𐴀𐴠 𐴊𐴡𐴌𐴡𐴏𐴒𐴞𐴕 𐴐𐴥𐴡𐴕 𐴲𐴰𐴱𐴴 𐴡𐴃𐴢 𐴀𐴟𐴃𐴧𐴡𐴌 𐴖𐴝𐴎𐴞𐴌𐴞𐴏𐴃𐴝𐴕𐴡𐴃𐴢 𐴁𐴝𐴚𐴓𐴝𐴊𐴠𐴐𐴥𐴡𐴌 𐴏𐴥𐴝𐴣𐴃𐴠 𐴃𐴝𐴀𐴝𐴓𐴧𐴟𐴑 𐴌𐴝𐴑𐴡𐴘𐴝 𐴔𐴟𐴅𐴝𐴇𐴞𐴊𐴢 𐴁𐴤𐴝𐴘 𐴀𐴦𐴡𐴓𐴡𐴌𐴠 𐴊𐴞𐴘𐴝𐴒𐴞𐴘𐴠| 𐴎𐴠𐴃𐴧𐴡𐴃𐴢 𐴀𐴠 𐴁𐴤𐴝𐴘 𐴀𐴦𐴡𐴀𐴡𐴓𐴢 𐴀𐴟𐴌𐴟𐴊𐴟 𐴎𐴟𐴁𐴝𐴕𐴡𐴌 𐴏𐴥𐴝𐴣𐴃𐴠 𐴁𐴤𐴝𐴓𐴝 𐴔𐴟𐴏𐴕𐴝𐴏𐴠𐴁𐴡𐴃𐴢 𐴕𐴥𐴝𐴘 𐴀𐴥𐴠𐴈𐴡𐴃𐴝𐴓𐴧𐴝 𐴃𐴝𐴌𐴝𐴌 𐴀𐴝𐴏𐴦𐴝𐴕𐴞𐴌 𐴔𐴞𐴑𐴧𐴝 𐴕𐴡𐴎𐴡𐴌 𐴒𐴡𐴌𐴞 𐴀𐴞𐴚𐴌𐴝𐴎𐴞 𐴓𐴡𐴉𐴎𐴡 𐴀𐴡𐴑𐴧𐴡𐴓𐴡𐴌 𐴀𐴠𐴏𐴃𐴠𐴔𐴝𐴓𐴢 𐴁𐴠𐴐𐴥𐴞 𐴒𐴡𐴌𐴝 𐴒𐴞𐴘𐴧𐴠||

𐴊𐴡𐴌𐴡𐴏𐴡𐴌 𐴏𐴥𐴝𐴣𐴃𐴞 𐴀𐴡𐴑𐴧𐴡𐴓𐴢: 𐴑𐴡𐴔𐴝𐴕𐴋𐴝𐴌 𐴁𐴤𐴝𐴘 𐴃𐴝𐴌𐴠𐴑(𐴏𐴟𐴇𐴝𐴘𐴓𐴢)، 𐴁𐴤𐴝𐴘 𐴀𐴝𐴁𐴟 𐴀𐴞𐴁𐴌𐴝𐴇𐴞𐴔(𐴏𐴝𐴘𐴉𐴟𐴓𐴢 𐴀𐴞𐴏𐴓𐴝𐴔 𐴇𐴝𐴏𐴡𐴕)، 𐴁𐴤𐴝𐴘 𐴏𐴟𐴓𐴝𐴘𐴔𐴝𐴕(𐴀𐴝𐴐𐴠𐴑𐴟 𐴌𐴝𐴇𐴝𐴔𐴝𐴕)، 𐴁𐴤𐴝𐴘 𐴘𐴝𐴑𐴟𐴁𐴢(𐴏𐴡𐴊𐴧𐴝𐴔 𐴇𐴟𐴏𐴝𐴘𐴕)، 𐴁𐴤𐴝𐴘 𐴀𐴝𐴕𐴟𐴖𐴝𐴌 (𐴕𐴝𐴎𐴠𐴔𐴟𐴊𐴢 𐴊𐴦𐴞𐴕)، 𐴁𐴤𐴝𐴘 𐴏𐴞𐴊𐴧𐴞𐴑( 𐴔𐴝𐴘𐴔𐴟𐴕 𐴇𐴝𐴏𐴠𐴁𐴢 𐴔𐴞𐴕𐴇𐴝𐴅) 𐴀𐴝𐴓𐴧𐴝𐴇 𐴃𐴝𐴌𐴝 𐴁𐴠𐴒𐴧𐴞𐴕𐴡𐴌 𐴖𐴡𐴌𐴠 𐴌𐴝𐴇𐴝𐴔 𐴒𐴡𐴌𐴡𐴑||

𐴏𐴟𐴓𐴝𐴘𐴔𐴝𐴕 𐴁𐴤𐴝𐴘 𐴐𐴥𐴡𐴕 𐴲𐴰𐴱𐴴 𐴡𐴃𐴢 𐴖𐴝𐴎𐴞𐴌𐴞𐴏𐴃𐴝𐴕𐴡𐴃𐴢 𐴀𐴝𐴔𐴠𐴌𐴞𐴑𐴝𐴌 𐴋𐴌𐴟𐴕 𐴇𐴥𐴝𐴔𐴓𐴝𐴃𐴢 𐴐𐴥𐴡𐴇𐴞𐴊𐴢 𐴀𐴥𐴡𐴘𐴧𐴠، 𐴀𐴝𐴌𐴠𐴑 𐴔𐴞𐴑𐴧𐴝 𐴁𐴝𐴑𐴞 𐴃𐴝𐴔𐴦𐴝𐴔 𐴁𐴤𐴝𐴘 𐴀𐴦𐴡𐴓𐴢 𐴐𐴥𐴡𐴕 𐴲𐴰𐴱𐴵 𐴡𐴃𐴢 𐴑𐴡𐴕𐴊𐴝𐴇𐴝𐴌𐴡𐴃𐴢 𐴀𐴝𐴔𐴠𐴌𐴞𐴑𐴝𐴌 𐴉𐴡𐴗𐴏𐴢 𐴀𐴦𐴡𐴓𐴡𐴌 𐴏𐴥𐴝𐴣𐴃𐴠 𐴔𐴟𐴑𐴝𐴁𐴠𐴓𐴝 𐴒𐴡𐴌𐴞 𐴐𐴥𐴡𐴇𐴞𐴊𐴢 𐴀𐴥𐴡𐴘 𐴒𐴞𐴘𐴡𐴘||

نحسبهم كذالك والله حسيبهم ولانزكي علي الله احدا!

𐴐𐴥𐴡𐴌𐴀𐴞 𐴊𐴡𐴌𐴡𐴏𐴢 𐴀𐴡𐴑𐴧𐴡𐴓𐴢

𐴐𐴥𐴡𐴇𐴞𐴊𐴢 𐴀𐴦𐴝𐴓𐴠𐴔𐴠 𐴌𐴡𐴁𐴧𐴝𐴕𐴞 𐴀𐴟𐴏𐴃𐴝𐴊𐴢 𐴀𐴝𐴇𐴝𐴔𐴡𐴊𐴢 𐴉𐴝𐴌𐴟𐴑 𐴌𐴡𐴇𐴞𐴔𐴝𐴇𐴟𐴓𐴧𐴝𐴇

𐴐𐴥𐴡𐴌𐴀𐴞 𐴊𐴡𐴌𐴡𐴏𐴢(𐴳)

𐴔𐴡𐴗𐴎𐴟

𐴔𐴟𐴅𐴝𐴇𐴞𐴊𐴞𐴕𐴡𐴓𐴧𐴝 𐴀𐴠𐴓𐴥𐴡𐴔𐴡𐴌 𐴀𐴝𐴇𐴝𐴔𐴞𐴘𐴡𐴃𐴢

𐴓𐴦𐴝𐴏𐴢 𐴈𐴡𐴃𐴝 𐴀𐴞𐴚 𐴐𐴦𐴝 𐴀𐴝𐴓𐴧𐴝𐴇 𐴘𐴝𐴕𐴡𐴌 𐴔𐴝𐴃𐴝𐴇𐴝𐴃𐴢 𐴀𐴠 𐴔𐴡𐴗𐴎𐴟𐴌𐴠 𐴈𐴡𐴃𐴡𐴔 𐴒𐴡𐴌𐴞𐴘𐴟𐴔، 𐴀𐴠𐴓𐴥𐴡𐴔𐴡𐴌 𐴔𐴡𐴗𐴎𐴟𐴌𐴠| 𐴘𐴦𐴝𐴕 𐴀𐴥𐴡𐴘𐴓𐴊𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴔𐴟𐴅𐴝𐴇𐴞𐴊𐴞𐴕𐴡𐴓𐴧𐴝 𐴀𐴠𐴓𐴥𐴡𐴔 𐴇𐴝𐴏𐴠𐴓𐴢 𐴒𐴡𐴌𐴡𐴕 𐴇𐴡𐴊𐴧𐴟𐴌 𐴀𐴝𐴇𐴝𐴔𐴞𐴘𐴡𐴃𐴢 𐴌𐴝𐴑𐴠؟

𐴔𐴡𐴌 𐴀𐴝𐴊𐴡𐴌𐴡𐴌 𐴁𐴤𐴝𐴘 𐴀𐴡𐴑𐴧𐴡𐴓𐴢! 𐴔𐴟𐴅𐴝𐴇𐴞𐴊𐴞𐴕𐴡𐴓𐴧𐴝 𐴀𐴠𐴓𐴥𐴡𐴔 𐴇𐴝𐴏𐴠𐴓𐴢 𐴒𐴡𐴌𐴝𐴌 𐴎𐴡𐴌𐴟𐴌𐴡𐴃𐴢 𐴀𐴠𐴈𐴡𐴃𐴝𐴓𐴧𐴝 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴔𐴟𐴅𐴝𐴇𐴞𐴊𐴢 𐴀𐴝𐴊𐴧𐴠 𐴋𐴝𐴇𐴝𐴙𐴃𐴡𐴌 𐴊𐴡𐴌𐴔𐴞𐴘𐴝𐴕 𐴁𐴟𐴕𐴞𐴘𐴝𐴊𐴞 𐴃𐴡𐴗𐴌𐴡𐴌 𐴖𐴡𐴌𐴠 𐴉𐴡𐴌𐴡𐴑 𐴀𐴥𐴡𐴘𐴓𐴊𐴠 𐴏𐴞𐴌𐴞𐴉𐴢 𐴀𐴠𐴓𐴥𐴡𐴔| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴊𐴟𐴕𐴟 𐴎𐴡𐴕𐴡𐴌 𐴀𐴥𐴝𐴃𐴡𐴃𐴢 𐴑𐴞 𐴃𐴝𐴑𐴠؟ 𐴁𐴡𐴕𐴊𐴟𐴑 𐴃𐴝𐴑𐴠, 𐴊𐴟𐴕𐴟 𐴎𐴡𐴕𐴡𐴌 𐴀𐴥𐴝𐴃𐴡𐴃𐴢 𐴇𐴥𐴝𐴣𐴃𐴞𐴘𐴝𐴌 𐴃𐴝𐴑𐴠| 𐴔𐴡𐴒𐴡𐴌 𐴀𐴠𐴑𐴎𐴡𐴕 𐴐𐴥𐴡𐴌𐴞𐴘𐴡𐴃𐴡𐴌 𐴉𐴝𐴁𐴡𐴕𐴊𐴞 𐴒𐴡𐴌𐴠، 𐴀𐴝𐴌𐴠𐴑 𐴎𐴡𐴕 𐴐𐴥𐴡𐴌𐴞𐴘𐴡𐴃𐴡𐴌 𐴉𐴝𐴁𐴡𐴕𐴊𐴞 𐴕𐴡𐴒𐴡𐴌𐴠| 𐴐𐴥𐴡𐴌𐴞𐴘𐴡𐴃𐴡𐴌 𐴉𐴝𐴁𐴡𐴕𐴊𐴞 𐴒𐴡𐴌𐴞𐴁𐴡𐴓𐴧𐴝 𐴐𐴥𐴡𐴌𐴞𐴘𐴡𐴃𐴡𐴌 𐴀𐴠𐴓𐴥𐴡𐴔 𐴃𐴝𐴑𐴡𐴕 𐴎𐴡𐴌𐴟𐴌𐴞| 𐴎𐴡𐴈𐴡𐴕 𐴀𐴠 𐴊𐴟𐴘𐴝𐴕 𐴏𐴞𐴏𐴢 𐴅𐴡𐴔𐴝 𐴀𐴥𐴡𐴘𐴁𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴊𐴟𐴘𐴝𐴕 𐴏𐴞𐴏𐴢 𐴀𐴠𐴑 𐴏𐴥𐴝𐴣𐴃𐴠 𐴅𐴡𐴔𐴝 𐴀𐴥𐴡𐴘𐴓𐴠 𐴃𐴡𐴘𐴓𐴠 𐴀𐴞𐴕𐴏𐴝𐴕 𐴁𐴝𐴏𐴞 𐴎𐴝𐴘𐴁𐴡𐴘||

𐴀𐴝𐴈𐴠𐴌𐴡𐴃𐴡𐴌 𐴀𐴠𐴃𐴠𐴁𐴝𐴌𐴠 𐴀𐴞𐴕𐴏𐴝𐴕 𐴄𐴞𐴑 𐴌𐴝𐴏𐴧𐴝𐴌 𐴖𐴡𐴌𐴠 𐴇𐴦𐴡𐴣𐴃𐴧𐴠 𐴀𐴟𐴍𐴥𐴠؟ 𐴎𐴡𐴈𐴡𐴕 𐴀𐴠 𐴊𐴟𐴘𐴝𐴕 𐴏𐴞𐴏𐴢 𐴃𐴝𐴑𐴞𐴁𐴡| 𐴀𐴠𐴑 𐴀𐴥𐴡𐴘𐴓𐴊𐴠 𐴈𐴝𐴓𐴠𐴏𐴢 𐴕𐴞𐴘𐴡𐴃𐴢، 𐴊𐴟𐴏𐴡𐴌𐴝 𐴐𐴥𐴡𐴌𐴞𐴘𐴡𐴃𐴡𐴌 𐴀𐴠𐴓𐴥𐴡𐴔| 𐴀𐴠 𐴊𐴟𐴘𐴝𐴕 𐴏𐴞𐴏𐴞 𐴔𐴞𐴓𐴞𐴁𐴡 𐴃𐴡𐴘𐴓𐴠 𐴀𐴞𐴕𐴏𐴝𐴕 𐴏𐴥𐴡𐴀𐴞 𐴓𐴦𐴝𐴙𐴕𐴡 𐴖𐴡𐴌𐴠 𐴃𐴝𐴑𐴞𐴁𐴡| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴕𐴞𐴘𐴡𐴃𐴢 𐴄𐴞𐴑 𐴀𐴝𐴏𐴠 𐴀𐴠𐴓𐴥𐴡𐴔 𐴕𐴥𐴝𐴘| 𐴃𐴡𐴘𐴓𐴠 𐴒𐴝𐴣𐴀𐴌𐴝𐴃𐴢 𐴉𐴡𐴌𐴞𐴁𐴡| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴀𐴡𐴕𐴠 𐴀𐴠𐴈𐴓𐴝𐴏𐴡𐴌 𐴏𐴥𐴝𐴣𐴃𐴠 𐴒𐴝𐴌𐴞𐴌 𐴋𐴠𐴌𐴝𐴘𐴁𐴝𐴌𐴞 𐴒𐴡𐴌𐴞𐴁𐴡𐴓𐴧𐴝 𐴁𐴡𐴙𐴐𐴧𐴡، 𐴉𐴟𐴌𐴝 𐴀𐴠𐴈𐴓𐴝𐴏𐴡𐴌 𐴏𐴥𐴝𐴣𐴃𐴠 𐴓𐴠𐴖𐴝𐴍𐴡𐴑 𐴎𐴝𐴘𐴃𐴡 𐴏𐴡𐴀𐴡𐴌| 𐴑𐴞𐴕𐴃𐴟 𐴕𐴡 𐴀𐴡𐴕𐴠 𐴘𐴦𐴝𐴌 𐴀𐴝𐴒𐴠 𐴒𐴝𐴌𐴞 𐴏𐴡𐴓𐴝𐴘𐴧𐴡 𐴀𐴝𐴌 𐴕𐴡 𐴓𐴠𐴖𐴝𐴍𐴡𐴑𐴡𐴌 𐴌𐴝𐴏𐴧𐴝 𐴏𐴞𐴕𐴡| 𐴊𐴟𐴘 𐴔𐴞𐴕𐴥𐴞𐴄𐴠 𐴋𐴥𐴠𐴑𐴧𐴝 𐴇𐴝𐴘𐴁𐴡 𐴀𐴡𐴕𐴡𐴌 𐴒𐴝𐴌𐴞 𐴎𐴡𐴊𐴞 𐴒𐴝𐴌𐴞 𐴀𐴠𐴏𐴄𐴝𐴋 𐴀𐴥𐴡𐴘 𐴎𐴝𐴒𐴡𐴘 𐴃𐴡𐴘𐴓𐴠| 𐴏𐴥𐴡𐴀𐴞 𐴀𐴝𐴏𐴠𐴕𐴠||

𐴃𐴡 𐴀𐴥𐴠𐴈𐴡𐴃𐴝𐴓𐴧𐴝 𐴏𐴞𐴌𐴞𐴉𐴢 𐴀𐴠𐴈𐴓𐴝𐴏𐴡𐴌 𐴎𐴡𐴌𐴞𐴘 𐴒𐴝𐴌𐴞 𐴕𐴡𐴏𐴡𐴓𐴞𐴁𐴡| 𐴃𐴡𐴘𐴓𐴠 𐴊𐴦𐴞𐴕𐴡𐴌 𐴒𐴝𐴌𐴞𐴘𐴥𐴡 𐴏𐴞𐴌𐴞𐴉𐴢 𐴀𐴠𐴈𐴓𐴝𐴏𐴢 𐴓𐴡𐴘 𐴕𐴡𐴏𐴡𐴓𐴞𐴁𐴡| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴀𐴠𐴈𐴓𐴝𐴏𐴡𐴌 𐴏𐴥𐴝𐴣𐴃𐴠 𐴏𐴥𐴝𐴣𐴃𐴠 𐴎𐴡𐴌𐴟𐴌𐴞 𐴀𐴡𐴥𐴘𐴓𐴊𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴡𐴕𐴡𐴌 𐴇𐴝𐴣𐴏𐴥𐴠 𐴀𐴠𐴈𐴡𐴃𐴝𐴌 𐴀𐴠𐴓𐴥𐴡𐴔 𐴃𐴝𐴑𐴝 𐴉𐴡𐴌𐴞𐴁𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌𐴠 𐴑𐴞𐴁𐴤𐴝𐴉𐴠 𐴌𐴝𐴎𐴞 𐴒𐴡𐴌𐴝𐴎𐴝، 𐴀𐴝𐴓𐴧𐴝𐴇𐴌 𐴇𐴡𐴑𐴟𐴔 𐴑𐴞؟ 𐴑𐴞𐴁𐴤𐴝𐴉𐴠 𐴃𐴝𐴌 𐴖𐴡𐴌𐴠 𐴀𐴝𐴔𐴥𐴡𐴓𐴢 𐴒𐴡𐴌𐴞𐴁𐴡؟ 𐴀𐴝𐴣𐴀𐴌𐴝 𐴈𐴡𐴘𐴓𐴝𐴔𐴊𐴠 𐴁𐴝𐴎𐴡 𐴇𐴡𐴑𐴟𐴔 𐴀𐴞𐴕𐴋𐴞𐴓𐴧𐴝 𐴀𐴝𐴏𐴠 𐴎𐴡𐴊𐴞 𐴀𐴥𐴠𐴒𐴞𐴕𐴡𐴌 𐴀𐴠𐴓𐴥𐴡𐴔 𐴇𐴝𐴏𐴠𐴓𐴢 𐴕𐴡𐴒𐴡𐴌𐴠 𐴃𐴡𐴘𐴓𐴠 𐴃𐴝𐴌 𐴖𐴡𐴌𐴠 𐴔𐴟𐴏𐴃𐴡𐴑𐴞𐴓𐴢 𐴁𐴤𐴝𐴉𐴠 𐴒𐴟𐴕𐴤𐴝 𐴀𐴥𐴡𐴘𐴁𐴡| 𐴑𐴞𐴘𐴡𐴓𐴧𐴝 𐴉𐴡𐴌𐴡𐴎 𐴏𐴥𐴝𐴌𐴞 𐴊𐴞𐴘𐴡||

𐴃𐴡𐴘𐴓𐴠 𐴊𐴟𐴕𐴞𐴘𐴝𐴌 𐴖𐴡𐴌𐴠𐴘𐴥𐴡 𐴑𐴝𐴕𐴟𐴕 𐴃𐴝𐴑𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴑𐴝𐴕𐴟𐴕 𐴕𐴡𐴎𐴝𐴕𐴡𐴕 𐴈𐴡𐴕𐴥𐴡 𐴀𐴟𐴎𐴡𐴌 𐴕𐴡𐴀𐴡| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴀𐴡𐴕𐴠 𐴄𐴌𐴝𐴉𐴞𐴑𐴡𐴌 𐴀𐴞𐴐𐴥𐴝𐴌𐴝 𐴑𐴌𐴡𐴏𐴢 𐴒𐴡𐴌𐴞𐴁𐴝 𐴀𐴝𐴌 𐴘𐴦𐴝𐴌𐴁𐴝𐴊𐴠 𐴔𐴡𐴄𐴡𐴁𐴞𐴘𐴠 𐴊𐴤𐴡𐴌𐴞 𐴈𐴡𐴘𐴁𐴡 𐴘𐴦𐴝𐴌 𐴀𐴡𐴕𐴠 𐴀𐴠𐴒𐴞𐴕 𐴑𐴞 𐴒𐴡𐴌𐴡𐴌؟ 𐴃𐴡𐴘 𐴀𐴡𐴕𐴠 𐴈𐴡𐴘𐴁𐴝𐴊𐴠 𐴀𐴝𐴣𐴀𐴃𐴧𐴞𐴃𐴡 𐴑𐴝𐴕𐴟𐴕 𐴘𐴦𐴝𐴕 𐴎𐴝𐴕𐴝𐴘𐴥𐴡 𐴕𐴡𐴀𐴝𐴙𐴐𐴧𐴞𐴓𐴢 𐴃𐴡𐴈𐴡𐴕 𐴊𐴟𐴖𐴝 𐴋𐴝𐴕𐴋𐴝𐴌 𐴁𐴝𐴌𐴞 𐴀𐴝𐴌𐴥𐴡 𐴁𐴞𐴐𐴥𐴞 𐴔𐴝𐴌𐴞𐴁𐴡 𐴀𐴡𐴕𐴠 𐴑𐴝𐴕𐴟𐴕 𐴑𐴞𐴘𐴡𐴓𐴧𐴝 𐴕𐴡𐴎𐴝𐴕𐴡||

