐴎𐴡𐴌 𐴉𐴡𐴏𐴥𐴡𐴕 𐴊𐴡𐴌 𐴐𐴥𐴡𐴔𐴡𐴃𐴢 𐴀𐴞𐴃𐴡𐴀𐴝𐴃𐴢 𐴒𐴡𐴌𐴡𐴕 𐴀𐴝𐴏𐴝𐴕| 𐴑𐴞𐴕𐴃𐴟 𐴕𐴝 𐴉𐴡𐴏𐴥𐴡𐴕 𐴊𐴡𐴌 𐴐𐴥𐴡𐴔𐴡𐴃𐴢 𐴀𐴥𐴠 𐴏𐴞𐴏𐴧𐴝𐴕𐴡𐴌𐴠 𐴔𐴡𐴇𐴝𐴁𐴧𐴝𐴃𐴢 𐴕𐴡 𐴒𐴡𐴌𐴥𐴠, 𐴎𐴞𐴘𐴝𐴕𐴡𐴌 𐴔𐴞𐴑𐴧𐴝 𐴈𐴡𐴕𐴡 𐴄𐴥𐴝𐴕 𐴕𐴝𐴘 𐴀𐴥𐴡 𐴀𐴡𐴑𐴃𐴡𐴃𐴢 𐴀𐴞𐴃𐴡𐴀𐴝𐴃𐴡𐴌 𐴇𐴝𐴑𐴞𐴑𐴡𐴃𐴢 𐴀𐴝𐴊𐴧𐴠 𐴀𐴝𐴔𐴞𐴌𐴡𐴌 𐴇𐴡𐴑𐴟𐴔 𐴔𐴝𐴕𐴡𐴕 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴀𐴞𐴁𐴝𐴊𐴡𐴃𐴢 𐴘𐴝𐴀𐴝𐴕 𐴏𐴦𐴝𐴉𐴢 𐴀𐴥𐴡𐴘 𐴎𐴝𐴘𐴎𐴝𐴒𐴡𐴘𐴢| 𐴑𐴞𐴘𐴡𐴓𐴧𐴝 𐴁𐴡𐴓𐴠 𐴎𐴠 𐴏𐴦𐴞𐴏𐴡𐴓𐴧𐴝𐴘 𐴊𐴞𐴓𐴡𐴃𐴢 𐴈𐴡𐴕𐴥𐴡 𐴄𐴥𐴝𐴕 𐴕𐴥𐴝𐴘, 𐴎𐴠𐴘𐴝𐴕𐴡𐴌 𐴖𐴡𐴌𐴠 𐴊𐴞𐴓𐴆𐴥𐴡𐴏𐴂𐴞 𐴕𐴡𐴀 𐴇𐴞𐴘𐴝𐴕𐴡𐴌𐴠 𐴑𐴡𐴄𐴥𐴞𐴕 𐴁𐴡𐴓𐴞 𐴁𐴟𐴎𐴝 𐴎𐴝𐴘||

𐴀𐴞𐴔𐴝𐴔 𐴕𐴡𐴁𐴡𐴖𐴞 (𐴌𐴇) 𐴏𐴥𐴡𐴀𐴞 𐴔𐴟𐴏𐴓𐴞𐴔 𐴐𐴡𐴌𐴞𐴉𐴡𐴌 𐴐𐴡𐴌𐴝𐴃𐴢 𐴓𐴠𐴙𐴑𐴧𐴠𐴊𐴠-
𐴀𐴡𐴓𐴝𐴔𐴝𐴘𐴠 𐴑𐴠𐴌𐴝𐴔 𐴀𐴠 𐴇𐴝𐴊𐴞𐴏𐴢 𐴘𐴝𐴀𐴝𐴕𐴡𐴌 𐴔𐴦𐴝𐴕𐴞 𐴁𐴡𐴘𐴝𐴕 𐴒𐴡𐴙𐴅𐴧𐴠𐴊𐴠 – 𐴎𐴠 𐴇𐴡𐴑𐴟𐴔𐴡𐴌𐴠 𐴕𐴡𐴉𐴡𐴏𐴠 𐴑𐴡𐴄𐴞𐴕 𐴁𐴡𐴓𐴞 𐴁𐴟𐴎𐴠 𐴘𐴦𐴝𐴃𐴡 𐴎𐴞𐴘𐴝𐴕𐴡𐴌𐴠 𐴕𐴝𐴉𐴡𐴤𐴏𐴡𐴤𐴕 𐴒𐴡𐴌𐴠 𐴀𐴡𐴃𐴥𐴡𐴁𐴝 𐴀𐴠𐴕𐴋𐴞𐴓𐴧𐴝 𐴎𐴝 𐴑𐴞𐴏𐴧𐴟 𐴀𐴝𐴏𐴠 𐴎𐴡𐴊𐴞 𐴇𐴞𐴘𐴝𐴕 𐴒𐴟𐴕𐴤𐴝𐴌 𐴈𐴝𐴔 𐴕𐴡 𐴀𐴡𐴘 𐴃𐴡𐴘𐴓𐴠 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌 𐴀𐴞𐴃𐴡𐴀𐴝𐴃𐴢 𐴒𐴡𐴌𐴡𐴕 𐴖𐴝𐴅𐴞𐴁𐴢| 𐴑𐴞𐴕𐴃𐴟 𐴎𐴡𐴊𐴞 𐴒𐴟𐴕𐴤𐴝𐴌 𐴇𐴡𐴑𐴟𐴔 𐴒𐴡𐴌𐴞𐴓𐴠 𐴃𐴡𐴈𐴡 𐴀𐴠𐴃𐴝𐴀𐴝𐴃𐴢 𐴎𐴡𐴌𐴟𐴌𐴞 𐴕𐴡𐴀||

