تهنئة وتبصرة بمناسبة عيد الفطر المبارك 1444 هجري||عید الفطر 1444ھ کے موقع پر مبارکباد اور بصیرت||𐴀𐴞𐴊𐴟𐴓𐴢 𐴉𐴞𐴃𐴡𐴌 𐴱𐴴𐴴𐴴 𐴇𐴞𐴅𐴌𐴞𐴌 𐴁𐴝𐴁𐴡𐴃𐴠𐴔𐴟𐴁𐴝𐴌𐴡𐴑𐴁𐴝𐴊𐴢 𐴀𐴝𐴊𐴧𐴠 𐴕𐴡𐴏𐴞𐴘𐴡𐴃𐴞 𐴂𐴡𐴘𐴒𐴝𐴔𐴢||On the occasion of Eid-ul-Fitr 1444 Hijri Messages of greetings and advice

𐴑𐴡𐴀𐴞𐴊𐴝𐴃𐴟𐴓𐴢 𐴅𐴞𐴇𐴝𐴊𐴢 – 𐴔𐴡𐴌𐴑𐴝𐴎𐴞 𐴀𐴝𐴔𐴞𐴌 𐴀𐴥𐴡𐴑𐴧𐴡𐴓𐴢
𐴀𐴞𐴊𐴟𐴓𐴢 𐴉𐴞𐴃𐴡𐴌 𐴱𐴴𐴴𐴴 𐴇𐴞𐴅𐴌𐴞𐴌 𐴁𐴝𐴁𐴡𐴃𐴠
𐴔𐴟𐴁𐴝𐴌𐴡𐴑𐴁𐴝𐴊𐴢 𐴀𐴝𐴊𐴧𐴠 𐴕𐴡𐴏𐴞𐴘𐴡𐴃𐴞 𐴂𐴡𐴘𐴒𐴝𐴔𐴢

𐴀𐴝𐴓𐴇𐴝𐴔𐴊𐴟𐴓𐴧𐴝𐴦𐴇! 𐴃𐴝𐴔𐴦𐴝𐴔𐴢 𐴃𐴝𐴌𐴞𐴉𐴢 𐴀𐴝𐴓𐴧𐴝𐴦𐴇 𐴃𐴝𐴀𐴝𐴓𐴝𐴓𐴧𐴝 𐴎𐴞𐴁𐴥𐴝 𐴌𐴡𐴔𐴎𐴝𐴕 𐴔𐴝𐴙𐴐𐴥𐴡𐴌 𐴊𐴥𐴝𐴌𐴝𐴘 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌𐴠 𐴔𐴟𐴑𐴝𐴌𐴧𐴡𐴔𐴢 𐴒𐴡𐴙𐴅𐴧𐴠| 𐴏𐴞𐴘𐴝𐴔𐴢 𐴀𐴝𐴊𐴧𐴠 𐴑𐴞𐴘𐴝𐴔𐴡𐴌 𐴇𐴥𐴡𐴑 𐴀𐴝𐴊𐴝𐴘 𐴒𐴡𐴌𐴡𐴕𐴡𐴌 𐴊𐴥𐴝𐴌𐴝𐴘 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴖𐴝𐴌𐴠 𐴌𐴥𐴡𐴇𐴔𐴝𐴃𐴡𐴌 𐴁𐴝𐴌𐴞𐴐𐴤𐴝 𐴊𐴞𐴘𐴧𐴠| 𐴈𐴦𐴝𐴏𐴢 𐴊𐴞𐴓𐴢 𐴓𐴡𐴘 𐴏𐴝𐴖𐴝𐴁𐴡𐴌 𐴀𐴝𐴐𐴥𐴝 𐴒𐴡𐴙𐴅𐴧𐴠𐴊𐴞 𐴀𐴠𐴃𐴡𐴓𐴧𐴝 𐴑𐴝𐴔𐴠𐴓𐴢 𐴅𐴝𐴎𐴦𐴝 𐴊𐴝𐴕 𐴒𐴡𐴌𐴞𐴁𐴡 𐴁𐴡𐴓𐴞 𐴀𐴠𐴓𐴝𐴕 𐴊𐴞𐴘𐴝𐴌𐴠 𐴀𐴝𐴣𐴀𐴌𐴝𐴌𐴠 𐴑𐴝𐴔𐴞𐴘𐴝𐴁𐴢 𐴒𐴡𐴙𐴅𐴧𐴠| 𐴀𐴞𐴔𐴦𐴝𐴕𐴡𐴌 𐴏𐴧𐴝𐴀𐴃𐴠 “𐴓𐴝𐴘𐴓𐴝𐴃𐴟𐴓𐴢 𐴑𐴡𐴊𐴡𐴌” 𐴉𐴝𐴀𐴕𐴡𐴌 𐴔𐴡𐴖𐴑𐴝 𐴊𐴞𐴘𐴝𐴌𐴠 𐴀𐴝𐴣𐴀𐴌𐴝𐴌𐴠 𐴀𐴝𐴊𐴡𐴌 𐴀𐴝𐴊𐴧𐴠 𐴌𐴡𐴇𐴡𐴔𐴢 𐴒𐴡𐴙𐴅𐴧𐴠| 𐴓𐴝𐴏𐴡𐴃𐴢 𐴔𐴡𐴁𐴝𐴌𐴡𐴑 𐴀𐴦𐴞𐴊𐴟𐴓𐴢 𐴉𐴞𐴃𐴡𐴌 𐴊𐴝𐴕 𐴒𐴡𐴙𐴅𐴧𐴠!!