𐴀𐴝𐴌 𐴀𐴡𐴕𐴠 𐴀𐴝𐴊𐴝𐴓𐴡𐴃𐴡𐴃𐴢 𐴎𐴝𐴘 𐴎𐴡𐴊𐴞 𐴈𐴦𐴡 𐴀𐴝𐴣𐴀𐴃𐴧𐴞 𐴑𐴝𐴕𐴟𐴕 𐴘𐴦𐴝𐴕𐴡𐴌 𐴈𐴥𐴡𐴁𐴡𐴌 𐴕𐴡𐴀𐴝𐴙𐴐𐴧𐴞𐴓𐴢 𐴃𐴡𐴘𐴓𐴠 𐴀𐴥𐴠𐴍𐴠 𐴃𐴝𐴌 𐴖𐴡𐴌𐴠 𐴀𐴝𐴓𐴡𐴑 𐴁𐴤𐴝𐴉𐴠 𐴎𐴡𐴌𐴞𐴁𐴝𐴕𐴝 𐴓𐴝𐴒𐴝𐴘𐴁𐴡، 𐴀𐴡𐴕𐴡𐴃𐴧𐴞 𐴑𐴝𐴕𐴟𐴕 𐴑𐴞𐴘𐴡𐴓𐴧𐴝 𐴎𐴝𐴕𐴝 𐴕𐴡𐴀𐴝𐴙𐴐𐴧𐴞𐴓𐴢| 𐴃𐴡𐴘𐴓𐴠 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌 𐴀𐴥𐴠𐴍𐴠𐴘𐴥𐴡 𐴀𐴦𐴠𐴕 𐴑𐴞𐴏𐴧𐴟 𐴎𐴝𐴇𐴥𐴠𐴌 𐴁𐴝𐴇𐴥𐴠𐴌 𐴑𐴝𐴕𐴟𐴕 𐴀𐴝𐴏𐴠 𐴎𐴠𐴒𐴞𐴕𐴡𐴃𐴧𐴞 𐴈𐴡𐴕𐴥𐴡 𐴔𐴟𐴏𐴡𐴓𐴔𐴝𐴕 𐴊𐴤𐴝𐴘 𐴕𐴡𐴉𐴝𐴌𐴞𐴁𐴡| 𐴀𐴥𐴞𐴁𐴝 𐴘𐴦𐴝𐴕 𐴈𐴦𐴡𐴘 𐴕𐴡𐴉𐴝𐴌𐴞𐴁𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴘𐴦𐴝𐴕 𐴀𐴝𐴀𐴛 𐴕𐴡𐴎𐴝𐴙𐴕𐴃𐴝𐴔||

𐴃𐴡𐴘𐴓𐴠 𐴉𐴡𐴘𐴓𐴝 𐴈𐴡𐴃𐴝 𐴀𐴥𐴡𐴘𐴓𐴊𐴠 𐴀𐴠𐴈𐴓𐴝𐴏𐴢، 𐴓𐴠𐴑𐴞𐴕 𐴀𐴠𐴑𐴠𐴓𐴝 𐴏𐴞𐴌𐴞𐴉𐴢 𐴀𐴠𐴈𐴓𐴝𐴏𐴠 𐴑𐴝𐴉𐴞 𐴕𐴡𐴀𐴡𐴘𐴁𐴡| 𐴀𐴝𐴣𐴀𐴌𐴝 𐴈𐴡𐴘𐴓𐴝𐴔𐴊𐴠 𐴀𐴠𐴈𐴓𐴝𐴏𐴡𐴌 𐴏𐴥𐴝𐴣𐴃𐴠 𐴊𐴟𐴏𐴡𐴌𐴝 𐴏𐴞𐴏𐴢 𐴎𐴡𐴌𐴟𐴌𐴞 𐴀𐴝𐴌 𐴘𐴦𐴝𐴕 𐴀𐴥𐴡𐴘𐴓𐴊𐴠 𐴀𐴠𐴓𐴥𐴡𐴔| 𐴀𐴥𐴞𐴕𐴋𐴞𐴓𐴧𐴝 𐴏𐴞𐴌𐴞𐴉𐴢 𐴀𐴠𐴓𐴥𐴡𐴔𐴡 𐴑𐴝𐴉𐴞 𐴕𐴡𐴀𐴡| 𐴀𐴝𐴣𐴀𐴌𐴝 𐴀𐴝𐴒𐴠𐴘𐴡 𐴈𐴦𐴡𐴘𐴓𐴝𐴔 𐴁𐴠𐴐𐴥𐴝 𐴁𐴠𐴐𐴥𐴞 𐴔𐴝𐴕𐴥𐴟𐴙𐴐𐴡𐴌 𐴇𐴝𐴣𐴏𐴥𐴠 𐴔𐴝𐴀𐴝𐴓𐴟𐴔𐴝𐴃𐴢 𐴃𐴝𐴑𐴠 𐴑𐴞𐴕𐴃𐴟 𐴀𐴠𐴈𐴓𐴝𐴏𐴢 𐴕𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝 𐴃𐴡𐴗𐴉𐴞𐴑 𐴕𐴡𐴊𐴠| 𐴄𐴞𐴑 𐴀𐴝𐴏𐴠| 𐴀𐴥𐴞𐴁𐴝𐴃𐴧𐴞 𐴎𐴝𐴕𐴝 𐴀𐴝𐴏𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴒𐴝𐴌𐴞𐴌𐴠 𐴑𐴞𐴁𐴤𐴝𐴉𐴠 𐴏𐴡𐴓𐴝𐴘𐴁𐴡، 𐴀𐴥𐴞𐴁𐴝𐴃𐴧𐴞 𐴎𐴝𐴕𐴝 𐴀𐴝𐴏𐴠 𐴓𐴠𐴖𐴝𐴍𐴡𐴑 𐴑𐴞𐴁𐴤𐴝𐴉𐴠 𐴎𐴝𐴘𐴁𐴡 𐴔𐴡𐴒𐴡𐴌 𐴕𐴞𐴘𐴡𐴃𐴢 𐴈𐴡𐴌𐴝𐴉𐴢| 𐴀𐴥𐴞𐴁𐴝 𐴎𐴝𐴘𐴃𐴡𐴘𐴥𐴡 𐴕𐴡𐴏𐴦𐴝𐴌 𐴀𐴥𐴠𐴍𐴠| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴀𐴥𐴞𐴁𐴝𐴃𐴧𐴞 𐴁𐴠𐴒𐴧𐴞𐴕 𐴎𐴝𐴕𐴝 𐴀𐴝𐴏𐴠، 𐴀𐴥𐴞𐴁𐴝 𐴎𐴝𐴕𐴠𐴊𐴠 𐴀𐴞𐴕𐴋𐴞𐴓𐴧𐴝 𐴒𐴡𐴌𐴞𐴓𐴠 𐴘𐴦𐴝 𐴀𐴠 𐴌𐴝𐴏𐴧𐴝𐴁𐴝𐴘 𐴎𐴝𐴘𐴓𐴠 𐴀𐴝𐴓𐴧𐴝𐴇 𐴌𐴝𐴎𐴞 𐴀𐴥𐴡𐴘𐴁𐴡| 𐴑𐴞𐴕𐴃𐴟 𐴀𐴥𐴞𐴁𐴝𐴌 𐴕𐴡𐴉𐴏𐴥𐴡 𐴀𐴥𐴞𐴁𐴝𐴌 𐴖𐴡𐴌𐴠 𐴒𐴝𐴓𐴠𐴁𐴢 𐴀𐴥𐴡𐴘 𐴒𐴞𐴘𐴡𐴘، 𐴀𐴥𐴞𐴁𐴝𐴌𐴠 𐴀𐴥𐴠𐴍𐴠 𐴎𐴝𐴘𐴃𐴡 𐴕𐴡𐴊𐴠𐴌| 𐴀𐴥𐴠𐴈𐴡𐴃𐴝𐴓𐴧𐴝 𐴊𐴟𐴌𐴠 𐴇𐴡𐴕 𐴎𐴝𐴘𐴁𐴡، 𐴀𐴥𐴡𐴌𐴝𐴕 𐴀𐴥𐴡𐴘𐴎𐴝𐴘𐴧𐴟𐴔، 𐴔𐴡𐴐𐴑𐴞𐴓𐴢 𐴀𐴥𐴡𐴘𐴁𐴡، 𐴁𐴡𐴓𐴉𐴡𐴌𐴞𐴁𐴡| 𐴃𐴡𐴘𐴓𐴠 𐴀𐴥𐴞𐴁𐴝𐴌 𐴊𐴞𐴓𐴢 𐴈𐴥𐴡𐴌𐴝𐴉𐴢، 𐴊𐴞𐴓𐴢 𐴈𐴥𐴡𐴌𐴝𐴉𐴢 𐴀𐴦𐴡𐴕𐴡𐴌 𐴎𐴡𐴌𐴞𐴘𐴝 𐴀𐴠𐴓𐴥𐴡𐴔 𐴃𐴝𐴑𐴝𐴌 𐴁𐴝𐴊𐴠𐴘𐴥𐴡 𐴀𐴞𐴕𐴏𐴝𐴕 𐴏𐴥𐴡𐴀𐴞 𐴌𐴝𐴏𐴧𐴝𐴃𐴧𐴞 𐴓𐴝𐴔𐴞 𐴎𐴝𐴒𐴡𐴘||

𐴃𐴡𐴘 𐴑𐴟𐴌𐴀𐴝𐴕𐴟𐴓𐴢 𐴑𐴝𐴌𐴞𐴔𐴡𐴃𐴢 𐴁𐴡𐴓𐴀𐴝𐴔 𐴁𐴞𐴕 𐴁𐴝𐴀𐴟𐴌𐴝𐴤𐴌 𐴔𐴠𐴏𐴥𐴝𐴓𐴢 𐴊𐴞𐴘𐴧𐴠| 𐴃𐴡 𐴘𐴦𐴝𐴕 𐴔𐴠𐴏𐴥𐴝𐴓𐴢 𐴊𐴞𐴘𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠:

{وَاتْلُ عَلَيْهِمْ نَبَأَ الَّذِي آتَيْنَاهُ آيَاتِنَا}

𐴑𐴞𐴁𐴡𐴓𐴞 𐴈𐴡𐴘𐴓𐴠 𐴃𐴝𐴌𐴝𐴌 𐴏𐴝𐴔𐴧𐴠 𐴉𐴡𐴌𐴡، 𐴀𐴡𐴒𐴞𐴕𐴡𐴌 𐴎𐴞𐴑𐴞𐴌 𐴒𐴡𐴌𐴡، 𐴎𐴝𐴌𐴠 𐴀𐴝𐴀𐴛 𐴀𐴝𐴣𐴀𐴌 𐴀𐴝𐴘𐴝𐴃𐴡𐴌 𐴀𐴠𐴓𐴥𐴡𐴔 𐴊𐴦𐴞𐴓𐴝𐴔||

{فَانْسَلَخَ مِنْهَا}

𐴃𐴡𐴘 𐴀𐴥𐴞𐴁𐴝 𐴀𐴥𐴠 𐴀𐴠𐴓𐴥𐴡𐴔𐴡𐴃𐴧𐴞 𐴁𐴝𐴘𐴌 𐴀𐴥𐴡𐴘 𐴒𐴞𐴘𐴡𐴘 𐴘𐴦𐴝𐴕𐴞 𐴀𐴥𐴠 𐴀𐴠𐴓𐴥𐴡𐴔𐴡𐴌𐴠 𐴉𐴞𐴏𐴠 𐴌𐴝𐴑𐴞 𐴁𐴝𐴘𐴌 𐴀𐴥𐴡𐴘 𐴒𐴞𐴘𐴡𐴘||

{فَأَتْبَعَهُ الشَّيْطَانُ}

𐴉𐴞𐴃𐴞𐴕 𐴐𐴥𐴡𐴘𐴃𐴝𐴕 𐴃𐴝𐴌 𐴉𐴞𐴏𐴠 𐴓𐴝𐴙𐴒𐴧𐴠||

{فَكَانَ مِنَ الْغَاوِينَ (175)} [الأعراف: 175]

𐴀𐴝𐴌 𐴀𐴥𐴞𐴁𐴝 𐴒𐴟𐴔𐴌𐴝𐴇 𐴀𐴥𐴡𐴘𐴒𐴞𐴘𐴡𐴘|| (𐴏𐴟𐴌𐴝 𐴀𐴝𐴌𐴝𐴉𐴢: 𐴱𐴷𐴵)

𐴃𐴡𐴘 𐴃𐴝𐴌𐴉𐴞𐴏𐴥𐴠 𐴁𐴡𐴓𐴀𐴝𐴔 𐴁𐴞𐴕 𐴁𐴝𐴀𐴟𐴌𐴝𐴤𐴌 𐴉𐴟𐴌𐴝 𐴖𐴝𐴑𐴞𐴘𐴝 𐴔𐴡𐴗𐴅𐴟𐴊𐴢 𐴀𐴝𐴏𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴎𐴠𐴕𐴞𐴑𐴞 𐴁𐴡𐴕𐴞 𐴀𐴞𐴏𐴌𐴝𐴘𐴓𐴡𐴌 𐴁𐴡𐴌𐴡 𐴀𐴦𐴝𐴓𐴠𐴔𐴡𐴌 𐴁𐴥𐴟𐴃𐴡𐴌𐴠 𐴀𐴠𐴑𐴎𐴡𐴕 𐴀𐴝𐴙𐴐𐴧𐴞𐴓𐴢| 𐴀𐴝𐴌 𐴀𐴠𐴓𐴥𐴡𐴔𐴡 𐴀𐴝𐴙𐴐𐴧𐴞𐴓𐴢 𐴁𐴠𐴒𐴧𐴞𐴕 𐴔𐴝𐴀𐴓𐴟𐴔𐴡 𐴀𐴝𐴙𐴐𐴧𐴞𐴓𐴢| 𐴔𐴡𐴒𐴡𐴌 𐴊𐴞𐴓𐴢 𐴈𐴥𐴡𐴌𐴝𐴉𐴢 𐴀𐴥𐴡𐴘 𐴎𐴝𐴘𐴓𐴠 𐴃𐴡𐴘𐴓𐴠 𐴀𐴠𐴓𐴥𐴡𐴔 𐴃𐴝𐴑𐴝𐴌 𐴁𐴝𐴊𐴠𐴘𐴥𐴡 𐴀𐴞𐴕𐴏𐴝𐴕 𐴏𐴥𐴡𐴀𐴞 𐴌𐴝𐴏𐴧𐴝𐴃𐴧𐴞 𐴇𐴡𐴄𐴞 𐴎𐴝𐴒𐴡𐴘| 𐴃𐴡𐴘 𐴑𐴟𐴌𐴀𐴝𐴕𐴡𐴃𐴢 𐴃𐴝𐴌 𐴎𐴞𐴑𐴞𐴌𐴡𐴌𐴠 𐴔𐴝𐴇𐴝𐴉𐴟𐴎 𐴒𐴡𐴌𐴞 𐴌𐴝𐴙𐴑𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴠𐴓𐴥𐴡𐴔𐴡𐴌 𐴁𐴝𐴊𐴠𐴘𐴥𐴡 𐴒𐴟𐴔𐴌𐴝𐴇 𐴀𐴥𐴡𐴘 𐴒𐴞𐴘𐴡𐴘||

𐴃𐴡𐴘𐴓𐴠 𐴏𐴞𐴌𐴞𐴉𐴢 𐴀𐴠𐴓𐴥𐴡𐴔𐴠 𐴑𐴝𐴉𐴞 𐴕𐴡𐴀𐴡𐴘𐴁𐴡| 𐴀𐴠𐴓𐴥𐴡𐴌𐴔𐴡𐴌 𐴏𐴥𐴝𐴣𐴃𐴠 𐴀𐴠𐴈𐴓𐴝𐴏𐴢، 𐴀𐴝𐴌 𐴏𐴞𐴌𐴞𐴉𐴢 𐴀𐴠𐴈𐴓𐴝𐴏𐴢 𐴑𐴝𐴉𐴞 𐴕𐴡𐴀𐴡 𐴀𐴠𐴈𐴓𐴝𐴏𐴡𐴌 𐴏𐴥𐴝𐴣𐴃𐴠 𐴀𐴠𐴓𐴥𐴡𐴔| 𐴀𐴠 𐴊𐴟𐴕𐴟 𐴏𐴞𐴏𐴢 𐴅𐴡𐴔𐴝 𐴀𐴥𐴡𐴘𐴓𐴠 𐴃𐴡𐴈𐴡𐴕 𐴀𐴞𐴕𐴏𐴝𐴕 𐴏𐴥𐴡𐴀𐴞 𐴌𐴝𐴏𐴧𐴝𐴌 𐴖𐴡𐴌𐴠 𐴏𐴡𐴓𐴞 𐴉𐴝𐴌𐴞𐴁𐴡||

𐴃𐴡𐴘𐴓𐴠 𐴀𐴝𐴣𐴀𐴌𐴝 𐴀𐴠𐴍𐴥𐴠 𐴎𐴞𐴑𐴞𐴌 𐴒𐴡𐴙𐴅𐴧𐴞𐴊𐴠 𐴔𐴟𐴅𐴝𐴇𐴞𐴊𐴢 𐴀𐴦𐴡𐴓𐴡𐴓𐴧𐴝 𐴀𐴠𐴓𐴥𐴡𐴔 𐴀𐴠𐴈𐴡𐴃𐴝𐴓𐴧𐴝 𐴀𐴝𐴇𐴥𐴝𐴔 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴥𐴞𐴁𐴝 𐴉𐴟𐴌𐴝𐴉𐴟𐴌𐴞 𐴀𐴠𐴈𐴓𐴝𐴏𐴡𐴌 𐴏𐴥𐴝𐴣𐴃𐴠، 𐴃𐴝𐴌 𐴊𐴞𐴓𐴡 𐴏𐴝𐴉𐴢 𐴀𐴥𐴡𐴘𐴁𐴡، 𐴅𐴞𐴇𐴝𐴊𐴡 𐴒𐴡𐴌𐴝𐴌 𐴀𐴠𐴌𐴝𐴊𐴝 𐴃𐴝𐴑𐴞𐴁𐴡، 𐴀𐴝𐴓𐴧𐴝𐴇𐴌𐴠 𐴌𐴝𐴎𐴞 𐴒𐴡𐴌𐴝𐴌 𐴀𐴠𐴌𐴝𐴊𐴝𐴘𐴡 𐴃𐴝𐴑𐴠| 𐴑𐴞𐴕𐴃𐴟 𐴀𐴥𐴞𐴁𐴝𐴃𐴧𐴞 𐴀𐴡 𐴀𐴠𐴓𐴥𐴡𐴔 𐴕𐴥𐴝𐴘 𐴎𐴝𐴌 𐴎𐴡𐴌𐴞𐴘𐴝 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌𐴠 𐴌𐴝𐴎𐴞 𐴒𐴡𐴌𐴞𐴁𐴡| 𐴃𐴡𐴈𐴡𐴕 𐴀𐴥𐴠𐴍𐴠 𐴀𐴥𐴞𐴁𐴝 𐴇𐴝𐴌𐴝𐴔𐴡𐴃𐴧𐴞 𐴁𐴝𐴏𐴞 𐴕𐴡𐴉𐴝𐴌𐴞𐴁𐴡| 𐴀𐴥𐴞𐴁𐴝 𐴀𐴠𐴈𐴓𐴝𐴏𐴡𐴌 𐴏𐴥𐴝𐴣𐴃𐴠 𐴈𐴡𐴕𐴥𐴡 𐴔𐴟𐴏𐴡𐴓𐴔𐴝𐴕𐴡𐴌𐴠 𐴑𐴝𐴉𐴠𐴌 𐴁𐴟𐴎𐴥𐴞𐴘𐴡𐴌𐴠 𐴑𐴡𐴃𐴡𐴓𐴢 𐴒𐴡𐴌𐴞𐴊𐴞𐴁𐴡| 𐴀𐴥𐴞𐴁𐴝 𐴀𐴠𐴈𐴓𐴝𐴏𐴡𐴌 𐴏𐴥𐴝𐴣𐴃𐴠 𐴃𐴡𐴃𐴡𐴌𐴧𐴟𐴏𐴡𐴌 𐴎𐴠 𐴀𐴟𐴏𐴟𐴓𐴢 𐴀𐴝𐴏𐴠 𐴀𐴥𐴞𐴁𐴝 𐴘𐴦𐴝𐴕𐴡𐴌𐴠 𐴀𐴠𐴁𐴤𐴝𐴉𐴠 𐴑𐴥𐴟𐴐𐴝𐴊𐴝𐴌 𐴏𐴥𐴝𐴣𐴃𐴠 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴞𐴁𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴝𐴓𐴧𐴝𐴇𐴌 𐴕𐴡𐴎𐴊𐴞𐴑 𐴀𐴥𐴞𐴁𐴝 𐴕𐴝𐴇𐴡𐴑 𐴑𐴡𐴃𐴡𐴓𐴡𐴃𐴢 𐴔𐴟𐴁𐴃𐴠𐴓𐴝 𐴀𐴥𐴡𐴘 𐴎𐴝𐴘𐴁𐴡𐴘| 𐴀𐴥𐴞𐴁𐴝 𐴀𐴠𐴈𐴓𐴝𐴏𐴡𐴌 𐴏𐴥𐴝𐴣𐴃𐴠 𐴀𐴠𐴅𐴠𐴣𐴏𐴞 𐴀𐴡𐴑𐴧𐴡𐴓𐴡𐴌 𐴏𐴥𐴝𐴣𐴃𐴠 𐴃𐴝𐴀𐴝𐴓𐴧𐴟𐴑 𐴒𐴡𐴌𐴝 𐴐𐴥𐴟𐴌𐴟 𐴒𐴡𐴌𐴞𐴊𐴞𐴁𐴡| 𐴀𐴥𐴞𐴁𐴝 𐴀𐴠𐴈𐴓𐴝𐴏𐴡𐴌 𐴏𐴝𐴣𐴀𐴃𐴠 𐴀𐴝𐴌𐴥𐴡 𐴁𐴠𐴐𐴥𐴝 𐴁𐴠𐴐𐴥𐴞 𐴇𐴝𐴔 𐴀𐴡𐴑𐴧𐴡𐴓𐴢 𐴊𐴦𐴞𐴕𐴡𐴌 𐴔𐴡𐴏𐴝𐴓𐴝 𐴁𐴟𐴎𐴥𐴞 𐴒𐴡𐴌𐴠𐴊𐴠 𐴃𐴝𐴑𐴞𐴁𐴡| 𐴃𐴡𐴘𐴓𐴠 𐴀𐴠 𐴊𐴟𐴕𐴟 𐴏𐴞𐴏𐴢 𐴀𐴠𐴑 𐴏𐴥𐴝𐴣𐴃𐴠 𐴅𐴡𐴔𐴝 𐴀𐴦𐴡𐴕 𐴎𐴡𐴌𐴟𐴌𐴞| 𐴀𐴠𐴓𐴥𐴡𐴔 𐴀𐴝𐴊𐴧𐴠 𐴀𐴠𐴈𐴓𐴝𐴏𐴢| 𐴉𐴞𐴃𐴞𐴕 𐴎𐴝𐴘𐴡𐴌𐴠 𐴀𐴞𐴕𐴏𐴝𐴕 𐴏𐴥𐴡𐴀𐴞 𐴌𐴝𐴏𐴧𐴝𐴌 𐴖𐴡𐴌𐴠 𐴀𐴟𐴍𐴥𐴞 𐴉𐴝𐴌𐴞𐴁𐴡||