𐴉𐴥𐴟𐴕𐴡𐴕 𐴀𐴝𐴊𐴧𐴠 𐴔𐴝𐴕𐴡𐴕 𐴔𐴦𐴝𐴕𐴞 𐴀𐴞𐴃𐴡𐴀𐴝𐴃𐴢 𐴒𐴡𐴌𐴡𐴕𐴡𐴌 𐴕𐴡𐴃𐴞𐴅𐴝 𐴀𐴝𐴊𐴧𐴠 𐴀𐴝𐴇𐴑𐴝𐴔 𐴀𐴥𐴡𐴑𐴧𐴡𐴓𐴢 𐴁𐴠𐴒𐴧𐴞𐴕 𐴔𐴝𐴙𐴕𐴐𐴥𐴡𐴌 𐴈𐴝𐴣𐴏𐴠 𐴔𐴡𐴐𐴟𐴌| 𐴀𐴠𐴎𐴝𐴒𐴝𐴃𐴢 𐴐𐴟𐴊𐴟 𐴊𐴟𐴁𐴝𐴌𐴝 𐴘𐴦𐴝𐴊𐴢 𐴒𐴡𐴌𐴝𐴘 𐴊𐴠𐴘𐴝 𐴎𐴝𐴌||

𐴀𐴟𐴒𐴧𐴗𐴝 𐴎𐴝𐴕𐴝 𐴈𐴡𐴃𐴝 𐴀𐴡𐴘𐴓𐴊𐴠 𐴑𐴞 𐴀𐴝𐴔𐴞𐴌𐴡𐴌 𐴇𐴡𐴑𐴟𐴔 𐴕𐴡 𐴔𐴝𐴕𐴡𐴕 𐴓𐴡𐴌𐴝𐴘𐴡𐴃𐴢 𐴐𐴠𐴑𐴝𐴏𐴃𐴢 𐴀𐴝𐴊𐴧𐴠 𐴕𐴟𐴑𐴏𐴝𐴕𐴞𐴌 𐴎𐴡𐴌𐴞𐴘𐴝 𐴀𐴡𐴘 𐴎𐴝𐴘𐴢| 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴠 𐴀𐴠 𐴏𐴡𐴁𐴡𐴑 𐴀𐴞𐴁𐴥𐴝 𐴅𐴡𐴚𐴒𐴠 𐴀𐴡𐴇𐴦𐴟𐴊𐴡𐴃𐴢 𐴉𐴝𐴘𐴧𐴠| 𐴌𐴡𐴏𐴟𐴓𐴢 (𐴏𐴓𐴢) 𐴔𐴠 𐴀𐴠𐴑𐴧𐴝𐴕 𐴇𐴡𐴑𐴟𐴔 𐴊𐴞𐴘𐴧𐴠 𐴑𐴞𐴕𐴃𐴟 𐴁𐴦𐴡𐴃𐴢 𐴏𐴝𐴇𐴝𐴁𐴞 𐴀𐴦𐴡𐴓𐴠 𐴇𐴥𐴞𐴘𐴝𐴕𐴡𐴌 𐴀𐴟𐴓𐴋𐴝 𐴈𐴝𐴔 𐴒𐴡𐴙𐴅𐴧𐴠||

𐴎𐴝𐴌𐴝 𐴇𐴡𐴑𐴟𐴔𐴡𐴌 𐴔𐴟𐴈𐴝𐴓𐴠𐴉𐴞 𐴒𐴡𐴙𐴅𐴧𐴠 𐴃𐴝𐴌𐴝 𐴀𐴝𐴙𐴐𐴧𐴞𐴓𐴊𐴠 𐴈𐴡𐴔 𐴐𐴡𐴚𐴑𐴝| 𐴉𐴟𐴌𐴝 𐴉𐴡𐴗𐴏𐴢 𐴀𐴦𐴡𐴓𐴠 𐴀𐴠𐴀𐴕 𐴕𐴡 𐴒𐴡𐴌𐴠| 𐴎𐴝𐴌𐴝 𐴃𐴝𐴀𐴛𐴌 𐴇𐴡𐴑𐴟𐴔𐴡𐴌 𐴔𐴟𐴈𐴝𐴓𐴠𐴉𐴞 𐴒𐴡𐴙𐴅𐴧𐴠 𐴃𐴝𐴌𐴝 𐴀𐴝𐴙𐴐𐴧𐴞𐴓 𐴁𐴠𐴒𐴧𐴟𐴕𐴡𐴃𐴧𐴟 𐴏𐴠𐴌𐴠𐴉𐴢 𐴈𐴡𐴀𐴠𐴑𐴎𐴡𐴕 𐴑𐴞𐴕𐴃𐴟 𐴇𐴞𐴘𐴝𐴌 𐴁𐴦𐴝𐴊𐴠𐴘𐴥𐴡 𐴁𐴠𐴒𐴧𐴟𐴕𐴡𐴌 𐴖𐴡𐴌𐴠 𐴀𐴝𐴎𐴝𐴁𐴢 𐴀𐴝𐴙𐴐𐴧𐴞𐴓𐴢 𐴏𐴠𐴌𐴠𐴉𐴢 𐴈𐴡𐴀𐴠𐴑𐴎𐴡𐴕𐴡𐴌 𐴔𐴟𐴈𐴝𐴓𐴡𐴉𐴞 𐴈𐴝𐴔 𐴒𐴡𐴌𐴡𐴕𐴡𐴌 𐴎𐴡𐴌𐴞𐴘𐴝||

