الأمر بالمعروف والنهي عن المنكر|| 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔𐴢 𐴒𐴡𐴌𐴡𐴕 𐴀𐴝𐴊𐴧𐴠 𐴈𐴤𐴡𐴌𐴝𐴂𐴞𐴃𐴧𐴟 𐴔𐴝𐴕𐴝 𐴒𐴡𐴌𐴡𐴕 ||Promotion of Virtue and Prevention of Vice

𐴁𐴤𐴝𐴓𐴝 𐴕𐴡𐴏𐴞𐴘𐴡𐴃𐴢

𐴐𐴝𐴘𐴈𐴢 𐴇𐴝𐴌𐴞𐴏𐴢 𐴁𐴞𐴕 𐴒𐴝𐴎𐴞 𐴀𐴝𐴕 𐴕𐴝𐴎𐴧𐴝𐴌𐴞 𐴌𐴡𐴇𐴞𐴔𐴝𐴇𐴟𐴓𐴧𐴝𐴤

𐴊𐴡𐴐𐴢 𐴓𐴡𐴔𐴁𐴝𐴌 𐴇𐴥𐴠𐴏𐴧𐴝

𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔𐴢 𐴒𐴡𐴌𐴡𐴕 𐴀𐴝𐴊𐴧𐴠 𐴈𐴤𐴡𐴌𐴝𐴂𐴞𐴃𐴧𐴟 𐴔𐴝𐴕𐴝 𐴒𐴡𐴌𐴡𐴕

الحمد لله رب العالمين، اللهم صلِّ على محمد وآله وسلم وبارك

𐴃𐴝𐴔𐴦𐴝𐴔𐴢 𐴃𐴝𐴌𐴞𐴉𐴢 𐴀𐴥𐴡 𐴀𐴝𐴓𐴧𐴝𐴤 𐴃𐴝𐴀𐴝𐴓𐴧𐴝𐴓𐴧𐴝 𐴎𐴞𐴁𐴤𐴝 𐴃𐴝𐴔𐴦𐴝𐴔 𐴅𐴝𐴇𐴝𐴕𐴡𐴌 𐴌𐴡𐴁𐴢| 𐴊𐴡𐴌𐴟𐴊𐴢 𐴀𐴝𐴊𐴧𐴠 𐴏𐴝𐴓𐴝𐴔𐴢 𐴕𐴝𐴎𐴞𐴓 𐴀𐴡𐴗𐴑 𐴀𐴝𐴣𐴀𐴌𐴝𐴌 𐴕𐴡𐴁𐴥𐴞 𐴔𐴟𐴇𐴝𐴔𐴧𐴝𐴊𐴢 𐴏𐴡𐴓𐴧𐴝𐴓𐴧𐴝𐴇𐴟 𐴀𐴝𐴓𐴝𐴘𐴇𐴞 𐴖𐴝 𐴏𐴝𐴓𐴧𐴝𐴔𐴡𐴌 𐴖𐴝𐴌𐴠, 𐴃𐴝𐴀𐴛𐴌 𐴀𐴝𐴇𐴓𐴡 𐴀𐴝𐴘𐴝𐴓𐴢 𐴀𐴝𐴊𐴧𐴠 𐴏𐴝𐴇𐴝𐴁𐴞 𐴀𐴥𐴡𐴑𐴧𐴡𐴓𐴡𐴌 𐴖𐴝𐴌𐴠|

𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴀𐴠𐴌𐴐𐴤𐴝𐴊𐴢 𐴒𐴡𐴙𐴅𐴧𐴠- 

وَلْتَكُنْ مِنْكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَأُوْلَئِكَ هُمُ الْمُفْلِحُونَ

𐴃𐴟𐴖𐴝𐴣𐴌𐴝𐴌 𐴁𐴟𐴃𐴥𐴡𐴌𐴠 𐴀𐴥𐴠𐴀𐴕 𐴀𐴟𐴒𐴧𐴗𐴝 𐴅𐴡𐴔𐴝𐴃𐴢 𐴃𐴝𐴑𐴡𐴕 𐴎𐴡𐴌𐴟𐴌𐴞 𐴎𐴝𐴌𐴝 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔 𐴊𐴞𐴁𐴡 𐴀𐴝𐴌 𐴁𐴟𐴌𐴝 𐴈𐴝𐴔𐴡𐴃𐴧𐴟𐴕 𐴌𐴟𐴑𐴞 𐴌𐴝𐴑𐴞𐴁𐴡 𐴀𐴝𐴌 𐴀𐴞𐴃𐴝𐴌𐴝 𐴀𐴡𐴘𐴓𐴊𐴠 𐴑𐴝𐴔𐴞𐴘𐴝𐴁𐴢| (𐴏𐴟𐴌𐴝 𐴀𐴝𐴓𐴢 𐴀𐴞𐴔𐴌𐴝𐴕- 𐴱𐴰𐴴)

𐴀𐴥𐴠 𐴀𐴝𐴘𐴝𐴃𐴡𐴃𐴢 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔 𐴊𐴠𐴘𐴡𐴘𐴧𐴝 𐴀𐴝𐴊𐴧𐴠 𐴈𐴤𐴡𐴌𐴝𐴂𐴞𐴃𐴧𐴟𐴕 𐴌𐴟𐴑𐴞 𐴌𐴝𐴑𐴡𐴘𐴧𐴝 𐴅𐴡𐴔𐴝𐴃𐴡𐴌𐴠 𐴑𐴝𐴔𐴞𐴘𐴝𐴁𐴞𐴌 𐴅𐴡𐴔𐴝𐴃𐴢 𐴁𐴡𐴓𐴞 𐴈𐴡𐴘𐴧𐴠| 

𐴀𐴥𐴠 𐴀𐴟𐴔𐴧𐴝𐴃𐴢 𐴀𐴡𐴙𐴕𐴧𐴡 𐴃𐴝𐴔𐴦𐴝𐴔 𐴀𐴟𐴔𐴧𐴝𐴃𐴡𐴃𐴧𐴠 𐴀𐴝𐴉𐴎𐴡𐴓𐴢 𐴀𐴡𐴀𐴕𐴡𐴌 𐴏𐴡𐴁𐴝𐴁𐴢 𐴀𐴞𐴏𐴝𐴉𐴠 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔𐴢 𐴀𐴝𐴊𐴧𐴠 𐴈𐴤𐴡𐴌𐴝𐴂𐴢 𐴈𐴝𐴔𐴡𐴃𐴧𐴟𐴕 𐴌𐴟𐴑𐴞 𐴌𐴝𐴑𐴡𐴕𐴡𐴌𐴠 𐴎𐴞𐴑𐴞𐴌 𐴒𐴡𐴙𐴅𐴧𐴠| 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴘𐴠 𐴀𐴠𐴌𐴐𐴝𐴊𐴢 𐴒𐴡𐴙𐴅𐴧𐴠- 

كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنْكَرِ وَتُؤْمِنُونَ بِاللَّهِ
𐴃𐴟𐴖𐴝𐴣𐴌𐴝 𐴀𐴡𐴘𐴓𐴝𐴊𐴠 𐴀𐴝𐴉𐴎𐴡𐴓𐴢 𐴀𐴟𐴔𐴧𐴝𐴃𐴢| 𐴃𐴟𐴖𐴝𐴣𐴌𐴝𐴌𐴠 𐴂𐴡𐴘𐴊𐴝 𐴒𐴡𐴌𐴝 𐴒𐴞𐴘𐴧𐴠 𐴔𐴝𐴕𐴟𐴙𐴐𐴥𐴡𐴌 𐴉𐴡𐴘𐴊𐴝𐴓𐴧𐴝, 𐴃𐴟𐴖𐴝𐴣𐴌𐴝 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔𐴢 𐴀𐴝𐴊𐴧𐴠 𐴈𐴤𐴡𐴌𐴝𐴂𐴢 𐴈𐴝𐴔𐴡𐴃𐴧𐴟 𐴌𐴟𐴑𐴞 𐴌𐴝𐴑𐴞𐴁𐴝 𐴀𐴝𐴌 𐴃𐴟𐴖𐴝𐴣𐴌𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴖𐴝𐴌𐴠 𐴀𐴞𐴔𐴝𐴕 𐴀𐴝𐴕𐴞𐴁𐴝| (𐴏𐴟𐴌𐴝 𐴀𐴝𐴓 𐴀𐴞𐴔𐴌𐴝𐴕- 𐴱𐴱𐴰)

𐴀𐴥𐴠 𐴀𐴟𐴔𐴧𐴝𐴃𐴢 𐴁𐴠𐴒𐴧𐴟𐴕𐴡𐴃𐴧𐴟 𐴀𐴝𐴉𐴎𐴡𐴓 𐴀𐴡𐴀𐴕𐴡𐴌 𐴏𐴡𐴁𐴝𐴁𐴢 𐴀𐴞𐴏𐴝𐴉𐴠 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴎𐴥𐴠  𐴀𐴞𐴁𐴝𐴊𐴡𐴃𐴡𐴌 𐴈𐴡𐴃𐴝 𐴁𐴥𐴡𐴘𐴝𐴕  𐴒𐴡𐴙𐴅𐴧𐴠 𐴇𐴥𐴞𐴘𐴝𐴕 𐴀𐴡𐴘𐴓𐴊𐴠 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔 𐴀𐴝𐴊𐴧𐴠 𐴈𐴤𐴡𐴌𐴝𐴂𐴞𐴃𐴧𐴟𐴕 𐴔𐴝𐴕𐴝 𐴒𐴡𐴌𐴡𐴕||

𐴀𐴞𐴃𐴡𐴓𐴧𐴝 𐴀𐴝𐴣𐴀𐴌𐴝 𐴈𐴡𐴀𐴘 𐴉𐴝𐴌𐴥𐴞 𐴑𐴞 ” 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔 𐴀𐴝𐴊𐴧𐴠 𐴈𐴤𐴡𐴌𐴝𐴂𐴞𐴃𐴧𐴟𐴕 𐴌𐴟𐴑𐴥𐴞 𐴌𐴝𐴑𐴡𐴕” 𐴀𐴥𐴠 𐴑𐴝𐴕𐴟𐴕𐴧𐴝𐴕 𐴃𐴝𐴔𐴦𐴝𐴔 𐴀𐴟𐴔𐴧𐴝𐴃𐴡𐴌 𐴖𐴝𐴌𐴠 𐴅𐴝𐴌𐴞 𐴀𐴡𐴘𐴁𐴡| 𐴌𐴝𐴏𐴟𐴓𐴢 (𐴏𐴓𐴢) 𐴀𐴡𐴌 𐴃𐴡𐴌𐴉𐴡𐴃𐴧𐴟𐴕 𐴀𐴝𐴘𐴧𐴠𐴊𐴠 𐴀𐴠𐴓𐴝𐴕 ” 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔 𐴒𐴡𐴌𐴡𐴕 𐴀𐴝𐴊𐴧𐴠 𐴈𐴤𐴡𐴌𐴝𐴂𐴞𐴃𐴧𐴟𐴕 𐴌𐴟𐴑𐴞 𐴌𐴝𐴑𐴡𐴕𐴡” 𐴀𐴡𐴃𐴧𐴟𐴕 𐴀𐴝𐴇𐴝𐴔 𐴀𐴝𐴌 𐴑𐴞 𐴀𐴡𐴘𐴃𐴉𐴝𐴌𐴥𐴠⸮

𐴏𐴡𐴇𐴞 𐴔𐴟𐴏𐴓𐴞𐴔𐴢 𐴐𐴡𐴌𐴞𐴉𐴡𐴃𐴢 𐴀𐴝𐴙𐴐𐴧𐴠- 𐴌𐴝𐴏𐴟𐴓𐴢 (𐴏𐴓𐴢) 𐴀𐴠𐴌𐴐𐴝𐴊𐴢 𐴒𐴡𐴙𐴅𐴧𐴠- 

من رأى منكم منكرًا فليغيره بيده، فإن لم يستطع فبلسانه، فإن لم يستطع فبقلبه وذلك أضعفُ الإيمان