𐴔𐴟𐴇𐴟𐴃𐴡𐴌𐴡𐴔 𐴁𐴤𐴝𐴘 𐴀𐴡𐴑𐴧𐴡𐴓𐴢! 𐴀𐴥𐴠𐴈𐴡𐴃𐴝𐴓𐴧𐴝 𐴀𐴝𐴣𐴀𐴌𐴝 𐴈𐴡𐴘𐴓𐴝𐴔𐴊𐴠 𐴔𐴟𐴅𐴝𐴇𐴞𐴊𐴡𐴓𐴧𐴝 𐴀𐴠𐴓𐴥𐴡𐴔 𐴀𐴠𐴈𐴡𐴃𐴝𐴓𐴧𐴝 𐴎𐴡𐴌𐴟𐴌𐴞 𐴃𐴦𐴝𐴑𐴠 𐴀𐴥𐴞𐴁𐴝 𐴕𐴞𐴎𐴡𐴌 𐴁𐴡𐴕𐴊𐴟𐴑𐴡𐴌، 𐴕𐴞𐴎𐴡𐴌 𐴃𐴝𐴑𐴡𐴃𐴡𐴌 𐴏𐴥𐴡𐴀𐴞 𐴀𐴠𐴏𐴃𐴠𐴔𐴝𐴓𐴢 𐴁𐴟𐴎𐴥𐴞𐴉𐴝𐴌𐴠| 𐴀𐴠𐴓𐴥𐴡𐴔𐴡𐴌 𐴎𐴡𐴌𐴞𐴘𐴝 𐴁𐴟𐴎𐴥𐴞𐴉𐴝𐴌𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴅𐴞𐴇𐴝𐴊𐴡𐴌 𐴔𐴡𐴏𐴧𐴟𐴊𐴢 𐴑𐴞؟ 𐴀𐴠𐴓𐴥𐴡𐴔𐴡𐴌 𐴎𐴡𐴌𐴞𐴘𐴝 𐴎𐴝𐴕𐴞𐴉𐴝𐴌𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴅𐴞𐴇𐴝𐴊𐴡𐴌 𐴀𐴝𐴊𐴡𐴁𐴢 𐴑𐴞؟ 𐴀𐴠𐴓𐴥𐴡𐴔𐴡𐴌 𐴎𐴡𐴌𐴞𐴘𐴝 𐴁𐴟𐴎𐴥𐴞𐴉𐴝𐴌𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴅𐴞𐴇𐴝𐴊𐴡𐴌 𐴀𐴝𐴇𐴥𐴝𐴔𐴞𐴘𐴡𐴃𐴢 𐴑𐴞؟ 𐴀𐴠𐴓𐴥𐴡𐴔𐴡𐴌 𐴎𐴡𐴌𐴞𐴘𐴝 𐴀𐴡 𐴃𐴝𐴔𐴦𐴝𐴔 𐴇𐴡𐴊𐴢 𐴀𐴡𐴑𐴧𐴡𐴓𐴢 𐴖𐴝𐴎𐴠𐴇 𐴀𐴥𐴡𐴘𐴎𐴝𐴒𐴡𐴘 𐴎𐴠𐴍𐴠 𐴁𐴥𐴟𐴃𐴡𐴌𐴠 𐴃𐴝𐴑𐴞𐴘𐴡𐴌𐴠 𐴀𐴝𐴀𐴛 𐴅𐴞𐴇𐴝𐴊𐴢 𐴒𐴡𐴌𐴞𐴘𐴟𐴔| 𐴃𐴡𐴘𐴓𐴠 𐴀𐴠𐴓𐴥𐴡𐴔 𐴏𐴥𐴝𐴌𐴝 𐴀𐴠𐴃𐴝𐴔𐴦𐴝𐴔 𐴏𐴞𐴏𐴢 𐴀𐴡𐴑𐴧𐴡𐴓𐴢 𐴇𐴝𐴏𐴠𐴓𐴢 𐴒𐴡𐴌𐴝 𐴕𐴡𐴎𐴝𐴘𐴁𐴡||

𐴃𐴡𐴘 𐴔𐴡𐴌 𐴀𐴝𐴊𐴡𐴌𐴡𐴌 𐴁𐴤𐴝𐴘 𐴀𐴡𐴑𐴧𐴡𐴓𐴢! 𐴑𐴡𐴐𐴔𐴞𐴌𐴡𐴃𐴢 𐴎𐴠 𐴅𐴞𐴇𐴝𐴊𐴢 𐴀𐴥𐴡𐴘𐴧𐴠، 𐴀𐴝𐴣𐴀𐴌𐴝𐴌 𐴀𐴞𐴕𐴃𐴞، 𐴉𐴝𐴑𐴞𐴏𐴃𐴝𐴕𐴡𐴌 𐴃𐴡𐴌𐴉𐴡𐴃𐴧𐴞، 𐴃𐴡 𐴀𐴠 𐴃𐴝𐴔𐴦𐴝𐴔 𐴅𐴞𐴇𐴝𐴊𐴡𐴌 𐴁𐴥𐴟𐴃𐴡𐴌𐴠 𐴔𐴟𐴈𐴓𐴠𐴏𐴢 𐴔𐴝𐴙𐴕𐴐𐴥𐴡𐴌 𐴇𐴡𐴔𐴃𐴞 𐴕𐴡𐴀𐴝𐴙𐴐𐴧𐴞𐴓𐴢، 𐴁𐴠𐴐𐴥𐴝 𐴁𐴠𐴐𐴥𐴞 𐴔𐴟𐴈𐴓𐴠𐴏𐴢 𐴀𐴦𐴡𐴓𐴢 𐴀𐴝𐴙𐴐𐴧𐴞𐴓𐴢| 𐴁𐴠𐴒𐴧𐴞𐴕𐴠 𐴔𐴞𐴓𐴝𐴘 𐴕𐴡𐴁𐴧𐴡𐴘𐴹𐴰𐴰𐴰𐴰 𐴇𐴥𐴝𐴎𐴝𐴌 𐴔𐴝𐴕𐴥𐴟𐴙𐴐𐴢 𐴐𐴥𐴡𐴇𐴞𐴊𐴢 𐴀𐴥𐴡𐴘𐴧𐴠، 𐴀𐴥𐴠 𐴕𐴡𐴁𐴧𐴡𐴘 𐴇𐴥𐴝𐴎𐴝𐴌𐴡𐴌 𐴁𐴥𐴟𐴃𐴡𐴌𐴠 𐴊𐴦𐴞𐴕𐴞 𐴃𐴡𐴕𐴎𐴞𐴔𐴡𐴌 𐴎𐴝𐴌𐴝 𐴐𐴥𐴡𐴇𐴞𐴊𐴢 𐴀𐴥𐴡𐴘𐴧𐴠 𐴃𐴝𐴌𐴝𐴘𐴡 𐴑𐴟𐴌𐴞𐴲𐴰𐴰𐴰𐴰 𐴉𐴡𐴣𐴐𐴡𐴘𐴐𐴢𐴲𐴵𐴰𐴰𐴰 𐴇𐴥𐴝𐴎𐴝𐴌𐴡𐴃𐴧𐴞 𐴇𐴡𐴔 𐴕𐴡𐴀𐴥𐴡𐴘𐴁𐴡| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴀𐴠𐴊𐴟𐴒𐴧𐴟𐴕 𐴔𐴝𐴕𐴥𐴟𐴙𐴐𐴢 𐴎𐴝𐴌𐴝 𐴕𐴞𐴎𐴡𐴌 𐴅𐴡𐴖𐴝𐴕 𐴀𐴡𐴑𐴧𐴡𐴓𐴢 𐴎𐴝𐴘𐴡𐴌𐴠 𐴕𐴞𐴎𐴡𐴌 𐴅𐴝𐴕𐴡𐴌𐴠 𐴊𐴞𐴉𐴠𐴓𐴝𐴌 𐴃𐴝𐴌𐴝 𐴀𐴝𐴓𐴧𐴝𐴇𐴌 𐴈𐴝𐴃𐴠𐴌𐴠 𐴅𐴝𐴕 𐴊𐴞𐴀𐴠𐴌| 𐴃𐴡𐴌𐴝 𐴀𐴠𐴈𐴓𐴝𐴏𐴡𐴌 𐴏𐴥𐴝𐴣𐴃𐴠 𐴅𐴝𐴕 𐴊𐴞𐴀𐴠𐴌| 𐴃𐴝𐴌𐴝 𐴀𐴞𐴕𐴋𐴞𐴘𐴝𐴌𐴠 𐴑𐴝𐴉𐴠𐴌 𐴁𐴟𐴎𐴞𐴘𐴠𐴌𐴠𐴃𐴡 𐴃𐴝𐴌 𐴈𐴠𐴓𐴝𐴉𐴢 𐴓𐴝𐴌𐴥𐴝𐴘 𐴒𐴡𐴌𐴠𐴌، 𐴃𐴝𐴌𐴝 𐴔𐴟𐴏𐴡𐴓𐴔𐴝𐴕𐴡𐴌 𐴔𐴡𐴊𐴡𐴃𐴡𐴓𐴧𐴝 𐴓𐴝𐴌𐴥𐴝𐴘 𐴒𐴡𐴌𐴠𐴌| 𐴑𐴞𐴕𐴃𐴟 𐴃𐴝𐴌𐴝𐴌 𐴇𐴝𐴣𐴏𐴥𐴠 𐴀𐴠𐴓𐴥𐴡𐴔 𐴕𐴡𐴀𐴝𐴙𐴐𐴧𐴞𐴓𐴢 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴅𐴞𐴇𐴝𐴊𐴡𐴌 𐴀𐴝𐴊𐴡𐴁𐴢 𐴀𐴝𐴊𐴧𐴠 𐴔𐴡𐴏𐴧𐴟𐴊𐴢 𐴑𐴞؟ 𐴘𐴦𐴝𐴕 𐴐𐴤𐴞𐴑𐴝𐴘𐴊𐴞𐴘𐴝 𐴕𐴡𐴎𐴝 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴅𐴞𐴇𐴝𐴊𐴢 𐴈𐴠𐴓𐴝𐴉𐴡𐴃𐴢 𐴑𐴝𐴘𐴠𐴔 𐴒𐴡𐴌𐴞𐴁𐴡𐴓𐴧𐴝 𐴒𐴡𐴌𐴝𐴎𐴝𐴊𐴠| 𐴘𐴦𐴝𐴕 𐴈𐴡𐴖𐴝 𐴒𐴞𐴘𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴅𐴞𐴇𐴝𐴊𐴢 𐴏𐴞𐴌𐴞𐴉𐴢 𐴑𐴡𐴐𐴔𐴞𐴌𐴡𐴌 𐴁𐴤𐴡𐴘𐴕 𐴀𐴡𐴑𐴧𐴡𐴓𐴡𐴌𐴠 𐴏𐴥𐴟𐴌𐴝𐴘 𐴁𐴡𐴓𐴧𐴝 𐴒𐴡𐴌𐴡𐴕||

𐴃𐴡 𐴀𐴥𐴠𐴈𐴡𐴃𐴝𐴓𐴧𐴝 𐴘𐴦𐴝𐴕 𐴁𐴝𐴑𐴞 𐴏𐴞𐴑𐴟𐴓𐴝𐴌 𐴀𐴝𐴑𐴞𐴊𐴝 𐴌𐴝𐴑𐴝𐴌 𐴁𐴝𐴊𐴠𐴘𐴥𐴡 𐴅𐴞𐴇𐴝𐴊𐴢 𐴀𐴥𐴡𐴘𐴃𐴉𐴝𐴌𐴠𐴌| 𐴑𐴞𐴘𐴡𐴓𐴧𐴝 𐴁𐴡𐴓𐴞𐴈𐴡𐴘𐴓𐴠 𐴀𐴥𐴠𐴍𐴠𐴃𐴡 𐴏𐴞𐴌𐴞𐴉𐴢 𐴓𐴝𐴌𐴥𐴝𐴘 𐴒𐴡𐴌𐴡𐴕| 𐴘𐴦𐴝𐴕𐴃𐴡 𐴏𐴞𐴌𐴞𐴉𐴢 𐴀𐴠𐴑𐴧𐴝𐴕 𐴅𐴟𐴖𐴝𐴁𐴞 𐴇𐴥𐴝𐴔𐴓𐴝𐴌 𐴓𐴝𐴌𐴥𐴝𐴘| 𐴀𐴥𐴞𐴕𐴋𐴞𐴓𐴧𐴝 𐴃𐴝𐴌𐴝𐴌𐴠 𐴘𐴦𐴝𐴕 𐴎𐴝𐴕𐴝𐴘 𐴊𐴞𐴘𐴝 𐴕𐴡𐴎𐴝 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴈𐴠𐴓𐴝𐴉𐴡𐴃𐴡𐴌 𐴕𐴠𐴎𐴝𐴔 𐴇𐴝𐴌𐴠 𐴈𐴦𐴡| 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝 𐴇𐴡𐴕𐴋𐴞𐴓𐴧𐴝 𐴕𐴠𐴎𐴝𐴔𐴡𐴌 𐴃𐴡𐴑𐴝𐴎𐴝 𐴒𐴡𐴌𐴠𐴌| 𐴈𐴡𐴃𐴝 𐴘𐴦𐴝𐴕 𐴎𐴝𐴕𐴝𐴘 𐴊𐴞𐴘𐴝 𐴕𐴡𐴎𐴝 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴋𐴞𐴔𐴟𐴑𐴌𐴠𐴏𐴞𐴌 𐴇𐴡𐴑𐴟𐴔 𐴑𐴞؟ 𐴎𐴡𐴊𐴞 𐴃𐴝𐴌𐴝𐴌𐴠 𐴀𐴠𐴒𐴞𐴕 𐴁𐴠𐴒𐴧𐴞𐴕 𐴎𐴝𐴕𐴝𐴘𐴃𐴡 𐴃𐴡𐴘𐴓𐴠 𐴃𐴝𐴌𐴝 𐴑𐴡𐴐𐴔𐴞𐴌𐴡𐴌 𐴀𐴝𐴒𐴠 𐴉𐴝𐴑𐴞𐴏𐴃𐴝𐴕𐴡𐴌𐴠 𐴀𐴟𐴎𐴟 𐴒𐴡𐴙𐴃𐴧𐴡| 𐴃𐴡𐴘𐴓𐴠 𐴀𐴠𐴅𐴠𐴣𐴏𐴞(𐴋𐴝𐴓𐴝𐴓𐴢) 𐴀𐴦𐴡𐴓𐴠 𐴃𐴝𐴌𐴝𐴌𐴠 𐴕𐴞𐴎𐴡𐴌 𐴑𐴡𐴕𐴄𐴌𐴟𐴓𐴡𐴃𐴢 𐴌𐴝𐴙𐴑𐴧𐴠| 𐴃𐴝𐴌𐴝 𐴀𐴠𐴑𐴞𐴏𐴞𐴔𐴡𐴌 𐴔𐴝𐴀𐴝𐴓𐴟𐴔𐴝𐴃𐴢 𐴕𐴡𐴊𐴠 𐴉𐴡𐴙𐴅𐴧𐴡𐴕𐴃𐴡| 𐴀𐴥𐴠𐴍𐴠𐴘𐴥𐴡 𐴐𐴥𐴡𐴌𐴀𐴞 𐴊𐴝𐴗𐴌𐴝𐴤 𐴀𐴡𐴑𐴧𐴡𐴓𐴡 𐴀𐴥𐴡𐴘𐴃𐴢 𐴀𐴝𐴑𐴏𐴡𐴌 𐴎𐴝𐴒𐴝𐴃𐴢 𐴕𐴡𐴀𐴡𐴘𐴃𐴡| 𐴀𐴝𐴌 𐴎𐴠𐴍𐴠 𐴀𐴥𐴡𐴘𐴃𐴡 𐴀𐴥𐴠𐴍𐴠𐴘𐴡 𐴀𐴦𐴠𐴕 𐴈𐴡𐴕𐴥𐴡 𐴃𐴡𐴉𐴏𐴞𐴓𐴢 𐴒𐴡𐴌𐴝 𐴕𐴡𐴎𐴝𐴘𐴃𐴡 𐴎𐴝𐴌 𐴎𐴡𐴌𐴞𐴘𐴝 𐴏𐴟𐴖𐴝𐴕 𐴉𐴝𐴑𐴞𐴏𐴃𐴝𐴕𐴡𐴌 𐴔𐴞𐴑𐴧𐴝 𐴉𐴞𐴌𐴞 𐴎𐴝𐴒𐴡𐴘| 𐴃𐴡 𐴀𐴦𐴠𐴕 𐴏𐴞𐴏𐴞 𐴀𐴡𐴑𐴧𐴡𐴓𐴢 𐴉𐴡𐴌𐴝 𐴎𐴝𐴘𐴃𐴡 𐴎𐴝𐴌 𐴎𐴡𐴌𐴞𐴘𐴝 𐴃𐴝𐴌𐴝𐴌 𐴔𐴦𐴟𐴣𐴑 𐴀𐴞𐴕𐴋𐴞𐴘𐴝𐴌 𐴔𐴞𐴑𐴧𐴝 𐴃𐴝𐴑𐴠||

𐴃𐴡𐴘 𐴀𐴥𐴠𐴈𐴡𐴃𐴝𐴓𐴧𐴝 𐴀𐴠𐴓𐴥𐴡𐴔 𐴕𐴡𐴀𐴝𐴙𐴐𐴧𐴞𐴓𐴢، 𐴀𐴠𐴓𐴥𐴡𐴔 𐴕𐴡𐴃𐴝𐴑𐴝𐴌 𐴎𐴡𐴌𐴞𐴘𐴝 𐴀𐴠𐴈𐴓𐴝𐴏𐴢 𐴃𐴝𐴑𐴝𐴌 𐴁𐴝𐴊𐴠𐴘𐴥𐴡 𐴒𐴡𐴓𐴃𐴞 𐴖𐴝𐴑𐴞 𐴀𐴡𐴘𐴧𐴠||

𐴀𐴠𐴈𐴓𐴝𐴏𐴡𐴌 𐴁𐴝𐴊𐴠𐴘𐴥𐴡 𐴃𐴝𐴇𐴝𐴌𐴞𐴑 𐴀𐴡𐴑𐴧𐴡𐴓𐴢 𐴉𐴡𐴣𐴐𐴡𐴘𐴐𐴢 𐴁𐴡𐴏𐴥𐴡𐴌 𐴓𐴡𐴃𐴞، 𐴑𐴟𐴌𐴞 𐴁𐴡𐴏𐴥𐴡𐴌 𐴓𐴡𐴃𐴞 𐴏𐴡𐴓𐴝𐴃𐴢 𐴀𐴝𐴏𐴠 𐴀𐴥𐴡𐴘𐴃𐴉𐴝𐴌𐴠 𐴀𐴠𐴈𐴡𐴕 𐴘𐴦𐴝𐴃𐴧𐴞 𐴁𐴠𐴐𐴥𐴞 𐴀𐴥𐴡𐴘𐴁𐴡| 𐴃𐴡𐴘 𐴉𐴡𐴣𐴐𐴡𐴘𐴐𐴢 𐴁𐴡𐴏𐴥𐴡𐴌 𐴀𐴥𐴡𐴘 𐴒𐴞𐴘𐴡𐴘 𐴘𐴦𐴝𐴌 𐴁𐴝𐴊𐴠𐴘𐴡 𐴃𐴝𐴌𐴝 𐴈𐴡𐴕𐴥𐴡 𐴀𐴠𐴑𐴧𐴝𐴕 𐴕𐴡𐴃𐴞𐴅𐴝𐴃𐴢 𐴉𐴦𐴡𐴣𐴏𐴞 𐴕𐴦𐴡𐴉𐴝𐴌𐴠||

𐴃𐴡 𐴀𐴠𐴈𐴡𐴕 𐴀𐴞𐴌𐴝𐴑𐴡𐴃𐴢 𐴎𐴠𐴑𐴞𐴏𐴧𐴟 𐴊𐴠𐴈𐴝𐴎𐴝𐴌(𐴊𐴝𐴀𐴞𐴐𐴡𐴌 𐴉𐴞𐴃𐴕𐴝𐴌 𐴔𐴞𐴑𐴧𐴝 𐴀𐴞𐴐𐴝𐴌𐴝) 𐴀𐴥𐴠𐴍𐴠𐴘𐴡 𐴔𐴟𐴈𐴓𐴠𐴏𐴢 𐴀𐴦𐴡𐴓𐴡𐴌 𐴇𐴡𐴔𐴞 𐴕𐴥𐴝𐴘||

𐴁𐴠𐴐𐴥𐴡𐴑 𐴎𐴡𐴌𐴟𐴌 𐴀𐴠𐴃𐴔𐴦𐴝𐴔 𐴖𐴝𐴑𐴞𐴘𐴝𐴌 𐴉𐴞𐴏𐴠 𐴀𐴦𐴠𐴕 𐴔𐴝𐴕𐴥𐴟𐴙𐴐𐴡 𐴃𐴝𐴑𐴞𐴁𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴎𐴝𐴌𐴝𐴌 𐴊𐴞𐴓𐴡𐴃𐴢 𐴈𐴡𐴕𐴥𐴡 𐴑𐴞𐴏𐴞𐴔𐴡𐴌 𐴎𐴥𐴝𐴔𐴞𐴓𐴝 𐴀𐴝𐴏𐴠| 𐴑𐴞𐴕𐴃𐴟 𐴕𐴞𐴏𐴠 𐴎𐴠 𐴕𐴡𐴅𐴡𐴖𐴝𐴕 𐴀𐴡𐴑𐴧𐴡𐴓𐴢 𐴀𐴝𐴏𐴠 𐴃𐴝𐴌𐴝𐴃𐴡 𐴔𐴟𐴈𐴓𐴠𐴏𐴢، 𐴃𐴝𐴌𐴝 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌𐴠 𐴌𐴝𐴎𐴞 𐴒𐴡𐴌𐴞𐴁𐴡𐴓𐴧𐴝 𐴇𐴝𐴔 𐴒𐴡𐴌𐴠𐴌| 𐴃𐴝𐴌𐴝 𐴎𐴝𐴘 𐴕𐴞𐴎𐴡𐴌 𐴅𐴝𐴕 𐴑𐴟𐴌𐴁𐴝𐴕 𐴒𐴡𐴌𐴠𐴌| 𐴘𐴝𐴇𐴝𐴃𐴡𐴑𐴧𐴠 “𐴀𐴝𐴓𐴧𐴝𐴇 𐴇𐴠𐴉𐴝𐴎𐴡𐴃𐴢 𐴒𐴡𐴌𐴡𐴑” 𐴑𐴞𐴕𐴃𐴟 𐴀𐴡𐴕𐴡𐴌 𐴑𐴥𐴞𐴘𐴝𐴓𐴡𐴃𐴢 𐴎𐴞𐴁𐴤𐴝 𐴐𐴝𐴘𐴈𐴢 𐴀𐴝𐴁𐴟 𐴈𐴝𐴓𐴠𐴊𐴡𐴌 𐴖𐴡𐴌𐴠 𐴎𐴝𐴘 𐴉𐴠𐴊𐴝𐴘𐴞 𐴇𐴥𐴝𐴔𐴓𐴝 𐴒𐴡𐴙𐴅𐴧𐴠، 𐴀𐴥𐴞𐴁𐴝 𐴕𐴞𐴎𐴡𐴌 𐴅𐴝𐴕𐴡𐴌𐴠 𐴀𐴠 𐴕𐴞𐴘𐴡𐴃𐴢 𐴌𐴝𐴑𐴞 𐴊𐴠𐴘𐴠𐴕𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴘𐴦𐴝𐴕𐴡𐴌 𐴎𐴡𐴌𐴞𐴘𐴝 𐴀𐴝𐴓𐴧𐴝𐴇 𐴌𐴝𐴎𐴞 𐴀𐴥𐴡𐴘𐴁𐴡||