𐴀𐴝𐴓𐴧𐴝𐴔𐴝 𐴀𐴞𐴁𐴕𐴠 𐴇𐴝𐴅𐴡𐴌 (𐴌𐴇) 𐴉𐴡𐴃𐴇𐴟𐴓𐴢 𐴁𐴝𐴌𐴞 𐴑𐴞𐴃𐴝𐴁𐴡𐴃𐴢 𐴒𐴡𐴎𐴖𐴝𐴘𐴠 𐴀𐴟𐴇𐴟𐴊𐴡𐴌 𐴁𐴝𐴁𐴡𐴃𐴠 𐴎𐴞𐴑𐴞𐴌 𐴒𐴡𐴙𐴅𐴠-
𐴀𐴠 𐴖𐴝𐴑𐴞𐴘𐴝𐴃𐴢 𐴁𐴦𐴡𐴃𐴢 𐴐𐴞𐴑𐴧𐴝 𐴀𐴝𐴏𐴠| 𐴔𐴝𐴕𐴝 𐴒𐴡𐴌𐴝 𐴒𐴞𐴘𐴧𐴠𐴊𐴠 𐴏𐴦𐴞𐴏𐴡𐴃𐴢 𐴔𐴡𐴐𐴒𐴟𐴓𐴢 𐴀𐴡𐴀𐴕𐴡𐴌 𐴕𐴡𐴃𐴞𐴅𐴝| 𐴀𐴝𐴌 𐴘𐴝𐴀𐴝𐴕𐴡𐴃𐴧𐴟 𐴁𐴟𐴎𐴝 𐴎𐴝𐴌 𐴎𐴝𐴌𐴝 𐴀𐴥𐴠 𐴒𐴡𐴓𐴡𐴃𐴞𐴌 𐴔𐴝𐴎𐴠 𐴐𐴝𐴔𐴞𐴓𐴢 𐴕𐴡 𐴀𐴝𐴙𐴐𐴧𐴞𐴓𐴢 𐴒𐴡𐴓𐴡𐴃𐴞𐴌 𐴕𐴟𐴏𐴧𐴝𐴕𐴠 𐴃𐴝𐴌𐴝𐴌𐴠 𐴘𐴥𐴡 𐴐𐴝𐴔𐴞𐴓𐴢 𐴒𐴡𐴌𐴞 𐴓𐴡𐴘𐴧𐴠| 𐴇𐴡𐴑𐴟𐴔 𐴕𐴡 𐴔𐴝𐴙𐴕𐴧𐴠𐴊𐴞 𐴈𐴡𐴀𐴠𐴑𐴎𐴡𐴕 𐴏𐴝𐴇𐴝𐴁𐴝 (𐴌𐴡𐴎) 𐴑𐴞𐴕𐴃𐴟 𐴏𐴥𐴝𐴣𐴀𐴎𐴝 𐴉𐴝𐴊𐴧𐴠 𐴁𐴠𐴒𐴧𐴟𐴕𐴠| |

𐴎𐴠𐴀𐴕𐴠𐴑𐴞 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴘𐴠 𐴀𐴠𐴌𐴐𐴝𐴊𐴢 𐴒𐴡𐴙𐴅𐴧𐴠-

وَاتَّقُوا فِتْنَةً لَا تُصِيبَنَّ الَّذِينَ ظَلَمُوا مِنْكُمْ خَاصَّةً
“𐴀𐴝𐴌 𐴃𐴟𐴖𐴝𐴣𐴌𐴝 𐴀𐴥𐴠𐴀𐴕 𐴉𐴞𐴃𐴕𐴝𐴌𐴠 𐴋𐴡𐴌𐴥𐴡 𐴎𐴞𐴘𐴝𐴕 𐴏𐴠𐴌𐴠𐴉𐴢 𐴎𐴝𐴓𐴠𐴔 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴕𐴡 𐴁𐴤𐴡𐴓𐴑𐴠 𐴀𐴡𐴙𐴕𐴧𐴡 𐴔𐴝𐴙𐴕𐴐𐴥𐴡𐴌 𐴖𐴡𐴌𐴠𐴘𐴥𐴡 𐴉𐴡𐴣𐴏𐴞𐴁𐴡|”(𐴏𐴟𐴌𐴝 𐴀𐴝𐴣𐴚𐴉𐴝𐴓- 𐴲𐴵)

𐴀𐴥𐴞𐴃𐴡𐴓𐴧𐴝 𐴁𐴡𐴓𐴞 𐴏𐴥𐴝𐴣𐴎𐴝 𐴏𐴠𐴌𐴠𐴉𐴢 𐴎𐴝𐴓𐴞𐴔 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴕𐴡 𐴁𐴤𐴡𐴓𐴑𐴠 𐴎𐴝𐴓𐴞𐴔 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴘𐴥𐴡 𐴀𐴝𐴘𐴁𐴡 𐴀𐴝𐴌 𐴀𐴡𐴙𐴕𐴧𐴡 𐴔𐴝𐴕𐴙𐴐𐴥𐴡𐴌 𐴖𐴡𐴌𐴠 𐴘𐴥𐴡 𐴀𐴝𐴘𐴁𐴡|- 𐴘𐴝𐴀𐴝𐴕 𐴀𐴥𐴡𐴘𐴓𐴊𐴠 𐴀𐴞𐴁𐴕𐴠 𐴇𐴝𐴅𐴡𐴌 (𐴌𐴇) 𐴌 𐴈𐴡𐴃𐴝||