𐴎𐴠 𐴔𐴝𐴙𐴕𐴐𐴥𐴠 𐴈𐴤𐴡𐴌𐴝𐴂𐴞 𐴒𐴡𐴌𐴠𐴊𐴧𐴠 𐴊𐴠𐴑𐴞𐴁𐴡 𐴃𐴝𐴓𐴧𐴝 𐴎𐴡𐴌𐴟𐴌𐴞 𐴀𐴡𐴘𐴁𐴡𐴊𐴠 𐴀𐴝𐴀𐴃𐴠 𐴁𐴝𐴊𐴤𐴝 𐴊𐴠𐴀𐴕| 𐴎𐴡𐴊𐴞 𐴀𐴝𐴀𐴃𐴠 𐴌𐴟𐴑𐴡𐴕𐴡𐴌 𐴃𐴝𐴑𐴡𐴃𐴢 𐴕𐴝 𐴃𐴤𐴝𐴑𐴠 𐴃𐴡𐴘𐴓𐴠 𐴔𐴟𐴑𐴠 𐴔𐴝𐴕𐴝 𐴒𐴡𐴌𐴡𐴕 𐴀𐴝𐴌 𐴎𐴡𐴊𐴞” 𐴎𐴟𐴁𐴝𐴕𐴡𐴌 𐴓𐴡𐴘 𐴔𐴟𐴑𐴝𐴁𐴠𐴓𐴝 𐴒𐴡𐴌𐴡𐴕𐴡𐴌𐴡 𐴃𐴝𐴑𐴡𐴃𐴢 𐴕𐴡 𐴃𐴤𐴝𐴑𐴠 𐴃𐴡𐴘𐴓𐴊𐴠 𐴊𐴞𐴓𐴠 𐴊𐴞𐴓𐴠 𐴔𐴟𐴑𐴝𐴁𐴠𐴓𐴝 𐴒𐴡𐴌𐴡𐴕𐴡𐴌 𐴔𐴡𐴇𐴡𐴓𐴢 𐴁𐴝𐴕𐴝𐴘𐴁𐴝𐴌 𐴑𐴟𐴐𐴠𐴐𐴢 𐴒𐴡𐴌𐴡𐴕| 𐴀𐴝𐴌 𐴘𐴝𐴀𐴝𐴕 𐴀𐴡𐴘𐴓𐴊𐴠  𐴀𐴥𐴝𐴊𐴝𐴕𐴝 𐴃𐴥𐴡𐴁𐴑𐴝𐴌 𐴀𐴞𐴦𐴔𐴝𐴕|”

𐴀𐴠𐴃𐴡𐴓𐴧𐴝 𐴁𐴡𐴓𐴠 𐴀𐴥𐴠 𐴃𐴝𐴔𐴦𐴝𐴔𐴢 𐴀𐴠𐴓𐴝𐴕 𐴀𐴦𐴝𐴔𐴁𐴤𐴝𐴉𐴠 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴇𐴡𐴏𐴡𐴓𐴝 𐴘𐴝𐴀𐴝𐴕 𐴁𐴝𐴌𐴝𐴘 𐴁𐴡𐴓𐴧𐴝 𐴑𐴞 𐴁𐴡𐴓𐴞 𐴈𐴡𐴘𐴓𐴠 𐴃𐴟𐴖𐴝𐴣𐴌𐴝 𐴈𐴡𐴏𐴟𐴌𐴞𐴌 𐴈𐴠𐴓𐴝𐴉𐴢 𐴓𐴡𐴌𐴝𐴘 𐴒𐴡𐴌𐴥𐴡| 𐴃𐴟𐴖𐴝𐴣𐴌𐴝 𐴈𐴤𐴡𐴌𐴝𐴂𐴞𐴌 𐴈𐴠𐴓𐴝𐴉𐴢 𐴀𐴝𐴀𐴃𐴠 𐴓𐴡𐴌𐴝𐴘 𐴒𐴡𐴌𐴥𐴡, 𐴎𐴡𐴁𐴝𐴕 𐴀𐴝𐴊𐴧𐴠 𐴊𐴞𐴓𐴢 𐴓𐴡𐴘 𐴓𐴡𐴌𐴝𐴘 𐴒𐴡𐴌𐴥𐴡| 𐴀𐴝𐴌 𐴈𐴤𐴡𐴌𐴝𐴂𐴞𐴌 𐴈𐴠𐴓𐴝𐴉𐴢 𐴓𐴡𐴌𐴝𐴘 𐴀𐴞𐴁𐴤𐴝 𐴀𐴠𐴃𐴡𐴑𐴧𐴟𐴕 𐴉𐴡𐴅𐴧𐴡𐴕𐴃𐴡  𐴅𐴝𐴌𐴞 𐴌𐴝𐴑𐴡𐴕 𐴎𐴡𐴌𐴟𐴌𐴞 𐴃𐴝𐴑𐴠 𐴀𐴝𐴌 𐴈𐴡𐴕𐴡 𐴈𐴤𐴡𐴌𐴝𐴂𐴞 𐴀𐴝𐴊𐴧𐴠 𐴈𐴟𐴏𐴟𐴌𐴞 𐴁𐴝𐴑𐴥𐴠 𐴕𐴡 𐴃𐴝𐴑𐴠||

𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓𐴢 𐴔𐴟𐴕𐴑𐴝𐴌 𐴕𐴡 𐴒𐴡𐴌𐴡𐴕 𐴀𐴝𐴊𐴧𐴠 𐴃𐴝𐴑𐴡𐴃𐴢 𐴃𐴝𐴑𐴡𐴕𐴡𐴌 𐴁𐴦𐴝𐴊𐴠𐴘𐴥𐴡 𐴈𐴡𐴏𐴟𐴌𐴞𐴌 𐴔𐴟𐴑𐴝𐴁𐴠𐴓𐴝 𐴕𐴡 𐴒𐴡𐴙𐴓𐴧𐴠 𐴀𐴟𐴔𐴧𐴝𐴃𐴡𐴌 𐴖𐴝𐴌𐴠 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴓𐴝𐴕𐴡𐴃𐴢 𐴕𐴝𐴔𐴞 𐴀𐴝𐴘𐴁𐴡| 𐴀𐴝𐴣𐴀𐴌𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴈𐴝𐴣𐴏𐴠 𐴂𐴝𐴕𐴝𐴤𐴝 𐴀𐴝𐴊𐴧𐴠 𐴀𐴝𐴔𐴝𐴕 𐴏𐴦𐴝𐴘||

𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴀𐴠𐴌𐴐𐴝𐴊𐴢 𐴒𐴡𐴙𐴅𐴧𐴠-

لُعِنَ الَّذِينَ كَفَرُواْ مِن بَنِي إِسْرَائِيلَ عَلَى لِسَانِ دَاوُودَ وَعِيسَى ابْنِ مَرْيَمَ ذَلِكَ بِمَا عَصَوا وَّكَانُواْ يَعْتَدُون- كَانُواْ لاَ يَتَنَاهَوْنَ عَن مُّنكَرٍ فَعَلُوهُ لَبِئْسَ مَا كَانُواْ يَفْعَلُون

𐴁𐴡𐴕𐴞 𐴀𐴞𐴏𐴌𐴝𐴦𐴀𐴞𐴓𐴡𐴌 𐴎𐴝𐴌𐴝 𐴑𐴟𐴉𐴟𐴌𐴞 𐴒𐴡𐴙𐴅𐴧𐴠 𐴃𐴝𐴌𐴝𐴌𐴠 𐴊𐴝𐴖𐴟𐴦𐴊𐴢 𐴀𐴝𐴊𐴧𐴠 𐴀𐴞𐴏𐴦𐴝 𐴀𐴞𐴁𐴕𐴠 𐴔𐴝𐴌𐴘𐴝𐴔𐴢 (𐴀𐴝𐴓) 𐴎𐴟𐴁𐴝𐴕𐴡𐴃𐴧𐴟 𐴓𐴝𐴕𐴡𐴃𐴢 𐴊𐴠𐴘𐴝 𐴒𐴞𐴘𐴥𐴠| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴇𐴞𐴃𐴝𐴌𐴝 𐴕𐴡𐴉𐴝𐴌𐴔𐴝𐴕𐴞 𐴀𐴝𐴊𐴧𐴠 𐴇𐴥𐴡𐴊𐴢 𐴃𐴝𐴅𐴝𐴖𐴟𐴎𐴞 𐴒𐴡𐴙𐴅𐴧𐴠| 𐴃𐴝𐴌𐴝 𐴀𐴠𐴑𐴎𐴡𐴕 𐴀𐴝𐴌𐴠𐴑𐴎𐴡𐴕𐴠 𐴈𐴤𐴡𐴌𐴝𐴂𐴞𐴃𐴧𐴟𐴕 𐴌𐴟𐴑𐴞 𐴕𐴡 𐴌𐴝𐴑𐴞𐴃𐴡| 𐴃𐴝𐴌𐴝 𐴈𐴡𐴊𐴧𐴟𐴌 𐴁𐴟𐴌𐴝 𐴈𐴝𐴔𐴢 𐴒𐴡𐴙𐴃𐴧𐴡| (𐴏𐴟𐴌𐴝 𐴔𐴝𐴀𐴞𐴊𐴤𐴝-𐴷𐴸)

𐴀𐴥𐴠 𐴀𐴝𐴘𐴝𐴃𐴡𐴃𐴢 𐴕𐴡𐴉𐴝𐴌𐴔𐴝𐴕𐴞 𐴀𐴝𐴊𐴧𐴠 𐴇𐴥𐴡𐴊𐴢 𐴃𐴝𐴅𐴝𐴖𐴟𐴎𐴞𐴌 𐴊𐴥𐴝𐴌𐴝 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔 𐴀𐴝𐴊𐴧𐴠 𐴈𐴤𐴡𐴌𐴝𐴂𐴞𐴃𐴧𐴟𐴕 𐴌𐴟𐴑𐴞 𐴕𐴡 𐴌𐴝𐴑𐴡𐴕 𐴔𐴟𐴌𐴝𐴊𐴢 𐴓𐴡𐴖𐴝 𐴒𐴞𐴘𐴠| 𐴃𐴝𐴌𐴝 𐴀𐴠𐴑𐴎𐴡𐴕𐴠 𐴈𐴡𐴏𐴟𐴌𐴞 𐴒𐴡𐴙𐴓𐴧𐴠 𐴀𐴝𐴌𐴠𐴑𐴎𐴡𐴕𐴠 𐴁𐴥𐴝𐴊𐴤𐴝 𐴕𐴡 𐴊𐴞𐴃𐴡| 𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓𐴢 𐴔𐴟𐴕𐴑𐴝𐴌𐴡𐴌𐴠 𐴏𐴥𐴝𐴌𐴞 𐴊𐴠𐴀𐴕- 𐴇𐴡𐴊𐴧𐴟𐴕 𐴈𐴤𐴡𐴌𐴝𐴂𐴢 𐴇𐴝𐴔𐴢||