𐴑𐴞𐴕𐴃𐴟 𐴑𐴞 𐴘𐴦𐴝𐴕𐴡𐴌 𐴎𐴡𐴌𐴞𐴘𐴝 𐴀𐴝𐴓𐴧𐴝𐴇𐴌 𐴌𐴠𐴎𐴝 𐴔𐴞𐴓𐴞 𐴎𐴝𐴘𐴁𐴡𐴘𐴕𐴠؟ 𐴃𐴡 𐴘𐴦𐴝𐴕𐴃𐴡 𐴅𐴝𐴇𐴝𐴕𐴧𐴝𐴔𐴡𐴃𐴢 𐴓𐴡𐴎𐴝𐴘𐴊𐴠 𐴇𐴝𐴔| 𐴀𐴝𐴌 𐴀𐴥𐴞𐴁𐴝 𐴘𐴦𐴝𐴕 𐴀𐴟𐴎𐴡𐴌 𐴉𐴠𐴐𐴢 𐴒𐴡𐴌𐴞 𐴕𐴡𐴉𐴝𐴌𐴠𐴁𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴝𐴔𐴞𐴌𐴡𐴌 𐴇𐴝𐴌𐴝𐴔 𐴇𐴡𐴑𐴟𐴔 𐴕𐴡𐴔𐴝𐴕𐴝 𐴉𐴡𐴌𐴠𐴊𐴠 𐴀𐴝𐴀𐴛 𐴕𐴡𐴎𐴝𐴘𐴕𐴃𐴝𐴔| 𐴀𐴝𐴣𐴀𐴃𐴧𐴞 𐴎𐴝𐴕𐴝 𐴕𐴡𐴀𐴝𐴙𐴐𐴧𐴞𐴓𐴢 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴔𐴟𐴏𐴡𐴓𐴔𐴝𐴕𐴡𐴌𐴠 𐴑𐴡𐴃𐴡𐴓𐴢 𐴒𐴡𐴌𐴝𐴌 𐴇𐴡𐴑𐴟𐴔 𐴑𐴞؟ 𐴘𐴦𐴝𐴕 𐴕𐴡𐴏𐴡𐴓𐴞𐴁𐴡| 𐴘𐴦𐴝𐴕 𐴈𐴡𐴕𐴥𐴡 𐴖𐴡𐴎𐴝𐴇𐴝𐴃𐴢 𐴕𐴡𐴀𐴡| 𐴀𐴞𐴕𐴃𐴞 𐴎𐴡𐴊𐴞 𐴈𐴡𐴕𐴥𐴡 𐴀𐴝𐴔𐴞𐴌𐴠 𐴈𐴡𐴕𐴡 𐴑𐴞𐴘𐴝𐴌𐴠 𐴊𐴞𐴉𐴠𐴍𐴝𐴘𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴁𐴝𐴎𐴝𐴌𐴡𐴃𐴢 𐴎𐴝𐴘 𐴉𐴥𐴝𐴍𐴞 𐴎𐴝𐴒𐴡𐴘| 𐴀𐴝𐴌 𐴀𐴥𐴞𐴁𐴝 𐴌𐴡𐴖𐴝𐴕𐴝 𐴎𐴝𐴒𐴡𐴘 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴘𐴦𐴝𐴕 𐴀𐴝𐴔𐴞𐴌𐴡𐴌 𐴇𐴡𐴑𐴟𐴔| 𐴀𐴠 𐴇𐴝𐴔𐴠 𐴃𐴝𐴌𐴠 𐴑𐴞 𐴀𐴝𐴈𐴠𐴌𐴡𐴃𐴡𐴃𐴢 𐴁𐴝𐴏𐴝𐴘𐴁𐴡؟ 𐴀𐴠 𐴏𐴞𐴏𐴠 𐴕𐴡 𐴁𐴝𐴏𐴝𐴘𐴁𐴡| 𐴃𐴡 𐴀𐴥𐴠𐴈𐴡𐴃𐴝𐴓𐴧𐴝 𐴀𐴠𐴓𐴥𐴡𐴔 𐴃𐴝𐴑𐴡𐴕 𐴎𐴡𐴌𐴟𐴌𐴞| 𐴑𐴞𐴘𐴡𐴓𐴧𐴝 𐴁𐴡𐴓𐴞𐴈𐴡𐴘𐴓𐴠 𐴀𐴠𐴓𐴥𐴡𐴔𐴡𐴌 𐴎𐴡𐴌𐴞𐴘𐴝 𐴀𐴞𐴕𐴏𐴝𐴕 𐴀𐴞𐴕𐴏𐴝𐴕 𐴁𐴡𐴕𐴠، 𐴀𐴠𐴓𐴥𐴡𐴔𐴡𐴌 𐴎𐴡𐴌𐴞𐴘𐴝 𐴔𐴟𐴅𐴝𐴇𐴞𐴊𐴢 𐴔𐴟𐴅𐴝𐴇𐴞𐴊𐴢 𐴁𐴡𐴕𐴠| 𐴃𐴡 𐴀𐴠𐴒𐴞𐴕 𐴏𐴥𐴝𐴌𐴝 𐴔𐴟𐴇𐴟𐴃𐴡𐴌𐴡𐴔 𐴁𐴤𐴝𐴘 𐴀𐴡𐴑𐴧𐴡𐴓𐴢 𐴁𐴠𐴐𐴥𐴞 𐴅𐴡𐴓𐴊𐴞 𐴀𐴠𐴈𐴓𐴝𐴏𐴢 𐴃𐴝𐴑𐴝𐴌 𐴁𐴝𐴊𐴠𐴘𐴡 𐴀𐴞𐴕𐴏𐴝𐴕 𐴒𐴡𐴓𐴡𐴃𐴢 𐴌𐴝𐴏𐴧𐴝𐴌 𐴔𐴞𐴑𐴧𐴝 𐴕𐴦𐴞𐴓𐴞 𐴎𐴝𐴒𐴡𐴘| 𐴀𐴝𐴌 𐴁𐴡𐴌𐴡 𐴁𐴡𐴌𐴡 𐴒𐴡𐴓𐴃𐴞 𐴀𐴡𐴑𐴧𐴡𐴓𐴡𐴃𐴢 𐴔𐴟𐴁𐴃𐴠𐴓𐴝 𐴀𐴥𐴡𐴘𐴎𐴝𐴒𐴡𐴘| 𐴀𐴝𐴌 𐴁𐴡𐴌𐴡 𐴁𐴡𐴌𐴡 𐴈𐴡𐴃𐴡𐴌𐴕𐴝𐴑 𐴒𐴝𐴣𐴌𐴝 𐴀𐴡𐴑𐴧𐴡𐴓𐴡𐴃𐴢 𐴎𐴝𐴘 𐴉𐴡𐴌𐴞 𐴎𐴝𐴒𐴡𐴘| 𐴀𐴝𐴌 𐴉𐴟𐴌𐴝 𐴃𐴝𐴇𐴝𐴌𐴞𐴑 𐴏𐴥𐴡𐴀𐴞 𐴌𐴝𐴏𐴧𐴝𐴃𐴧𐴞 𐴓𐴝𐴔𐴞 𐴎𐴝𐴒𐴡𐴘||

𐴃𐴡𐴘𐴓𐴠 𐴀𐴠𐴓𐴥𐴡𐴔 𐴀𐴡𐴕𐴡𐴌𐴠 𐴐𐴤𐴞𐴑𐴝𐴊𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴇𐴝𐴓𐴝𐴓𐴢 𐴑𐴞، 𐴇𐴝𐴌𐴝𐴔 𐴑𐴞؟ 𐴀𐴠𐴓𐴥𐴡𐴔𐴠 𐴁𐴡𐴕𐴊𐴟𐴑 𐴊𐴤𐴡𐴌𐴝𐴌 𐴀𐴝𐴊𐴡𐴁𐴢 𐴐𐴤𐴞𐴑𐴝| 𐴀𐴠𐴓𐴥𐴡𐴔𐴠 𐴁𐴡𐴕𐴊𐴟𐴑 𐴊𐴤𐴡𐴌𐴝𐴌 𐴅𐴡𐴎𐴁𐴝 𐴉𐴡𐴘𐴊𐴝 𐴒𐴡𐴌𐴠| 𐴀𐴡𐴕𐴡𐴌𐴠 𐴀𐴠 𐴉𐴡𐴙𐴅𐴧𐴡𐴕𐴃𐴡 𐴓𐴡𐴘 𐴀𐴝𐴘𐴧𐴠| 𐴉𐴞𐴃𐴞𐴕 𐴀𐴠𐴍𐴥𐴠 𐴀𐴝𐴕𐴝𐴌 𐴁𐴝𐴊𐴠 𐴀𐴡𐴕𐴡𐴌𐴠 𐴌𐴝𐴇𐴕𐴟𐴔𐴝𐴘𐴞 𐴊𐴠𐴀| 𐴀𐴠𐴓𐴥𐴡𐴔 𐴏𐴥𐴝𐴌𐴝 𐴀𐴠 𐴃𐴝𐴔𐴦𐴝𐴔 𐴏𐴞𐴏𐴢 𐴔𐴟𐴔𐴑𐴞𐴕 𐴕𐴡𐴀𐴡||

𐴃𐴡𐴘 𐴀𐴥𐴠𐴈𐴡𐴃𐴝𐴓𐴧𐴝 𐴊𐴡𐴌𐴈𐴝𐴏𐴢 𐴀𐴥𐴡𐴘𐴓𐴊𐴠، 𐴑𐴥𐴞𐴘𐴝𐴓𐴢 𐴒𐴡𐴌𐴡 𐴀𐴡𐴕𐴡𐴌𐴝 𐴉𐴡𐴘𐴓𐴝 𐴔𐴝𐴕𐴥𐴟𐴙𐴐𐴢 𐴕𐴡𐴀𐴡 𐴎𐴝𐴌𐴝 𐴅𐴞𐴇𐴝𐴊𐴢 𐴒𐴡𐴌𐴡𐴌، 𐴘𐴦𐴝𐴕 𐴀𐴠𐴑𐴒𐴖𐴤𐴝 𐴀𐴦𐴠𐴕 𐴏𐴝𐴑𐴧𐴝 𐴎𐴝𐴌𐴠 𐴊𐴟𐴁𐴝𐴌𐴝 𐴕𐴡𐴘𐴝𐴒𐴡𐴌𐴞 𐴀𐴞𐴅𐴝𐴊𐴢 𐴒𐴡𐴌𐴝𐴌 𐴎𐴡𐴌𐴟𐴌𐴡𐴃𐴢 𐴕𐴥𐴝𐴘| 𐴀𐴡𐴕𐴡𐴌𐴝𐴌 𐴀𐴝𐴒𐴠 𐴀𐴠𐴒𐴞𐴕 𐴁𐴠𐴒𐴧𐴞𐴕𐴡𐴌 𐴃𐴡𐴅𐴡𐴌𐴟𐴁𐴝 𐴀𐴥𐴡𐴘 𐴒𐴞𐴘𐴡𐴘| 𐴀𐴡𐴕𐴡𐴌𐴝𐴌 𐴀𐴝𐴒𐴠𐴘𐴥𐴡 𐴔𐴝𐴕𐴥𐴟𐴙𐴐𐴢 𐴅𐴞𐴇𐴝𐴊𐴢 𐴒𐴡𐴙𐴅𐴧𐴠| 𐴃𐴡𐴘𐴓𐴠 𐴇𐴡𐴔𐴏𐴠 𐴇𐴡𐴔 𐴀𐴠 𐴎𐴡𐴁𐴝𐴕𐴝𐴌 𐴃𐴝𐴇𐴝𐴌𐴞𐴑 𐴀𐴡𐴑𐴧𐴡𐴓𐴡𐴌 𐴔𐴞𐴑𐴧𐴝 𐴕𐴡𐴎𐴡𐴌 𐴒𐴡𐴌𐴡 𐴃𐴡𐴑𐴡𐴌𐴞𐴁𐴝𐴕 𐴱𐴹𐴶𐴰 𐴞𐴌 𐴎𐴟𐴒𐴡𐴃𐴧𐴞 𐴅𐴞𐴇𐴝𐴊𐴢 𐴐𐴥𐴟𐴌𐴟 𐴀𐴥𐴡𐴘𐴧𐴠| 𐴄𐴞𐴑 𐴀𐴝𐴏𐴠؟ 𐴃𐴡𐴘𐴓𐴠 𐴃𐴡𐴑𐴡𐴌𐴞𐴁𐴝𐴕 𐴆𐴝𐴓𐴧𐴞𐴐𐴢 𐴉𐴡𐴕𐴎𐴝𐴐𐴢 𐴁𐴡𐴏𐴥𐴡𐴌𐴡𐴌، 𐴆𐴝𐴓𐴧𐴞𐴐𐴢 𐴁𐴡𐴏𐴥𐴡𐴌𐴡𐴌 𐴖𐴡𐴌𐴡𐴌 𐴃𐴝𐴌𐴞𐴈𐴢 𐴁𐴡𐴕𐴞 𐴎𐴝𐴒𐴡𐴘| 𐴃𐴡𐴘𐴓𐴠 𐴀𐴠 𐴉𐴟𐴌𐴝 𐴃𐴝𐴌𐴞𐴈𐴡𐴌 𐴁𐴥𐴟𐴃𐴡𐴌𐴠 𐴘𐴦𐴝 𐴀𐴠𐴊𐴧𐴟𐴌 𐴓𐴝𐴔𐴁𐴝 𐴄𐴝𐴘𐴔𐴡𐴌 𐴁𐴥𐴟𐴃𐴡𐴌𐴠 𐴀𐴠 𐴃𐴝𐴔𐴦𐴝𐴔 𐴃𐴡𐴅𐴟𐴌𐴟𐴁𐴝 𐴀𐴡𐴑𐴧𐴡𐴓𐴢 𐴀𐴥𐴡𐴘𐴧𐴠| 𐴃𐴝𐴔𐴦𐴝𐴔 𐴑𐴡𐴔𐴎𐴟𐴌𐴞 𐴀𐴡𐴑𐴧𐴡𐴓𐴢، 𐴔𐴟𐴈𐴃𐴡𐴓𐴞𐴉𐴢 𐴃𐴝𐴇𐴝𐴌𐴞𐴑 𐴀𐴡𐴑𐴧𐴡𐴓𐴡𐴌 𐴁𐴥𐴟𐴃𐴡𐴌𐴠 𐴔𐴟𐴈𐴃𐴡𐴓𐴞𐴉𐴢 𐴑𐴡𐴔𐴎𐴟𐴌𐴞 𐴀𐴡𐴑𐴧𐴡𐴓𐴢 𐴀𐴝𐴙𐴐𐴧𐴞𐴓𐴢| 𐴀𐴞𐴕𐴏𐴝𐴕𐴡𐴓𐴧𐴝 𐴀𐴠 𐴃𐴝𐴔𐴦𐴝𐴔 𐴏𐴞𐴏𐴡𐴃𐴧𐴞 𐴐𐴥𐴞𐴤𐴑𐴧𐴝 𐴇𐴝𐴏𐴠𐴓𐴢 𐴒𐴡𐴌𐴝 𐴉𐴡𐴌𐴞𐴁𐴡| 𐴃𐴡𐴘𐴓𐴠 𐴀𐴝𐴣𐴀𐴌𐴝𐴓𐴧𐴝 𐴉𐴡𐴃𐴧𐴞 𐴀𐴠𐴑𐴧𐴝𐴕 𐴇𐴝𐴔𐴡𐴌𐴠 𐴀𐴠𐴁𐴃𐴠𐴊𐴝𐴃𐴧𐴞 𐴐𐴥𐴟𐴌𐴟 𐴒𐴡𐴌𐴝𐴌 𐴎𐴡𐴌𐴟𐴌𐴡𐴃𐴢 𐴕𐴥𐴝𐴘||

𐴐𐴝𐴘𐴈𐴢 𐴀𐴝𐴁𐴟 𐴔𐴟𐴏𐴀𐴝𐴁𐴢 𐴀𐴝𐴏𐴢 𐴏𐴟𐴌𐴞(𐴉𐴡𐴑𐴧𐴡𐴓𐴧𐴝𐴇𐴟 𐴀𐴝𐴏𐴌𐴝𐴇𐴟) 𐴕𐴞𐴎𐴡𐴌 𐴑𐴞𐴃𐴝𐴁𐴢 𐴀𐴡𐴑𐴧𐴡𐴓𐴡𐴃𐴢، 𐴁𐴡𐴗𐴃𐴢 𐴑𐴞𐴃𐴝𐴁𐴢 𐴀𐴝𐴏𐴠 𐴎𐴠𐴒𐴞𐴕𐴡𐴌 𐴐𐴥𐴟𐴌𐴟 𐴀𐴞𐴕𐴃𐴞 𐴒𐴡𐴙𐴅𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴁𐴤𐴝𐴘 𐴀𐴡𐴑𐴧𐴡𐴓𐴢 𐴀𐴝𐴣𐴀𐴌𐴝𐴌 𐴓𐴡𐴗 𐴉𐴥𐴟𐴖𐴝𐴘 𐴒𐴞𐴘𐴡𐴘، 𐴀𐴝𐴣𐴀𐴌𐴝 𐴉𐴟𐴌𐴝 𐴀𐴠𐴑𐴒𐴖𐴤𐴝 𐴃𐴝𐴇𐴝𐴌𐴞𐴑 𐴏𐴡𐴓𐴝𐴘𐴧𐴞، 𐴊𐴟𐴖𐴧𐴝 𐴃𐴝𐴇𐴝𐴌𐴞𐴑 𐴏𐴡𐴓𐴝𐴘𐴧𐴞، 𐴀𐴥𐴠𐴍𐴠 𐴒𐴡𐴓𐴃𐴞 𐴀𐴡𐴑𐴧𐴡𐴓𐴢 𐴀𐴥𐴡𐴘𐴧𐴠| 𐴁𐴤𐴝𐴘 𐴀𐴠 𐴁𐴡𐴀𐴘𐴒𐴞𐴕 𐴀𐴠𐴈𐴡𐴃𐴝𐴓𐴧𐴝 𐴓𐴠𐴑𐴤𐴞𐴥𐴌 𐴃𐴦𐴝𐴑𐴠 𐴀𐴡𐴕𐴡𐴌𐴝 𐴎𐴠𐴊𐴧𐴟𐴌𐴡𐴃𐴢 𐴀𐴝𐴣𐴀𐴌𐴝 𐴉𐴦𐴡𐴣𐴆𐴧𐴞 𐴕𐴞𐴎𐴡𐴌 𐴃𐴡𐴅𐴟𐴌𐴟𐴁𐴝 𐴓𐴡𐴘 𐴘𐴦𐴝𐴌 𐴁𐴝𐴊𐴡𐴃𐴧𐴞 𐴏𐴡𐴉𐴡𐴌 𐴐𐴥𐴟𐴌𐴟 𐴒𐴡𐴌𐴞𐴉𐴝𐴌𐴡| 𐴀𐴡𐴕𐴠𐴘𐴥𐴡 𐴉𐴞𐴏𐴡𐴌 𐴀𐴡 𐴒𐴡𐴓𐴃𐴞 𐴀𐴡𐴑𐴧𐴡𐴓𐴢 𐴊𐴟𐴖𐴝𐴌𐴝𐴘 𐴊𐴟𐴖𐴝𐴌𐴝𐴘 𐴊𐴡𐴙𐴐𐴢 𐴁𐴡𐴏𐴥𐴡𐴌 𐴀𐴥𐴠 𐴀𐴟𐴅𐴥𐴝𐴄𐴢 𐴀𐴡𐴑𐴧𐴡𐴓𐴢 𐴇𐴥𐴝𐴘 𐴇𐴥𐴝𐴘 𐴉𐴞𐴃𐴞𐴕 𐴀𐴥𐴞𐴕𐴃𐴞 𐴏𐴡𐴁𐴡𐴑 𐴇𐴝𐴏𐴠𐴓𐴢 𐴕𐴡𐴒𐴡𐴙𐴅𐴧𐴡| 𐴁𐴤𐴡𐴓𐴑𐴠 𐴀𐴡𐴕𐴡𐴃𐴧𐴞 𐴔𐴝𐴀𐴓𐴟𐴔 𐴃𐴝𐴑𐴝 𐴉𐴡𐴌𐴞𐴁𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴝𐴒𐴠 𐴀𐴠 𐴀𐴠 𐴒𐴡𐴓𐴃𐴞 𐴀𐴡𐴑𐴧𐴡𐴓𐴢 𐴉𐴞𐴏𐴡𐴌 𐴃𐴝𐴌𐴞𐴈𐴡𐴃𐴢 𐴖𐴝𐴑𐴞 𐴀𐴥𐴡𐴘𐴧𐴠 𐴀𐴡𐴕𐴠𐴘𐴥𐴡 𐴀𐴠𐴒𐴞𐴕𐴡𐴌 𐴖𐴡𐴌𐴠 𐴁𐴠𐴕𐴝 𐴐𐴥𐴟𐴌𐴟 𐴒𐴡𐴌𐴡| 𐴃𐴝𐴌 𐴁𐴝𐴊𐴡𐴃𐴧𐴞 𐴀𐴝𐴒𐴠𐴁𐴝𐴌𐴥𐴝 𐴐𐴥𐴟𐴌𐴟 𐴒𐴡𐴌𐴡||

𐴃𐴡𐴘 𐴀𐴡𐴕𐴡𐴌𐴝𐴘𐴡 𐴎𐴠𐴇𐴠𐴕𐴡𐴃𐴢 𐴘𐴦𐴝𐴕 𐴌𐴝𐴑𐴞𐴁𐴝 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴑𐴡𐴐𐴔𐴞𐴌𐴡𐴌 𐴃𐴝𐴇𐴝𐴌𐴞𐴑 𐴀𐴠𐴑𐴧𐴝𐴕 𐴏𐴡𐴁𐴡𐴑، 𐴀𐴝𐴉𐴒𐴝𐴕𐴞𐴏𐴃𐴝𐴕𐴡𐴌 𐴁𐴥𐴟𐴃𐴡𐴌𐴠𐴘𐴡 𐴎𐴠𐴒𐴞𐴕 𐴀𐴝𐴒𐴞 𐴅𐴞𐴇𐴝𐴊𐴢 𐴀𐴥𐴡𐴘𐴧𐴠 𐴌𐴝𐴐𐴞𐴘𐴝𐴌 𐴓𐴝𐴌𐴥𐴝𐴘𐴌 𐴀𐴝𐴈𐴠𐴌𐴞 𐴄𐴝𐴘𐴔𐴡𐴃𐴢 𐴎𐴠𐴑𐴞𐴏𐴧𐴟 𐴀𐴥𐴡𐴘𐴧𐴠 𐴃𐴝𐴌 𐴎𐴡𐴌𐴞𐴘𐴝𐴘𐴡 𐴖𐴝𐴎𐴠𐴇 𐴀𐴥𐴡𐴘 𐴒𐴞𐴘𐴡𐴘 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴥𐴠𐴍𐴠 𐴀𐴠𐴓𐴥𐴡𐴔𐴡𐴌𐴡 𐴇𐴡𐴔𐴃𐴞 𐴀𐴝𐴙𐴐𐴧𐴞𐴓𐴢، 𐴀𐴝𐴌 “𐴕𐴝𐴀𐴟𐴎𐴟 𐴁𐴞𐴓𐴧𐴝𐴇” 𐴀𐴠𐴈𐴓𐴝𐴏𐴡𐴌𐴡 𐴇𐴝𐴔𐴞𐴃𐴞 𐴀𐴝𐴙𐴐𐴧𐴞𐴓𐴢 𐴁𐴠𐴐𐴥𐴞 𐴖𐴝𐴎𐴠𐴇 𐴃𐴡𐴗𐴌𐴡𐴌 𐴖𐴡𐴌𐴠| 𐴎𐴝𐴌 𐴎𐴡𐴌𐴞𐴘𐴝 𐴁𐴝𐴊𐴡𐴃𐴧𐴞 𐴅𐴥𐴡𐴒𐴡𐴍𐴝 𐴐𐴥𐴟𐴌𐴟 𐴀𐴥𐴡𐴘 𐴒𐴞𐴘𐴡𐴘، 𐴀𐴝𐴉𐴡𐴏𐴡𐴃𐴢 𐴔𐴝𐴌𐴝𐴔𐴝𐴌𐴞 𐴐𐴥𐴟𐴌𐴟 𐴀𐴥𐴡𐴘 𐴒𐴞𐴘𐴡𐴘||