𐴌𐴡𐴇𐴔𐴡𐴃𐴢 𐴀𐴝𐴊𐴧𐴠 𐴐𐴤𐴝𐴕𐴃𐴤𐴞 𐴕𐴝𐴎𐴞𐴓𐴢 𐴀𐴡𐴗𐴑 𐴀𐴟𐴁𐴝𐴓𐴧𐴝 𐴎𐴞𐴁𐴝𐴘𐴠 𐴃𐴝𐴔𐴦𐴝𐴔𐴢 𐴔𐴝𐴙𐴕𐴐𐴥𐴡𐴓𐴧𐴝 𐴀𐴝𐴓𐴧𐴝𐴦𐴇 𐴃𐴝𐴀𐴝𐴓𐴝𐴌 𐴃𐴡𐴌𐴉𐴡𐴃𐴧𐴞 𐴀𐴝𐴔𐴡𐴕 𐴀𐴝𐴊𐴧𐴠 𐴐𐴤𐴝𐴕𐴃𐴤𐴞 𐴀𐴞𐴏𐴝𐴉𐴠 𐴇𐴠𐴊𐴝𐴘𐴡𐴃𐴢 𐴀𐴝𐴊𐴧𐴠 𐴕𐴦𐴟𐴌 𐴓𐴡𐴘𐴝𐴌𐴠 𐴀𐴝𐴙𐴐𐴧𐴠 𐴔𐴟𐴇𐴝𐴔𐴧𐴝𐴊𐴢 𐴔𐴟𐴏𐴃𐴡𐴉𐴦𐴝 𐴏𐴡𐴓𐴧𐴝𐴓𐴧𐴝𐴇𐴟 𐴀𐴝𐴓𐴝𐴘𐴇𐴞 𐴖𐴝𐴏𐴝𐴓𐴧𐴝𐴔𐴡𐴌 𐴖𐴝𐴌𐴠| 𐴃𐴝𐴀𐴛𐴌 𐴀𐴝𐴇𐴓𐴡 𐴀𐴝𐴘𐴝𐴓𐴢 𐴀𐴝𐴊𐴧𐴠 𐴏𐴝𐴇𐴝𐴁𐴞 𐴀𐴥𐴡𐴑𐴧𐴡𐴓𐴢 𐴀𐴝𐴌 𐴑𐴞𐴘𐴝𐴔𐴡𐴃𐴢 𐴉𐴡𐴙𐴅𐴧𐴡𐴕𐴃𐴡 𐴃𐴝𐴌𐴝𐴌 𐴀𐴠𐴃𐴧𐴠𐴁𐴝 𐴒𐴡𐴌𐴡𐴘𐴧𐴝 𐴃𐴝𐴔𐴦𐴝𐴔𐴢 𐴔𐴟𐴀𐴔𐴞𐴕 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴖𐴝𐴌𐴠 𐴘𐴥𐴡 𐴌𐴡𐴇𐴔𐴡𐴃𐴢 𐴀𐴝𐴊𐴧𐴠 𐴐𐴤𐴝𐴕𐴃𐴤𐴞 𐴕𐴝𐴎𐴞𐴓𐴢 𐴀𐴡𐴗𐴑!!

𐴇𐴝𐴔𐴊𐴡 𐴏𐴝𐴓𐴝𐴃𐴡𐴌 𐴁𐴦𐴝𐴊𐴠…
𐴀𐴝𐴣𐴀𐴌𐴝𐴌 𐴀𐴠 𐴂𐴡𐴘𐴒𐴝𐴔𐴢 𐴔𐴟𐴏𐴓𐴞𐴔𐴢 𐴀𐴟𐴔𐴧𐴝𐴃𐴡𐴓𐴧𐴝, 𐴎𐴝𐴌𐴝𐴌𐴠 𐴀𐴝𐴓𐴧𐴝𐴦𐴇 𐴃𐴝𐴀𐴝𐴓𐴝” 𐴈𐴡𐴘𐴌𐴟𐴓𐴢 𐴀𐴟𐴔𐴧𐴝𐴇”  𐴁𐴠𐴒𐴧𐴟𐴕𐴡𐴃𐴧𐴟 𐴔𐴟𐴑𐴝𐴌𐴧𐴡𐴔𐴢 𐴎𐴝𐴃𐴞 𐴈𐴡𐴘𐴧𐴝𐴌𐴠 𐴀𐴠𐴓𐴝𐴕 𐴒𐴡𐴙𐴅𐴧𐴠| 𐴀𐴠 𐴎𐴝𐴃𐴞𐴌𐴠 𐴃𐴝𐴔𐴦𐴝𐴔𐴢 𐴔𐴝𐴙𐴕𐴐𐴥𐴡𐴌 𐴈𐴝𐴇𐴠𐴌 𐴈𐴝𐴇𐴞𐴓𐴧𐴝 𐴊𐴠𐴉𐴝𐴍𐴝𐴘𐴧𐴠||

𐴀𐴝𐴣𐴀𐴌𐴝𐴌 𐴀𐴠 𐴂𐴡𐴘𐴒𐴝𐴔𐴢 𐴉𐴟𐴌𐴝 𐴊𐴟𐴕𐴞𐴘𐴝𐴌 𐴔𐴟𐴏𐴓𐴔𐴝𐴕 𐴁𐴥𐴝𐴘𐴧𐴝𐴕𐴊𐴡𐴓𐴧𐴝|𐴊𐴟𐴕𐴞𐴘𐴝𐴌 𐴀𐴠𐴍𐴠 𐴇𐴠𐴍𐴠  𐴀𐴞𐴏𐴓𐴝𐴔𐴢 𐴀𐴝𐴊𐴧𐴠 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴇𐴠𐴉𐴝𐴎𐴡𐴃𐴡𐴓𐴧𐴝 𐴈𐴝𐴔𐴢 𐴒𐴡𐴌𐴠𐴊𐴧𐴠 𐴔𐴟𐴅𐴝𐴇𐴞𐴊𐴢 𐴁𐴥𐴝𐴘𐴧𐴝𐴕𐴊𐴡𐴓𐴧𐴝|

𐴀𐴝𐴏𐴢 𐴏𐴝𐴓𐴝𐴔𐴟 𐴀𐴝𐴓𐴝𐴘𐴑𐴟𐴔𐴢 𐴖𐴝𐴌𐴡𐴇𐴔𐴝𐴃𐴟𐴓𐴧𐴝𐴦𐴇𐴞 𐴖𐴝𐴁𐴝𐴌𐴝𐴑𐴝𐴃𐴟𐴇!