𐴔𐴦𐴝𐴕𐴞 𐴁𐴤𐴝𐴓𐴝 𐴇𐴝𐴔𐴡𐴌 𐴇𐴡𐴑𐴟𐴔𐴢 𐴀𐴝𐴊𐴧𐴠 𐴈𐴤𐴡𐴌𐴝𐴂𐴞𐴌 𐴔𐴟𐴑𐴝𐴁𐴠𐴓𐴝 𐴒𐴡𐴌𐴝 𐴏𐴝𐴌𐴞 𐴊𐴠𐴀𐴕 𐴀𐴟𐴔𐴧𐴝𐴃𐴡𐴓𐴧𐴝 𐴀𐴞𐴇𐴝𐴕𐴡𐴃𐴡𐴌 𐴎𐴡𐴌𐴞𐴘𐴝 𐴀𐴡𐴘𐴎𐴝𐴒𐴡𐴘| 𐴈𐴟𐴓𐴝𐴏𐴝 𐴈𐴡𐴃𐴝 𐴀𐴡𐴘𐴓𐴊𐴠 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴀𐴠𐴒𐴞𐴕𐴡𐴓𐴧𐴝 𐴁𐴡𐴕𐴊𐴝𐴌𐴠 𐴁𐴠𐴎𐴧𐴡𐴃𐴞 𐴒𐴡𐴌𐴞𐴁𐴡| 𐴓𐴝 𐴇𐴝𐴖𐴓𐴝 𐴖𐴝𐴓𐴦𐴝 𐴑𐴟𐴖𐴧𐴝𐴃𐴝 𐴀𐴞𐴓𐴧𐴝 𐴁𐴞𐴓𐴧𐴝𐴤||

𐴀𐴞𐴔𐴝𐴔𐴢 𐴀𐴝𐴇𐴔𐴡𐴊𐴢 𐴀𐴝𐴊𐴧𐴠 𐴀𐴞𐴔𐴝𐴔𐴢 𐴃𐴥𐴞𐴌𐴔𐴞𐴎𐴞 (𐴌𐴡𐴇) 𐴇𐴥𐴡𐴎𐴌𐴡𐴃𐴢 𐴇𐴟𐴎𐴝𐴘𐴉𐴝𐴃𐴟𐴓 𐴘𐴝𐴔𐴝𐴕𐴞 (𐴌𐴡𐴎) 𐴃𐴧𐴟𐴕 𐴁𐴥𐴡𐴘𐴝𐴕 𐴒𐴡𐴙𐴅𐴧𐴠- 𐴌𐴝𐴏𐴟𐴓𐴢 (𐴏𐴓𐴢) 𐴈𐴡𐴘𐴧𐴠𐴊𐴠-

والذي نفسي بيده، لتأمُرُنّ بالمعروف ولتَنهوُنّ عن المنكر، أو ليُوشِكنّ الله أن يبعث عليكم عقابًا من عنده، ثم لتدعوُنهُ فلا يستجيب لكم
𐴀𐴥𐴡 𐴎𐴝𐴃𐴠 𐴂𐴝𐴑𐴡𐴌 𐴑𐴡𐴏𐴥𐴡𐴔 𐴎𐴝𐴌 𐴀𐴝𐴀𐴃𐴡𐴃𐴢 𐴀𐴝𐴣𐴀𐴌 𐴉𐴡𐴌𐴝𐴕| 𐴃𐴟𐴖𐴝𐴣𐴌𐴝 𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓𐴢 𐴔𐴟𐴕𐴑𐴝𐴌 𐴒𐴡𐴌𐴡 𐴀𐴝𐴌 𐴕𐴡𐴀𐴘𐴓𐴠 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴃𐴟𐴖𐴝𐴣𐴌𐴝𐴌 𐴖𐴝𐴌𐴠 𐴀𐴝𐴎𐴝𐴁𐴢 𐴊𐴠𐴉𐴠𐴍𐴤𐴝𐴘𐴁𐴡| 𐴘𐴝𐴀𐴝𐴌 𐴁𐴦𐴝𐴊𐴠 𐴃𐴟𐴖𐴝𐴣𐴌𐴝 𐴀𐴝𐴓𐴧𐴝𐴤 𐴃𐴝𐴓𐴝𐴌 𐴈𐴝𐴣𐴏𐴠 𐴊𐴟𐴀𐴦𐴝 𐴒𐴡𐴌𐴞𐴁𐴝 𐴑𐴞𐴕𐴃𐴟 𐴃𐴝𐴀𐴛 𐴃𐴟𐴖𐴝𐴣𐴌𐴝𐴌 𐴋𐴝𐴑𐴡𐴃𐴢 𐴅𐴟𐴖𐴝𐴁𐴢 𐴕𐴡 𐴊𐴞𐴁𐴡|

𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓𐴢 𐴔𐴟𐴕𐴑𐴝𐴌 𐴒𐴡𐴌𐴥𐴝 𐴏𐴥𐴝𐴌𐴞 𐴊𐴠𐴓𐴠 𐴐𐴤𐴝𐴎𐴝 𐴀𐴞𐴏𐴝𐴉𐴠 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴘𐴠 𐴀𐴠𐴇𐴝𐴕𐴡𐴃𐴢 𐴀𐴝𐴊𐴧𐴠 𐴁𐴠𐴎𐴧𐴡𐴃𐴞𐴌 𐴉𐴟𐴣𐴎𐴤𐴝 𐴃𐴟𐴓𐴞 𐴊𐴞𐴁𐴡| 𐴘𐴝𐴀𐴝𐴌 𐴁𐴦𐴝𐴊𐴠  𐴀𐴝𐴣𐴀𐴌𐴝𐴌 𐴊𐴟𐴀𐴦𐴝 𐴘𐴥𐴡 𐴀𐴝𐴣𐴀𐴌𐴝𐴌𐴠 𐴁𐴠𐴎𐴧𐴡𐴃𐴞𐴃𐴧𐴟 𐴇𐴠𐴉𐴝𐴎𐴡𐴃𐴢 𐴒𐴡𐴌𐴞 𐴕𐴡 𐴉𐴝𐴌𐴞𐴁𐴡||

𐴀𐴥𐴠 𐴇𐴝𐴊𐴞𐴏𐴢 𐴀𐴞𐴁𐴤𐴝 𐴇𐴝𐴏𐴝𐴕 𐴀𐴝𐴊𐴧𐴠 𐴇𐴝𐴏𐴝𐴕 𐴓𐴞𐴒𐴥𐴡𐴘𐴌𐴞𐴇𐴞 𐴀𐴞𐴏𐴝𐴉𐴠 𐴈𐴡𐴀𐴠𐴑 𐴎𐴝𐴒𐴝𐴃𐴢 𐴁𐴥𐴡𐴘𐴝𐴕 𐴒𐴡𐴌𐴥𐴝 𐴒𐴞𐴘𐴠| (𐴔𐴟𐴏𐴕𐴝𐴊𐴠 𐴀𐴝𐴇𐴔𐴡𐴊𐴢/ 𐴃𐴞𐴌𐴔𐴞𐴎𐴞)

𐴀𐴟𐴏𐴃𐴝𐴊𐴢 𐴀𐴝𐴁𐴊𐴟𐴓𐴧𐴝𐴤 𐴀𐴝𐴊𐴇𐴝𐴔 (𐴌𐴡𐴇) 𐴈𐴡𐴘𐴧𐴠𐴊𐴠-  𐴎𐴠 𐴔𐴝𐴙𐴕𐴐𐴥𐴠 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔𐴢 𐴀𐴝𐴊𐴧𐴠 𐴈𐴤𐴡𐴌𐴝𐴂𐴢 𐴈𐴝𐴔𐴡𐴃𐴧𐴟𐴕 𐴌𐴟𐴑𐴞 𐴌𐴝𐴑𐴞𐴁𐴡 𐴃𐴝𐴌𐴓𐴧𐴝 𐴎𐴡𐴌𐴟𐴌𐴞 𐴀𐴡𐴘𐴓𐴊𐴠 𐴑𐴞 𐴇𐴠𐴁𐴤𐴝𐴘𐴠 𐴔𐴡𐴖𐴎𐴟𐴌 𐴁𐴝𐴁𐴡𐴃𐴞 𐴇𐴡𐴑𐴟𐴔 𐴀𐴝𐴊𐴧𐴠 𐴔𐴝𐴕𐴝 𐴒𐴡𐴌𐴞𐴁𐴡 𐴇𐴞𐴘𐴝𐴌 𐴖𐴝𐴌𐴠 𐴁𐴤𐴝𐴓𐴝 𐴒𐴡𐴌𐴥𐴞 𐴀𐴞𐴓𐴡𐴔 𐴇𐴝𐴏𐴞𐴓𐴢 𐴒𐴡𐴌𐴡𐴕| 𐴀𐴞𐴃𐴡𐴓𐴧𐴝 𐴁𐴡𐴓𐴞 𐴈𐴡𐴕𐴡 𐴅𐴝𐴇𐴠𐴓 𐴔𐴝𐴙𐴕𐴐𐴥𐴡𐴓𐴧𐴝 𐴕𐴡 𐴎𐴝𐴕𐴞 𐴕𐴡 𐴁𐴟𐴎𐴥𐴞 𐴊𐴞𐴕𐴡𐴌 𐴈𐴡𐴕𐴡 𐴔𐴡𐴖𐴎𐴟𐴌 𐴁𐴝𐴁𐴡𐴃𐴠 𐴈𐴡𐴃𐴝 𐴈𐴡𐴀𐴕 𐴄𐴞𐴑 𐴕𐴡|

𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴀𐴠𐴌𐴐𐴝𐴊𐴢 𐴒𐴡𐴌𐴠𐴕- 

قُلْ هَذِهِ سَبِيلِي أَدْعُو إِلَى اللَّهِ عَلَى بَصِيرَةٍ
 𐴀𐴡 𐴕𐴡𐴁𐴞 𐴀𐴡𐴕𐴠 𐴈𐴡𐴘 𐴊𐴦𐴡! 𐴘𐴝𐴀𐴝𐴕 𐴀𐴡𐴘𐴓𐴊𐴠 𐴀𐴝𐴣𐴀𐴌 𐴌𐴝𐴏𐴧𐴝|  𐴀𐴝𐴀𐴛 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌 𐴃𐴡𐴌𐴡𐴉𐴢 𐴎𐴝𐴕𐴞 𐴁𐴟𐴎𐴞 𐴊𐴝𐴖𐴝𐴃𐴢 𐴊𐴠𐴘|(𐴏𐴟𐴌𐴝 𐴘𐴟𐴏𐴟𐴉𐴢-𐴱𐴰𐴸)

𐴀𐴞𐴃𐴡𐴓𐴧𐴝 𐴎𐴠 𐴈𐴝𐴔𐴡𐴌 𐴃𐴡𐴌𐴡𐴉𐴢 𐴊𐴝𐴖𐴝𐴃𐴢 𐴊𐴠𐴀𐴝 𐴎𐴝𐴘𐴁𐴡 𐴀𐴝𐴌 𐴎𐴠 𐴈𐴝𐴔𐴡𐴃𐴧𐴟𐴕 𐴔𐴝𐴕𐴝 𐴒𐴡𐴌𐴞𐴁𐴡 𐴇𐴞𐴕𐴡𐴌 𐴁𐴝𐴁𐴡𐴃𐴠 𐴁𐴤𐴝𐴓𐴝 𐴒𐴡𐴌𐴥𐴞 𐴎𐴝𐴕𐴝 𐴀𐴝𐴊𐴧𐴠 𐴉𐴟𐴕𐴡𐴕 𐴎𐴡𐴌𐴟𐴌𐴞||

𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓 𐴔𐴟𐴕𐴑𐴝𐴌 𐴒𐴡𐴌𐴡𐴘𐴧𐴝 𐴀𐴦𐴡𐴓𐴡𐴓𐴧𐴝 𐴀𐴝𐴌𐴡 𐴎𐴡𐴌𐴟𐴌𐴞- 𐴀𐴠𐴈𐴓𐴝𐴏𐴡𐴌 𐴏𐴧𐴝𐴀𐴣𐴃𐴠 𐴊𐴝𐴖𐴝𐴃𐴢 𐴊𐴠𐴀𐴕| 𐴘𐴝𐴀𐴝𐴕 𐴀𐴡𐴘𐴓𐴊𐴠 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴃𐴡𐴌𐴡𐴉𐴢 𐴃𐴝𐴌 𐴌𐴝𐴏𐴧𐴝𐴃𐴢 𐴊𐴝𐴖𐴝𐴃𐴢 𐴊𐴠𐴀𐴕| 𐴘𐴝𐴀𐴝𐴕 𐴈𐴡𐴕𐴡 𐴔𐴝𐴙𐴕𐴐𐴥𐴡𐴓𐴧𐴝 𐴊𐴝𐴖𐴝𐴃𐴢 𐴕𐴡 𐴊𐴠 𐴇𐴞𐴁𐴤𐴝𐴘𐴠 𐴈𐴡𐴘𐴁𐴡 𐴀𐴠𐴍𐴠 𐴀𐴝𐴀𐴛 𐴀𐴝𐴏𐴞! 𐴀𐴝𐴣𐴀𐴌𐴠 𐴏𐴥𐴞𐴕𐴞 𐴌𐴝𐴑𐴡! 𐴀𐴝𐴀𐴛 𐴀𐴡𐴘𐴓𐴝𐴔𐴢 𐴉𐴟𐴓𐴝𐴕𐴝!  نعوذ بالله 𐴘𐴝𐴀𐴝𐴕𐴡 𐴈𐴡𐴕𐴡 𐴀𐴠𐴈𐴓𐴝𐴏𐴢⸮ 𐴀𐴝𐴣𐴀𐴌𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴈𐴝𐴣𐴏𐴠 (𐴌𐴞𐴘𐴦𐴝) 𐴔𐴝𐴕𐴟𐴙𐴐𐴢 𐴊𐴠𐴈𐴝𐴙𐴕𐴧𐴝 𐴀𐴝𐴔𐴡𐴓𐴡𐴃𐴧𐴟𐴕 𐴂𐴝𐴕𐴝𐴤 𐴏𐴝𐴛| 𐴀𐴝𐴌 𐴃𐴝𐴌 𐴈𐴝𐴣𐴏𐴠 𐴀𐴠𐴈𐴓𐴝𐴏𐴡𐴌 𐴊𐴟𐴀𐴦𐴝 𐴒𐴡𐴌𐴥𐴞|

𐴃𐴝𐴀𐴛 𐴀𐴝𐴌𐴡 𐴈𐴡𐴘𐴧𐴠𐴊𐴠-
 𐴀𐴥𐴠 𐴀𐴞𐴁𐴝𐴊𐴡𐴃𐴢 𐴘𐴝𐴀𐴝𐴕𐴡𐴃𐴢 𐴀𐴠𐴈𐴓𐴝𐴏𐴢 𐴃𐴝𐴑𐴡𐴕 𐴎𐴡𐴌𐴟𐴌𐴞| 𐴐𐴟𐴇𐴌𐴡𐴃𐴢 𐴀𐴝𐴊𐴧𐴠 𐴔𐴝𐴕𐴟𐴙𐴐𐴥𐴢 𐴊𐴠𐴈𐴡𐴙𐴕𐴧𐴝 𐴀𐴞𐴁𐴝𐴊𐴡𐴃𐴢 𐴕𐴡 𐴒𐴡𐴌𐴡𐴕 𐴏𐴝𐴘| 𐴀𐴠𐴃𐴡𐴓𐴧𐴝 𐴁𐴡𐴓𐴞 𐴎𐴞𐴁𐴤𐴝𐴘𐴠 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴘𐴠 𐴊𐴞𐴘𐴧𐴠𐴊𐴠 𐴎𐴞𐴔𐴧𐴝𐴊𐴝𐴌𐴞 𐴀𐴝𐴊𐴝𐴘 𐴒𐴡𐴌𐴞𐴁𐴡 𐴃𐴝𐴌 𐴀𐴠𐴒𐴞𐴕 𐴈𐴠𐴓𐴝𐴘 𐴌𐴝𐴑𐴡𐴕 𐴀𐴝𐴊𐴧𐴠 𐴕𐴞𐴎𐴡𐴌 𐴁𐴝𐴁𐴡𐴃𐴠 𐴇𐴟𐴐𐴞𐴘𐴝𐴌 𐴃𐴝𐴑𐴡𐴕 𐴎𐴡𐴌𐴟𐴌𐴞| 𐴃𐴝𐴓𐴧𐴝𐴘 𐴊𐴥𐴡𐴌𐴈𐴝𐴌 𐴀𐴡𐴘𐴓𐴊𐴠 𐴕𐴞𐴎𐴡𐴌 𐴔𐴡𐴑𐴏𐴟𐴊𐴡𐴌𐴠 𐴄𐴥𐴞𐴑 𐴒𐴡𐴌𐴞 𐴓𐴡𐴀𐴕, 𐴕𐴞𐴘𐴡𐴃𐴡𐴌𐴠 𐴈𐴝𐴓𐴠𐴏𐴢 𐴒𐴡𐴌𐴥𐴞 𐴓𐴡𐴀𐴕 𐴀𐴝𐴌 𐴕𐴞𐴎𐴡𐴌 𐴀𐴝𐴔𐴡𐴓𐴢 𐴀𐴥𐴡𐴑𐴧𐴡𐴓𐴡𐴌 𐴊𐴥𐴝𐴌𐴝𐴘 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴌𐴝𐴎𐴞 𐴑𐴥𐴟𐴐𐴞 𐴇𐴝𐴏𐴞𐴓𐴢 𐴒𐴡𐴌𐴡𐴕| 𐴑𐴞𐴘𐴡𐴓𐴧𐴝 𐴁𐴡𐴓𐴞  𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴊𐴕𐴞𐴓𐴢 𐴔𐴟𐴕𐴑𐴝𐴌𐴡𐴌 𐴊𐴝𐴌𐴝𐴘 𐴈𐴡𐴕𐴡 𐴈𐴡𐴕𐴡 𐴀𐴡𐴑𐴃𐴡𐴃𐴢 𐴔𐴝𐴙𐴕𐴐𐴥𐴡𐴌 𐴈𐴝𐴣𐴏𐴠 𐴀𐴝𐴊𐴡𐴙𐴅𐴧𐴝 𐴀𐴡𐴖 𐴀𐴝𐴁𐴌 𐴘𐴝𐴀𐴝𐴌 𐴀𐴟𐴓𐴍𐴝 𐴘𐴥𐴡 𐴀𐴡𐴘| 𐴁𐴦𐴝𐴎𐴟 𐴔𐴡𐴃𐴧𐴝 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔𐴢 𐴀𐴝𐴊𐴧𐴠 𐴈𐴤𐴡𐴌𐴝𐴂𐴞𐴃𐴧𐴟𐴕 𐴌𐴟𐴑𐴞 𐴌𐴝𐴑𐴡𐴕𐴡𐴌 𐴎𐴡𐴌𐴞𐴘𐴝 𐴔𐴝𐴕𐴟𐴙𐴐𐴥𐴠 𐴀𐴡𐴕𐴡𐴓𐴧𐴡𐴘 𐴒𐴟𐴏𐴧𐴝 𐴀𐴡𐴘𐴎𐴝𐴘𐴁𐴡| 𐴀𐴞𐴃𐴡𐴓𐴧𐴝 𐴁𐴡𐴓𐴞 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴌𐴝𐴎𐴞 𐴈𐴟𐴐𐴞𐴌 𐴈𐴠𐴘𐴝𐴓𐴢 𐴌𐴝𐴑𐴡𐴕 𐴎𐴡𐴌𐴟𐴌𐴞| 𐴀𐴝𐴓𐴧𐴝𐴤𐴓𐴧𐴝 𐴒𐴡𐴌𐴝 𐴉𐴡𐴌𐴞𐴁𐴡| 𐴈𐴡𐴕𐴡 𐴔𐴝𐴙𐴕𐴐𐴥𐴡𐴌 𐴌𐴞𐴎𐴠 𐴀𐴡𐴃𐴡𐴁𐴝 𐴒𐴟𐴏𐴧𐴝𐴌 𐴓𐴧𐴝 𐴕𐴡| 𐴀𐴥𐴠 𐴈𐴝𐴔𐴡𐴌 𐴎𐴡𐴌𐴞𐴘𐴝 𐴎𐴠𐴀𐴕 𐴕𐴠𐴑𐴞 𐴁𐴦𐴡𐴃𐴢 𐴔𐴝𐴙𐴕𐴐𐴥𐴠 𐴈𐴟𐴐𐴥𐴞 𐴀𐴡𐴘 𐴀𐴝𐴁𐴝𐴌 𐴁𐴦𐴡𐴃𐴢 𐴒𐴟𐴏𐴧𐴝 𐴘𐴥𐴡 𐴀𐴡𐴘| 𐴃𐴝𐴌 𐴖𐴝𐴌𐴠 𐴁𐴠𐴀𐴞𐴕𐴏𐴝𐴉𐴞 𐴂𐴠𐴐𐴥𐴝𐴌 𐴊𐴠𐴀||