𐴀𐴟𐴏𐴃𐴝𐴊𐴢 𐴀𐴝𐴁𐴊𐴟𐴓𐴧𐴝𐴤 𐴀𐴝𐴓𐴢 𐴀𐴝𐴊𐴡𐴔𐴠 𐴈𐴡𐴘𐴧𐴠𐴊𐴠-
𐴀𐴥𐴞𐴃𐴡𐴓𐴧𐴝 𐴁𐴡𐴓𐴞 𐴇𐴤𐴟𐴣𐴐𐴞𐴘𐴝𐴌 𐴀𐴥𐴡!! 𐴀𐴦𐴡 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴌𐴝𐴏𐴧𐴝𐴌 𐴔𐴟𐴏𐴝𐴉𐴞𐴌! 𐴀𐴡𐴕𐴠 𐴀𐴟𐴔𐴧𐴡𐴃𐴠 𐴔𐴟𐴇𐴝𐴔𐴧𐴡𐴊𐴞𐴘𐴝 (𐴏𐴓𐴢)𐴝𐴌 𐴀𐴥𐴡𐴃𐴡𐴁𐴝 𐴎𐴠 𐴃𐴡𐴕𐴅𐴞𐴔𐴡𐴌 𐴉𐴟𐴣𐴖𐴝𐴣𐴃𐴞 𐴔𐴞𐴓𐴞 𐴈𐴝𐴔 𐴒𐴡𐴌𐴞𐴁𐴝 𐴃𐴝𐴌𐴝𐴌 𐴈𐴡𐴌𐴝𐴁𐴢 𐴃𐴡𐴕𐴞𐴅𐴝𐴌 𐴎𐴡𐴌𐴞𐴘𐴝 𐴕𐴡 𐴁𐴡𐴙𐴕𐴧𐴡| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴀𐴞𐴔𐴝𐴔 𐴀𐴝𐴊𐴧𐴠 𐴀𐴝𐴔𐴞𐴌𐴡𐴌𐴠 𐴕𐴝 𐴔𐴝𐴕𐴡𐴕 𐴇𐴦𐴝𐴌 𐴑𐴠𐴏𐴞𐴙𐴔𐴧𐴝 𐴈𐴡𐴌𐴝𐴁𐴞𐴌𐴠 𐴄𐴦𐴝𐴕𐴞 𐴀𐴝𐴕𐴠| 𐴃𐴡𐴘𐴓𐴠 𐴀𐴝𐴏𐴡𐴓𐴢 𐴔𐴡𐴏𐴧𐴟𐴊𐴢 𐴀𐴞𐴃𐴡𐴀𐴝𐴃𐴢| 𐴕𐴝𐴉𐴥𐴡𐴌𐴔𐴝𐴕𐴞 𐴀𐴝𐴊𐴧𐴠 𐴔𐴟𐴈𐴝𐴓𐴡𐴉𐴞 𐴕𐴡𐴀 |

𐴀𐴠𐴃𐴡𐴀𐴝𐴃𐴡𐴌 𐴉𐴟𐴖𐴝𐴣𐴃𐴞 𐴀𐴝𐴌𐴠𐴒𐴧𐴗𐴝 𐴁𐴡𐴌𐴥𐴡 𐴏𐴦𐴞𐴏𐴢 𐴀𐴡𐴘𐴓𐴊𐴠 𐴀𐴝𐴔𐴞𐴌𐴡𐴌 𐴃𐴝𐴎𐴞𐴔 𐴀𐴝𐴊𐴧𐴠 𐴃𐴝𐴌𐴠 𐴀𐴞𐴎𐴧𐴡𐴃𐴢 𐴀𐴝𐴌 𐴑𐴡𐴊𐴡𐴌 𐴒𐴡𐴌𐴡𐴕| 𐴘𐴝𐴀𐴝𐴕𐴥𐴡 𐴀𐴠𐴑𐴧𐴝𐴕 𐴐𐴡𐴌𐴞𐴀𐴞 𐴀𐴝𐴇𐴑𐴝𐴔𐴡𐴌 𐴁𐴤𐴟𐴃𐴡𐴌𐴃𐴧𐴞||

، عن أبي موسى الأشعري -رضي الله عنه- قال: قال رسول الله ﷺ: (من إجلال الله إكرام ذي الشيبة المسلم، وحامل القرآن غير الغالي فيه والجافي عنه وإكرام ذي السلطان المقسط)