𐴀𐴡𐴕𐴡𐴌𐴝 𐴁𐴠𐴒𐴧𐴟𐴕𐴡𐴌𐴠 𐴀𐴦𐴊𐴞𐴟𐴓𐴢 𐴉𐴞𐴃𐴡𐴌𐴡𐴌 𐴔𐴡𐴁𐴝𐴌𐴡𐴑𐴁𐴝 𐴎𐴝𐴕𐴝𐴘! 𐴀𐴝𐴣𐴀𐴌𐴝 𐴁𐴠𐴒𐴧𐴟𐴕𐴡𐴌𐴠 𐴀𐴝𐴓𐴧𐴝𐴦𐴇 𐴃𐴝𐴀𐴝𐴓𐴝 𐴈𐴤𐴟𐴐𐴞, 𐴐𐴤𐴝𐴕𐴃𐴤𐴞, 𐴉𐴝𐴃𐴤𐴝 𐴀𐴝𐴊𐴧𐴠 𐴑𐴝𐴔𐴞𐴘𐴝𐴁𐴞 𐴊𐴝𐴕 𐴒𐴡𐴌𐴟𐴑| 𐴀𐴝𐴣𐴀𐴝𐴌𐴝 𐴀𐴝𐴊𐴧𐴠 𐴀𐴡𐴕𐴡𐴌𐴝𐴌 𐴏𐴞𐴘𐴝𐴔𐴢, 𐴑𐴞𐴘𐴝𐴔𐴢 𐴀𐴝𐴊𐴧𐴠 𐴁𐴤𐴝𐴓𐴝 𐴈𐴝𐴔𐴢 𐴀𐴥𐴡𐴑𐴧𐴡𐴓𐴢 𐴀𐴝𐴓𐴧𐴝𐴦𐴇 𐴃𐴝𐴀𐴝𐴓𐴝 𐴑𐴡𐴁𐴟𐴓𐴢 𐴒𐴡𐴌𐴟𐴑| 𐴀𐴝𐴣𐴀𐴌𐴝 𐴀𐴝𐴊𐴧𐴠 𐴀𐴡𐴕𐴡𐴌𐴝𐴌𐴠 𐴇𐴠𐴊𐴝𐴘𐴡𐴃𐴢 𐴀𐴝𐴊𐴧𐴠 𐴏𐴡𐴇𐴞 𐴌𐴝𐴏𐴧𐴝𐴌 𐴌𐴝𐴇𐴕𐴟𐴔𐴝𐴀𐴞 𐴒𐴡𐴌𐴡𐴘𐴧𐴝 𐴁𐴝𐴕𐴝𐴘 𐴊𐴡𐴗𐴑| 𐴀𐴝𐴣𐴀𐴌𐴝𐴌𐴠 𐴃𐴝𐴌 𐴁𐴥𐴝𐴓𐴝 𐴇𐴝𐴔𐴢 𐴒𐴡𐴌𐴡𐴘𐴧𐴝 𐴁𐴝𐴕𐴊𐴤𐴝 𐴀𐴥𐴡𐴑𐴧𐴡𐴓𐴡𐴌 𐴁𐴟𐴃𐴡𐴌𐴡𐴃𐴧𐴟 𐴐𐴝𐴔𐴞𐴓𐴢 𐴒𐴡𐴌𐴥𐴞 𐴓𐴡𐴗𐴑| 𐴀𐴝𐴓𐴧𐴝𐴦𐴇 𐴃𐴝𐴀𐴝𐴓𐴝 𐴀𐴝𐴣𐴀𐴌𐴝𐴌 𐴀𐴦𐴞𐴊𐴡𐴌𐴠 𐴑𐴝𐴔𐴞𐴘𐴝𐴁𐴞 𐴀𐴝𐴊𐴧𐴠 𐴈𐴤𐴟𐴐𐴞𐴌 𐴊𐴥𐴝𐴌𐴝𐴘 𐴁𐴡𐴌𐴥𐴞 𐴊𐴠𐴗𐴑| 𐴀𐴦𐴞𐴊𐴡𐴌 𐴈𐴤𐴟𐴐𐴞𐴔𐴧𐴝𐴎𐴠 𐴌𐴡𐴇𐴔𐴝𐴃𐴢 𐴀𐴝𐴊𐴧𐴠 𐴁𐴡𐴌𐴑𐴡𐴃𐴡𐴌 𐴁𐴝𐴌𐴞𐴐𐴤𐴝 𐴕𐴝𐴎𐴞𐴓𐴢 𐴒𐴡𐴌𐴟𐴑||

𐴀𐴡𐴕𐴡𐴌𐴝𐴌 𐴔𐴡𐴃𐴡 𐴔𐴝𐴙𐴕𐴐𐴥𐴡𐴓𐴧𐴝𐴘𐴁𐴡𐴓𐴞 𐴀𐴡𐴕𐴡𐴌𐴝𐴌 𐴌𐴡𐴁𐴧𐴠 𐴑𐴡𐴌𐴞𐴔𐴡𐴌 𐴀𐴠 𐴀𐴝𐴘𐴝𐴃𐴢 𐴃𐴡𐴌𐴃𐴞𐴓𐴡𐴌 𐴏𐴝𐴣𐴃𐴠 𐴃𐴠𐴓𐴝𐴖𐴡𐴃𐴢 𐴒𐴡𐴌𐴡𐴕 𐴓𐴝𐴘𐴠𐴑- 

قُلْ بِفَضْلِ اللَّهِ وَبِرَحْمَتِهِ فَبِذَٰلِكَ فَلْيَفْرَحُوا هُوَ خَيْرٌ مِّمَّا يَجْمَعُونَ 

“𐴀𐴡 𐴕𐴡𐴁𐴞 𐴀𐴡𐴕𐴠 𐴈𐴡𐴘 𐴊𐴦𐴡! 𐴀𐴝𐴓𐴧𐴝𐴦𐴇𐴌 𐴔𐴠𐴇𐴠𐴌𐴁𐴝𐴕𐴞 𐴀𐴝𐴊𐴧𐴠 𐴌𐴡𐴇𐴔𐴡𐴃𐴢 𐴓𐴡𐴘…! 𐴀𐴠𐴃𐴡𐴓𐴧𐴝 𐴁𐴡𐴓𐴞 𐴇𐴞𐴘𐴝𐴕 𐴓𐴡𐴘 𐴃𐴝𐴌𐴝𐴌 𐴈𐴤𐴟𐴐𐴞 𐴀𐴡𐴀𐴕 𐴏𐴝𐴛| 𐴇𐴞𐴃𐴝𐴌𐴝 𐴎𐴝𐴑𐴞𐴏𐴧𐴟 𐴅𐴡𐴔𐴝 𐴒𐴡𐴌𐴥𐴞 𐴇𐴠𐴒𐴞𐴕𐴡𐴃𐴧𐴟 𐴘𐴝𐴀𐴝𐴕 𐴁𐴠𐴐𐴥𐴞 𐴁𐴤𐴝𐴓𐴝|” 𐴏𐴟𐴌𐴝 𐴘𐴟𐴕𐴟𐴏𐴢-𐴵𐴸)