𐴁𐴦𐴝𐴎𐴟 𐴔𐴡𐴃𐴧𐴝 𐴔𐴝𐴕𐴟𐴙𐴐𐴥𐴢 𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓 𐴔𐴟𐴑𐴝𐴌𐴡𐴌𐴡 𐴈𐴝𐴔 𐴒𐴡𐴌𐴞𐴃𐴡 𐴋𐴡𐴌𐴝𐴘| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴁𐴦𐴡𐴃𐴢 𐴎𐴝𐴒𐴝𐴃𐴢 𐴔𐴝𐴕𐴟𐴙𐴐𐴥𐴠 𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓𐴢 𐴔𐴟𐴕𐴑𐴝𐴌𐴡𐴌𐴠 𐴕𐴡 𐴔𐴝𐴕𐴠 𐴁𐴡𐴓𐴑𐴠 𐴀𐴟𐴓𐴊𐴝 𐴃𐴝𐴌𐴠 𐴒𐴝𐴓𐴞𐴒𐴝𐴓𐴡𐴏𐴢 𐴒𐴡𐴌𐴠 𐴇𐴡𐴓𐴡𐴃𐴢 𐴈𐴤𐴡𐴌𐴝𐴂𐴢 𐴒𐴡𐴌𐴞𐴉𐴠𐴓𐴠| 𐴎𐴠𐴀𐴕 𐴕𐴠𐴑𐴞 𐴁𐴦𐴡𐴃𐴢 𐴀𐴝𐴓𐴠𐴔𐴢 𐴀𐴦𐴡𐴓𐴡𐴏𐴧𐴝𐴀𐴃𐴠 𐴀𐴞𐴕𐴋𐴞𐴓𐴧𐴝 𐴀𐴡𐴘𐴠 | 𐴃𐴝𐴌𐴝𐴓𐴧𐴝 𐴋𐴡𐴣𐴀𐴌 𐴔𐴡𐴏𐴞𐴁𐴡𐴃𐴢 𐴀𐴡𐴘𐴓𐴊𐴠 𐴌𐴝𐴎𐴝 𐴁𐴝𐴊𐴐𐴤𐴝𐴌 𐴋𐴡𐴌 𐴀𐴝𐴊𐴧𐴠 𐴃𐴝𐴌𐴝𐴌 𐴃𐴝𐴑𐴡𐴃𐴢| 𐴃𐴡𐴘 𐴇𐴞𐴁𐴤𐴝𐴘𐴠 𐴇𐴤𐴝𐴣𐴏𐴤𐴝 𐴈𐴡𐴃𐴝 𐴈𐴡𐴘𐴃𐴡 𐴋𐴡𐴌𐴝𐴀, 𐴁𐴝𐴊𐴐𐴤𐴝𐴌 𐴊𐴥𐴡𐴚𐴑𐴠𐴌𐴠 𐴋𐴡𐴌𐴝𐴀| 𐴁𐴦𐴝𐴎𐴟 𐴔𐴡𐴃𐴧𐴝 𐴇𐴥𐴡𐴑 𐴈𐴡𐴃𐴝 𐴈𐴡𐴘 𐴕𐴡 𐴉𐴥𐴝𐴌𐴠, 𐴀𐴠𐴑𐴧𐴡𐴁𐴝𐴌𐴠 𐴈𐴡𐴔𐴎𐴟𐴌 𐴀𐴡𐴘𐴎𐴝𐴒𐴡𐴘| 𐴀𐴝𐴁𐴝𐴌 𐴁𐴦𐴝𐴎𐴟 𐴔𐴡𐴃𐴧𐴝 𐴊𐴠𐴈𐴝 𐴎𐴝𐴀 𐴁𐴝𐴊𐴐𐴤𐴝𐴌𐴠 𐴕𐴡 𐴁𐴡𐴓𐴑𐴠 𐴁𐴠𐴐𐴥𐴢 𐴐𐴡𐴚𐴈𐴝 𐴔𐴝𐴙𐴕𐴐𐴥𐴡𐴌𐴠 𐴋𐴡𐴌𐴝𐴀| 𐴀𐴝𐴌 𐴏𐴞𐴕𐴃𐴝 𐴉𐴞𐴑𐴞𐴌 𐴒𐴡𐴌𐴝𐴃𐴢 𐴃𐴤𐴝𐴑𐴠 𐴃𐴝𐴌𐴝𐴌𐴠 𐴀𐴝𐴀𐴛 𐴑𐴞 𐴈𐴡𐴘𐴧𐴟𐴔𐴢⸮ 𐴀𐴞𐴃𐴝𐴌𐴝 𐴑𐴞 𐴀𐴝𐴣𐴀𐴌 𐴀𐴥𐴠 𐴇𐴥𐴡𐴑 𐴈𐴡𐴃𐴝𐴌𐴠 𐴔𐴝𐴕𐴞 𐴓𐴡𐴘𐴁𐴡 𐴕𐴝⸮ 𐴕𐴝𐴑𐴠 𐴈𐴡𐴕𐴡 𐴑𐴞𐴏𐴧𐴟 𐴃𐴡𐴁𐴊𐴞𐴓 𐴒𐴡𐴌𐴞𐴊𐴞𐴁𐴡⸮ 𐴀𐴡𐴒𐴡𐴘𐴌𐴝 𐴀𐴡𐴒𐴡𐴘𐴌𐴝| 𐴀𐴠𐴑 𐴐𐴤𐴡𐴔𐴡𐴃𐴢 𐴀𐴥𐴠 𐴇𐴥𐴡𐴑𐴧𐴝𐴕 𐴀𐴝𐴦𐴣𐴎𐴞 𐴎𐴝𐴒𐴡𐴘| 𐴀𐴞𐴕𐴋𐴞𐴓𐴧𐴝 𐴑𐴞𐴏𐴧𐴟 𐴒𐴡𐴌𐴝 𐴄𐴥𐴞𐴑 𐴕𐴡| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴀𐴞𐴈𐴓𐴝𐴏𐴢 𐴀𐴡𐴘𐴓𐴊𐴠 𐴏𐴠𐴌𐴠𐴉𐴢 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴓𐴧𐴝| 𐴀𐴠𐴃𐴡𐴓𐴧𐴝 𐴁𐴡𐴓𐴞 𐴎𐴡𐴌𐴟𐴌𐴞 𐴀𐴡𐴘𐴁𐴡𐴊𐴠 𐴑𐴞  𐴋𐴡𐴌𐴡𐴌 𐴂𐴡𐴌𐴡𐴌𐴖𐴝 𐴕𐴡 𐴒𐴡𐴌𐴥𐴞 𐴀𐴠𐴈𐴓𐴝𐴏𐴡𐴌 𐴐𐴡𐴇𐴞𐴃𐴢 𐴈𐴝𐴔𐴢 𐴒𐴡𐴌𐴝𐴃𐴢 𐴃𐴝𐴑𐴡𐴕, 𐴀𐴠𐴙𐴑𐴧𐴝 𐴀𐴡𐴙𐴑𐴧𐴝 𐴕𐴡 𐴏𐴡𐴀𐴡𐴕||

𐴀𐴟𐴏𐴃𐴝𐴊𐴢 𐴀𐴝𐴁𐴊𐴟𐴓𐴧𐴝𐴤 𐴀𐴝𐴊𐴇𐴝𐴔𐴢 𐴀𐴝𐴌𐴡 𐴈𐴡𐴘𐴧𐴠𐴊𐴠-
𐴀𐴡 𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴕𐴝𐴇𐴞 𐴀𐴝𐴕𐴞𐴓𐴢 𐴔𐴟𐴕𐴑𐴝𐴌 𐴒𐴡𐴌𐴡𐴘𐴧𐴝 𐴀𐴦𐴡𐴓!  𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔𐴢 𐴀𐴝𐴊𐴧𐴠 𐴈𐴤𐴡𐴌𐴝𐴂𐴢 𐴈𐴝𐴔𐴡𐴃𐴧𐴟𐴕 𐴌𐴟𐴑𐴞 𐴌𐴝𐴑𐴡𐴕 𐴎𐴞𐴘𐴝𐴕 𐴑𐴡𐴃𐴀𐴞 𐴊𐴡𐴓𐴞𐴓𐴡𐴌 𐴎𐴡𐴌𐴞𐴘𐴝 𐴏𐴝𐴁𐴠𐴃𐴢, 𐴘𐴝𐴀𐴝𐴕𐴡𐴌 𐴔𐴟𐴈𐴝𐴓𐴠𐴉𐴞 𐴈𐴡𐴕𐴡 𐴊𐴡𐴓𐴞𐴓𐴢 𐴕𐴝𐴘| 𐴇𐴝𐴣!  𐴑𐴞𐴏𐴧𐴟 𐴔𐴝𐴏𐴝𐴀𐴠𐴓𐴡𐴃𐴢 𐴀𐴠𐴈𐴃𐴠𐴓𐴝𐴉𐴢 𐴀𐴝𐴏𐴠| 𐴑𐴞𐴕𐴃𐴟 𐴇𐴞𐴕𐴡 𐴁𐴦𐴡𐴃𐴢 𐴈𐴡𐴔𐴎𐴡𐴌 𐴀𐴝𐴊𐴧𐴠 𐴎𐴡𐴀𐴞𐴉𐴢 𐴀𐴠𐴈𐴃𐴠𐴓𐴝𐴉𐴢||

𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓𐴢 𐴔𐴟𐴕𐴑𐴝𐴌 𐴈𐴡𐴕 𐴈𐴡𐴕 𐴎𐴝𐴒𐴝𐴃𐴢 𐴅𐴝𐴌𐴞 𐴀𐴡𐴘𐴁𐴡⸮ 𐴎𐴠 𐴔𐴡𐴖𐴎𐴟𐴒𐴞𐴕𐴡𐴌 𐴁𐴝𐴁𐴡𐴃𐴠 𐴏𐴦𐴝𐴉𐴢 𐴏𐴦𐴝𐴉𐴢 𐴕𐴡𐴏𐴢 𐴔𐴦𐴝𐴕𐴞 𐴀𐴝𐴘𐴝𐴃𐴢 𐴀𐴝𐴊𐴧𐴠 𐴇𐴝𐴊𐴞𐴏𐴢 𐴀𐴝𐴏𐴠 𐴇𐴥𐴠𐴎𐴝𐴒𐴝𐴃𐴢 𐴕𐴝𐴑𐴠 𐴎𐴠𐴘𐴝𐴇𐴕𐴡𐴃𐴢 𐴀𐴠𐴈𐴃𐴠𐴓𐴝𐴉𐴢 𐴀𐴝𐴏𐴠 𐴇𐴞𐴘𐴝𐴕𐴡𐴃𐴢⸮ 𐴀𐴠𐴈𐴃𐴠𐴓𐴝𐴉𐴢 𐴀𐴦𐴡𐴓𐴝 𐴔𐴝𐴏𐴀𐴝𐴓𐴝 𐴎𐴠𐴀𐴕 𐴕𐴝𐴑𐴞- 𐴑𐴠𐴓𐴢 𐴃𐴝𐴔𐴝𐴐𐴝𐴌 𐴇𐴝𐴣𐴃𐴞𐴘𐴝𐴌𐴡𐴌 𐴁𐴝𐴁𐴡𐴃𐴠 𐴀𐴠𐴈𐴃𐴠𐴓𐴝𐴉𐴢 𐴑𐴞𐴕𐴃𐴟 𐴀𐴞𐴀𐴕 𐴀𐴡𐴘𐴓𐴊𐴠 𐴕𐴝𐴊𐴠𐴌 𐴀𐴠𐴈𐴃𐴠𐴓𐴝𐴉𐴢| 𐴀𐴝𐴌 𐴕𐴝𐴊𐴠𐴌 𐴀𐴝𐴊𐴧𐴠 𐴈𐴡𐴔𐴎𐴡𐴌 𐴀𐴠𐴈𐴃𐴠𐴓𐴝𐴉𐴢 𐴑𐴡𐴁𐴟𐴓𐴢 𐴒𐴡𐴌𐴝 𐴕𐴡 𐴎𐴝𐴀||

𐴀𐴡𐴓𐴝𐴔𐴝𐴘𐴠 𐴑𐴠𐴌𐴝𐴔𐴢 𐴈𐴡𐴘𐴧𐴠𐴊𐴠- لا إنكار في مسائل الخلاف 𐴔𐴦𐴝𐴕𐴞 𐴀𐴡𐴘𐴓𐴊𐴠 𐴀𐴠𐴈𐴃𐴠𐴓𐴝𐴉𐴞 𐴔𐴝𐴏𐴀𐴝𐴓𐴝𐴃𐴢 𐴀𐴠𐴕𐴑𐴝𐴌 𐴀𐴝𐴊𐴧𐴠 𐴕𐴡 𐴔𐴝𐴕𐴝 𐴑𐴡𐴁𐴟𐴓𐴢 𐴒𐴡𐴌𐴝 𐴕𐴡 𐴎𐴝𐴀 𐴔𐴦𐴝𐴕𐴞 𐴀𐴡𐴘𐴓𐴊𐴠 𐴀𐴞𐴈𐴃𐴠𐴓𐴝𐴉𐴢 𐴔𐴝𐴕𐴡𐴕𐴡𐴃𐴢 𐴈𐴡𐴕𐴡 𐴕𐴟𐴑𐴏𐴝𐴕 𐴕𐴝𐴘)| 𐴑𐴞𐴕𐴃𐴟 𐴇𐴠 𐴀𐴠𐴈𐴃𐴠𐴓𐴝𐴉𐴒𐴝𐴕 𐴔𐴟𐴀𐴃𐴝𐴁𐴡𐴌 𐴀𐴠𐴈𐴃𐴠𐴓𐴝𐴉𐴢 𐴀𐴡𐴀𐴡𐴕 𐴎𐴡𐴌𐴟𐴌𐴞, 𐴈𐴡𐴔𐴎𐴟𐴌 𐴀𐴠𐴈𐴃𐴠𐴓𐴝𐴉𐴢 𐴕𐴡| 𐴎𐴠𐴀𐴕 𐴕𐴠𐴑𐴞 𐴈𐴡𐴕𐴡 𐴀𐴠𐴑𐴎𐴡𐴕 𐴐𐴤𐴝𐴀𐴠𐴌𐴠 𐴈𐴡𐴘𐴧𐴠𐴊𐴠- 