“𐴇𐴥𐴡𐴎𐴌𐴡𐴃𐴢 𐴀𐴝𐴁𐴟 𐴔𐴟𐴏𐴦𐴝 𐴀𐴝𐴐𐴀𐴝𐴌𐴞 (𐴌𐴡) 𐴃𐴧𐴞 𐴌𐴠𐴖𐴝𐴘𐴡𐴃𐴢 𐴃𐴝𐴀𐴛 𐴈𐴦𐴡𐴊𐴠- 𐴌𐴡𐴏𐴟𐴓𐴢 (𐴏𐴓𐴢) 𐴔𐴠 𐴈𐴡𐴘𐴧𐴠𐴊𐴠- 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴌𐴠 𐴀𐴞𐴎𐴧𐴡𐴃𐴢 𐴊𐴡𐴀𐴕𐴡𐴌 𐴀𐴠𐴑𐴧𐴝𐴕 𐴃𐴡𐴌𐴞𐴑𐴝 𐴀𐴥𐴡𐴘𐴓𐴊𐴠 𐴔𐴟𐴏𐴡𐴓𐴔𐴝𐴕 𐴁𐴟𐴌𐴝 𐴔𐴝𐴙𐴐𐴥𐴡𐴌𐴠 𐴀𐴞𐴎𐴧𐴡𐴃𐴠 𐴒𐴡𐴌𐴡𐴕, 𐴀𐴦𐴠𐴕 𐴀𐴝𐴇𐴓𐴠 𐴑𐴟𐴌𐴀𐴦𐴝𐴕𐴡𐴌 𐴀𐴞𐴎𐴧𐴡𐴃𐴢 𐴒𐴡𐴌𐴡𐴕 𐴎𐴞𐴁𐴤𐴝𐴘𐴠 𐴑𐴟𐴌𐴀𐴦𐴝𐴕𐴡𐴃𐴢 𐴒𐴟𐴓𐴥𐴟 𐴀𐴝𐴌 𐴇𐴥𐴡𐴊𐴢 𐴃𐴠𐴎𐴝𐴖𐴡𐴎𐴞 𐴕𐴡𐴒𐴡𐴌𐴠 𐴀𐴝𐴌 𐴀𐴞𐴕𐴏𐴝𐴉𐴒𐴝𐴌 𐴔𐴟𐴔𐴞𐴕 𐴔𐴟𐴃𐴧𐴡𐴑𐴞 𐴀𐴝𐴔𐴞𐴌𐴡𐴌 𐴀𐴞𐴎𐴧𐴡𐴃𐴢 𐴒𐴡𐴌𐴡𐴕 |”

𐴀𐴟𐴏𐴃𐴝𐴊𐴢 𐴀𐴝𐴁𐴊𐴟𐴓𐴧𐴝𐴇 𐴀𐴝𐴓𐴢 𐴀𐴝𐴊𐴡𐴔𐴠 𐴎𐴠𐴒𐴞𐴕𐴡𐴌 𐴊𐴥𐴝𐴌𐴝𐴘 𐴀𐴝𐴔𐴞𐴌𐴡𐴌 𐴀𐴞𐴎𐴧𐴡𐴃𐴢 𐴒𐴡𐴌𐴥𐴝 𐴎𐴝𐴘 𐴃𐴝𐴌 𐴀𐴠𐴑𐴧𐴝𐴕 𐴓𐴞𐴐𐴄𐴞 𐴃𐴡𐴘𐴧𐴝𐴌 𐴒𐴙𐴅𐴧𐴠| 𐴃𐴝𐴀𐴛 𐴃𐴝𐴌 𐴓𐴞𐴐𐴄𐴞 𐴔𐴧𐴝𐴎𐴠 𐴊𐴡𐴐𐴧𐴝𐴕 𐴃𐴡𐴌𐴞𐴑𐴝𐴌 𐴈𐴡𐴃𐴝 𐴁𐴡𐴘𐴝𐴕 𐴒𐴡𐴙𐴅𐴧𐴠| 𐴀𐴥𐴠 𐴢𐴘𐴡𐴓 𐴕𐴞𐴒𐴝𐴑𐴞𐴌𐴡𐴃 𐴀𐴠𐴑𐴎𐴡𐴕 𐴀𐴝𐴔𐴞𐴌𐴡𐴌 𐴃𐴝𐴎𐴞𐴔 𐴒𐴡𐴌𐴥𐴝 𐴎𐴝𐴘𐴁𐴡|

𐴏𐴡- 𐴃𐴝𐴀𐴛𐴌 𐴈𐴡𐴏𐴟𐴌𐴞 𐴀𐴝𐴊𐴧𐴠 𐴒𐴡𐴓𐴡𐴃𐴞𐴌𐴠 𐴏𐴟𐴉𐴝𐴘 𐴌𐴝𐴑𐴡𐴕| 𐴀𐴝𐴌 𐴃𐴝𐴀𐴛𐴌𐴠 𐴒𐴡𐴉𐴓𐴡𐴃𐴞𐴌 𐴇𐴝𐴓𐴡𐴃𐴡𐴃𐴢 𐴇𐴟𐴐𐴥𐴞𐴘𐴝𐴌𐴞 𐴒𐴡𐴌𐴥𐴞 𐴊𐴡𐴀𐴕|
𐴇𐴝𐴣𐴃𐴢- 𐴇𐴥𐴝𐴏𐴞 𐴃𐴝𐴔𐴝𐴐𐴝𐴃𐴧𐴟 𐴃𐴝𐴀𐴛𐴌𐴠 𐴌𐴟𐴑𐴞 𐴌𐴝𐴑𐴡𐴕|
𐴀𐴝𐴣𐴐𐴄𐴡- 𐴔𐴝𐴙𐴕𐴐𐴥𐴡𐴌𐴠 𐴃𐴝𐴀𐴛𐴌 𐴈𐴡𐴃𐴝𐴌 𐴖𐴡𐴌𐴠 𐴅𐴡𐴔𐴝 𐴒𐴡𐴌𐴡𐴕| 𐴎𐴝𐴌𐴝 𐴃𐴝𐴀𐴛𐴃𐴧𐴟 𐴔𐴦𐴟𐴣 𐴉𐴞𐴌𐴝𐴘 𐴓𐴡𐴘𐴧𐴠 𐴃𐴝𐴌𐴝𐴌𐴠 𐴉𐴥𐴞𐴌𐴝𐴘 𐴀𐴝𐴕𐴡𐴕|
𐴕𐴡- 𐴎𐴟𐴓𐴟𐴔𐴡𐴃𐴧𐴟 𐴃𐴝𐴀𐴛𐴌𐴠 𐴁𐴤𐴝𐴓𐴝 𐴃𐴡𐴌𐴞𐴑𐴝 𐴓𐴡𐴘 𐴌𐴥𐴟𐴑𐴞 𐴌𐴝𐴑𐴡𐴕|
𐴊𐴡𐴐𐴢- 𐴁𐴥𐴟𐴃𐴡𐴌𐴠 𐴁𐴥𐴟𐴃𐴡𐴌𐴠 𐴃𐴝𐴀𐴛𐴌𐴠 𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴢 𐴊𐴡𐴀𐴕||