𐴀𐴡 𐴏𐴡𐴇𐴞 𐴌𐴝𐴏𐴧𐴝 𐴀𐴠𐴈𐴃𐴠𐴘𐴝𐴌 𐴒𐴡𐴌𐴡𐴘𐴧𐴝 𐴀𐴟𐴔𐴧𐴡𐴃𐴢!
𐴀𐴝𐴣𐴀𐴌𐴝𐴌 𐴈𐴝𐴣𐴏𐴠 𐴁𐴝𐴌 𐴁𐴝𐴌 𐴀𐴦𐴞𐴊𐴢 𐴈𐴤𐴟𐴐𐴞 𐴀𐴝𐴊𐴧𐴠 𐴐𐴤𐴝𐴕𐴃𐴤𐴞𐴌 𐴉𐴟𐴣𐴖𐴝𐴣𐴃𐴞 𐴉𐴟𐴖𐴝𐴣𐴃𐴞 𐴑𐴞𐴏𐴧𐴟 𐴐𐴞𐴑𐴧𐴝 𐴀𐴝𐴊𐴧𐴠 𐴕𐴡𐴏𐴞𐴘𐴡𐴃𐴢 𐴓𐴡𐴘𐴧𐴝𐴌𐴠 𐴀𐴝𐴀| 𐴇𐴠𐴃𐴝𐴔𐴦𐴝𐴔𐴢 𐴐𐴞𐴑𐴧𐴝 𐴀𐴝𐴊𐴧𐴠 𐴕𐴡𐴏𐴞𐴘𐴡𐴔𐴧𐴝𐴎𐴠 𐴀𐴝𐴇𐴝𐴔𐴢 𐴕𐴡𐴏𐴞𐴘𐴡𐴃𐴧𐴗𐴝 𐴀𐴡𐴘𐴓𐴊𐴞- 𐴔𐴟𐴏𐴓𐴞𐴔𐴢 𐴀𐴟𐴔𐴧𐴝𐴃𐴡𐴌 𐴔𐴧𐴝𐴎𐴠 𐴀𐴠𐴑𐴝𐴄𐴧𐴝 𐴀𐴡𐴀𐴕𐴡𐴌 𐴐𐴡𐴗𐴑 𐴎𐴡𐴗𐴑| 𐴀𐴦𐴞𐴊𐴢 𐴀𐴝𐴊𐴧𐴠 𐴀𐴞𐴏𐴓𐴝𐴔𐴞 𐴈𐴤𐴟𐴐𐴞 𐴔𐴡𐴅𐴓𐴞𐴏𐴡𐴌 𐴊𐴞𐴕𐴒𐴟𐴕𐴡𐴃𐴢 𐴀𐴟𐴔𐴧𐴝𐴤 𐴀𐴝𐴂𐴡𐴏𐴡𐴌𐴠 𐴔𐴡𐴊𐴡𐴊𐴢 𐴀𐴝𐴊𐴧𐴠 𐴐𐴤𐴡𐴔𐴝𐴎𐴞 𐴈𐴝𐴌𐴖𐴝𐴘𐴡𐴌 𐴎𐴟𐴌 𐴁𐴝𐴌𐴝𐴘 𐴊𐴠𐴀| 𐴃𐴟𐴖𐴝𐴕𐴒𐴝𐴌 𐴀𐴝𐴊𐴧𐴠 𐴒𐴡𐴌𐴞𐴉𐴡𐴌 𐴔𐴧𐴝𐴎𐴠 𐴀𐴠𐴇𐴏𐴝𐴕 𐴀𐴝𐴊𐴧𐴠 𐴊𐴞𐴦𐴕𐴞 𐴁𐴥𐴝𐴘 𐴃𐴝𐴓𐴧𐴟𐴑𐴡𐴌 𐴊𐴥𐴝𐴌𐴝𐴘 𐴀𐴠𐴅𐴔𐴝𐴓𐴞 𐴁𐴤𐴝𐴉𐴠 𐴃𐴥𐴡𐴌𐴑𐴤𐴞 𐴀𐴡𐴀| 𐴀𐴠𐴕𐴋𐴞𐴓𐴧𐴝 𐴉𐴟𐴌𐴝 𐴑𐴡𐴖𐴔𐴡𐴌 𐴀𐴝𐴂𐴡𐴏𐴦𐴡𐴔𐴧𐴝𐴎𐴠 𐴀𐴠𐴇𐴏𐴝𐴕 𐴀𐴝𐴊𐴧𐴠 𐴔𐴡𐴊𐴡𐴃𐴡𐴌 𐴀𐴠𐴑 𐴅𐴡𐴕𐴧𐴝𐴃𐴞 𐴔𐴡𐴕𐴎𐴝𐴌𐴝 𐴊𐴠𐴈𐴤𐴝 𐴎𐴝𐴀| 𐴀𐴝𐴌 𐴀𐴠𐴒𐴞𐴕𐴡𐴌 𐴈𐴡𐴕𐴡 𐴀𐴠𐴑𐴎𐴡𐴕𐴡𐴌 𐴉𐴝𐴘𐴊𐴝𐴌 𐴁𐴡𐴓𐴊𐴝𐴃𐴢 𐴉𐴟𐴌𐴝 𐴀𐴟𐴔𐴧𐴝𐴃𐴡𐴌 𐴃𐴝𐴔𐴦𐴝𐴔𐴢 𐴔𐴝𐴙𐴕𐴐𐴥𐴡𐴌 𐴀𐴝𐴐𐴤𐴝 𐴉𐴟𐴌𐴝 𐴀𐴡𐴀| 𐴔𐴟𐴏𐴓𐴞𐴔𐴢 𐴀𐴟𐴔𐴧𐴝𐴃𐴡𐴌 𐴃𐴝𐴓𐴧𐴟𐴑 𐴔𐴡𐴎𐴁𐴟𐴃𐴢 𐴔𐴡𐴎𐴁𐴟𐴃𐴢 𐴀𐴡𐴀| 𐴀𐴝𐴌 𐴀𐴟𐴔𐴧𐴝𐴃𐴡𐴌𐴠  𐴃𐴝𐴌 𐴀𐴝𐴏𐴡𐴓𐴢 𐴔𐴦𐴝𐴕𐴞 𐴊𐴝𐴖𐴝𐴃𐴡𐴌𐴠 𐴉𐴡𐴘𐴓𐴝 𐴊𐴠𐴀𐴕, 𐴉𐴟𐴌𐴝 𐴊𐴟𐴕𐴞𐴘𐴝𐴃𐴢 𐴀𐴞𐴏𐴓𐴝𐴔𐴞 𐴃𐴝𐴇𐴎𐴞𐴁𐴡𐴌𐴠 𐴉𐴡𐴘𐴓𐴝 𐴊𐴠𐴀𐴕, 𐴁𐴝𐴃𐴠𐴓𐴢 𐴀𐴝𐴊𐴧𐴠 𐴔𐴟𐴕𐴝𐴉𐴠𐴑𐴞 𐴈𐴝𐴏𐴓𐴝𐴃𐴡𐴃𐴧𐴟 𐴀𐴞𐴕𐴏𐴝𐴕𐴞 𐴀𐴝𐴑𐴡𐴓𐴡𐴌𐴠 𐴀𐴝𐴎𐴝𐴊𐴢 𐴒𐴡𐴌𐴡𐴕, 𐴎𐴡𐴁𐴞𐴕𐴡𐴃𐴢 𐴀𐴞𐴔𐴝𐴕 𐴀𐴝𐴊𐴧𐴠 𐴃𐴝𐴖𐴇𐴞𐴊𐴢 𐴑𐴝𐴀𐴠𐴔𐴢 𐴒𐴡𐴌𐴡𐴕, 𐴔𐴝𐴙𐴕𐴐𐴥𐴡𐴔𐴧𐴝𐴎𐴠 𐴀𐴝𐴏𐴔𐴝𐴕𐴞 𐴐𐴡𐴌𐴞𐴘𐴝𐴃𐴢 𐴀𐴝𐴊𐴧𐴠 𐴔𐴡𐴑𐴁𐴟𐴓𐴢 𐴊𐴦𐴞𐴕 𐴓𐴡𐴘 𐴉𐴡𐴘𐴏𐴝𐴓𐴝 𐴒𐴡𐴌𐴡𐴕 𐴀𐴝𐴊𐴧𐴠 𐴉𐴟𐴌𐴝 𐴊𐴟𐴕𐴞𐴘𐴝𐴃𐴢 𐴀𐴞𐴏𐴓𐴝𐴔𐴡𐴌 𐴀𐴟𐴅𐴟𐴊𐴡𐴌𐴠 𐴇𐴠𐴉𐴝𐴎𐴡𐴃𐴢 𐴒𐴡𐴌𐴞𐴁𐴡𐴓𐴧𐴝 𐴀𐴟𐴏𐴑𐴝𐴘 𐴊𐴠𐴀||