فليس كلُ خلافٍ جاء مُعتبرًا ** إلا خلافٌ له حظُ من النظر
𐴉𐴟𐴙𐴃𐴧𐴡𐴑 𐴀𐴠𐴈𐴃𐴠𐴓𐴝𐴉𐴢 𐴑𐴡𐴁𐴟𐴓𐴢 𐴒𐴡𐴌𐴝 𐴕𐴡 𐴎𐴝𐴀| 𐴑𐴞𐴕𐴃𐴟 𐴀𐴥𐴞𐴀𐴕 𐴑𐴞𐴏𐴧𐴟 𐴀𐴠𐴈𐴃𐴠𐴓𐴝𐴉𐴢 𐴀𐴝𐴏𐴠 𐴎𐴞𐴕𐴡𐴃𐴢 𐴏𐴞𐴕𐴃𐴝𐴌 𐴔𐴡𐴖𐴑𐴝 𐴀𐴝𐴏𐴦𐴠|

𐴀𐴥𐴠𐴀𐴕 𐴁𐴦𐴡𐴃𐴢 𐴔𐴝𐴏𐴀𐴝𐴓𐴝 𐴀𐴝𐴏𐴠 𐴎𐴠𐴒𐴞𐴕𐴡𐴃𐴢 𐴁𐴠𐴐𐴥𐴝𐴁𐴠𐴐𐴥𐴞 𐴀𐴠𐴈𐴃𐴠𐴓𐴝𐴉𐴢 𐴀𐴝𐴏𐴠| 𐴑𐴞𐴕𐴃𐴟 𐴔𐴟𐴀𐴃𐴝𐴁𐴡𐴌 𐴀𐴠𐴈𐴃𐴠𐴓𐴝𐴉𐴢 𐴀𐴡𐴘𐴓𐴊𐴠 𐴎𐴠 𐴀𐴠𐴈𐴃𐴠𐴓𐴝𐴉𐴡𐴃𐴢 𐴑𐴞𐴃𐴝𐴁𐴟𐴓𐴧𐴝𐴤 𐴀𐴝𐴊𐴧𐴠 𐴏𐴟𐴕𐴧𐴝𐴃𐴠 𐴌𐴡𐴏𐴟𐴓𐴡𐴃𐴧𐴟 𐴊𐴡𐴓𐴞𐴓𐴢 𐴀𐴝𐴏𐴠|

𐴀𐴟𐴏𐴃𐴝𐴊𐴢 𐴀𐴝𐴁𐴊𐴟𐴓𐴧𐴝𐴤 𐴀𐴝𐴊𐴇𐴝𐴔 𐴀𐴝𐴌𐴡 𐴈𐴡𐴘𐴧𐴠𐴊𐴠-
𐴁𐴠𐴐𐴥𐴢 𐴇𐴠𐴏𐴧𐴝 𐴔𐴟𐴇𐴝𐴑𐴧𐴞𐴑 𐴀𐴝𐴓𐴠𐴔 𐴀𐴥𐴡𐴑𐴧𐴡𐴓𐴠 𐴉𐴟𐴌𐴟𐴀𐴞 𐴔𐴝𐴏𐴀𐴝𐴓𐴝 𐴔𐴦𐴝𐴕𐴞 𐴀𐴞𐴅𐴃𐴠𐴇𐴝𐴊𐴞 𐴔𐴡𐴏𐴀𐴝𐴓𐴝𐴃𐴢 𐴀𐴠𐴈𐴃𐴠𐴓𐴝𐴉𐴡𐴌𐴠 𐴀𐴠𐴕𐴑𐴝𐴌 𐴕𐴡 𐴒𐴡𐴌𐴥𐴠| 𐴔𐴝𐴏𐴝𐴓𐴝𐴕 𐴀𐴞𐴔𐴝𐴔𐴢 𐴕𐴡𐴁𐴡𐴖𐴞 (𐴌𐴡𐴇) 𐴈𐴡𐴘𐴧𐴠𐴊𐴠 𐴀𐴠𐴈𐴃𐴠𐴓𐴝𐴉𐴡𐴌 𐴁𐴝𐴁𐴡𐴃𐴠 𐴀𐴟𐴏𐴟𐴓𐴢 𐴀𐴡𐴘𐴓𐴊𐴠- 𐴔𐴡𐴐𐴖𐴝𐴌𐴝 𐴊𐴡𐴀𐴕 𐴀𐴝𐴊𐴧𐴠 𐴁𐴥𐴡𐴘𐴝𐴕 𐴒𐴡𐴌𐴡𐴕| 𐴃𐴟𐴖𐴝𐴣𐴌 𐴈𐴝𐴣𐴏𐴠 𐴎𐴞𐴘𐴝𐴕 𐴔𐴡𐴑𐴁𐴟𐴓𐴢 𐴀𐴝𐴣𐴀𐴌𐴝𐴌 𐴈𐴝𐴣𐴏𐴠 𐴇𐴥𐴞𐴘𐴝𐴕 𐴔𐴡𐴑𐴁𐴟𐴓𐴢 𐴕𐴡 𐴀𐴡𐴘𐴃𐴡 𐴉𐴝𐴌𐴠 𐴀𐴝𐴁𐴝𐴌 𐴀𐴝𐴣𐴀𐴌𐴝𐴌 𐴈𐴝𐴣𐴏𐴠 𐴎𐴞𐴘𐴝𐴕 𐴔𐴡𐴑𐴁𐴟𐴓𐴢 𐴃𐴟𐴖𐴝𐴣𐴌𐴝𐴌 𐴈𐴝𐴣𐴏𐴠 𐴇𐴞𐴘𐴝𐴕 𐴔𐴡𐴑𐴁𐴟𐴓𐴢 𐴕𐴡𐴘𐴡 𐴀𐴡𐴘𐴃𐴡 𐴉𐴝𐴌𐴠| 𐴔𐴡𐴑𐴁𐴟𐴓𐴢 𐴀𐴝𐴊𐴧𐴠 𐴔𐴡𐴑𐴁𐴟𐴓𐴢 𐴕𐴡 𐴔𐴦𐴝𐴕𐴞 𐴎𐴠 𐴀𐴠𐴈𐴃𐴠𐴓𐴝𐴉𐴡𐴌 𐴁𐴝𐴁𐴡𐴃𐴠 𐴑𐴟𐴌𐴀𐴦𐴝𐴕 𐴀𐴝𐴊𐴧𐴠 𐴏𐴟𐴕𐴧𐴝𐴃𐴠 𐴌𐴡𐴏𐴟𐴓𐴡𐴃𐴧𐴟 𐴏𐴦𐴝𐴉𐴢 𐴊𐴡𐴓𐴞𐴓𐴢 𐴕𐴝𐴘 𐴀𐴥𐴞𐴀𐴕 𐴏𐴦𐴞𐴏𐴡𐴌 𐴁𐴝𐴁𐴡𐴃𐴠 𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓𐴢 𐴔𐴟𐴕𐴑𐴝𐴌 𐴕𐴝𐴘 𐴁𐴡𐴓𐴑𐴠 𐴏𐴠𐴌𐴠𐴉𐴢 𐴔𐴡𐴐𐴖𐴝𐴌𐴝 𐴀𐴝𐴊𐴧𐴠 𐴁𐴥𐴝𐴘𐴝𐴕 𐴀𐴝𐴏𐴠| 𐴔𐴡𐴐𐴖𐴝𐴌𐴝 𐴊𐴠𐴖𐴝 𐴎𐴝𐴘𐴁𐴡𐴊𐴠 𐴀𐴞𐴕𐴋𐴞𐴓𐴧𐴝 𐴒𐴡𐴌𐴞 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴝𐴣𐴀𐴌𐴝 𐴈𐴡𐴘 𐴘𐴝𐴀𐴝𐴕 𐴀𐴝𐴖𐴓𐴝 𐴀𐴡𐴃𐴡𐴁𐴝 𐴘𐴡𐴀𐴝𐴕 𐴀𐴝𐴖𐴓𐴝 𐴀𐴝𐴌 𐴘𐴝𐴀𐴝𐴕 𐴇𐴝𐴊𐴞𐴏𐴡𐴌 𐴊𐴥𐴝𐴌𐴝𐴘 𐴏𐴝𐴁𐴠𐴃𐴢 𐴀𐴡𐴘𐴧𐴠| 𐴀𐴞𐴃𐴡𐴓𐴧𐴝 𐴁𐴡𐴓𐴞 𐴀𐴝𐴣𐴀𐴌𐴝𐴝𐴌 𐴈𐴝𐴣𐴏𐴠 𐴘𐴝𐴀𐴝𐴕 𐴔𐴡𐴖𐴎𐴟 𐴑𐴞𐴕𐴃𐴟 𐴀𐴡𐴕𐴡𐴌 𐴈𐴝𐴣𐴏𐴠 𐴘𐴝𐴀𐴝𐴕 𐴏𐴡𐴇𐴞| 𐴀𐴥𐴠 𐴔𐴡𐴏𐴝𐴀𐴝𐴓𐴝𐴒𐴞𐴕𐴡𐴃𐴢 𐴒𐴡𐴓𐴠𐴁𐴝𐴕 𐴔𐴡𐴏𐴓𐴝𐴒𐴝𐴕 𐴃𐴡𐴌𐴅𐴞 𐴉𐴝𐴘𐴁𐴡| 𐴑𐴞𐴘𐴝𐴏𐴢 𐴀𐴝𐴊𐴧𐴠  𐴀𐴝𐴑𐴡𐴓𐴠 𐴘𐴥𐴡 𐴘𐴝𐴀𐴝𐴕 𐴈𐴡𐴦||

𐴃𐴝𐴀𐴛 𐴀𐴝𐴌𐴡 𐴈𐴡𐴘𐴧𐴠𐴊𐴠-
𐴀𐴠𐴈𐴃𐴞𐴓𐴝𐴉𐴡𐴌 𐴀𐴟𐴏𐴟𐴓𐴢 𐴀𐴡𐴘𐴓𐴊𐴠- 𐴀𐴝𐴓𐴠𐴔𐴢 𐴀𐴥𐴡𐴑𐴧𐴡𐴓𐴡𐴌 𐴁𐴟𐴃𐴥𐴡𐴌𐴠 𐴎𐴝𐴌𐴝 𐴑𐴝𐴁𐴠𐴓𐴢 𐴀𐴝𐴊𐴧𐴠 𐴓𐴝𐴀𐴠𐴑 𐴃𐴝𐴌𐴝 𐴔𐴡𐴐𐴖𐴝𐴌𐴝 𐴀𐴝𐴊𐴧𐴠 𐴁𐴥𐴡𐴘𐴝𐴕 𐴊𐴞𐴁𐴡| 𐴀𐴞𐴔𐴝𐴔 𐴒𐴝𐴎𐴝𐴓𐴞 (𐴌𐴡𐴇)  𐴀𐴞𐴇𐴘𐴝𐴘𐴠 𐴀𐴟𐴓𐴟𐴔𐴟𐴊𐴧𐴞𐴕 𐴑𐴞𐴃𐴝𐴁𐴡𐴃𐴢 𐴀𐴝𐴓𐴢 𐴇𐴝𐴏𐴝𐴁𐴤𐴝𐴌 𐴐𐴡𐴌𐴡𐴃𐴡 𐴀𐴥𐴡𐴑𐴧𐴡𐴓𐴡𐴌 𐴁𐴝𐴁𐴡𐴃𐴠 𐴈𐴡𐴘𐴧𐴠𐴊𐴠- 𐴇𐴝𐴏𐴝𐴁𐴤𐴝 𐴈𐴦𐴡𐴊𐴧𐴠 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔𐴢 𐴀𐴝𐴊𐴧𐴠 𐴈𐴤𐴡𐴌𐴝𐴂𐴞𐴃𐴧𐴟𐴕 𐴌𐴟𐴑𐴞 𐴌𐴝𐴑𐴡𐴕𐴡𐴌𐴠| 𐴀𐴝𐴔𐴡𐴓𐴢 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓𐴢 𐴔𐴟𐴕𐴑𐴝𐴌 𐴒𐴡𐴌𐴡𐴘𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴔𐴟𐴇𐴃𐴝𐴏𐴞𐴁𐴞𐴕 𐴁𐴡𐴓𐴥𐴞 𐴈𐴦𐴡𐴀| 𐴇𐴝𐴏𐴝𐴁𐴤𐴝𐴌 𐴐𐴡𐴌𐴡𐴃𐴡 𐴀𐴡𐴘𐴓𐴊𐴠- 𐴔𐴟𐴕𐴑𐴝𐴌 𐴔𐴦𐴝𐴕𐴞 𐴈𐴤𐴡𐴌𐴝𐴂𐴢 𐴈𐴝𐴔𐴧𐴡𐴌 𐴁𐴝𐴁𐴡𐴃𐴠 𐴁𐴤𐴝𐴓𐴝 𐴒𐴡𐴌𐴥𐴞 𐴎𐴝𐴕𐴝 𐴃𐴝𐴑𐴝 𐴉𐴡𐴌𐴞𐴁𐴡, 𐴈𐴡𐴕𐴡 𐴑𐴠𐴏𐴞𐴙𐴔𐴧𐴝 𐴀𐴞𐴅𐴃𐴠𐴇𐴝𐴊𐴞 𐴔𐴡𐴏𐴀𐴝𐴓𐴝 𐴕𐴡𐴀 𐴀𐴡𐴀𐴕| 𐴀𐴞𐴃𐴡𐴓𐴧𐴝 𐴁𐴡𐴓𐴞 𐴈𐴡𐴕𐴡 𐴀𐴞𐴅𐴃𐴠𐴇𐴝𐴊𐴞 𐴔𐴝𐴏𐴀𐴝𐴓𐴝𐴃𐴢 𐴇𐴝𐴏𐴝𐴁𐴤𐴝 𐴕𐴝𐴘||