𐴃𐴡𐴘 𐴔𐴟𐴇𐴟𐴃𐴡𐴌𐴡𐴔 𐴁𐴤𐴝𐴘 𐴀𐴡𐴑𐴧𐴡𐴓𐴢! 𐴀𐴠 𐴃𐴝𐴔𐴦𐴝𐴔 𐴃𐴡𐴅𐴟𐴌𐴟𐴁𐴝 𐴀𐴝𐴒𐴠 𐴀𐴥𐴡𐴘 𐴒𐴞𐴘𐴡𐴘| 𐴕𐴞𐴎𐴡𐴌 𐴏𐴥𐴝𐴣𐴃𐴞 𐴀𐴡𐴑𐴧𐴡𐴓𐴡𐴌 𐴁𐴥𐴟𐴃𐴡𐴌𐴠، 𐴕𐴞𐴎𐴡𐴌 𐴁𐴥𐴟𐴃𐴡𐴌𐴠، 𐴁𐴠𐴒𐴧𐴞𐴕𐴡𐴌 𐴀𐴝𐴒𐴠 𐴕𐴞𐴎𐴡𐴌 𐴁𐴥𐴟𐴃𐴡𐴌𐴠 𐴘𐴦𐴝𐴌 𐴁𐴝𐴊𐴠 𐴕𐴞𐴎𐴡𐴌 𐴏𐴥𐴝𐴣𐴃𐴞 𐴀𐴡𐴑𐴧𐴡𐴓𐴡𐴌 𐴁𐴥𐴟𐴃𐴡𐴌𐴠 𐴀𐴠𐴓𐴥𐴡𐴔𐴡𐴌𐴠 𐴉𐴤𐴡𐴙𐴓𐴝𐴘𐴁𐴝𐴌 𐴁𐴠𐴐𐴥𐴞 𐴁𐴠𐴐𐴥𐴞 𐴁𐴠𐴐𐴥𐴞 𐴀𐴠𐴇𐴃𐴠𐴔𐴝𐴔 𐴒𐴡𐴌𐴡𐴕| 𐴎𐴠𐴃𐴡 𐴁𐴠𐴐𐴥𐴞 𐴀𐴠𐴓𐴥𐴡𐴔 𐴃𐴝𐴑𐴞𐴁𐴡 𐴀𐴥𐴠𐴃𐴡 𐴁𐴠𐴐𐴥𐴞 𐴀𐴝𐴓𐴧𐴝𐴇 𐴏𐴝𐴘𐴓𐴠 𐴃𐴝𐴇𐴝𐴌𐴞𐴑 𐴏𐴥𐴡𐴀𐴞 𐴌𐴝𐴏𐴧𐴝𐴌 𐴖𐴡𐴌𐴠 𐴃𐴝𐴑𐴞𐴁𐴡||

𐴀𐴝𐴌𐴕𐴡𐴘𐴓𐴠 𐴔𐴞𐴕𐴥𐴞𐴄𐴢 𐴓𐴝𐴒𐴞𐴁𐴡 𐴃𐴝𐴇𐴝𐴌𐴞𐴑 𐴏𐴥𐴡𐴀𐴞 𐴌𐴝𐴏𐴧𐴝𐴃𐴧𐴞 𐴁𐴝𐴘𐴌 𐴀𐴥𐴡𐴘𐴃𐴠| 𐴇𐴦𐴡𐴊𐴧𐴞𐴕 𐴀𐴝𐴒𐴠 𐴉𐴡𐴙𐴅𐴧𐴡𐴕𐴃𐴡 𐴀𐴞𐴌𐴝𐴑 𐴁𐴠𐴒𐴧𐴞𐴕𐴡𐴌 𐴔𐴝𐴃𐴥𐴝𐴌 𐴃𐴝𐴏𐴢 𐴀𐴝𐴙𐴐𐴧𐴞𐴓𐴊𐴠𐴕𐴡؟ 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴑𐴞𐴕𐴃𐴟 𐴀𐴝𐴙𐴅𐴧𐴝 𐴀𐴥𐴠𐴒𐴞𐴕𐴡𐴃𐴧𐴞 𐴑𐴞 𐴁𐴝𐴑𐴞 𐴀𐴝𐴏𐴠 𐴀𐴥𐴠 𐴃𐴝𐴔𐴦𐴝𐴔 𐴏𐴞𐴏𐴢 𐴀𐴡𐴑𐴧𐴡𐴓𐴡𐴃𐴧𐴞؟ 𐴃𐴡 𐴀𐴠𐴈𐴡𐴕𐴡 𐴃𐴝𐴌𐴝 𐴀𐴠𐴏𐴑𐴌𐴞𐴕𐴡𐴌 𐴖𐴡𐴌𐴠 𐴁𐴠𐴐𐴥𐴞 𐴐𐴥𐴟𐴕𐴊𐴡𐴌 𐴊𐴠𐴈𐴝𐴎𐴝𐴌| 𐴄𐴞𐴑 𐴀𐴝𐴏𐴠| 𐴔𐴝𐴕𐴥𐴟𐴙𐴐𐴢 𐴊𐴠𐴈𐴞𐴘𐴡𐴌𐴠 𐴈𐴦𐴡𐴊𐴠 𐴔𐴝𐴐𐴦𐴝 𐴀𐴝𐴓𐴧𐴝𐴇 𐴔𐴝𐴐𐴦𐴝 𐴀𐴝𐴓𐴧𐴝𐴇، 𐴀𐴠𐴈𐴡𐴕𐴡 𐴓𐴝𐴔𐴁𐴝 𐴓𐴝𐴔𐴁𐴝 𐴑𐴝𐴉𐴠𐴓𐴝 𐴀𐴡𐴑𐴧𐴡𐴓𐴢، 𐴓𐴝𐴔𐴁𐴝 𐴓𐴝𐴔𐴁𐴝 𐴒𐴝𐴌𐴞𐴌 𐴓𐴝𐴘𐴀𐴕 𐴀𐴡𐴑𐴧𐴡𐴓𐴢، 𐴁𐴠𐴒𐴧𐴞𐴕𐴃𐴡 𐴔𐴡𐴗𐴅𐴟𐴊𐴢 𐴀𐴝𐴏𐴠| 𐴃𐴝𐴌𐴝𐴌 𐴑𐴝𐴁𐴠𐴓𐴞𐴘𐴡𐴃𐴢 𐴁𐴠𐴐𐴥𐴞 𐴏𐴞𐴏𐴡 𐴔𐴧𐴝𐴎𐴠 𐴁𐴤𐴡𐴓𐴑𐴠 𐴁𐴠𐴇𐴠𐴃𐴡𐴌 𐴀𐴥𐴡𐴘𐴃𐴉𐴝𐴌𐴠، 𐴑𐴞𐴕𐴃𐴟 𐴃𐴝𐴌𐴝𐴌 𐴁𐴟𐴕𐴞𐴘𐴝𐴊𐴞 𐴃𐴡𐴌𐴞𐴑𐴝 𐴉𐴡𐴙𐴅𐴧𐴡𐴕𐴃𐴡 𐴒𐴡𐴓𐴡𐴃𐴢 𐴀𐴥𐴡𐴘 𐴒𐴞𐴘𐴡𐴘| 𐴃𐴝𐴌𐴝𐴌 𐴃𐴡𐴌𐴞𐴑𐴝 𐴀𐴝𐴌𐴠𐴑 𐴔𐴞𐴑𐴧𐴝 𐴉𐴥𐴞𐴌𐴞 𐴒𐴞𐴘𐴡𐴘||

𐴃𐴡𐴘𐴓𐴠 𐴀𐴠𐴓𐴥𐴡𐴔 𐴕𐴡𐴃𐴝𐴑𐴝𐴌 𐴎𐴡𐴌𐴞𐴘𐴝 𐴁𐴦𐴡𐴗𐴃𐴢 𐴁𐴡𐴌𐴡 𐴈𐴡𐴃𐴡𐴌𐴕𐴝𐴑 𐴕𐴡𐴃𐴞𐴅𐴝 𐴁𐴝𐴘𐴌 𐴀𐴥𐴡𐴘𐴃𐴉𐴝𐴌𐴠| 𐴀𐴝𐴌 𐴀𐴠𐴓𐴥𐴡𐴔𐴡 𐴏𐴞𐴌𐴞𐴉𐴢 𐴀𐴠𐴑 𐴊𐴟𐴘𐴎𐴡𐴕 𐴔𐴝𐴙𐴕𐴐𐴥𐴡𐴃𐴧𐴞 𐴃𐴝𐴑𐴞𐴓𐴠 𐴑𐴝𐴉𐴞 𐴕𐴡𐴀𐴘𐴁𐴡| 𐴀𐴝𐴣𐴀𐴌𐴝 𐴈𐴦𐴡𐴘𐴓𐴝𐴔𐴊𐴠 𐴉𐴟𐴌𐴝 𐴃𐴝𐴇𐴝𐴌𐴞𐴑𐴡𐴃𐴢 𐴀𐴠𐴓𐴥𐴡𐴔𐴡𐴌 𐴔𐴝𐴇𐴡𐴗𐴓𐴢 𐴃𐴡𐴘𐴧𐴝𐴌 𐴖𐴦𐴝𐴉𐴡𐴌𐴞𐴁𐴡| 𐴔𐴝𐴕𐴥𐴟𐴙𐴐𐴢 𐴀𐴡𐴑𐴧𐴡𐴓𐴡𐴃𐴧𐴞 𐴁𐴟𐴕𐴞𐴘𐴝𐴊𐴞 𐴀𐴥𐴞𐴏𐴝𐴉𐴠 𐴀𐴠𐴊𐴧𐴟𐴌 𐴔𐴝𐴓𐴟𐴔𐴝𐴃𐴢 𐴀𐴦𐴡𐴕𐴏𐴝، 𐴀𐴠𐴓𐴥𐴡𐴔𐴡𐴌 𐴀𐴞𐴕𐴋𐴞𐴓𐴧𐴝 𐴀𐴠𐴑𐴧𐴝𐴕 𐴑𐴝𐴁𐴠𐴓𐴠 𐴑𐴡𐴁𐴟𐴓𐴢 𐴔𐴡𐴌𐴃𐴡𐴁𐴝 𐴁𐴠𐴒𐴧𐴞𐴕𐴡𐴌 𐴃𐴝𐴑𐴡𐴕 𐴏𐴝𐴀 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴠𐴐𐴃𐴠𐴔𐴝𐴀𐴞 𐴃𐴡𐴗𐴌𐴡𐴌 𐴖𐴡𐴌𐴠 𐴀𐴠𐴑𐴒𐴖𐴤𐴝 𐴁𐴞𐴌𐴞𐴑 𐴃𐴝𐴑𐴝 𐴉𐴡𐴌𐴞𐴁𐴡| 𐴀𐴠𐴓𐴥𐴡𐴔𐴡𐴌 𐴎𐴡𐴌𐴞𐴘𐴝 𐴁𐴞𐴌𐴞𐴑 𐴓𐴝𐴒𐴞 𐴎𐴝𐴒𐴡𐴘| 𐴒𐴡𐴓𐴃𐴞 𐴀𐴥𐴡𐴘𐴓𐴠 𐴔𐴡𐴃𐴧𐴡𐴌 𐴏𐴥𐴝𐴣𐴃𐴞 𐴀𐴡𐴑𐴧𐴡𐴓𐴠 𐴌𐴟𐴑𐴞 𐴉𐴥𐴠𐴓𐴝𐴘𐴁𐴡، 𐴊𐴤𐴡𐴌𐴞 𐴉𐴥𐴠𐴓𐴝𐴘𐴁𐴡 𐴘𐴦𐴝𐴕 𐴑𐴞 𐴒𐴡𐴌𐴡𐴌||

𐴃𐴡 𐴏𐴥𐴟𐴖𐴝𐴓𐴃𐴡 𐴁𐴠𐴒𐴧𐴞𐴕 𐴀𐴠𐴍𐴥𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴞𐴕𐴋𐴞𐴓𐴧𐴝 𐴑𐴞𐴁𐴤𐴝𐴉𐴠 𐴀𐴥𐴡𐴘𐴓𐴡 𐴐𐴝𐴘𐴈𐴢 𐴀𐴝𐴁𐴟 𐴈𐴝𐴓𐴠𐴊𐴢 𐴐𐴥𐴡𐴇𐴞𐴊𐴢 𐴀𐴥𐴡𐴘𐴓𐴡 𐴀𐴝𐴌 𐴊𐴡𐴗𐴓𐴝𐴤𐴌 𐴁𐴥𐴟𐴃𐴡𐴌𐴃𐴞 𐴀𐴦𐴠𐴕 𐴈𐴡𐴕𐴥𐴡𐴑𐴞𐴘𐴝 𐴁𐴝𐴘𐴌 𐴕𐴡𐴀𐴥𐴡𐴘𐴓𐴡 𐴎𐴞𐴁𐴤𐴝 𐴏𐴝𐴔𐴧𐴠 𐴀𐴦𐴝𐴘𐴡𐴌𐴠 𐴈𐴦𐴡𐴘𐴁𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴠𐴒𐴞𐴕 𐴇𐴡𐴕𐴋𐴞𐴓𐴧𐴝 𐴎𐴟𐴓𐴟𐴔 𐴒𐴡𐴌𐴡𐴌؟ 𐴑𐴞𐴘𐴡𐴓𐴧𐴝 𐴀𐴥𐴡𐴘𐴓𐴡 𐴀𐴠𐴒𐴞𐴕؟ 𐴀𐴞𐴕𐴋𐴞𐴓𐴧𐴝 𐴑𐴞𐴘𐴡𐴓𐴧𐴝 𐴀𐴥𐴡𐴘𐴓𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴃𐴝𐴌𐴝 𐴀𐴥𐴠𐴍𐴠 𐴎𐴝𐴘 𐴎𐴡𐴈𐴡𐴕 𐴅𐴝𐴁𐴇𐴝𐴃𐴟𐴕 𐴕𐴟𐴏𐴌𐴝𐴤𐴌 𐴈𐴠𐴓𐴝𐴉𐴢 𐴓𐴝𐴌𐴥𐴝𐴘 𐴐𐴥𐴟𐴌𐴟 𐴒𐴡𐴙𐴅𐴧𐴠 𐴃𐴡𐴈𐴡𐴕 𐴊𐴡𐴗𐴓𐴝𐴤𐴌 𐴁𐴥𐴟𐴃𐴡𐴌𐴃𐴞 𐴀𐴦𐴠𐴕 𐴈𐴡𐴕𐴥𐴡 𐴔𐴝𐴕𐴥𐴟𐴙𐴐𐴢 𐴁𐴝𐴘𐴌 𐴕𐴦𐴡𐴀𐴡 𐴎𐴝𐴌𐴝 𐴏𐴥𐴟𐴖𐴝𐴓𐴢 𐴒𐴡𐴌𐴞𐴁𐴡||

𐴃𐴡 𐴀𐴝𐴓𐴧𐴝𐴇 𐴕𐴡𐴒𐴡𐴌𐴡𐴑 𐴀𐴝𐴣𐴀𐴌𐴝𐴌 𐴁𐴥𐴟𐴃𐴡𐴌𐴠𐴘𐴡 𐴀𐴞𐴕𐴋𐴞𐴓𐴧𐴝 𐴒𐴟𐴔𐴌𐴝𐴘𐴞 𐴊𐴝𐴈𐴠𐴓𐴢 𐴀𐴥𐴡𐴘 𐴎𐴝𐴒𐴡𐴘| 𐴓𐴠𐴑𐴞𐴕 𐴀𐴝𐴓𐴇𐴝𐴔𐴊𐴟 𐴓𐴞𐴓𐴧𐴝𐴇 𐴀𐴝𐴣𐴀𐴌𐴝 𐴀𐴠𐴊𐴧𐴟𐴦𐴌 𐴀𐴠𐴃𐴔𐴞𐴕𐴝𐴕 𐴀𐴝𐴏𐴞 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴠𐴈𐴡𐴕 𐴉𐴡𐴙𐴅𐴧𐴡𐴕𐴃𐴡 𐴀𐴝𐴣𐴀𐴌𐴝𐴌 𐴔𐴝𐴀𐴔𐴠𐴓𐴝 𐴀𐴠𐴊𐴧𐴟𐴦𐴌 𐴏𐴡𐴓𐴠𐴌 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴝𐴣𐴀𐴌𐴝𐴌 𐴀𐴠𐴍𐴥𐴠𐴃𐴡 𐴎𐴡𐴌𐴟𐴌𐴡𐴃𐴡𐴌 𐴁𐴝𐴘𐴌𐴠 𐴃𐴥𐴟𐴌𐴝 𐴁𐴠𐴐𐴞 𐴃𐴡𐴕𐴑𐴞𐴊𐴢 𐴒𐴡𐴌𐴝𐴎𐴝| 𐴁𐴤𐴡𐴓𐴑𐴠 𐴎𐴠 𐴏𐴞𐴏𐴡 𐴔𐴧𐴝𐴎𐴠 𐴕𐴡𐴀𐴡𐴕𐴏𐴝𐴀 𐴀𐴥𐴠𐴍𐴠𐴘𐴡 𐴃𐴡𐴕𐴑𐴞𐴊𐴢 𐴉𐴦𐴝𐴎𐴝| 𐴀𐴝𐴓𐴧𐴝𐴇𐴌 𐴇𐴝𐴣𐴏𐴥𐴠 𐴀𐴝𐴝𐴐𐴤𐴝 𐴒𐴡𐴌𐴞𐴌 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴝𐴣𐴀𐴌𐴝𐴌 𐴀𐴠𐴓𐴥𐴡𐴔𐴡𐴌 𐴔𐴝𐴇𐴡𐴗𐴓𐴢 𐴀𐴠𐴊𐴧𐴟𐴌𐴡 𐴈𐴥𐴡𐴌𐴝𐴉𐴢 𐴕𐴡𐴀𐴡 𐴀𐴦𐴝𐴔 𐴃𐴡𐴗𐴌𐴡𐴌 𐴖𐴡𐴌𐴠 𐴀𐴝𐴓𐴢 𐴑𐴝𐴘𐴊𐴝𐴌 𐴁𐴥𐴟𐴃𐴡𐴌𐴠 𐴀𐴠𐴃𐴡𐴁𐴡𐴌𐴡 𐴒𐴟𐴔𐴌𐴝𐴘𐴞 𐴐𐴥𐴟𐴌𐴟 𐴀𐴥𐴡𐴘 𐴎𐴝𐴘𐴁𐴡𐴘 𐴀𐴝𐴌 𐴁𐴠𐴒𐴧𐴞𐴕 𐴕𐴞𐴎𐴤𐴝𐴔 𐴃𐴝𐴑𐴞𐴁𐴡| 𐴔𐴝𐴙𐴕𐴟𐴐𐴥𐴡𐴌𐴠 𐴑𐴡𐴃𐴡𐴓𐴠 𐴀𐴦𐴝𐴔 𐴒𐴡𐴌𐴞𐴁𐴡، 𐴔𐴝𐴕𐴥𐴟𐴙𐴐𐴡𐴌𐴠 𐴕𐴝𐴇𐴡𐴑 𐴑𐴡𐴃𐴡𐴓𐴢 𐴒𐴡𐴌𐴞𐴁𐴡| 𐴀𐴝𐴣𐴌𐴝𐴌 𐴏𐴥𐴝𐴣𐴃𐴞 𐴀𐴦𐴡𐴓𐴠𐴃𐴡 𐴑𐴝𐴌𐴖𐴝𐴘𐴞 𐴒𐴡𐴌𐴝𐴌 𐴀𐴝𐴒𐴠 𐴑𐴟𐴌𐴞𐴁𐴝𐴌 𐴉𐴟𐴏𐴥𐴝𐴌 𐴒𐴡𐴌𐴠، 𐴑𐴝𐴌𐴖𐴝𐴘𐴞 𐴑𐴞𐴘𐴡𐴓𐴧𐴝 𐴒𐴡𐴌𐴝 𐴉𐴡𐴌𐴠𐴌، 𐴇𐴡𐴕 𐴖𐴝𐴅𐴥𐴝𐴓𐴧𐴝 𐴒𐴡𐴌𐴝 𐴉𐴡𐴌𐴠𐴌| 𐴅𐴝𐴏𐴟𐴏𐴢 𐴃𐴝𐴌𐴝𐴌𐴠 𐴇𐴝𐴖𐴝𐴓𐴝 𐴒𐴡𐴌𐴞𐴊𐴡 𐴃𐴡𐴘𐴓𐴠 𐴃𐴝𐴌𐴝 𐴁𐴝𐴎𐴞 𐴎𐴝𐴒𐴡𐴘| 𐴃𐴝𐴌𐴝 𐴀𐴠𐴑𐴁𐴝𐴌 𐴏𐴟𐴖𐴝𐴌 𐴔𐴝𐴌𐴞𐴃𐴠 𐴉𐴡𐴙𐴅𐴧𐴡𐴕𐴃𐴡 𐴀𐴝𐴣𐴀𐴌𐴝𐴃𐴧𐴞 𐴉𐴟𐴏𐴝𐴌 𐴒𐴡𐴌𐴞 𐴒𐴡𐴌𐴞، 𐴏𐴟𐴖𐴝𐴌 𐴔𐴝𐴌𐴞𐴘𐴟𐴔 𐴕𐴝𐴑𐴞 𐴕𐴡𐴔𐴝𐴌𐴞𐴘𐴟𐴔||