𐴀𐴡 𐴀𐴝𐴊𐴡𐴙𐴅𐴧𐴝 𐴀𐴟𐴔𐴧𐴝𐴃𐴠 𐴔𐴟𐴏𐴓𐴞𐴔𐴤𐴝!
𐴀𐴝𐴣𐴀𐴌𐴝 𐴘𐴥𐴡 𐴀𐴟𐴔𐴧𐴝𐴃𐴡𐴌 𐴇𐴥𐴠𐴏𐴧𐴝| 𐴀𐴝𐴣𐴀𐴌𐴝 𐴘𐴥𐴡 𐴀𐴡𐴕𐴡𐴌𐴝𐴌 𐴓𐴡𐴘 𐴀𐴝𐴘𐴧𐴠𐴊𐴠 𐴊𐴞𐴕𐴒𐴟𐴕𐴡𐴌 𐴐𐴥𐴡𐴉𐴧𐴡𐴕 𐴊𐴠𐴑𐴞| 𐴀𐴝𐴣𐴀𐴌𐴝 𐴀𐴟𐴔𐴧𐴝𐴃𐴠 𐴔𐴟𐴏𐴓𐴞𐴔𐴝𐴌𐴠 𐴀𐴠𐴑 𐴀𐴡𐴘𐴁𐴡𐴓𐴧𐴝, 𐴀𐴠𐴑𐴎𐴡𐴕𐴠 𐴀𐴝𐴌𐴠𐴑 𐴎𐴡𐴕𐴡𐴌𐴠 𐴔𐴡𐴊𐴡𐴃𐴢 𐴒𐴡𐴌𐴞𐴁𐴡𐴓𐴧𐴝 𐴋𐴝𐴑𐴞𐴌| 𐴀𐴝𐴣𐴀𐴌𐴝 𐴀𐴟𐴔𐴧𐴝𐴃𐴡𐴌𐴠 𐴃𐴝𐴌 𐴁𐴝𐴀𐴊𐴟𐴌 𐴉𐴟𐴗𐴝𐴙𐴕 𐴀𐴥𐴡𐴑𐴧𐴡𐴓𐴡𐴌 𐴉𐴟𐴣𐴖𐴝𐴣𐴃𐴞 𐴃𐴞𐴛𐴝𐴘𐴁𐴡𐴓𐴧𐴝 𐴅𐴡𐴎𐴁𐴝 𐴀𐴟𐴍𐴝𐴘 𐴊𐴞| 𐴎𐴠 𐴉𐴟𐴗𐴝𐴙𐴕 𐴀𐴦𐴡𐴓𐴠 𐴓𐴝𐴒𐴝𐴃𐴝𐴌𐴁𐴤𐴝𐴉𐴠 𐴊𐴞𐴦𐴕 𐴑𐴝𐴀𐴠𐴔𐴢 𐴀𐴝𐴊𐴧𐴠 𐴀𐴟𐴔𐴧𐴝𐴃𐴡𐴌𐴠 𐴎𐴝𐴓𐴠𐴔𐴢 𐴃𐴝𐴒𐴟𐴃𐴢 𐴀𐴥𐴡𐴑𐴧𐴡𐴓𐴡𐴌 𐴀𐴝𐴃𐴡𐴃𐴧𐴟 𐴀𐴝𐴎𐴝𐴊𐴢 𐴒𐴡𐴌𐴞𐴁𐴝𐴌 𐴎𐴞𐴔𐴧𐴝𐴊𐴝𐴌𐴞 𐴕𐴞𐴎𐴡𐴌  𐴈𐴝𐴣𐴊𐴡𐴃𐴢 𐴃𐴟𐴓𐴞 𐴓𐴡𐴘𐴧𐴠| 𐴎𐴠𐴃𐴝𐴌𐴝 𐴐𐴤𐴡𐴔𐴝𐴎𐴡𐴃𐴢  𐴀𐴞𐴕𐴏𐴝𐴉𐴢 𐴑𐴝𐴀𐴠𐴔𐴢 𐴒𐴡𐴌𐴡𐴕, 𐴀𐴠𐴑𐴃𐴠𐴏𐴡𐴊𐴞 𐴀𐴝𐴊𐴧𐴠 𐴀𐴝𐴙𐴕-𐴑𐴝𐴕𐴟𐴕𐴡𐴌 𐴃𐴡𐴌𐴑𐴥𐴞, 𐴏𐴡𐴓𐴞𐴁𐴞 𐴑𐴡𐴁𐴎𐴥𐴝𐴃𐴧𐴟 𐴕𐴞𐴎𐴥𐴡𐴌 𐴀𐴝𐴎𐴝𐴊𐴞𐴌𐴠 𐴇𐴝𐴑𐴞𐴑𐴞 𐴒𐴡𐴌𐴡𐴕, 𐴃𐴝𐴔𐴦𐴝𐴔𐴢 𐴔𐴟𐴏𐴓𐴞𐴔𐴢 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴃𐴢 𐴀𐴝𐴣𐴀𐴌𐴝𐴌 𐴀𐴞𐴎𐴧𐴡𐴃𐴢 𐴀𐴝𐴊𐴧𐴠 𐴃𐴝𐴎𐴞𐴔𐴢 𐴖𐴝𐴉𐴠𐴏𐴢 𐴀𐴝𐴕𐴡𐴕, 𐴉𐴟𐴌𐴝 𐴊𐴟𐴕𐴞𐴘𐴝𐴌 𐴃𐴝𐴔𐴦𐴝𐴔𐴢 𐴔𐴝𐴙𐴕𐴐𐴥𐴡𐴓𐴧𐴝 𐴀𐴞𐴕𐴏𐴝𐴕𐴞 𐴀𐴝𐴎𐴝𐴊𐴞𐴘𐴝𐴃𐴡𐴌𐴠 𐴇𐴝𐴑𐴞𐴑𐴡𐴃𐴡𐴃𐴢 𐴀𐴝𐴕𐴡𐴕, 𐴐𐴡𐴘𐴃𐴝𐴕𐴡𐴌 𐴀𐴠𐴃𐴧𐴠𐴁𐴝 𐴒𐴡𐴌𐴡𐴘𐴧𐴝 𐴀𐴥𐴡𐴑𐴧𐴡𐴓𐴡𐴌 𐴏𐴥𐴞𐴘𐴧𐴡𐴓𐴡𐴃𐴧𐴟 𐴈𐴝𐴓𐴝𐴏𐴞 𐴓𐴡𐴀𐴕 𐴀𐴝𐴊𐴧𐴠 𐴀𐴝𐴌𐴇𐴝𐴔𐴟𐴌 𐴌𐴡𐴇𐴠𐴔𐴞𐴕𐴡𐴌 𐴊𐴥𐴡𐴌𐴁𐴝𐴌𐴡𐴃𐴢 𐴉𐴞𐴌𐴞 𐴀𐴝𐴀𐴕𐴡𐴌 𐴔𐴡𐴏𐴧𐴟𐴊𐴢 𐴓𐴡𐴘 𐴑𐴟𐴐𐴠𐴐𐴢 𐴒𐴡𐴌𐴠𐴌| 𐴀𐴝𐴌 𐴌𐴡𐴇𐴔𐴝𐴕𐴟𐴌 𐴌𐴡𐴇𐴞𐴔𐴞𐴕 𐴀𐴡𐴘𐴓𐴊𐴞 𐴀𐴟𐴁𐴥𐴝 𐴎𐴞𐴁𐴥𐴝𐴘𐴠 𐴃𐴝𐴀𐴛𐴌 𐴈𐴝𐴣𐴏𐴠 𐴂𐴝𐴕𐴤𐴝 𐴏𐴝𐴖𐴡𐴘𐴧𐴝𐴌𐴠 𐴀𐴝𐴊𐴡𐴌 𐴒𐴡𐴌𐴥𐴠| 𐴀𐴝𐴌 𐴃𐴝𐴌𐴠 𐴔𐴡𐴇𐴝𐴁𐴧𐴡𐴃𐴢 𐴀𐴝𐴊𐴧𐴠 𐴉𐴞𐴃𐴌𐴡𐴃𐴡𐴌 𐴊𐴥𐴝𐴌𐴝𐴘 𐴇𐴝𐴑𐴞𐴑𐴞 𐴀𐴝𐴎𐴝𐴊𐴡𐴌 𐴔𐴡𐴎𐴝 𐴉𐴥𐴟𐴖𐴥𐴝𐴊𐴧𐴠||