𐴀𐴟𐴏𐴃𐴝𐴊𐴢  𐴀𐴝𐴊𐴟𐴓𐴧𐴝𐴦𐴇 𐴀𐴝𐴊𐴇𐴝𐴔 𐴀𐴠𐴎𐴝𐴒𐴝𐴃𐴢 𐴀𐴠𐴑𐴧𐴝𐴕 𐴁𐴝𐴌𐴞𐴑 𐴈𐴡𐴃𐴝 𐴈𐴡𐴘𐴧𐴠𐴊𐴠-  “𐴀𐴡 𐴔𐴟𐴇𐴝𐴅𐴞𐴌 𐴀𐴥𐴡𐴑𐴧𐴡𐴓𐴢! 𐴘𐴝𐴀𐴝𐴕𐴡𐴌 𐴖𐴝𐴌𐴠 𐴀𐴡𐴕𐴡𐴌𐴝 𐴇𐴟𐴐𐴞𐴘𐴝𐴌 𐴀𐴡𐴖 𐴀𐴝𐴌 𐴃𐴟𐴖𐴝𐴣𐴌𐴝𐴌 “𐴔𐴡𐴏𐴀𐴝𐴓𐴝𐴌𐴠 𐴊𐴡𐴓𐴞𐴓𐴡𐴌 𐴎𐴡𐴌𐴞𐴘𐴝 𐴏𐴝𐴁𐴠𐴃𐴢 𐴒𐴡𐴌𐴥𐴡|  𐴀𐴡𐴕𐴡𐴌𐴝 𐴎𐴝 𐴎𐴝𐴙𐴕𐴧𐴡 𐴔𐴡𐴎𐴁𐴟𐴃𐴢 𐴒𐴡𐴌𐴥𐴞 𐴊𐴡𐴌𐴥𐴡||”

𐴃𐴝𐴀𐴛 𐴀𐴥𐴠 𐴈𐴡𐴃𐴝𐴒𐴞𐴕 𐴀𐴞𐴃𐴡𐴓𐴧𐴝 𐴁𐴡𐴓𐴞 𐴈𐴡𐴘𐴧𐴠 𐴑𐴞 𐴁𐴦𐴝𐴎𐴟 𐴔𐴡𐴃𐴧𐴝 𐴀𐴡𐴕𐴠 𐴀𐴥𐴞𐴀𐴕  𐴑𐴡𐴗𐴔𐴡𐴌 𐴈𐴝𐴣𐴏𐴠 𐴎𐴝𐴘𐴁𐴝 𐴎𐴝𐴌𐴝𐴌 𐴉𐴞𐴑𐴇𐴞 𐴔𐴡𐴎𐴇𐴝𐴁𐴢 𐴃𐴟𐴖𐴝𐴣𐴌 𐴔𐴡𐴎𐴇𐴝𐴁𐴡𐴃𐴧𐴟𐴕 𐴀𐴝𐴓𐴡𐴑𐴢| 𐴀𐴞𐴁𐴤𐴝 𐴀𐴥𐴠 𐴔𐴡𐴎𐴇𐴝𐴁𐴢 𐴀𐴝𐴊𐴧𐴠 𐴀𐴡𐴁𐴤𐴝 𐴀𐴡 𐴔𐴡𐴎𐴇𐴝𐴁𐴢| 𐴀𐴝𐴌 𐴘𐴝𐴀𐴝𐴕 𐴀𐴡𐴘𐴓𐴊𐴠  𐴇𐴥𐴝𐴓𐴢 𐴎𐴡𐴔𐴝𐴕𐴝𐴌 𐴀𐴝𐴑𐴏𐴡𐴌 𐴅𐴞𐴇𐴝𐴞 𐴎𐴡𐴔𐴞𐴕𐴡𐴌 𐴇𐴝𐴓𐴡𐴃𐴢| 𐴀𐴞𐴃𐴡𐴓𐴧𐴝 𐴁𐴡𐴓𐴞 𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓𐴢 𐴔𐴟𐴕𐴑𐴝𐴌 𐴒𐴡𐴌𐴞𐴁𐴝𐴌 𐴀𐴝𐴒𐴠 𐴏𐴞𐴕𐴃𐴝- 𐴉𐴞𐴑𐴞𐴌 𐴒𐴡𐴌𐴥𐴞 𐴁𐴦𐴝𐴊𐴠 𐴔𐴟𐴔𐴞𐴑𐴧𐴝 𐴎𐴦𐴡||

𐴀𐴦𐴝𐴔𐴢 𐴔𐴝𐴙𐴕𐴐𐴥𐴡𐴌 𐴔𐴡𐴎𐴇𐴝𐴁𐴡𐴌 𐴁𐴝𐴁𐴡𐴃𐴠 𐴎𐴝𐴕𐴞 𐴓𐴡𐴖 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴔𐴡𐴑𐴁𐴟𐴓 𐴔𐴡𐴏𐴀𐴝𐴓𐴝 𐴀𐴝𐴊𐴧𐴠 𐴀𐴠𐴈𐴃𐴠𐴓𐴝𐴉𐴞 𐴔𐴡𐴏𐴀𐴝𐴓𐴝𐴃𐴢 𐴉𐴡𐴌𐴡𐴑 𐴒𐴡𐴌𐴞 𐴉𐴝𐴌𐴡𐴉𐴝𐴕| 𐴀𐴠𐴈𐴃𐴠𐴓𐴝𐴉𐴞 𐴀𐴝𐴊𐴧𐴠 𐴀𐴠𐴈𐴃𐴞𐴓𐴝𐴉𐴢 𐴕𐴝𐴘 𐴊𐴞 𐴔𐴡𐴏𐴀𐴝𐴓𐴝𐴌 𐴁𐴝𐴁𐴡𐴃𐴠 𐴑𐴝𐴉𐴞 𐴀𐴞𐴓𐴡𐴔𐴢 𐴇𐴝𐴏𐴞𐴓𐴢 𐴒𐴡𐴌𐴡| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴀𐴡𐴕𐴠 𐴁𐴟𐴎𐴥𐴞 𐴉𐴝𐴌𐴡𐴉𐴝𐴕 𐴀𐴠 𐴔𐴡𐴏𐴀𐴝𐴓𐴝 𐴀𐴠𐴕𐴡𐴌 𐴀𐴠𐴈𐴃𐴠𐴓𐴝𐴉𐴢 𐴔𐴟𐴀𐴃𐴝𐴁𐴡𐴌 𐴀𐴡𐴘𐴁𐴡 𐴕𐴝𐴑𐴞 𐴕𐴡 𐴀𐴡𐴘𐴁𐴡⸮ 𐴇𐴥𐴠 𐴔𐴡𐴏𐴀𐴝𐴓𐴝𐴒𐴞𐴕 𐴁𐴟𐴎𐴞𐴁𐴡𐴓𐴧𐴝 𐴉𐴞𐴑𐴝𐴤 𐴀𐴝𐴊𐴧𐴠 𐴀𐴞𐴓𐴡𐴔𐴡𐴌 𐴎𐴡𐴌𐴟𐴌𐴡𐴃𐴢 𐴀𐴝𐴏𐴠 𐴕𐴝𐴑𐴞 𐴕𐴝𐴘⸮

𐴀𐴝𐴌 𐴊𐴝𐴖𐴝𐴃𐴢 𐴊𐴡𐴀𐴕𐴡𐴌 𐴁𐴝𐴁𐴡𐴃𐴠 𐴕𐴡𐴌𐴡𐴔𐴢 𐴀𐴝𐴊𐴧𐴠 𐴇𐴠𐴑𐴔𐴡𐴃𐴢 𐴀𐴦𐴡𐴓𐴝 𐴈𐴡𐴃𐴝 𐴈𐴦𐴡| 𐴏𐴡𐴈𐴃𐴞 𐴏𐴟𐴓𐴟𐴑 𐴕𐴡 𐴒𐴡𐴌𐴥𐴞𐴁𐴝 𐴃𐴡𐴘𐴓𐴠 𐴔𐴝𐴕𐴟𐴙𐴐𐴥𐴢 𐴀𐴥𐴡𐴑𐴧𐴡𐴓𐴢 𐴃𐴟𐴖𐴝𐴣𐴃𐴧𐴟 𐴊𐴟𐴌𐴞 𐴎𐴝𐴘𐴁𐴡𐴒𐴡𐴘| 𐴀𐴠𐴃𐴧𐴡𐴃𐴢 𐴀𐴡𐴕𐴠 𐴕𐴞𐴎𐴡𐴌𐴠 𐴁𐴦𐴝𐴊𐴠 𐴀𐴡𐴙𐴕𐴧𐴡 𐴈𐴡𐴕𐴞𐴙𐴑𐴧𐴝𐴌𐴠 𐴕𐴡 𐴉𐴝𐴘𐴁𐴝| 𐴀𐴝𐴌 𐴏𐴡𐴈𐴃𐴡 𐴏𐴟𐴓𐴟𐴑𐴡𐴌 𐴎𐴡𐴌𐴞𐴘𐴝 𐴃𐴝𐴌𐴝𐴌 𐴀𐴝𐴃𐴠 𐴈𐴝𐴣𐴏𐴠 𐴀𐴝𐴊𐴧𐴠 𐴊𐴟𐴌𐴞 𐴃𐴝𐴑𐴡𐴘𐴧𐴝 𐴀𐴦𐴡𐴓𐴠 𐴃𐴟𐴖𐴝𐴣𐴌 𐴖𐴝𐴌𐴠 𐴎𐴟𐴓𐴟𐴔𐴢 𐴒𐴡𐴌𐴞𐴁𐴡| 𐴇𐴝𐴔𐴠𐴐𐴥𐴝 𐴇𐴝𐴔𐴠𐴐𐴥𐴝 𐴈𐴡𐴃𐴝 𐴘𐴝𐴀𐴝𐴕 𐴘𐴦𐴝𐴊𐴢 𐴌𐴝𐴑𐴞𐴁𐴝! 𐴀𐴡𐴓𐴝𐴔𐴝𐴘𐴠 𐴑𐴠𐴌𐴝𐴔𐴢 𐴀𐴥𐴡𐴑𐴧𐴡𐴓𐴠 𐴀𐴥𐴡 𐴃𐴝𐴔𐴦𐴝𐴔𐴢 𐴈𐴡𐴏𐴟𐴌𐴞 𐴀𐴝𐴊𐴧𐴠 𐴒𐴡𐴓𐴡𐴃𐴞 𐴓𐴡𐴘 𐴈𐴦𐴡𐴃𐴝 𐴈𐴡𐴘𐴧𐴠, 𐴎𐴠𐴒𐴞𐴕 𐴑𐴟𐴌𐴀𐴦𐴝𐴕 𐴀𐴝𐴊𐴧𐴠 𐴇𐴝𐴊𐴞𐴏𐴡𐴃𐴢 𐴏𐴦𐴝𐴉𐴢 𐴏𐴦𐴝𐴉𐴢 𐴁𐴥𐴡𐴘𐴝𐴕  𐴒𐴡𐴌𐴝 𐴀𐴝𐴏𐴠| 𐴎𐴠 𐴔𐴡𐴏𐴀𐴝𐴓𐴝 𐴓𐴡𐴘 𐴀𐴠𐴈𐴃𐴠𐴓𐴝𐴉𐴢 𐴀𐴝𐴏𐴠 𐴇𐴞𐴒𐴞𐴕 𐴃𐴝𐴌𐴝 𐴁𐴝𐴌𐴁𐴝𐴌 𐴁𐴥𐴡𐴘𐴝𐴕 𐴕𐴡 𐴒𐴡𐴙𐴃𐴧𐴡||