𐴐𐴝𐴘𐴈𐴢 𐴀𐴝𐴃𐴞𐴘𐴡𐴃𐴟𐴓𐴧𐴝𐴤 𐴓𐴞𐴁𐴧𐴞 𐴀𐴝𐴈𐴠𐴌𐴞 𐴃𐴡𐴌𐴞𐴑𐴝 𐴔𐴦𐴕𐴞 𐴏𐴟𐴉𐴝𐴘 𐴏𐴟𐴉𐴝𐴘 𐴃𐴝𐴀𐴛𐴌𐴠 𐴕𐴡𐴏𐴞𐴘𐴡𐴃𐴢 𐴒𐴡𐴌𐴡𐴕| 𐴘𐴝𐴀𐴝𐴕𐴡 𐴉𐴟𐴣𐴖𐴝𐴣𐴃𐴞 𐴀𐴝𐴌𐴥𐴡 𐴑𐴞𐴏𐴧𐴟 𐴈𐴡𐴃𐴝 𐴁𐴝𐴌𐴝𐴘𐴧𐴠-
𐴑𐴞𐴕𐴃𐴟 𐴈𐴠𐴓𐴝𐴉𐴠 𐴀𐴟𐴏𐴟𐴓𐴢 𐴎𐴡𐴊𐴞 𐴁𐴡𐴌𐴡 𐴈𐴡𐴕𐴡 𐴈𐴡𐴌𐴝𐴁𐴞 𐴒𐴡𐴌𐴞 𐴀𐴥𐴠 𐴀𐴡𐴑𐴃𐴡𐴃𐴢 𐴃𐴝𐴀𐴛𐴌𐴠 𐴎𐴡𐴇𐴠𐴌𐴞 𐴕𐴡𐴏𐴞𐴘𐴡𐴃𐴢 𐴒𐴡𐴌𐴡𐴕 𐴀𐴝𐴊𐴧𐴠 𐴃𐴝𐴀𐴛𐴌 𐴈𐴝𐴔𐴡𐴌 𐴁𐴝𐴁𐴡𐴃𐴠 𐴎𐴡𐴇𐴠𐴌𐴞 𐴀𐴦𐴠𐴃𐴠𐴌𐴝𐴎 𐴒𐴡𐴌𐴡𐴕 𐴅𐴝𐴀𐴠𐴎 𐴀𐴝𐴏𐴠||

𐴀𐴠 𐴈𐴝𐴔𐴒𐴞𐴕 𐴏𐴡𐴓𐴡𐴉𐴢 𐴘𐴦𐴝𐴕𐴞 𐴏𐴝𐴇𐴝𐴁𐴝 𐴑𐴠𐴌𐴝𐴔 𐴀𐴝𐴌 𐴃𐴝𐴌𐴁𐴦𐴝𐴊𐴠 𐴀𐴝𐴘𐴡𐴕𐴧𐴝 𐴀𐴦𐴡𐴓𐴠 𐴒𐴡𐴙𐴅𐴧𐴠| 𐴀𐴥𐴠𐴈𐴡𐴃𐴝𐴌 𐴓𐴥𐴝𐴘 𐴀𐴝𐴣𐴌𐴝𐴌 𐴌𐴝𐴘 𐴀𐴥𐴡𐴘𐴓𐴊𐴠 𐴀𐴝𐴔𐴞𐴌𐴡𐴌𐴠 𐴁𐴥𐴟𐴃𐴡𐴙𐴅𐴧𐴝 𐴕𐴡𐴏𐴞𐴘𐴡𐴃𐴢 𐴒𐴡𐴕𐴡𐴌 𐴘𐴝𐴕 𐴀𐴥𐴡𐴘𐴓𐴊𐴠 𐴀𐴝𐴏𐴡𐴓𐴢 𐴑𐴞𐴕𐴃𐴟 𐴇𐴝𐴓𐴡𐴃𐴢 𐴔𐴡𐴃𐴝𐴁𐴠𐴑 𐴎𐴝𐴇𐴠𐴌𐴝𐴕𐴥𐴝 𐴕𐴡𐴏𐴞𐴘𐴡𐴃𐴢 𐴒𐴡𐴌𐴝 𐴎𐴝𐴘𐴁𐴡||