𐴁𐴠𐴐𐴥𐴡𐴑 𐴘𐴝𐴀𐴝𐴕 𐴀𐴡𐴘𐴓𐴊𐴠 𐴔𐴟𐴕𐴝𐴏𐴠𐴁𐴢 𐴀𐴝𐴊𐴧𐴠 𐴏𐴡𐴇𐴞 𐴀𐴡𐴑𐴃𐴡 𐴎𐴠𐴃𐴧𐴡𐴃𐴢 𐴀𐴝𐴣𐴀𐴌𐴝 𐴀𐴝𐴣𐴀𐴌𐴝𐴌 𐴔𐴟𐴈𐴝𐴓𐴠𐴉𐴢 𐴀𐴝𐴊𐴧𐴠 𐴉𐴟𐴌𐴝 𐴊𐴟𐴕𐴞𐴘𐴝𐴌 𐴀𐴡𐴙𐴕𐴧𐴡 𐴃𐴝𐴔𐴦𐴝𐴔𐴢 𐴑𐴖𐴔𐴡𐴌 𐴔𐴝𐴙𐴕𐴐𐴥𐴠𐴌 𐴈𐴝𐴣𐴏𐴠 𐴘𐴥𐴡 𐴕𐴡𐴏𐴞𐴘𐴡𐴃𐴢 𐴀𐴝𐴊𐴧𐴠 𐴈𐴝𐴇𐴠𐴌𐴈𐴤𐴝𐴇𐴞𐴌 𐴂𐴡𐴘𐴒𐴝𐴔𐴢 𐴓𐴡𐴘 𐴎𐴝𐴘𐴉𐴝𐴌𐴞| 𐴀𐴝𐴣𐴀𐴝𐴌 𐴀𐴡𐴕𐴡𐴌𐴝 𐴁𐴠𐴒𐴧𐴟𐴕𐴡𐴌𐴠 𐴊𐴝𐴖𐴝𐴃𐴢 𐴊𐴞 𐴑𐴞 𐴁𐴡𐴓𐴞 𐴈𐴡𐴘𐴓𐴠 𐴀𐴡𐴕𐴡𐴌𐴝 𐴕𐴞𐴎𐴡𐴌𐴠 𐴀𐴝𐴓𐴧𐴝𐴦𐴇 𐴃𐴝𐴀𐴝𐴓𐴝𐴌 𐴊𐴞𐴦𐴕 𐴀𐴞𐴏𐴓𐴝𐴔𐴢 𐴀𐴝𐴊𐴧𐴠 𐴃𐴝𐴀𐴛 𐴂𐴝𐴑 𐴑𐴝𐴓𐴝𐴔𐴡𐴌𐴠 𐴎𐴝𐴕𐴞𐴁𐴡𐴓𐴧𐴠 𐴔𐴡𐴖𐴑𐴝 𐴊𐴡| 𐴀𐴝𐴌 𐴏𐴡𐴓𐴞𐴁𐴞 𐴒𐴝𐴊𐴧𐴝𐴌 𐴀𐴥𐴡𐴑𐴧𐴡𐴓𐴡𐴌 𐴉𐴟𐴣𐴖𐴝𐴣𐴃𐴞 𐴕𐴞𐴎𐴥𐴡𐴌 𐴃𐴝𐴓𐴧𐴟𐴑𐴡𐴃𐴟 𐴀𐴝𐴎𐴝𐴊𐴢 𐴀𐴡𐴘 𐴎𐴡𐴀 𐴃𐴡𐴘𐴓𐴠 𐴀𐴡𐴕𐴡𐴌 𐴏𐴡𐴗𐴑𐴡𐴃𐴧𐴟 𐴀𐴝𐴕𐴊𐴤𐴝𐴌𐴡𐴌 𐴉𐴡𐴌𐴊𐴤𐴝 𐴀𐴟𐴍𐴞 𐴎𐴝𐴘𐴁𐴡𐴘| 𐴀𐴠𐴃𐴧𐴡𐴃𐴢 𐴊𐴦𐴞𐴕 𐴀𐴞𐴏𐴓𐴝𐴔𐴠 𐴓𐴡𐴘 𐴀𐴝𐴙𐴐𐴧𐴠𐴊𐴞 𐴇𐴝𐴑𐴞𐴑𐴡𐴃𐴢 𐴁𐴠𐴙𐴓𐴡𐴌 𐴋𐴡𐴙𐴓𐴧𐴝 𐴎𐴡𐴇𐴠𐴌 𐴀𐴡𐴘𐴎𐴝𐴘𐴁𐴡𐴘||