𐴎𐴠𐴀𐴕 𐴕𐴠𐴑𐴞 𐴀𐴝𐴁𐴟 𐴕𐴟𐴘𐴝𐴔𐴢, 𐴏𐴟𐴉𐴞𐴘𐴝𐴕 𐴏𐴡𐴖𐴌𐴞 (𐴌𐴡𐴇)𐴃𐴧𐴟𐴕 𐴁𐴥𐴡𐴘𐴝𐴕 𐴒𐴡𐴙𐴅𐴧𐴠-  𐴎𐴡𐴊𐴞 𐴃𐴟𐴀𐴛 𐴀𐴥𐴠𐴀𐴕 𐴈𐴡𐴕𐴡 𐴀𐴝𐴔𐴡𐴓𐴢 𐴒𐴡𐴌𐴠𐴊𐴧𐴡 𐴊𐴠𐴑𐴡  𐴎𐴞𐴘𐴝𐴕𐴡𐴃𐴢 𐴀𐴠𐴈𐴃𐴠𐴓𐴝𐴉𐴢 𐴀𐴝𐴏𐴠|| 𐴃𐴡𐴘 𐴇𐴞𐴘𐴝𐴕 𐴃𐴟𐴖𐴝𐴣𐴌 𐴔𐴟𐴈𐴝𐴓𐴠𐴉𐴢 𐴀𐴡𐴘𐴓𐴠𐴘𐴥𐴡 𐴃𐴝𐴌𐴠 𐴔𐴝𐴕𐴥𐴝 𐴕𐴡 𐴒𐴡𐴙𐴅𐴧𐴡||

𐴀𐴞𐴔𐴝𐴔𐴢 𐴀𐴝𐴇𐴔𐴡𐴊𐴢 𐴁𐴞𐴕 𐴇𐴝𐴔𐴁𐴡𐴓𐴢 (𐴌𐴡𐴇) 𐴈𐴡𐴘𐴧𐴠𐴊𐴠- “𐴔𐴝𐴙𐴕𐴐𐴥𐴡𐴌𐴠 𐴁𐴤𐴝𐴓𐴝 𐴈𐴝𐴔𐴡𐴌 𐴇𐴡𐴑𐴟𐴔𐴢 𐴊𐴡𐴀𐴕𐴡𐴌 𐴁𐴝𐴁𐴡𐴃𐴠 𐴇𐴞𐴑𐴔𐴡𐴃𐴢 𐴀𐴝𐴊𐴧𐴠 𐴕𐴡𐴌𐴔𐴞 𐴏𐴟𐴓𐴟𐴑 𐴒𐴡𐴌𐴥𐴡| 𐴈𐴡𐴕𐴡 𐴏𐴡𐴈𐴃𐴞 𐴏𐴟𐴓𐴟𐴑 𐴕𐴡 𐴒𐴡𐴌𐴥𐴞𐴁𐴝| 𐴑𐴞𐴕𐴃𐴟 𐴎𐴞𐴁𐴤𐴝𐴘𐴠 𐴎𐴡𐴇𐴠𐴌𐴞 𐴁𐴝𐴇𐴠𐴌 𐴒𐴟𐴕𐴤𐴝 𐴒𐴡𐴌𐴠 𐴀𐴥𐴞𐴀𐴕 𐴔𐴝𐴙𐴕𐴐𐴥𐴡𐴌𐴠 𐴌𐴟𐴑𐴞 𐴌𐴝𐴑𐴡𐴕 𐴎𐴡𐴌𐴟𐴌𐴞| 𐴑𐴞𐴘𐴡𐴓𐴧𐴝 𐴈𐴦𐴡𐴀 𐴎𐴝𐴊𐴧𐴠 𐴑𐴞 𐴉𐴝𐴏𐴠𐴑𐴡𐴌 𐴈𐴡𐴕𐴡 𐴑𐴠𐴏𐴞𐴙𐴔𐴧𐴝 𐴇𐴟𐴌𐴔𐴡𐴃𐴢 𐴕𐴝𐴘| 𐴀𐴞𐴃𐴡𐴓𐴧𐴝 𐴁𐴡𐴓𐴞 𐴘𐴝𐴀𐴝𐴕𐴡𐴃𐴥𐴡 𐴃𐴝𐴌 𐴈𐴡𐴕𐴡 𐴇𐴟𐴌𐴔𐴡𐴃𐴢 𐴕𐴡 𐴃𐴝𐴑𐴞𐴁𐴡||

𐴀𐴟𐴏𐴃𐴝𐴊𐴢 𐴀𐴝𐴁𐴊𐴟𐴓𐴧𐴝𐴤 𐴀𐴝𐴊𐴇𐴝𐴔 𐴈𐴡𐴘𐴧𐴠𐴊𐴠-
𐴎𐴝𐴌𐴝 𐴀𐴝𐴔𐴡𐴌 𐴁𐴞𐴓𐴢 𐴔𐴝𐴌𐴟𐴉𐴢 𐴀𐴝𐴊𐴧𐴠 𐴕𐴝𐴇𐴞 𐴀𐴝𐴕𐴞𐴓 𐴔𐴟𐴕𐴑𐴝𐴌 𐴒𐴡𐴌𐴞𐴁𐴡 𐴃𐴝𐴌𐴝𐴓𐴧𐴝 𐴎𐴡𐴌𐴟𐴌𐴞 𐴀𐴡𐴘𐴓𐴊𐴠 𐴃𐴝𐴌𐴝 𐴔𐴝𐴙𐴕𐴐𐴥𐴡𐴌𐴠 𐴀𐴥𐴞𐴀𐴕𐴁𐴤𐴝𐴉𐴠 𐴈𐴠𐴃𐴝𐴁𐴢 𐴒𐴡𐴌𐴞 𐴈𐴡𐴃𐴝 𐴈𐴡𐴘𐴁𐴡 𐴃𐴝𐴑𐴥𐴠 𐴃𐴝𐴌𐴝 𐴁𐴟𐴎𐴞 𐴉𐴝𐴌𐴠𐴉𐴝𐴕 𐴀𐴝𐴌 𐴀𐴠𐴊𐴧𐴟𐴌 𐴁𐴡𐴘𐴝𐴕 𐴒𐴡𐴌𐴞𐴁𐴡 𐴎𐴠𐴊𐴧𐴟𐴌 𐴃𐴝𐴌𐴝 𐴑𐴡𐴁𐴟𐴓𐴢 𐴒𐴡𐴌𐴞𐴁𐴡| 𐴃𐴝𐴌𐴝𐴌𐴠 𐴀𐴥𐴠𐴀𐴕 𐴑𐴞𐴏𐴧𐴟 𐴒𐴡𐴌𐴞𐴁𐴡𐴓𐴧𐴝 𐴔𐴡𐴅𐴁𐴟𐴌 𐴕𐴡 𐴒𐴡𐴌𐴞𐴁𐴝 𐴎𐴞𐴘𐴝𐴕 𐴃𐴝𐴌𐴝 𐴕𐴡 𐴁𐴟𐴎𐴠 𐴀𐴡𐴃𐴡𐴁𐴝 𐴃𐴝𐴌𐴝 𐴇𐴥𐴠 𐴀𐴝𐴔𐴡𐴓𐴢 𐴒𐴡𐴌𐴞𐴁𐴝𐴌 𐴃𐴝𐴑𐴡𐴃𐴢 𐴕𐴡 𐴌𐴝𐴑𐴠| 𐴀𐴝𐴔𐴡𐴕 𐴇𐴥𐴝𐴓𐴡𐴃𐴡𐴃𐴢 𐴃𐴝𐴌𐴝𐴌 𐴀𐴞𐴏𐴧𐴝 𐴀𐴝𐴊𐴧𐴠 𐴐𐴡𐴑 𐴔𐴡𐴎𐴠𐴕 𐴊𐴝𐴖𐴝𐴃𐴡𐴓𐴧𐴝 𐴔𐴡𐴖𐴑𐴝 𐴀𐴝𐴊𐴧𐴠 𐴐𐴡𐴔𐴡𐴘 𐴔𐴟𐴀𐴝𐴘𐴧𐴞𐴕 𐴒𐴡𐴌𐴥𐴞 𐴓𐴡𐴘𐴁𐴝| 𐴕𐴡𐴘𐴓𐴠 𐴉𐴝𐴏𐴝𐴊𐴢 𐴊𐴠𐴈𐴝 𐴊𐴞𐴁𐴡| 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝 𐴀𐴡𐴘𐴓𐴊𐴠 𐴃𐴝𐴖𐴉𐴞𐴑 𐴊𐴡𐴘𐴧𐴝 𐴀𐴝𐴊𐴧𐴠 𐴏𐴡𐴀𐴞 𐴌𐴝𐴏𐴧𐴝 𐴊𐴠𐴈𐴡𐴘𐴧𐴝||

𐴀𐴝𐴣𐴀𐴌𐴝 𐴀𐴝𐴓𐴧𐴝𐴤 𐴃𐴝𐴀𐴝𐴓𐴝𐴌 𐴈𐴝𐴣𐴏𐴠 𐴊𐴟𐴀𐴦𐴝 𐴒𐴡𐴌𐴥𐴞 𐴃𐴝𐴀𐴛 𐴀𐴝𐴣𐴀𐴌𐴝𐴌𐴠 𐴃𐴝𐴀𐴛𐴌 𐴀𐴞𐴃𐴡𐴀𐴝𐴃𐴡𐴌 𐴃𐴡𐴖𐴉𐴞𐴑 𐴊𐴝𐴕 𐴒𐴡𐴌𐴟𐴑 𐴀𐴝𐴌 𐴕𐴡𐴉𐴝𐴌𐴔𐴡𐴕𐴞𐴃𐴧𐴟𐴕 𐴊𐴟𐴌𐴞 𐴌𐴝𐴑𐴟𐴕| 𐴀𐴦𐴝𐴔𐴞𐴕

والسلام عليكم ورحمة الله وبركاته