𐴃𐴡𐴘 𐴀𐴝𐴓𐴧𐴝𐴇𐴌 𐴌𐴝𐴇𐴝𐴔𐴡𐴃𐴠 𐴀𐴠𐴍𐴥𐴠 𐴃𐴟𐴌𐴝 𐴀𐴝𐴊𐴧𐴝𐴕 𐴁𐴞𐴌𐴞𐴑 𐴓𐴝𐴒𐴞 𐴀𐴝𐴏𐴠| 𐴑𐴞𐴕𐴃𐴟 𐴀𐴠 𐴀𐴠𐴓𐴥𐴡𐴔𐴡𐴌 𐴔𐴡𐴌𐴃𐴡𐴁𐴝𐴌 𐴎𐴠𐴃𐴡 𐴁𐴝𐴌𐴝𐴘𐴟𐴔، 𐴎𐴠𐴃𐴡 𐴔𐴝𐴀𐴓𐴟𐴔𐴝𐴃𐴢 𐴁𐴠𐴐𐴥𐴞 𐴀𐴥𐴡𐴘𐴁𐴡 𐴀𐴝𐴌 𐴀𐴝𐴣𐴀𐴌𐴝𐴌 𐴁𐴥𐴟𐴃𐴡𐴌𐴠 𐴀𐴦𐴠𐴕 𐴔𐴝𐴕𐴥𐴟𐴙𐴐𐴢 𐴁𐴠𐴐𐴥𐴞 𐴀𐴥𐴡𐴘𐴁𐴡 𐴎𐴝𐴌𐴝 𐴀𐴠𐴊𐴧𐴟𐴦𐴌 𐴎𐴝𐴇𐴥𐴠𐴌 𐴁𐴝𐴇𐴥𐴠𐴌 𐴃𐴡𐴗𐴌𐴡𐴌 𐴖𐴡𐴌𐴠 𐴇𐴝𐴓𐴝𐴓𐴢 𐴇𐴝𐴌𐴝𐴔𐴡𐴌𐴠 𐴎𐴝𐴕𐴞𐴁𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴎𐴞𐴕𐴋𐴞𐴓𐴧𐴝 𐴕𐴞𐴑𐴞 𐴇𐴡𐴎𐴌𐴡𐴃𐴢 𐴀𐴟𐴔𐴡𐴌 𐴌𐴡𐴎𐴞𐴘𐴡𐴓𐴧𐴝𐴇𐴟 𐴀𐴝𐴕𐴇𐴟𐴌𐴠 𐴔𐴡𐴏𐴥𐴞𐴘𐴃𐴡𐴌 𐴁𐴥𐴟𐴃𐴡𐴌𐴠 𐴀𐴠𐴑𐴁𐴝𐴌 𐴀𐴦𐴝𐴔 𐴀𐴠𐴑𐴎𐴡𐴕 𐴁𐴟𐴌𐴝 𐴔𐴝𐴕𐴥𐴟𐴙𐴐𐴢 𐴃𐴥𐴞𐴘𐴝𐴘𐴡𐴌𐴠 𐴀𐴠𐴃𐴠𐴌𐴝𐴎 𐴒𐴡𐴌𐴞𐴊𐴞𐴘𐴧𐴠، 𐴀𐴠𐴑𐴁𐴝𐴌 𐴀𐴦𐴝𐴔 𐴀𐴠𐴑𐴎𐴡𐴕 𐴔𐴝𐴙𐴕𐴐𐴥𐴠 𐴇𐴡𐴎𐴌𐴡𐴃𐴢 𐴀𐴝𐴁𐴟 𐴁𐴡𐴑𐴡𐴌 𐴌𐴡𐴎𐴞𐴘𐴡𐴓𐴧𐴝𐴇𐴟 𐴀𐴝𐴕𐴇𐴟𐴌𐴠 𐴀𐴠𐴃𐴠𐴌𐴝𐴎 𐴒𐴡𐴌𐴞𐴊𐴞𐴘𐴧𐴠| 𐴃𐴡𐴘𐴓𐴠 𐴀𐴠𐴒𐴞𐴕 𐴀𐴠𐴓𐴥𐴡𐴔𐴡𐴌 𐴎𐴡𐴌𐴞𐴘𐴝 𐴀𐴥𐴡𐴘𐴧𐴠𐴊𐴠𐴕𐴡؟ 𐴀𐴥𐴞𐴁𐴝𐴌 𐴇𐴝𐴣𐴏𐴥𐴠 𐴇𐴝𐴓𐴝𐴓𐴢 𐴇𐴝𐴌𐴝𐴔𐴡𐴌 𐴁𐴝𐴁𐴡𐴃𐴠 𐴀𐴠𐴊𐴧𐴟𐴦𐴌 𐴖𐴝𐴎𐴠𐴇 𐴃𐴡𐴗𐴌𐴡𐴌 𐴖𐴡𐴌𐴠 𐴎𐴝𐴕𐴝 𐴀𐴝𐴙𐴐𐴧𐴞𐴓𐴢 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴎𐴝𐴌 𐴎𐴡𐴌𐴞𐴘𐴝 𐴀𐴥𐴞𐴁𐴝 𐴀𐴟𐴎𐴟 𐴀𐴟𐴎𐴟 𐴈𐴦𐴡𐴘𐴊𐴞𐴘𐴧𐴠 𐴁𐴤𐴝𐴘 𐴘𐴦𐴝𐴕 𐴒𐴡𐴓𐴡𐴃𐴢، 𐴘𐴦𐴝𐴕 𐴏𐴥𐴡𐴀𐴞 𐴀𐴠𐴒𐴞𐴕 𐴀𐴡𐴕𐴠 𐴑𐴞 𐴒𐴡𐴌𐴡𐴌| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴃𐴡 𐴀𐴟𐴔𐴡𐴌 𐴇𐴡𐴕𐴃𐴞 𐴀𐴝𐴙𐴐𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴥𐴞𐴁𐴝 𐴔𐴡𐴇𐴡𐴌𐴡𐴌 𐴔𐴞𐴑𐴊𐴝𐴌𐴡𐴌 𐴁𐴝𐴁𐴡𐴃𐴠 𐴉𐴝𐴁𐴡𐴕𐴊𐴞 𐴓𐴝𐴒𐴝𐴘𐴁𐴡||

𐴃𐴡𐴘𐴓𐴠 𐴔𐴟𐴇𐴟𐴃𐴡𐴌𐴡𐴔 𐴁𐴤𐴝𐴘 𐴀𐴡𐴑𐴧𐴡𐴓𐴢! 𐴘𐴦𐴝𐴕 𐴀𐴥𐴡𐴘𐴓𐴊𐴠 𐴈𐴡𐴃𐴝 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴠𐴓𐴥𐴡𐴔𐴡𐴌 𐴎𐴡𐴌𐴞𐴘𐴝 𐴁𐴌𐴞𐴑 𐴓𐴝𐴒𐴠| 𐴀𐴝𐴌 𐴀𐴠𐴓𐴥𐴡𐴔𐴡𐴌𐴠 𐴔𐴡𐴅𐴔𐴟𐴀𐴞 𐴃𐴡𐴗𐴌𐴡𐴌 𐴖𐴡𐴌𐴠 𐴕𐴞𐴎𐴡𐴌 𐴁𐴥𐴟𐴃𐴡𐴌𐴠 𐴉𐴤𐴡𐴙𐴓𐴡𐴕𐴡𐴌 𐴎𐴡𐴌𐴟𐴌𐴡𐴃𐴢 𐴀𐴝𐴏𐴠| 𐴀𐴝𐴒𐴠𐴘𐴥𐴡 𐴀𐴡𐴕𐴡𐴌𐴝𐴌𐴠 𐴀𐴠𐴈𐴡𐴃𐴝𐴌 𐴔𐴠𐴏𐴥𐴝𐴓𐴢 𐴎𐴞𐴑𐴞𐴌 𐴒𐴡𐴌𐴝 𐴒𐴞𐴘𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴠 𐴃𐴡𐴕𐴎𐴞𐴔𐴡𐴃𐴡 𐴲𐴰 𐴑𐴟𐴌𐴞 𐴁𐴡𐴏𐴥𐴡𐴌 𐴀𐴝𐴒𐴠 𐴎𐴡𐴈𐴡𐴕 𐴔𐴟𐴅𐴝𐴇𐴞𐴊𐴞𐴕𐴡𐴌 𐴇𐴝𐴣𐴏𐴥𐴠 𐴀𐴟𐴓𐴝𐴔𐴝 𐴑𐴠𐴌𐴝𐴔 𐴕𐴡𐴀𐴝𐴙𐴐𐴧𐴞𐴓𐴢| 𐴀𐴠 𐴀𐴠𐴃𐴠𐴁𐴝𐴌𐴠 𐴔𐴟𐴅𐴝𐴇𐴞𐴊𐴞𐴕𐴡𐴌 𐴇𐴝𐴓𐴡𐴃𐴢 𐴕𐴝𐴎𐴟𐴑 𐴀𐴝𐴙𐴐𐴧𐴞𐴓𐴢| 𐴀𐴝𐴓𐴢 𐴅𐴝𐴎𐴝𐴘𐴠𐴌𐴡𐴃𐴢 𐴀𐴠𐴑𐴧𐴝𐴕 𐴈𐴡𐴃𐴡𐴌𐴕𐴝𐴑 𐴃𐴡𐴅𐴡𐴌𐴟𐴁𐴝𐴘𐴡 𐴒𐴡𐴌𐴝 𐴒𐴞𐴘𐴧𐴠| 𐴃𐴡𐴘 𐴀𐴥𐴠 𐴉𐴟𐴌𐴝 𐴔𐴡𐴌𐴇𐴝𐴓𐴝𐴌 𐴁𐴥𐴟𐴃𐴡𐴌𐴠 𐴁𐴦𐴡𐴗𐴃𐴢 𐴅𐴞𐴇𐴝𐴊𐴞 𐴃𐴡𐴕𐴎𐴞𐴔 𐴀𐴡𐴑𐴧𐴡𐴓𐴠 𐴀𐴠 𐴓𐴝𐴓𐴏𐴞 𐴘𐴥𐴝 𐴀𐴠 𐴅𐴡𐴎𐴁𐴝𐴌 𐴏𐴥𐴝𐴣𐴃𐴠 𐴕𐴞𐴎𐴡𐴌 𐴑𐴞𐴏𐴧𐴟 𐴀𐴝𐴇𐴥𐴝𐴔 𐴏𐴥𐴝𐴣𐴃𐴞 𐴀𐴦𐴡𐴓𐴡𐴌𐴠 𐴀𐴝𐴎𐴟𐴙𐴌 𐴒𐴡𐴙𐴅𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴃𐴝𐴌𐴝 𐴎𐴝𐴘𐴡𐴌𐴠 𐴀𐴠𐴓𐴥𐴡𐴔 𐴇𐴝𐴏𐴠𐴓𐴢 𐴒𐴡𐴌𐴡𐴑| 𐴀𐴝𐴌 𐴖𐴝𐴉𐴠𐴏𐴢 𐴀𐴦𐴝𐴘𐴡𐴌𐴠 𐴔𐴟𐴅𐴝𐴇𐴞𐴊𐴞𐴕𐴡𐴌 𐴎𐴡𐴌𐴟𐴌𐴡𐴃𐴢 𐴀𐴡𐴑𐴧𐴡𐴓𐴡𐴌 𐴁𐴝𐴁𐴡𐴃𐴠 𐴌𐴝𐴇𐴕𐴟𐴔𐴝𐴘𐴞 𐴒𐴡𐴌𐴠| 𐴃𐴡𐴘 𐴀𐴝𐴓𐴢 𐴑𐴝𐴘𐴊𐴝𐴌 𐴃𐴡𐴌𐴉𐴡𐴃𐴧𐴞 𐴐𐴝𐴘𐴈𐴢 𐴀𐴝𐴃𐴞𐴘𐴝𐴃𐴟𐴓𐴧𐴝𐴇 𐴀𐴝𐴓𐴢 𐴓𐴞𐴁𐴞(𐴌𐴇) 𐴌𐴠 𐴀𐴝𐴎𐴟𐴙𐴌 𐴒𐴡𐴙𐴅𐴧𐴠| 𐴀𐴥𐴞𐴁𐴝𐴌 𐴏𐴥𐴝𐴣𐴃𐴠 𐴉𐴟𐴌𐴝 𐴀𐴠𐴑 𐴒𐴟𐴌𐴟𐴉𐴢 𐴊𐴞𐴉𐴠𐴍𐴝𐴘𐴧𐴠 𐴏𐴥𐴝𐴣𐴃𐴞 𐴀𐴡𐴑𐴧𐴡𐴓𐴡𐴌| 𐴀𐴥𐴞𐴕𐴋𐴞𐴓𐴧𐴝 𐴐𐴝𐴘𐴈𐴢 𐴀𐴝𐴁𐴟 𐴘𐴝𐴇𐴘𐴝 𐴀𐴝𐴓𐴢 𐴓𐴞𐴁𐴞 𐴌𐴡𐴇𐴞𐴔𐴝𐴇𐴟𐴓𐴧𐴝𐴇𐴌𐴠 𐴀𐴝𐴎𐴟𐴙𐴌 𐴒𐴡𐴙𐴅𐴧𐴠 𐴓𐴞𐴁𐴞𐴘𐴝𐴌 𐴅𐴞𐴇𐴝𐴊𐴞 𐴒𐴟𐴌𐴟𐴉𐴢 “𐴅𐴡𐴔𐴝𐴀𐴝𐴃𐴠 𐴔𐴟𐴑𐴝𐴃𐴠𐴓𐴝” 𐴘𐴠| 𐴀𐴝𐴌 𐴀𐴥𐴠𐴃𐴝𐴌𐴝 𐴁𐴠𐴒𐴧𐴞𐴕 𐴁𐴡𐴌𐴃𐴝𐴕𐴞𐴘𐴝 𐴎𐴝𐴘𐴧𐴠 𐴀𐴝𐴌 𐴀𐴥𐴠𐴍𐴠 𐴎𐴝𐴘 𐴀𐴠𐴓𐴥𐴡𐴔 𐴇𐴝𐴏𐴠𐴓𐴢 𐴒𐴡𐴙𐴅𐴧𐴠| 𐴀𐴝𐴌 𐴖𐴝𐴉𐴠𐴏𐴢 𐴀𐴝𐴙𐴐𐴧𐴠| 𐴐𐴥𐴡𐴕 𐴱𐴹𐴹𐴱 𐴡𐴃𐴢 𐴎𐴠 𐴀𐴞𐴕𐴁𐴤𐴠𐴏𐴔𐴠𐴣𐴄𐴢 𐴀𐴥𐴡𐴘𐴧𐴠 𐴘𐴦𐴝𐴕𐴡𐴌، 𐴀𐴥𐴞𐴁𐴝 𐴲𐴰𐴰𐴴 𐴡𐴃𐴧𐴞 𐴲𐴰𐴱𐴲، 𐴲𐴰𐴱𐴳 𐴉𐴡𐴙𐴅𐴧𐴡𐴕𐴃𐴡 𐴉𐴟𐴌𐴝 𐴅𐴞𐴇𐴝𐴊𐴡𐴌 𐴀𐴠𐴕𐴃𐴠𐴇𐴝𐴘𐴞 𐴔𐴡𐴐𐴑𐴞𐴓𐴢 𐴔𐴡𐴌𐴇𐴝𐴓𐴝 𐴀𐴡𐴑𐴧𐴡𐴓𐴡𐴌𐴠 𐴇𐴥𐴡𐴓𐴢 𐴒𐴡𐴌𐴞𐴁𐴝𐴌 𐴎𐴡𐴌𐴞𐴘 𐴁𐴡𐴘𐴕𐴧𐴠| 𐴀𐴥𐴞𐴁𐴝 𐴀𐴥𐴠𐴍𐴠 𐴀𐴝𐴣𐴀𐴌𐴝𐴓𐴧𐴝𐴘 𐴁𐴡𐴓𐴞 𐴉𐴝𐴘𐴊𐴝 𐴊𐴞𐴘𐴧𐴠||

𐴃𐴦𐴡 𐴀𐴥𐴠𐴈𐴡𐴃𐴝𐴓𐴧𐴝 𐴘𐴦𐴝𐴕𐴡𐴌 𐴁𐴝𐴁𐴡𐴃𐴠 𐴀𐴠𐴈𐴡𐴕 𐴓𐴡𐴃𐴞 𐴉𐴞𐴑𐴞𐴌 𐴒𐴡𐴌𐴡، 𐴀𐴠𐴈𐴡𐴕 𐴓𐴡𐴃𐴞 𐴕𐴞𐴎𐴡𐴌 𐴁𐴥𐴟𐴃𐴡𐴌𐴠 𐴀𐴟𐴓𐴝𐴔𐴝 𐴀𐴦𐴡𐴓𐴡𐴌𐴠 𐴔𐴟𐴏𐴃𐴡𐴑𐴞𐴓𐴢 𐴁𐴤𐴝𐴉𐴠 𐴐𐴡𐴌𐴞𐴑 𐴒𐴡𐴌𐴡، 𐴎𐴝𐴌𐴝 𐴀𐴝𐴒𐴠𐴓𐴡𐴃𐴞 𐴀𐴦𐴝𐴓𐴠𐴔 𐴃𐴝𐴌𐴝𐴌𐴠 𐴅𐴞𐴇𐴝𐴊𐴡𐴌 𐴔𐴞𐴑𐴧𐴝 𐴀𐴝𐴕𐴝 𐴎𐴝𐴘𐴁𐴡| 𐴑𐴞𐴕𐴃𐴟 𐴘𐴦𐴝𐴕𐴥𐴡 𐴀𐴝𐴇𐴥𐴝𐴔، 𐴘𐴦𐴝𐴕𐴡𐴃𐴧𐴞 𐴁𐴠𐴐𐴥𐴞 𐴀𐴝𐴇𐴥𐴝𐴔 𐴀𐴥𐴡𐴘𐴓𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴔𐴟𐴅𐴝𐴇𐴞𐴊𐴞𐴕𐴡𐴌𐴠 𐴀𐴦𐴝𐴓𐴠𐴔 𐴁𐴝𐴕𐴡𐴕| 𐴄𐴞𐴑 𐴀𐴝𐴏𐴠| 𐴅𐴞𐴇𐴝𐴊𐴡𐴌 𐴕𐴞𐴎𐴡𐴌 𐴔𐴟𐴏𐴃𐴡𐴑𐴞𐴓𐴢 𐴃𐴡𐴌𐴁𐴞𐴘𐴝𐴤 𐴀𐴝𐴏𐴠| 𐴅𐴞𐴇𐴝𐴊𐴠 𐴀𐴞𐴕𐴏𐴝𐴕𐴡𐴌𐴠 𐴀𐴡𐴙𐴕𐴧𐴡 𐴋𐴦𐴡𐴘𐴓𐴧𐴝 𐴀𐴞𐴕𐴏𐴝𐴕 𐴁𐴝𐴕𐴝𐴘𐴊𐴠| 𐴐𐴝𐴘𐴈𐴢 𐴀𐴝𐴁𐴊𐴟𐴓𐴧𐴝𐴇 𐴀𐴝𐴎𐴧𐴝𐴔𐴠 𐴈𐴡𐴘𐴃𐴡𐴊𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴅𐴞𐴇𐴝𐴊𐴢 𐴕𐴞𐴎𐴠 𐴁𐴝𐴎𐴠 𐴀𐴠𐴑𐴧𐴝𐴕 𐴔𐴝𐴊𐴝𐴌𐴝𐴏𐴤𐴝| 𐴀𐴠 𐴔𐴝𐴊𐴝𐴌𐴝𐴏𐴤𐴝𐴌 𐴀𐴝𐴓𐴡𐴑 𐴁𐴤𐴝𐴉𐴠 𐴄𐴠𐴍𐴞𐴚 𐴀𐴝𐴏𐴠| 𐴀𐴠 𐴄𐴠𐴍𐴞𐴚 𐴊𐴟𐴕𐴞𐴘𐴝𐴌 𐴀𐴝𐴌 𐴈𐴡𐴕𐴥𐴡 𐴎𐴝𐴒𐴝𐴃𐴢 𐴉𐴦𐴝𐴕𐴡𐴎𐴝| 𐴀𐴠𐴍𐴥𐴠 𐴌𐴠𐴅𐴝𐴓𐴢(𐴁𐴦𐴝𐴊𐴟𐴌) 𐴁𐴡𐴕𐴠، 𐴀𐴞𐴕𐴏𐴝𐴕 𐴁𐴡𐴕𐴠| 𐴌𐴠𐴅𐴝𐴓𐴢 𐴈𐴦𐴡𐴊𐴠: 𐴌𐴠𐴅𐴝𐴓𐴢 𐴏𐴞𐴌𐴞𐴉𐴢 𐴀𐴞𐴕𐴏𐴝𐴕𐴡𐴌𐴠 𐴈𐴦𐴡𐴊𐴠𐴕𐴡 𐴔𐴡𐴌𐴡𐴊𐴢 𐴁𐴡𐴕𐴠 𐴈𐴦𐴡𐴘𐴃𐴢 𐴉𐴝𐴌𐴡| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴃𐴡𐴘 𐴀𐴠𐴍𐴥𐴠 𐴔𐴡𐴌𐴡𐴊𐴢 𐴁𐴡𐴕𐴠 𐴎𐴝𐴌𐴝𐴌 𐴁𐴥𐴟𐴃𐴡𐴌𐴠 𐴑𐴞𐴘𐴝𐴊𐴡𐴃𐴢 𐴒𐴡𐴌𐴝𐴌 𐴑𐴝𐴁𐴠𐴓𐴞𐴘𐴡𐴃𐴢 𐴃𐴝𐴑𐴠| 𐴎𐴝𐴌𐴝 𐴀𐴟𐴔𐴧𐴡𐴃𐴡𐴌𐴠 𐴏𐴥𐴝𐴣𐴃𐴠𐴓𐴡𐴘 𐴏𐴡𐴓𐴝𐴌 𐴑𐴝𐴁𐴠𐴓𐴞𐴘𐴡𐴃𐴢 𐴌𐴝𐴑𐴠| 𐴀𐴥𐴠𐴒𐴞𐴕 𐴀𐴥𐴡𐴘𐴓𐴊𐴠 𐴅𐴞𐴇𐴝𐴊𐴡𐴃𐴢 𐴁𐴡𐴕𐴠𐴊𐴠| 𐴀𐴝𐴌 𐴒𐴡𐴃𐴡 𐴉𐴡𐴦𐴀𐴌𐴟 𐴀𐴠𐴑 𐴀𐴦𐴝𐴓𐴠𐴔𐴡𐴌 𐴇𐴝𐴣𐴏𐴥𐴠 𐴁𐴡𐴙𐴐𐴧𐴞𐴓𐴝𐴔 𐴀𐴥𐴞𐴁𐴝𐴘𐴠 𐴀𐴠𐴑𐴧𐴝𐴕 𐴐𐴥𐴟𐴕𐴊𐴡𐴌 𐴈𐴡𐴃𐴝 𐴈𐴡𐴘𐴧𐴠| 𐴀𐴥𐴞𐴁𐴝 𐴈𐴡𐴘𐴓𐴡𐴊𐴠 𐴔𐴡𐴗𐴓𐴝𐴕𐴝 𐴑𐴝𐴏𐴠𐴔 𐴕𐴝𐴕𐴟𐴃𐴟𐴖𐴞 𐴌𐴡𐴇𐴞𐴔𐴝𐴇𐴟𐴓𐴧𐴝 𐴀𐴠𐴑𐴒𐴖𐴤𐴝 𐴀𐴝𐴇𐴥𐴝𐴔 𐴅𐴟𐴔𐴓𐴝 𐴘𐴦𐴝𐴕 𐴈𐴦𐴡𐴘𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴔𐴝𐴊𐴝𐴌𐴝𐴏𐴤𐴝𐴃𐴧𐴞 𐴀𐴠𐴑𐴎𐴡𐴕 𐴔𐴦𐴝𐴔𐴟𐴓𐴞 𐴏𐴥𐴞𐴂𐴝𐴇𐴞 𐴃𐴡𐴘𐴧𐴝𐴌 𐴀𐴥𐴡 𐴔𐴝𐴊𐴝𐴌𐴝𐴏𐴤𐴝𐴌 𐴃𐴡𐴌𐴁𐴞𐴘𐴡𐴃𐴢 𐴓𐴡𐴘 𐴀𐴝𐴌 𐴔𐴡𐴏𐴥𐴞𐴃𐴡𐴌 𐴃𐴡𐴌𐴁𐴞𐴘𐴡𐴃𐴢 𐴓𐴡𐴘 𐴑𐴝𐴘𐴠𐴊𐴢 𐴉𐴡𐴘𐴊𐴝 𐴀𐴥𐴡||