𐴀𐴝𐴁𐴝𐴌 𐴈𐴡𐴀𐴠𐴑𐴧𐴝𐴕 𐴃𐴡𐴌𐴞𐴑𐴝 𐴓𐴡𐴘𐴢 𐴀𐴝𐴔𐴞𐴌𐴡𐴌𐴠 𐴁𐴠𐴙𐴎𐴧𐴡𐴃𐴞 𐴀𐴝𐴊𐴧𐴠 𐴀𐴠𐴇𐴝𐴕𐴡𐴃𐴢 𐴒𐴡𐴌𐴥𐴝 𐴎𐴝𐴘| 𐴀𐴠 𐴎𐴝𐴒𐴝𐴃𐴢 𐴃𐴝𐴛 𐴎𐴞𐴑𐴞𐴌 𐴒𐴡𐴙𐴅𐴧𐴠 𐴈𐴡𐴕 𐴈𐴡𐴕 𐴏𐴞𐴦𐴏𐴞𐴡𐴌 𐴊𐴝𐴌𐴝𐴘 𐴀𐴝𐴔𐴞𐴌𐴡𐴌 𐴃𐴝𐴎𐴞𐴔 𐴒𐴡𐴌𐴥𐴝 𐴎𐴝𐴘 𐴀𐴝𐴌 𐴀𐴠𐴇𐴝𐴕𐴡𐴃𐴢 𐴈𐴡𐴕 𐴏𐴞𐴏𐴡𐴌 𐴊𐴝𐴌𐴝𐴘 𐴒𐴡𐴌𐴥𐴝 𐴎𐴝𐴘𐴁𐴡| 𐴀𐴡𐴒𐴞𐴕𐴡𐴌𐴠 𐴒𐴡𐴌𐴥𐴡𐴕 𐴉𐴡𐴌𐴞𐴁𐴡 𐴀𐴝𐴌 𐴀𐴠𐴒𐴞𐴕𐴡𐴌𐴠 𐴏𐴥𐴝𐴌𐴞 𐴊𐴡𐴀𐴕 𐴉𐴡𐴌𐴞𐴁𐴡||

𐴀𐴠𐴇𐴝𐴕𐴡𐴃𐴢 𐴒𐴡𐴌𐴝𐴌 𐴑𐴞𐴏𐴧𐴟 𐴃𐴡𐴌𐴞𐴑𐴝 𐴀𐴥𐴡𐴘𐴓𐴊𐴠- 𐴔𐴝𐴙𐴕𐴐𐴥𐴡𐴌 𐴏𐴝𐴔𐴧𐴠 𐴃𐴝𐴀𐴛𐴌 𐴈𐴡𐴌𐴝𐴁𐴞 𐴁𐴡𐴘𐴝𐴕 𐴒𐴡𐴌𐴡𐴕| 𐴃𐴝𐴀𐴛𐴌 𐴈𐴡𐴏𐴟𐴌𐴞 𐴀𐴝𐴊𐴧𐴠 𐴒𐴡𐴓𐴡𐴃𐴞 𐴌𐴠 𐴁𐴠𐴒𐴧𐴟𐴕𐴡𐴌𐴠 𐴉𐴥𐴡𐴓𐴝𐴘 𐴊𐴡𐴀𐴕| 𐴃𐴝𐴀𐴛𐴌 𐴏𐴝𐴣𐴃𐴠 𐴇𐴥𐴝𐴣𐴏𐴞 𐴃𐴝𐴔𐴝𐴐𐴝 𐴒𐴡𐴌𐴡𐴕| 𐴃𐴝𐴀𐴛𐴌 𐴇𐴡𐴑𐴟𐴔 𐴕𐴡 𐴔𐴝𐴕𐴡𐴕| 𐴃𐴝𐴀𐴛𐴌 𐴖𐴡𐴌𐴠 𐴔𐴟𐴏𐴡𐴓𐴔𐴝𐴕𐴡𐴌 𐴎𐴠 𐴎𐴞𐴔𐴧𐴝𐴊𐴝𐴌𐴞 𐴀𐴝𐴏𐴠 𐴀𐴥𐴠𐴒𐴞𐴕𐴡𐴃𐴢 𐴔𐴡𐴊𐴡𐴊𐴢 𐴕𐴡𐴒𐴡𐴌𐴡𐴕| 𐴃𐴝𐴛𐴌𐴠 𐴎𐴝𐴇𐴠𐴌 𐴁𐴝𐴇𐴠𐴌 𐴀𐴞𐴕𐴑𐴝𐴌 𐴒𐴡𐴌𐴡𐴕| 𐴀𐴠𐴒𐴞𐴕 𐴀𐴥𐴡𐴘𐴓𐴊𐴠 𐴁𐴠𐴐𐴥𐴝 𐴁𐴠𐴐𐴥𐴞 𐴈𐴡𐴌𐴝𐴁𐴢 𐴈𐴡𐴏𐴓𐴝𐴃𐴢 𐴀𐴦𐴡𐴓𐴝 𐴈𐴝𐴔||

𐴀𐴥𐴠 𐴃𐴝𐴔𐴦𐴝𐴔 𐴏𐴦𐴞𐴏𐴡𐴌 𐴊𐴥𐴝𐴌𐴝𐴘 𐴎𐴝𐴕𐴝 𐴒𐴠𐴘𐴧𐴠𐴊𐴠 𐴑𐴞 𐴑𐴠𐴀𐴕 𐴒𐴡𐴌𐴥𐴞 𐴀𐴝𐴔𐴞𐴌𐴡𐴌 𐴃𐴝𐴎𐴞𐴔 𐴒𐴡𐴌𐴥𐴝 𐴎𐴝𐴘 𐴀𐴝𐴌 𐴑𐴠𐴀𐴕 𐴒𐴡𐴌𐴥𐴞 𐴃𐴝𐴀𐴛𐴌𐴠 𐴎𐴞𐴓𐴧𐴡𐴃𐴞 𐴒𐴡𐴌𐴝 𐴎𐴝𐴘||