قُلْ يَا أَهْلَ الْكِتَابِ تَعَالَوْا إِلَىٰ كَلِمَةٍ سَوَاءٍ بَيْنَنَا وَبَيْنَكُمْ أَلَّا نَعْبُدَ إِلَّا اللَّهَ وَلَا نُشْرِكَ بِهِ شَيْئًا وَلَا يَتَّخِذَ بَعْضُنَا بَعْضًا أَرْبَابًا مِّن دُونِ اللَّهِ ۚ فَإِن تَوَلَّوْا فَقُولُوا اشْهَدُوا بِأَنَّا مُسْلِمُونَ 

𐴀𐴡 𐴕𐴡𐴁𐴞 𐴀𐴡𐴕𐴠 𐴈𐴡𐴘 𐴊𐴡! 𐴀𐴡 𐴀𐴝𐴇𐴓𐴠 𐴑𐴞𐴃𐴝𐴁𐴢 𐴀𐴥𐴡𐴑𐴧𐴡𐴓𐴢!  𐴀𐴝𐴣𐴀𐴌𐴝 𐴀𐴝𐴊𐴧𐴠 𐴀𐴡𐴕𐴡𐴌𐴝𐴌 𐴊𐴥𐴡𐴌𐴔𐴞𐴘𐴝𐴕 𐴁𐴡𐴌𐴝𐴁𐴡𐴌𐴞 𐴈𐴡𐴃𐴝𐴌 𐴔𐴞𐴑𐴧𐴝 𐴀𐴝𐴘𐴧𐴡| 𐴀𐴝𐴌 𐴇𐴠 𐴈𐴡𐴃𐴝 𐴇𐴞𐴘𐴝𐴕 𐴀𐴡𐴘𐴓𐴠 𐴀𐴝𐴣𐴀𐴌𐴝 𐴀𐴝𐴓𐴧𐴝𐴦𐴇 𐴏𐴝𐴌𐴝 𐴇𐴡𐴕𐴡𐴑𐴤𐴞𐴘𐴡𐴌 𐴀𐴞𐴁𐴝𐴊𐴡𐴃𐴢 𐴕𐴡 𐴒𐴡𐴙𐴅𐴧𐴟𐴔𐴢 𐴀𐴝𐴌 𐴃𐴝𐴀𐴛𐴌 𐴉𐴟𐴣𐴖𐴝𐴣𐴃𐴞 𐴈𐴡𐴕𐴡𐴑𐴤𐴞𐴘𐴡𐴌𐴠 𐴐𐴡𐴌𐴞𐴑𐴡 𐴕𐴡 𐴒𐴡𐴙𐴅𐴧𐴟𐴔𐴢| 𐴀𐴝𐴌 𐴀𐴠𐴑𐴎𐴡𐴕 𐴀𐴝𐴌𐴠𐴑 𐴎𐴡𐴕𐴡𐴌𐴠 𐴌𐴡𐴁𐴢 𐴀𐴞𐴏𐴝𐴉𐴠 𐴔𐴝𐴕𐴞 𐴕𐴡 𐴓𐴡𐴘𐴧𐴡 𐴀𐴝𐴓𐴧𐴝𐴦𐴇 𐴏𐴝𐴌𐴝| 𐴀𐴝𐴌 𐴎𐴡𐴊𐴞 𐴃𐴝𐴌𐴝 𐴔𐴟𐴦𐴣 𐴉𐴞𐴌𐴞 𐴓𐴡𐴀 𐴃𐴡𐴘𐴓𐴠 𐴃𐴟𐴖𐴝𐴣𐴌𐴝 𐴈𐴡𐴘𐴊𐴡 𐴑𐴞 𐴁𐴡𐴓𐴞 𐴈𐴡𐴘𐴓𐴠 𐴀𐴡𐴕𐴡𐴌𐴝 𐴒𐴟𐴁𐴤𐴝 𐴃𐴤𐴝𐴑𐴡 𐴁𐴠𐴐𐴥𐴡𐴑 𐴀𐴝𐴣𐴀𐴌𐴝 𐴀𐴡𐴘𐴓𐴝𐴔𐴊𐴞 𐴔𐴟𐴏𐴡𐴓𐴔𐴝𐴕| 𐴏𐴟𐴌𐴝 𐴀𐴝𐴓𐴢 𐴀𐴞𐴔𐴌𐴝𐴕- 𐴶𐴴)

𐴀𐴡𐴕𐴡𐴌𐴝𐴓𐴧𐴝 𐴀𐴝𐴣𐴀𐴌𐴝𐴌 𐴕𐴡𐴏𐴞𐴘𐴡𐴃𐴢 𐴀𐴡𐴘𐴓𐴊𐴠- 𐴀𐴡𐴕𐴡𐴌𐴝 𐴀𐴟𐴀𐴕 𐴃𐴝𐴔𐴦𐴝𐴔𐴢 𐴀𐴝𐴓𐴡𐴔𐴞 𐴓𐴞𐴋𐴝𐴌 𐴀𐴥𐴡𐴑𐴧𐴡𐴓𐴢 𐴀𐴝𐴊𐴧𐴠 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴇𐴡𐴑𐴟𐴔𐴌𐴝𐴕 𐴀𐴥𐴡𐴑𐴧𐴡𐴓𐴡𐴌𐴠 𐴁𐴞𐴐𐴧𐴝𐴐𐴢 𐴕𐴡 𐴒𐴡𐴙𐴅𐴧𐴡| 𐴇𐴞𐴃𐴝𐴌𐴝 𐴀𐴡𐴕𐴡𐴌𐴝𐴌 𐴉𐴟𐴣𐴖𐴝𐴣𐴃𐴞 𐴒𐴝𐴊𐴧𐴝𐴌𐴞 𐴒𐴡𐴙𐴅𐴧𐴞| 𐴀𐴡𐴕𐴡𐴌𐴝𐴌 𐴕𐴞𐴎𐴡𐴌 𐴎𐴝𐴃𐴥𐴞𐴌𐴠 𐴊𐴡𐴚𐴐𐴥𐴡 𐴒𐴡𐴌𐴥𐴞 𐴉𐴠𐴓𐴝𐴘𐴧𐴠| 𐴀𐴡𐴕𐴡𐴌𐴝𐴌 𐴓𐴞𐴋𐴝𐴌 𐴀𐴥𐴡𐴑𐴧𐴡𐴓𐴡𐴌 𐴎𐴡𐴊𐴞 𐴃𐴥𐴡𐴌𐴝𐴏𐴝 𐴀𐴝𐴑𐴡𐴓𐴢 𐴀𐴝𐴊𐴧𐴠 𐴁𐴟𐴊𐴧𐴞 𐴃𐴤𐴝𐴑𐴞𐴃𐴡 𐴃𐴡𐴘𐴓𐴠 𐴈𐴝𐴔𐴝𐴤𐴝 𐴃𐴝𐴌𐴝 𐴀𐴠𐴀𐴕 𐴀𐴟𐴔𐴧𐴝𐴃𐴡𐴌𐴠 𐴓𐴡𐴘 𐴏𐴞𐴕𐴃𐴥𐴝-𐴁𐴤𐴝𐴉𐴕𐴝 𐴒𐴡𐴌𐴞𐴃𐴡 𐴎𐴝𐴌𐴝 𐴐𐴡𐴚𐴈𐴤𐴝𐴃𐴢 𐴊𐴟𐴘 𐴁𐴞𐴓𐴞𐴖𐴝𐴕𐴡𐴃𐴧𐴟 𐴀𐴝𐴌𐴥𐴡 𐴁𐴠𐴐𐴥𐴞||