𐴃𐴝𐴀𐴛𐴌 𐴀𐴠 𐴊𐴟𐴕𐴟 𐴈𐴡𐴃𐴝𐴃𐴢 𐴉𐴡𐴌𐴡𐴑 𐴀𐴥𐴡𐴘𐴓𐴊𐴠 𐴘𐴦𐴝𐴕 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴔𐴡𐴏𐴥𐴞𐴃𐴡𐴌 𐴃𐴡𐴌𐴁𐴞𐴘𐴡𐴃𐴡𐴃𐴢، 𐴔𐴡𐴏𐴥𐴞𐴃𐴡 𐴔𐴧𐴝𐴎𐴠 𐴀𐴞𐴔𐴝𐴔 𐴔𐴝𐴙𐴕𐴐𐴥𐴡𐴌 𐴏𐴥𐴝𐴣𐴃𐴠 𐴀𐴡𐴃𐴧𐴡 𐴒𐴟𐴎𐴝𐴌𐴠، 𐴁𐴦𐴡𐴗𐴃𐴢 𐴔𐴝𐴕𐴥𐴟𐴙𐴐𐴢 𐴀𐴝𐴘𐴧𐴠، 𐴃𐴝𐴌𐴝𐴌 𐴏𐴥𐴝𐴣𐴃𐴠 𐴁𐴡𐴘𐴧𐴠، 𐴃𐴝𐴌𐴝𐴌 𐴏𐴥𐴝𐴣𐴃𐴠 𐴈𐴡𐴃𐴝 𐴈𐴦𐴡، 𐴎𐴡𐴊𐴞 𐴔𐴡𐴏𐴥𐴞𐴃𐴢 𐴘𐴦𐴝𐴕 𐴎𐴞𐴕𐴊𐴝 𐴔𐴡𐴏𐴥𐴞𐴃𐴢 𐴀𐴥𐴡، 𐴀𐴝𐴣𐴀𐴌𐴝𐴌 𐴔𐴡𐴏𐴥𐴞𐴃𐴡𐴌 𐴋𐴦𐴡𐴘𐴓𐴧𐴝 𐴕𐴡𐴀𐴡| 𐴎𐴞𐴕𐴋𐴞𐴓𐴧𐴝 𐴕𐴞𐴑𐴞 𐴀𐴝𐴒𐴡𐴌 𐴎𐴟𐴒𐴡𐴃𐴢 𐴔𐴡𐴏𐴥𐴞𐴃𐴢 𐴀𐴡𐴑𐴧𐴡𐴓𐴢 𐴀𐴥𐴡𐴘𐴃𐴡| 𐴎𐴞𐴘𐴝𐴕 𐴐𐴤𐴡𐴔𐴝𐴎𐴡𐴌 𐴔𐴡𐴌𐴑𐴡𐴏𐴢 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓𐴢 𐴀𐴥𐴡𐴘𐴃𐴡| 𐴃𐴡𐴘 𐴔𐴝𐴕𐴥𐴟𐴙𐴐𐴢 𐴕𐴞𐴎𐴡𐴌 𐴔𐴡𐴏𐴝𐴓𐴝 𐴀𐴡𐴑𐴧𐴡𐴓𐴢 𐴓𐴡𐴘𐴀𐴝𐴘𐴃𐴡، 𐴕𐴞𐴎𐴡𐴌 𐴔𐴡𐴐𐴑𐴞𐴓𐴝𐴃𐴡𐴌𐴠 𐴀𐴝𐴕𐴞𐴃𐴡، 𐴕𐴞𐴎𐴡𐴌 𐴇𐴡𐴙𐴅𐴧𐴝 𐴀𐴡𐴑𐴧𐴡𐴓𐴢 𐴉𐴝𐴘𐴏𐴝𐴓𐴝 𐴒𐴡𐴌𐴝𐴘𐴃𐴡، 𐴀𐴝𐴌𐴥𐴡 𐴔𐴟𐴈𐴃𐴡𐴓𐴞𐴉𐴢 𐴔𐴝𐴕𐴥𐴟𐴙𐴐𐴢 𐴀𐴡𐴑𐴧𐴡𐴓𐴢 𐴀𐴝𐴘𐴃𐴡، 𐴀𐴥𐴠𐴍𐴠 𐴁𐴞𐴓𐴑𐴟𐴓𐴢 𐴁𐴠𐴈𐴥𐴝𐴣 𐴔𐴝𐴕𐴥𐴟𐴙𐴐𐴡 𐴕𐴟𐴖𐴥𐴝𐴏𐴢 𐴉𐴡𐴌𐴞𐴁𐴡𐴓𐴧𐴝 𐴀𐴝𐴘𐴃𐴡، 𐴁𐴠𐴊𐴝𐴃𐴞 𐴑𐴞𐴏𐴞𐴔𐴡𐴌 𐴔𐴝𐴕𐴥𐴟𐴙𐴐𐴡 𐴀𐴝𐴘𐴃𐴡| 𐴁𐴡𐴌𐴡 𐴕𐴠𐴑𐴧𐴝𐴌 𐴊𐴦𐴞𐴕𐴊𐴝𐴌 𐴔𐴝𐴕𐴥𐴟𐴙𐴐𐴡 𐴀𐴝𐴘𐴃𐴡| 𐴀𐴠𐴒𐴞𐴕 𐴁𐴠𐴒𐴧𐴞𐴕𐴡𐴌𐴠 𐴏𐴥𐴝𐴣𐴃𐴠 𐴓𐴡𐴘 𐴏𐴡𐴓𐴠| 𐴀𐴡𐴃𐴧𐴡 𐴒𐴟𐴎𐴝𐴌𐴠 𐴃𐴝𐴌𐴝𐴌 𐴏𐴥𐴝𐴣𐴃𐴠| 𐴃𐴡𐴘𐴓𐴠 𐴀𐴠𐴓𐴠𐴕𐴊𐴠𐴕𐴡𐴌𐴠 𐴊𐴠𐴑𐴤𐴞𐴘𐴡𐴌𐴠 𐴎𐴠 𐴔𐴝𐴕𐴥𐴟𐴙𐴐𐴢 𐴃𐴝𐴌 𐴏𐴥𐴝𐴣𐴃𐴠 𐴃𐴝𐴑𐴠، 𐴎𐴠 𐴔𐴝𐴕𐴥𐴟𐴙𐴐𐴢 𐴃𐴝𐴌 𐴇𐴝𐴣𐴏𐴥𐴠 𐴃𐴡𐴌𐴁𐴞𐴘𐴡𐴃𐴢 𐴇𐴝𐴏𐴠𐴓𐴢 𐴒𐴡𐴌𐴠 𐴃𐴝𐴌𐴝 𐴀𐴠 𐴔𐴦𐴝𐴔𐴠𐴓𐴝 𐴀𐴡𐴑𐴧𐴡𐴓𐴡𐴌𐴠 𐴊𐴠𐴑𐴤𐴞𐴘𐴡𐴌𐴠 𐴑𐴝𐴔𐴠𐴓𐴢 𐴁𐴤𐴝𐴉𐴠 𐴀𐴠𐴑 𐴓𐴠𐴙𐴋𐴝𐴌 𐴆𐴞𐴉𐴢 𐴃𐴡𐴘𐴧𐴝𐴌 𐴖𐴦𐴝 𐴐𐴥𐴟𐴌𐴟 𐴀𐴥𐴡𐴘 𐴎𐴝𐴒𐴡𐴘| 𐴑𐴞𐴘𐴡𐴓𐴧𐴝 𐴁𐴡𐴓𐴞𐴈𐴡𐴘𐴓𐴠 𐴀𐴥𐴠𐴍𐴠 𐴀𐴥𐴞𐴁𐴝 𐴀𐴞𐴔𐴝𐴔𐴡𐴃𐴞 𐴒𐴡𐴌𐴠𐴌، 𐴔𐴝𐴙𐴕𐴐𐴥𐴡𐴌 𐴑𐴞𐴘𐴊𐴡𐴃𐴢 𐴒𐴡𐴌𐴠𐴌||

𐴃𐴡𐴘𐴓𐴠 𐴀𐴠𐴒𐴞𐴕 𐴀𐴥𐴡𐴘𐴓𐴊𐴠 𐴔𐴡𐴏𐴥𐴞𐴃𐴡𐴌 𐴁𐴝𐴁𐴡𐴃𐴠، 𐴀𐴝𐴌𐴠𐴑 𐴔𐴞𐴑𐴧𐴝 𐴔𐴝𐴊𐴝𐴌𐴝𐴏𐴤𐴝𐴃𐴢 𐴀𐴥𐴞𐴕𐴋𐴞𐴓𐴧𐴝 𐴒𐴡𐴌𐴝 𐴕𐴡𐴎𐴝، 𐴔𐴝𐴝𐴊𐴡𐴌𐴝𐴏𐴤𐴝𐴃𐴢 𐴏𐴞𐴌𐴞𐴉𐴢 𐴑𐴠𐴓𐴝𐴏𐴢 𐴀𐴥𐴡𐴊𐴠، 𐴀𐴠𐴒𐴞𐴕 𐴀𐴥𐴡𐴊𐴠، 𐴀𐴠𐴈𐴥𐴡𐴕 𐴎𐴠𐴒𐴞𐴕 𐴏𐴡𐴓𐴠𐴌| 𐴊𐴡𐴌𐴡𐴏𐴡𐴌 𐴎𐴡𐴌𐴞𐴘𐴝 𐴈𐴡𐴕𐴥𐴡 𐴊𐴞𐴕𐴥𐴡 𐴉𐴟𐴌𐴝𐴉𐴟𐴌𐴞 𐴁𐴤𐴝𐴉𐴠 𐴃𐴡𐴌𐴁𐴞𐴘𐴡𐴃𐴢 𐴕𐴡𐴀𐴡| 𐴃𐴡𐴌𐴁𐴞𐴘𐴡𐴃𐴢 𐴀𐴠𐴑 𐴏𐴥𐴝𐴣𐴃𐴠 𐴃𐴝𐴑𐴡𐴕𐴡𐴌 𐴎𐴡𐴌𐴞𐴘𐴝 𐴇𐴝𐴏𐴠𐴓𐴢 𐴒𐴡𐴌𐴝𐴎𐴝𐴊𐴠| 𐴃𐴡𐴌𐴁𐴞𐴘𐴡𐴃𐴢 𐴏𐴟𐴇𐴟𐴁𐴡𐴃𐴡𐴌 𐴎𐴡𐴌𐴞𐴘𐴝 𐴇𐴝𐴏𐴠𐴓𐴢 𐴀𐴥𐴡𐴊𐴠| 𐴈𐴡𐴕𐴥𐴡𐴑𐴞𐴘𐴡𐴌 𐴑𐴟𐴔𐴉𐴝𐴕𐴞𐴃𐴢 𐴃𐴝𐴑𐴝𐴌 𐴎𐴡𐴌𐴞𐴘𐴝 𐴀𐴥𐴡𐴊𐴠| 𐴀𐴝𐴌 𐴒𐴡𐴃𐴡 𐴇𐴝𐴙𐴓𐴧𐴝 𐴁𐴤𐴝𐴘𐴡𐴌 𐴏𐴥𐴝𐴣𐴃𐴠 𐴈𐴡𐴃𐴝 𐴀𐴥𐴡𐴘𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴝𐴀𐴛 𐴈𐴡𐴘𐴞𐴊𐴠 𐴏𐴝𐴇𐴝𐴁𐴝𐴌𐴠 𐴔𐴝𐴗𐴓𐴝𐴕𐴝 𐴀𐴝𐴁𐴊𐴟 𐴏𐴧𐴡𐴔𐴡𐴊𐴠 𐴕𐴞𐴎𐴡𐴌 𐴑𐴞𐴃𐴝𐴁𐴡𐴃𐴢 𐴀𐴠𐴈𐴡𐴃𐴝𐴌𐴠 𐴓𐴞𐴙𐴑𐴧𐴠𐴤 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴏𐴝𐴇𐴝𐴁𐴝𐴌𐴠 𐴏𐴝𐴇𐴝𐴁𐴝 𐴈𐴡𐴖𐴝𐴎𐴝𐴊𐴠 𐴐𐴝𐴒𐴞𐴌𐴞𐴊𐴢 𐴈𐴡𐴖𐴦𐴝 𐴕𐴡𐴎𐴝| 𐴏𐴝𐴇𐴝𐴁𐴝 𐴀𐴠𐴈𐴡𐴃𐴝𐴓𐴧𐴝 𐴈𐴡𐴖𐴝𐴎𐴝𐴊𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴃𐴝𐴌𐴝 𐴏𐴟𐴇𐴟𐴁𐴡𐴃𐴢 𐴉𐴝𐴘𐴧𐴠| 𐴃𐴝𐴌𐴝 𐴑𐴟𐴔𐴉𐴝𐴕𐴞 𐴉𐴝𐴘𐴧𐴠| 𐴃𐴝𐴌𐴝 𐴕𐴡𐴁𐴞 𐴀𐴝𐴓𐴝𐴘𐴇𐴞 𐴏𐴧𐴝𐴓𐴝𐴔𐴡𐴌 𐴏𐴥𐴝𐴣𐴃𐴠 𐴀𐴡𐴃𐴧𐴡 𐴒𐴟𐴎𐴝𐴌𐴞𐴁𐴝𐴌 𐴔𐴡𐴗𐴑𐴝 𐴉𐴝𐴘𐴧𐴠| 𐴃𐴝𐴌𐴝 𐴕𐴡𐴁𐴞 𐴀𐴝𐴓𐴝𐴘𐴇𐴞 𐴏𐴧𐴝𐴓𐴝𐴔𐴡𐴃𐴧𐴞 𐴊𐴝𐴗𐴌𐴝 𐴕𐴡𐴒𐴡𐴌𐴠| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴃𐴝𐴌 𐴔𐴡𐴃𐴡𐴓𐴡𐴁𐴢 𐴘𐴦𐴝𐴕 𐴕𐴡𐴀𐴡 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴃𐴝𐴌𐴝 𐴕𐴡𐴉𐴡𐴌𐴠| 𐴏𐴝𐴇𐴝𐴁𐴝 𐴑𐴠𐴌𐴝𐴔 𐴀𐴦𐴡𐴓𐴠𐴘𐴡 𐴔𐴟𐴏𐴃𐴡𐴑𐴞𐴓𐴢 𐴁𐴤𐴝𐴉𐴠 𐴕𐴡𐴁𐴞 𐴀𐴝𐴓𐴝𐴘𐴇𐴞 𐴏𐴧𐴝𐴓𐴝𐴔𐴡𐴃𐴧𐴞 𐴉𐴡𐴙𐴅𐴧𐴠| 𐴑𐴞𐴕𐴃𐴟 𐴎𐴞𐴘𐴝𐴕 𐴀𐴦𐴝𐴔 𐴏𐴦𐴟𐴌𐴡𐴃𐴢 𐴀𐴝𐴏𐴠 𐴎𐴝𐴌 𐴎𐴡𐴌𐴞𐴘𐴝 𐴏𐴝𐴇𐴝𐴁𐴞 𐴏𐴝𐴇𐴝𐴁𐴞 𐴁𐴡𐴙𐴕𐴧𐴠، 𐴎𐴝𐴌 𐴎𐴡𐴌𐴞𐴘𐴝 𐴃𐴝𐴌𐴝 𐴔𐴡𐴗𐴑𐴝 𐴉𐴝𐴘𐴧𐴠||

𐴃𐴡𐴘𐴓𐴠 𐴏𐴝𐴇𐴝𐴁𐴝 𐴑𐴠𐴌𐴝𐴔𐴡𐴌 𐴇𐴡𐴔𐴏𐴠 𐴇𐴡𐴔 𐴃𐴝𐴀𐴌𐴞𐴉𐴢 𐴀𐴥𐴡𐴘𐴓𐴊𐴠 𐴀𐴞𐴕𐴋𐴞𐴓𐴧𐴝 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴎𐴝𐴌𐴝 𐴎𐴞𐴕𐴊𐴞𐴒𐴞 𐴔𐴧𐴝𐴎𐴠 𐴀𐴠𐴑𐴁𐴝𐴌 𐴌𐴡𐴏𐴥𐴟𐴓𐴢 𐴏𐴡𐴓𐴧𐴡𐴓𐴧𐴝𐴇𐴟 𐴀𐴝𐴓𐴝𐴘𐴇𐴠 𐴖𐴡𐴏𐴡𐴓𐴧𐴡𐴔𐴡𐴌𐴠، 𐴎𐴞𐴕𐴊𐴞𐴒𐴞 𐴔𐴧𐴝𐴎𐴠 𐴀𐴠𐴑𐴁𐴝𐴌 𐴕𐴡𐴁𐴞 𐴀𐴝𐴓𐴝𐴘𐴇𐴞 𐴏𐴧𐴝𐴓𐴝𐴔𐴡𐴌𐴠 𐴀𐴞𐴏𐴓𐴝𐴔𐴡𐴌 𐴇𐴝𐴓𐴡𐴃𐴡𐴃𐴢 𐴊𐴞𐴑𐴧𐴠𐴤| 𐴏𐴞𐴌𐴞𐴉𐴢 𐴊𐴠𐴑𐴤𐴝𐴌 𐴎𐴡𐴌𐴞𐴘𐴝 𐴏𐴝𐴇𐴝𐴁𐴝𐴌 𐴃𐴝𐴀𐴝𐴌𐴞𐴉𐴡𐴃𐴢 𐴊𐴝𐴈𐴠𐴓𐴢 𐴀𐴥𐴡𐴘 𐴎𐴝𐴒𐴡𐴘| 𐴏𐴞𐴌𐴞𐴉𐴢 𐴊𐴠𐴑𐴤𐴝𐴌 𐴎𐴡𐴌𐴞𐴘𐴝| 𐴏𐴥𐴡𐴀𐴞 𐴀𐴝𐴏𐴠𐴕𐴠| 𐴃𐴡𐴘𐴓𐴠 𐴎𐴞𐴁𐴤𐴝𐴌 𐴀𐴡𐴃𐴧𐴡 𐴁𐴠𐴐𐴥𐴞 𐴒𐴟𐴎𐴡𐴙𐴅𐴧𐴠، 𐴎𐴠𐴃𐴡 𐴁𐴠𐴐𐴥𐴞 𐴀𐴡𐴃𐴧𐴡 𐴒𐴟𐴎𐴝𐴙𐴅𐴧𐴠 𐴃𐴝𐴌 𐴔𐴡𐴃𐴡𐴓𐴡𐴁𐴢 𐴀𐴡𐴃𐴡 𐴁𐴠𐴐𐴥𐴞 𐴀𐴥𐴞𐴁𐴝 𐴁𐴡𐴓𐴡𐴕𐴊𐴡 𐴔𐴡𐴌𐴃𐴡𐴁𐴝𐴌 𐴖𐴡𐴌𐴠، 𐴀𐴡𐴃𐴡 𐴁𐴠𐴐𐴥𐴞 𐴀𐴥𐴞𐴁𐴝 𐴏𐴟𐴇𐴟𐴁𐴡𐴃𐴡𐴃𐴢 𐴖𐴡𐴌𐴡𐴌 𐴔𐴡𐴌𐴃𐴡𐴁𐴝𐴃𐴢| 𐴎𐴞𐴁𐴤𐴝 𐴁𐴠𐴒𐴧𐴞𐴕𐴡𐴌 𐴀𐴝𐴒𐴠 𐴏𐴝𐴇𐴝𐴁𐴞 𐴀𐴝𐴙𐴐𐴧𐴞𐴓𐴢 𐴀𐴥𐴞𐴁𐴝𐴌 𐴎𐴠 𐴔𐴡𐴌𐴃𐴡𐴁𐴝 𐴉𐴡𐴃𐴇𐴠 𐴔𐴡𐴑𐴧𐴝𐴌 𐴁𐴝𐴊𐴠 𐴐𐴝𐴔𐴠𐴓𐴢 𐴀𐴦𐴡𐴘𐴝𐴌 𐴀𐴥𐴠 𐴔𐴡𐴌𐴃𐴡𐴁𐴝 𐴕𐴡𐴀𐴡| 𐴉𐴡𐴃𐴧𐴞 𐴀𐴠𐴑 𐴎𐴡𐴕𐴡𐴌 𐴀𐴠𐴑𐴧𐴝𐴕 𐴕𐴞𐴎𐴡𐴌 𐴕𐴞𐴎𐴡𐴌 𐴔𐴡𐴌𐴃𐴡𐴁𐴝 𐴀𐴝𐴏𐴠||

𐴃𐴡 𐴑𐴟𐴔𐴉𐴝𐴕𐴞𐴌 𐴎𐴡𐴌𐴞𐴘𐴝 𐴀𐴞𐴕𐴏𐴝𐴕 𐴁𐴡𐴕𐴠𐴊𐴠| 𐴀𐴥𐴞𐴕𐴃𐴞 𐴑𐴝𐴘𐴠𐴊𐴢 𐴀𐴡𐴑𐴧𐴡𐴓𐴢 𐴃𐴡𐴘𐴧𐴝𐴌 𐴀𐴥𐴡𐴊𐴠||

𐴃𐴡𐴘𐴓𐴠 𐴀𐴝𐴣𐴀𐴌𐴝 𐴈𐴦𐴡𐴘𐴓𐴝𐴔𐴊𐴠 𐴔𐴡𐴏𐴥𐴞𐴃𐴡𐴃𐴢 𐴔𐴞𐴓𐴢 𐴎𐴥𐴟𐴓𐴢 𐴉𐴦𐴝𐴎𐴝، 𐴔𐴝𐴕𐴥𐴟𐴙𐴐𐴢 𐴀𐴡𐴑𐴧𐴡𐴓𐴡𐴌 𐴏𐴥𐴝𐴣𐴃𐴠 𐴓𐴠𐴕𐴊𐴠𐴕 𐴒𐴡𐴌𐴝𐴎𐴝، 𐴀𐴥𐴠𐴈𐴡𐴃𐴝𐴓𐴧𐴝 𐴀𐴥𐴞𐴍𐴞𐴘𐴝𐴌 𐴔𐴡𐴘𐴊𐴝𐴕𐴡𐴃𐴧𐴞، 𐴀𐴥𐴠𐴍𐴞𐴘𐴝𐴌 𐴃𐴡𐴌𐴁𐴞𐴘𐴡𐴃𐴡𐴃𐴧𐴞 𐴑𐴝𐴘𐴠𐴊𐴢 𐴉𐴡𐴘𐴝𐴊𐴝 𐴀𐴥𐴡| 𐴃𐴡 𐴎𐴡𐴈𐴡𐴕 𐴔𐴡𐴏𐴥𐴞𐴃𐴡𐴃𐴧𐴞 𐴑𐴝𐴘𐴠𐴊𐴢 𐴉𐴡𐴘𐴊𐴝 𐴀𐴥𐴡𐴌 𐴃𐴡𐴈𐴡𐴕 𐴅𐴞𐴇𐴝𐴊𐴡𐴃𐴢 𐴎𐴠𐴍𐴥𐴠 𐴉𐴟𐴌𐴝 𐴀𐴟𐴔𐴧𐴡𐴃𐴡𐴌 𐴏𐴥𐴝𐴣𐴃𐴠 𐴓𐴠𐴕𐴊𐴠𐴕 𐴒𐴡𐴌𐴝𐴎𐴝، 𐴉𐴟𐴌𐴝 𐴑𐴠 𐴉𐴟𐴌𐴝 𐴑𐴡𐴗𐴔𐴡𐴌 𐴏𐴥𐴝𐴣𐴃𐴠 𐴓𐴝𐴌𐴥𐴝𐴘 𐴏𐴡𐴓𐴠 𐴀𐴝𐴌 𐴕𐴞𐴎𐴡𐴌 𐴉𐴟𐴌𐴝 𐴑𐴡𐴁𐴞𐴓𐴝 𐴑𐴠 𐴑𐴡𐴁𐴞𐴓𐴝𐴌 𐴏𐴥𐴝𐴣𐴃𐴠 𐴓𐴠𐴕𐴊𐴠𐴕 𐴒𐴡𐴌𐴝𐴎𐴝| 𐴀𐴠𐴍𐴥𐴞𐴘𐴝𐴌 𐴃𐴡𐴌𐴁𐴞𐴘𐴡𐴃𐴢 𐴓𐴡𐴘 𐴀𐴝𐴓𐴧𐴝𐴇 𐴎𐴝𐴕𐴠 𐴇𐴡𐴕 𐴏𐴞𐴏𐴢 𐴁𐴡𐴕𐴠| 𐴀𐴥𐴡𐴘𐴃𐴉𐴝𐴌𐴠 𐴉𐴝𐴀𐴌 𐴁𐴡𐴕𐴠| 𐴀𐴥𐴡𐴘𐴃𐴉𐴝𐴌𐴠 𐴀𐴞𐴕𐴏𐴝𐴕 𐴕𐴡𐴁𐴡𐴕𐴠||