𐴃𐴡𐴘𐴓𐴠 𐴀𐴝𐴈𐴠𐴌𐴞 𐴈𐴡𐴃𐴝 𐴀𐴡𐴘𐴓𐴊𐴠- 𐴀𐴝𐴔𐴞𐴌𐴡𐴌 𐴈𐴡𐴃𐴝 𐴉𐴥𐴟𐴕𐴡𐴕 𐴀𐴝𐴊𐴧𐴠 𐴔𐴝𐴕𐴡𐴕 𐴎𐴡𐴌𐴟𐴌𐴞| 𐴘𐴝𐴀𐴝𐴕 𐴀𐴞𐴁𐴝𐴊𐴡𐴃𐴢| 𐴘𐴝𐴕𐴡𐴌 𐴎𐴡𐴌𐴞𐴘𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴑𐴟𐴌𐴁𐴡𐴃𐴢 𐴇𐴝𐴏𐴞𐴓𐴢 𐴀𐴥𐴡𐴘| 𐴃𐴝𐴀𐴛𐴌𐴠 𐴀𐴞𐴎𐴧𐴡𐴃𐴢 𐴒𐴡𐴌𐴡𐴕 𐴘𐴥𐴡 𐴀𐴞𐴁𐴝𐴊𐴡𐴃𐴢| 𐴃𐴝𐴀𐴛𐴌𐴠 𐴀𐴞𐴎𐴧𐴡𐴃𐴢 𐴀𐴝𐴊𐴧𐴠 𐴃𐴝𐴎𐴞𐴔 𐴒𐴡𐴌𐴕𐴡𐴌 𐴀𐴡𐴃𐴧𐴡𐴃𐴢 𐴀𐴝𐴣𐴀𐴌𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴃𐴡𐴌𐴉𐴡𐴃𐴧𐴟 𐴏𐴝𐴖𐴝𐴁𐴡𐴌 𐴀𐴝𐴐𐴤𐴝 𐴌𐴝𐴙𐴑𐴧𐴟𐴔|𐴀𐴞𐴚𐴐𐴦𐴝 𐴀𐴝𐴓𐴧𐴝𐴤! 𐴔𐴝𐴕𐴥𐴟𐴙𐴐𐴢 𐴀𐴠𐴑𐴊𐴞𐴕 𐴃𐴝𐴌 𐴁𐴡𐴊𐴡𐴓𐴝 𐴉𐴝𐴘𐴁𐴡| 𐴎𐴡𐴊𐴞 𐴃𐴝𐴀𐴛𐴌𐴠 𐴀𐴞𐴎𐴧𐴡𐴃𐴢 𐴒𐴡𐴌𐴡𐴕 𐴀𐴝𐴊𐴧𐴠 𐴔𐴝𐴕𐴡𐴕 𐴈𐴝𐴓𐴠𐴏𐴢 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴓𐴧𐴝 𐴀𐴝𐴊𐴧𐴠 𐴃𐴝𐴀𐴛𐴌 𐴌𐴡𐴏𐴟𐴓𐴢(𐴏𐴓𐴢)𐴔𐴡𐴌 𐴀𐴞𐴃𐴧𐴠𐴁𐴝 𐴒𐴡𐴌𐴞𐴁𐴡𐴓𐴧𐴝 𐴀𐴥𐴡𐴘𐴓𐴠|

𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴈𐴝𐴣𐴏𐴠 𐴊𐴟𐴀𐴦𐴝 𐴒𐴡𐴌𐴥𐴞 𐴀𐴝𐴣𐴀𐴌𐴝𐴌𐴠 𐴃𐴝𐴀𐴛𐴌 𐴀𐴞𐴁𐴝𐴊𐴡𐴃𐴢 𐴒𐴡𐴌𐴞𐴁𐴝𐴌 𐴃𐴡𐴖𐴉𐴞𐴑 𐴊𐴝𐴕 𐴒𐴡𐴌𐴡𐴑 𐴀𐴝𐴌 𐴃𐴝𐴛𐴌 𐴔𐴝𐴏𐴞𐴘𐴝𐴃𐴡𐴃𐴧𐴟𐴕 𐴊𐴥𐴟𐴌𐴞 𐴌𐴝𐴑𐴡𐴑! 𐴀𐴦𐴝𐴔𐴞𐴕!

والسلام عليكم ورحمة الله وبركاته

𐴀𐴝𐴌𐴥𐴡 𐴉𐴡𐴌𐴞𐴁𐴡𐴓𐴧𐴝
𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴀𐴠𐴑𐴡𐴔 𐴀𐴥𐴞𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴊𐴟𐴘𐴡𐴔 𐴀𐴥𐴞𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴃𐴞𐴕𐴡𐴔 𐴇𐴥𐴞𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴏𐴦𐴝𐴙𐴌𐴡𐴔 𐴇𐴥𐴠𐴏𐴧𐴝

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴉𐴝𐴣𐴏𐴀𐴡𐴔𐴢 𐴁𐴤𐴝𐴑

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴡𐴌 𐴏𐴡 𐴓𐴡𐴔𐴁𐴝𐴌 𐴇𐴥𐴠𐴏𐴧𐴝

𐴀𐴡𐴕𐴡𐴌 𐴕𐴠𐴑 𐴊𐴟𐴀𐴦𐴝𐴌 𐴔𐴧𐴝𐴎𐴠 𐴀𐴝𐴣𐴀𐴌𐴝𐴌𐴠 𐴐𐴡𐴌𐴞𐴑 𐴌𐴝𐴙𐴑𐴧𐴡!