𐴃𐴡𐴘𐴓𐴠 𐴔𐴡𐴏𐴝𐴓𐴝 𐴀𐴥𐴡𐴘𐴓𐴊𐴠 𐴀𐴞𐴕𐴋𐴞𐴓𐴧𐴝 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴎𐴝𐴌𐴝 𐴔𐴟𐴑𐴡𐴔𐴧𐴡𐴓𐴢 𐴃𐴝𐴀𐴓𐴞𐴔 𐴇𐴝𐴏𐴠𐴓𐴢 𐴒𐴡𐴌𐴞 𐴀𐴝𐴘𐴧𐴠𐴌، 𐴑𐴟𐴌𐴞 𐴁𐴡𐴏𐴥𐴡𐴌𐴡𐴌 𐴃𐴝𐴀𐴓𐴞𐴔𐴞 𐴃𐴡𐴅𐴡𐴌𐴟𐴁𐴝𐴘𐴡 𐴌𐴝𐴑𐴠، 𐴘𐴦𐴝𐴌 𐴁𐴝𐴊𐴠 𐴀𐴥𐴞𐴁𐴝 𐴅𐴞𐴇𐴝𐴊𐴡𐴃𐴢 𐴀𐴝𐴘𐴁𐴡 𐴃𐴝𐴌𐴝 𐴀𐴝𐴣𐴀𐴌𐴝𐴌 𐴔𐴝𐴃𐴥𐴝𐴌 𐴃𐴝𐴏𐴢| 𐴀𐴝𐴣𐴀𐴌𐴝𐴃𐴧𐴞 𐴃𐴝𐴌𐴝𐴌 𐴎𐴡𐴌𐴟𐴌𐴡𐴃𐴢 𐴀𐴝𐴏𐴠| 𐴀𐴥𐴞𐴁𐴝𐴌 𐴃𐴝𐴔𐴦𐴝𐴔 𐴑𐴝𐴁𐴠𐴓𐴞𐴘𐴡𐴃𐴢 𐴀𐴝𐴣𐴀𐴌𐴝𐴓𐴧𐴝𐴘 𐴀𐴝𐴇𐴥𐴝𐴔| 𐴑𐴞𐴕𐴃𐴟 𐴃𐴝𐴌 𐴎𐴡𐴌𐴞𐴘𐴝 𐴔𐴡𐴏𐴝𐴓𐴝 𐴇𐴥𐴡𐴓𐴢 𐴕𐴡𐴀𐴡𐴘𐴁𐴡| 𐴇𐴥𐴡𐴓𐴢 𐴀𐴥𐴡𐴘𐴁𐴡𐴓𐴧𐴝 𐴎𐴡𐴌𐴟𐴌𐴞 𐴀𐴥𐴡𐴘𐴓𐴊𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴔𐴟𐴅𐴝𐴇𐴠𐴊𐴢 𐴀𐴦𐴝𐴓𐴠𐴔 𐴁𐴡𐴕𐴡𐴕| 𐴎𐴞𐴁𐴤𐴝 𐴀𐴝𐴒𐴠𐴓𐴡𐴃𐴞 𐴔𐴟𐴅𐴝𐴇𐴠𐴊𐴢 𐴀𐴥𐴡𐴘𐴁𐴡، 𐴎𐴞𐴁𐴤𐴝 𐴅𐴞𐴇𐴝𐴊𐴞 𐴃𐴡𐴌𐴁𐴞𐴘𐴡𐴃𐴢 𐴁𐴤𐴝𐴓𐴝 𐴒𐴡𐴌𐴞 𐴇𐴝𐴏𐴠𐴓𐴢 𐴒𐴡𐴙𐴅𐴧𐴝 𐴀𐴥𐴡𐴘𐴁𐴡||

𐴁𐴝𐴑𐴞 𐴎𐴠𐴈𐴡𐴕𐴥𐴡 𐴑𐴞𐴘𐴝 𐴀𐴥𐴡𐴘𐴃𐴉𐴝𐴌𐴠 𐴐𐴝𐴘𐴈𐴢 𐴈𐴝𐴓𐴠𐴊𐴢 𐴇𐴟𐴏𐴝𐴘𐴕𐴝𐴕𐴡𐴌 𐴋𐴦𐴡𐴘𐴓𐴧𐴝| 𐴎𐴞𐴁𐴤𐴝 𐴎𐴞𐴕𐴊𐴞𐴒𐴞𐴌𐴠 𐴀𐴥𐴠𐴍𐴠 𐴒𐴟𐴎𐴝𐴌𐴝𐴌 𐴁𐴝𐴊𐴠𐴘𐴡 𐴀𐴠𐴍𐴥𐴠 𐴀𐴝𐴘𐴡𐴌𐴠 𐴃𐴞𐴕 𐴁𐴡𐴏𐴥𐴡𐴌 𐴓𐴠𐴑𐴤𐴝 𐴓𐴠𐴑𐴤𐴞𐴌 𐴖𐴡𐴌𐴠 𐴇𐴝𐴍𐴝𐴘 𐴊𐴞𐴘𐴧𐴠| 𐴀𐴝𐴌 𐴀𐴥𐴞𐴁𐴝 𐴊𐴟𐴘 𐴁𐴡𐴏𐴥𐴡𐴌𐴃𐴡 𐴀𐴠𐴁𐴤𐴝𐴉𐴠 𐴒𐴟𐴎𐴝𐴙𐴅𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴈𐴥𐴡𐴁𐴡𐴌 𐴉𐴡𐴙𐴅𐴧𐴡𐴕𐴃𐴡 𐴔𐴝𐴀𐴝𐴓𐴟𐴔 𐴕𐴡𐴀𐴡، 𐴇𐴡𐴔𐴏𐴠𐴇𐴡𐴔 𐴀𐴝𐴀𐴛 𐴕𐴡𐴎𐴝𐴙𐴕𐴃𐴝𐴔 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴐𐴝𐴘𐴈𐴢 𐴀𐴠𐴍𐴥𐴠 𐴀𐴝𐴏𐴠| 𐴃𐴡 𐴀𐴝𐴀𐴛 𐴉𐴡𐴘𐴓𐴝𐴁𐴝𐴌 𐴎𐴡𐴈𐴡𐴕 𐴀𐴥𐴞𐴁𐴝𐴌 𐴕𐴝𐴔 𐴉𐴥𐴟𐴙𐴕𐴧𐴞 𐴃𐴡𐴈𐴡𐴕 𐴊𐴟𐴘 𐴁𐴡𐴏𐴥𐴡𐴌 𐴒𐴟𐴎𐴡𐴌𐴞 𐴒𐴞𐴘𐴡𐴘| 𐴑𐴞𐴘𐴡𐴓𐴧𐴝 𐴁𐴡𐴓𐴞𐴈𐴡𐴘𐴓𐴠 𐴀𐴥𐴞𐴁𐴝 𐴃𐴡𐴑𐴡𐴌𐴞𐴁𐴝𐴕 𐴊𐴟𐴘 𐴁𐴡𐴏𐴥𐴡𐴌 𐴉𐴟𐴌𐴝 𐴑𐴠 𐴉𐴟𐴌𐴝 𐴀𐴝𐴉𐴒𐴝𐴕𐴞𐴏𐴃𐴝𐴕𐴡𐴌 𐴁𐴥𐴟𐴃𐴡𐴌𐴠 𐴇𐴝𐴍𐴝𐴘𐴧𐴠| 𐴘𐴦𐴝𐴌 𐴁𐴝𐴊𐴠 𐴃𐴝𐴀𐴛 𐴕𐴞𐴎𐴡𐴌 𐴊𐴡𐴌𐴡𐴏𐴢 𐴃𐴡𐴊𐴡𐴌𐴞𐴏𐴢 𐴀𐴠𐴑 𐴔𐴞𐴑𐴧𐴝 𐴌𐴝𐴙𐴑𐴧𐴠 𐴀𐴝𐴌 𐴃𐴝𐴔𐴦𐴝𐴔 𐴀𐴡𐴃𐴧𐴡 𐴓𐴠𐴑𐴤𐴝 𐴓𐴠𐴑𐴤𐴞𐴌 𐴖𐴡𐴌𐴠 𐴔𐴡𐴌𐴑𐴡𐴏𐴡𐴃𐴢 𐴄𐴝𐴘𐴔 𐴇𐴝𐴍𐴝𐴘𐴧𐴞||

𐴃𐴡𐴘𐴓𐴠 𐴘𐴦𐴝𐴕𐴡𐴌 𐴎𐴡𐴌𐴞𐴘𐴝 𐴃𐴡𐴁𐴊𐴞𐴓𐴞 𐴀𐴝𐴘𐴁𐴡 𐴀𐴠𐴈𐴡𐴃𐴝 𐴁𐴞𐴓𐴑𐴟𐴓𐴢 𐴎𐴝𐴇𐴥𐴠𐴌 𐴁𐴝𐴇𐴥𐴠𐴌| 𐴀𐴥𐴠𐴕𐴋𐴞𐴓𐴧𐴝 𐴑𐴞𐴕𐴃𐴟 𐴀𐴝𐴃𐴞𐴑𐴧𐴝 𐴀𐴟𐴃𐴞𐴑𐴧𐴝 𐴉𐴦𐴝𐴎𐴝𐴊𐴠، 𐴀𐴝𐴑𐴏𐴥𐴡𐴌 𐴀𐴥𐴞𐴕𐴋𐴞𐴓𐴧𐴝 𐴉𐴦𐴝 𐴕𐴡𐴎𐴝| 𐴁𐴠𐴐𐴥𐴞 𐴔𐴡𐴐𐴑𐴞𐴓𐴡𐴌 𐴁𐴝𐴊𐴠 𐴀𐴞𐴕𐴋𐴞𐴓𐴧𐴝 𐴀𐴟𐴓𐴝𐴔𐴝 𐴀𐴡𐴑𐴧𐴡𐴓𐴢 𐴁𐴝𐴘𐴌 𐴀𐴥𐴡𐴊𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴎𐴝𐴌𐴝 𐴀𐴥𐴠𐴊𐴧𐴟𐴌 𐴉𐴡𐴙𐴅𐴧𐴡𐴕𐴃𐴡 𐴕𐴞𐴎𐴡𐴌𐴠 𐴕𐴞𐴎𐴠 𐴁𐴡𐴊𐴡𐴓𐴞 𐴉𐴥𐴠𐴓𐴝| 𐴎𐴡𐴊𐴞 𐴀𐴞𐴕𐴋𐴞𐴓𐴧𐴝 𐴔𐴞𐴓𐴞 𐴎𐴝𐴒𐴡𐴘 𐴃𐴡𐴘𐴓𐴠𐴃𐴡 𐴀𐴝𐴓𐴧𐴝𐴇𐴌 𐴕𐴞𐴘𐴝𐴔𐴡𐴃𐴢| 𐴁𐴦𐴡𐴗𐴃𐴢 𐴁𐴡𐴌𐴡 𐴕𐴞𐴘𐴝𐴔𐴡𐴃𐴢||

𐴃𐴡 𐴔𐴟𐴇𐴟𐴃𐴡𐴌𐴡𐴔 𐴁𐴤𐴝𐴘 𐴀𐴡𐴑𐴧𐴡𐴓𐴢! 𐴀𐴠𐴊𐴧𐴟𐴌 𐴉𐴡𐴙𐴅𐴧𐴡𐴕𐴃𐴡 𐴈𐴡𐴃𐴝 𐴀𐴥𐴡𐴘𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴕𐴞𐴎𐴡𐴌 𐴁𐴥𐴟𐴃𐴡𐴌𐴃𐴞 𐴀𐴟𐴓𐴝𐴔𐴝 𐴉𐴡𐴘𐴊𐴝 𐴒𐴡𐴌𐴡𐴕، 𐴁𐴝𐴘𐴌 𐴒𐴡𐴌𐴡𐴕| 𐴀𐴝𐴌 𐴀𐴦𐴝𐴔 𐴁𐴤𐴝𐴉𐴠 𐴕𐴞𐴎𐴡𐴌 𐴀𐴠𐴓𐴥𐴡𐴔𐴡𐴃𐴢 𐴎𐴞𐴘𐴝𐴊𐴝 𐴒𐴡𐴌𐴡𐴕||

𐴃𐴡𐴘 𐴀𐴠 𐴊𐴡𐴌𐴡𐴏𐴡𐴌 𐴓𐴦𐴝𐴏𐴡𐴃𐴢 𐴏𐴞𐴌𐴞𐴉𐴢 𐴀𐴠𐴃𐴧𐴡𐴌𐴝𐴕 𐴀𐴝𐴌𐴡𐴎 𐴒𐴡𐴙𐴅𐴧𐴟𐴔| 𐴀𐴝𐴐𐴤𐴝 𐴒𐴡𐴌𐴞𐴌 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴠𐴓𐴥𐴡𐴔𐴡𐴌 𐴀𐴠 𐴉𐴡𐴎𐴞𐴓𐴡𐴃𐴢 𐴀𐴡𐴑𐴧𐴡𐴓𐴢 𐴏𐴝𐴔𐴧𐴠 𐴌𐴝𐴑𐴞، 𐴀𐴠𐴓𐴥𐴡𐴔𐴡𐴌 𐴀𐴝𐴇𐴝𐴔𐴞𐴘𐴡𐴃𐴡𐴌 𐴔𐴞𐴑𐴧𐴝 𐴕𐴡𐴎𐴡𐴌 𐴌𐴝𐴑𐴞، 𐴀𐴝𐴌 𐴉𐴞𐴏𐴡𐴌 𐴃𐴝𐴇𐴝𐴌𐴞𐴑 𐴀𐴡𐴑𐴧𐴡𐴓𐴡𐴃𐴢 𐴎𐴠 𐴒𐴡𐴓𐴃𐴞 𐴀𐴡𐴑𐴧𐴡𐴓𐴢 𐴖𐴝𐴑𐴞 𐴀𐴥𐴡𐴘𐴧𐴠 𐴀𐴥𐴠𐴒𐴞𐴕𐴡𐴃𐴧𐴞 𐴀𐴠𐴇𐴠𐴃𐴠𐴘𐴝𐴃𐴢 𐴒𐴡𐴌𐴞 𐴒𐴡𐴌𐴞، 𐴀𐴡𐴕𐴡𐴌𐴝𐴌 𐴁𐴥𐴟𐴃𐴡𐴌𐴃𐴞 𐴉𐴡𐴃𐴧𐴞 𐴀𐴠𐴑𐴎𐴡𐴕𐴡𐴌 𐴖𐴡𐴌𐴠 𐴎𐴝𐴃𐴞 𐴃𐴡𐴗𐴌𐴡𐴌 𐴖𐴡𐴌𐴠 𐴎𐴞𐴔𐴧𐴝 𐴀𐴝𐴊𐴧𐴠 𐴅𐴡𐴎𐴁𐴝 𐴀𐴥𐴡𐴘𐴁𐴡𐴊𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴃𐴝𐴌𐴝 𐴀𐴠𐴓𐴥𐴡𐴔 𐴇𐴝𐴏𐴠𐴓𐴢 𐴒𐴡𐴌𐴡𐴕| 𐴀𐴝𐴌 𐴀𐴝𐴀𐴛 𐴘𐴦𐴝𐴕 𐴕𐴡𐴈𐴦𐴡𐴘𐴌 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴘𐴦𐴝𐴕𐴃𐴡 𐴀𐴝𐴔𐴞𐴌𐴡𐴌 𐴖𐴡𐴌𐴠 𐴊𐴝𐴌𐴔𐴡𐴊𐴝𐴌 𐴇𐴝𐴌𐴠 𐴉𐴟𐴌𐴝𐴉𐴟𐴌𐴞 𐴁𐴤𐴝𐴉𐴠 𐴀𐴝𐴎𐴟𐴙𐴌 𐴒𐴡𐴌𐴞𐴁𐴡، 𐴀𐴝𐴌 𐴇𐴝𐴃𐴧𐴞 𐴑𐴞𐴏𐴧𐴟 𐴇𐴥𐴞𐴏𐴧𐴝 𐴀𐴝𐴎𐴟𐴙𐴌 𐴖𐴦𐴝𐴉𐴡𐴌𐴞𐴁𐴡| 𐴑𐴞𐴕𐴃𐴟 𐴎𐴝𐴌 𐴎𐴞𐴔𐴧𐴝𐴃𐴢 𐴎𐴠𐴇𐴝𐴔 𐴃𐴝𐴑𐴞𐴁𐴡 𐴃𐴝𐴑𐴡𐴑 𐴎𐴡𐴊𐴞 𐴕𐴞𐴎𐴡𐴌 𐴊𐴞𐴓𐴡𐴃𐴢 𐴀𐴝𐴎𐴧𐴟 𐴃𐴝𐴑𐴠 𐴃𐴡𐴘𐴓𐴠 𐴀𐴞𐴕𐴏𐴝𐴕 𐴀𐴠𐴓𐴥𐴡𐴔 𐴇𐴝𐴏𐴠𐴓𐴢 𐴒𐴡𐴌𐴞 𐴉𐴝𐴌𐴠| 𐴎𐴠𐴈𐴡𐴕𐴥𐴡 𐴇𐴝𐴓𐴡𐴃𐴡𐴃𐴢 𐴀𐴥𐴞𐴁𐴝𐴌𐴠 𐴌𐴝𐴑𐴡 𐴀𐴥𐴞𐴁𐴝 𐴕𐴞𐴎𐴡𐴌 𐴌𐴝𐴏𐴧𐴝 𐴕𐴞𐴎𐴠 𐴃𐴟𐴖𐴝𐴘𐴓𐴡||

𐴃𐴡𐴘𐴓𐴠 𐴔𐴟𐴇𐴟𐴃𐴡𐴌𐴡𐴔 𐴁𐴤𐴝𐴘 𐴀𐴡𐴑𐴧𐴡𐴓𐴢! 𐴘𐴦𐴝𐴕 𐴀𐴥𐴡𐴘𐴓𐴊𐴠 𐴀𐴝𐴌𐴡𐴎 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴕𐴞𐴎𐴠 𐴔𐴠𐴇𐴠𐴕𐴧𐴡𐴃𐴢 𐴒𐴡𐴌𐴡، 𐴕𐴞𐴎𐴠 𐴀𐴠𐴓𐴥𐴡𐴔𐴡𐴌𐴠 𐴃𐴝𐴓𐴝𐴐𐴢 𐴒𐴡𐴌𐴡، 𐴀𐴠𐴓𐴥𐴡𐴔𐴡𐴌 𐴃𐴞𐴌𐴝𐴙𐴐𐴧𐴝 𐴁𐴡𐴕𐴡، 𐴀𐴠𐴓𐴥𐴡𐴔𐴡𐴌 𐴏𐴥𐴝𐴣𐴃𐴠 𐴔𐴟𐴇𐴝𐴁𐴧𐴡𐴃𐴢 𐴒𐴡𐴌𐴡، 𐴀𐴝𐴌 𐴀𐴝𐴓𐴧𐴝𐴇𐴌 𐴇𐴝𐴣𐴏𐴥𐴠 ( رَّبِّ زِدْنِي عِلْمًا) 𐴝𐴌 𐴊𐴟𐴖𐴝 𐴒𐴡𐴌𐴡، 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌 𐴇𐴝𐴣𐴏𐴥𐴠 𐴀𐴠𐴓𐴔𐴠 𐴕𐴝𐴉𐴠𐴌 𐴊𐴟𐴖𐴝 𐴒𐴡𐴌𐴡| 𐴃𐴡𐴘𐴓𐴠 𐴀𐴞𐴚 𐴐𐴦𐴝 𐴀𐴝𐴓𐴧𐴝𐴇 𐴀𐴝𐴓𐴧𐴝𐴇 𐴏𐴟𐴁𐴇𐴝𐴕𐴝𐴇𐴟 𐴖𐴡𐴃𐴝𐴀𐴝𐴓𐴝 𐴕𐴞𐴎𐴡𐴌 𐴌𐴝𐴇𐴝𐴔𐴡𐴃𐴠 𐴊𐴡𐴌𐴖𐴝𐴎𐴝 𐴑𐴤𐴟𐴓𐴞𐴊𐴞𐴁𐴡| 𐴀𐴝𐴓𐴧𐴝𐴇 𐴎𐴝𐴌𐴠 𐴊𐴞𐴃𐴡 𐴏𐴝𐴘𐴁𐴡 𐴈𐴡𐴕𐴥𐴡 𐴑𐴞𐴘𐴝 𐴌𐴟𐴑𐴞 𐴕𐴡𐴉𐴝𐴌𐴠| 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝 𐴎𐴡𐴌𐴟𐴌 𐴀𐴥𐴞𐴁𐴝𐴌𐴠 𐴊𐴝𐴕 𐴒𐴡𐴌𐴞𐴁𐴡||

سُبْحَانَكَ اللَّهُمَّ وَبِحَمْدِكَ، أَشْهَدُ أَنْ لَا إِلَهَ إِلَّا أَنْتَ أَسْتَغْفِرُكَ وَأَتُوبُ إِلَيْكَ

𐴇𐴥𐴡𐴎𐴌𐴡𐴃𐴢 𐴀𐴟𐴔𐴡𐴌 𐴌𐴡𐴎𐴞𐴘𐴡𐴓𐴧𐴝𐴇𐴟 𐴀𐴝𐴕𐴇𐴟𐴘𐴠 𐴉𐴡𐴌𐴔𐴝𐴘𐴠𐴊𐴠:

” تَفَقَّهُوا قَبْلَ أَنْ تُسَوَّدُوا ”

“𐴀𐴠𐴓𐴥𐴡𐴔 𐴇𐴝𐴏𐴠𐴓𐴢 𐴒𐴡𐴌𐴡 𐴏𐴡𐴌𐴊𐴝𐴌𐴞 𐴒𐴡𐴌𐴝𐴌 𐴀𐴝𐴒𐴠“

𐴀𐴝𐴌 𐴀𐴞𐴔𐴝𐴔 𐴁𐴟𐴈𐴝𐴌𐴞 𐴌𐴡𐴇𐴞𐴔𐴝𐴇𐴟𐴓𐴧𐴝𐴇 𐴀𐴠𐴈𐴡𐴃𐴝𐴌 𐴔𐴝𐴃𐴝𐴇𐴝𐴃𐴢 𐴈𐴦𐴡𐴊𐴧𐴠:

“𐴀𐴠𐴓𐴥𐴡𐴔 𐴇𐴝𐴏𐴠𐴓𐴢 𐴒𐴡𐴌𐴡 𐴎𐴡𐴊𐴞𐴘𐴥𐴡 𐴃𐴥𐴟𐴣𐴖𐴥𐴝𐴣𐴀𐴌𐴠 𐴏𐴡𐴌𐴊𐴝𐴌 𐴁𐴝𐴕𐴝𐴘 𐴊𐴞𐴘𐴎𐴡𐴗𐴑، 𐴀𐴝𐴌 𐴁𐴠𐴐𐴥𐴡𐴑 𐴏𐴝𐴇𐴝𐴁𐴝𐴘𐴠 𐴌𐴡𐴏𐴥𐴟𐴓𐴢 𐴏𐴡𐴓𐴧𐴡𐴓𐴧𐴝𐴇𐴟 𐴀𐴝𐴓𐴝𐴘𐴇𐴠 𐴖𐴡𐴏𐴡𐴓𐴧𐴡𐴔 𐴀𐴦𐴡𐴓𐴠 𐴀𐴟𐴔𐴡𐴌 𐴁𐴠𐴐𐴥𐴞 𐴀𐴦𐴡𐴕𐴡𐴌 𐴇𐴝𐴓𐴡𐴃𐴡 𐴔𐴧𐴝𐴎𐴠𐴘𐴥𐴡 𐴀𐴠𐴓𐴥𐴡𐴔 𐴇𐴝𐴏𐴠𐴓𐴢 𐴒𐴡𐴙𐴃𐴧𐴡” (𐴏𐴥𐴡𐴀𐴞 𐴁𐴟𐴈𐴝𐴌𐴞)

* * * * *