𐴃𐴝𐴌𐴝𐴃𐴧𐴟 𐴎𐴡𐴊𐴞𐴥 𐴀𐴝𐴑𐴡𐴓𐴠 𐴏𐴡𐴓𐴞𐴔𐴢 𐴃𐴝𐴤𐴑𐴞𐴃𐴡 𐴃𐴡𐴘𐴓𐴠 𐴃𐴝𐴌𐴝 𐴁𐴟𐴎𐴞𐴃𐴡 𐴀𐴟𐴔𐴧𐴝𐴃𐴠 𐴔𐴟𐴏𐴓𐴞𐴔𐴤𐴝 𐴀𐴠𐴀𐴠𐴕 𐴀𐴟𐴒𐴧𐴗𐴝 𐴀𐴟𐴔𐴧𐴡𐴃𐴢 𐴎𐴝𐴌𐴝 𐴀𐴠𐴑 𐴎𐴟𐴒𐴢 𐴘𐴦𐴝𐴃𐴡 𐴀𐴠𐴑𐴐𐴤𐴡 𐴁𐴡𐴏𐴡𐴌 𐴁𐴦𐴝𐴊𐴠 𐴁𐴦𐴝𐴊𐴠  𐴎𐴝𐴒𐴞 𐴀𐴟𐴍𐴠| 𐴀𐴠𐴃𐴡𐴓𐴧𐴝 𐴁𐴡𐴓𐴞 𐴀𐴠 𐴀𐴟𐴔𐴧𐴝𐴃𐴡𐴌𐴠 𐴈𐴡𐴕𐴥𐴡 𐴊𐴞𐴕𐴡 𐴈𐴡𐴃𐴡𐴔𐴢 𐴒𐴡𐴌𐴞 𐴊𐴠𐴀𐴕 𐴕𐴡 𐴎𐴝𐴘𐴁𐴡| 𐴀𐴟𐴔𐴧𐴝𐴃𐴠 𐴔𐴟𐴏𐴓𐴞𐴔𐴝𐴤 𐴁𐴠𐴐𐴥𐴡𐴑 𐴀𐴝𐴁𐴝𐴌𐴡 𐴀𐴠𐴑𐴊𐴞𐴕 𐴊𐴟𐴕𐴞𐴘𐴝𐴌𐴠 𐴓𐴞𐴋𐴝𐴌𐴞 𐴒𐴡𐴌𐴥𐴞𐴁𐴡| 𐴕𐴞𐴎𐴡𐴌𐴝𐴌 𐴊𐴦𐴞𐴕, 𐴃𐴝𐴇𐴎𐴞𐴁𐴢-𐴃𐴝𐴔𐴝𐴊𐴧𐴟𐴕, 𐴀𐴝𐴙𐴕-𐴑𐴝𐴕𐴟𐴕 𐴀𐴝𐴊𐴧𐴠 𐴀𐴞𐴕𐴏𐴝𐴉𐴢 𐴓𐴡𐴘 𐴊𐴟𐴕𐴞𐴘𐴝𐴌𐴠 𐴇𐴡𐴑𐴟𐴔𐴡𐴃𐴢 𐴒𐴡𐴌𐴥𐴞𐴁𐴡||

𐴃𐴝𐴌𐴝𐴃𐴧𐴟 𐴎𐴡𐴊𐴞𐴥 𐴃𐴤𐴡𐴌𐴞𐴏𐴞 𐴀𐴝𐴑𐴡𐴓𐴠 𐴏𐴡𐴓𐴞𐴔𐴢 𐴃𐴝𐴤𐴑𐴞𐴃𐴡 𐴃𐴡𐴘𐴓𐴠 𐴃𐴝𐴌𐴝 𐴕𐴞𐴎𐴡𐴌𐴝𐴌 𐴔𐴡𐴐𐴖𐴝𐴌𐴝 𐴋𐴤𐴞𐴂𐴝𐴌𐴄𐴔𐴠𐴕𐴄𐴡𐴃𐴢 𐴊𐴦𐴞𐴕𐴡𐴌 𐴔𐴟𐴈𐴓𐴞𐴏𐴢 𐴔𐴝𐴕𐴟𐴙𐴐𐴥𐴢 𐴀𐴥𐴡𐴑𐴧𐴡𐴓𐴡𐴌𐴠 𐴔𐴡𐴖𐴑𐴝 𐴊𐴞𐴃𐴡| 𐴀𐴞𐴃𐴝𐴌𐴝 𐴃𐴝𐴌𐴝𐴌𐴠 𐴀𐴞𐴏𐴓𐴝𐴔𐴡𐴌 𐴁𐴝𐴁𐴡𐴃𐴠, 𐴀𐴞𐴏𐴓𐴝𐴔𐴡𐴌 𐴒𐴟𐴎𐴝𐴐𐴃𐴤𐴝 𐴃𐴝𐴌𐴞𐴑𐴤𐴡𐴌 𐴁𐴝𐴁𐴡𐴃𐴠, 𐴊𐴟𐴕𐴞𐴘𐴝𐴔𐴧𐴝𐴎𐴠 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴑𐴝𐴔𐴞𐴘𐴝𐴁𐴞, 𐴎𐴞𐴔𐴧𐴝𐴊𐴝𐴌𐴞𐴌 𐴁𐴝𐴁𐴡𐴃𐴠 𐴕𐴡𐴏𐴞𐴘𐴡𐴃𐴢 𐴒𐴡𐴙𐴃𐴧𐴡| 𐴀𐴞𐴃𐴝𐴌𐴝 𐴀𐴝𐴔𐴞𐴌 𐴀𐴥𐴡𐴑𐴧𐴡𐴓𐴡𐴌 𐴏𐴥𐴞𐴕𐴃𐴝-𐴁𐴤𐴝𐴉𐴕𐴝𐴌𐴠 𐴁𐴤𐴝𐴓𐴝 𐴇𐴝𐴔𐴡𐴌 𐴔𐴞𐴙𐴑𐴧𐴝 𐴓𐴡𐴘 𐴎𐴝𐴘𐴃𐴡| 𐴀𐴝𐴓𐴡𐴔𐴞 𐴑𐴞𐴘𐴝𐴊𐴝𐴃𐴡𐴌 𐴇𐴝𐴑𐴞𐴑𐴞 𐴊𐴝𐴁𐴞 𐴒𐴡𐴌𐴡𐴘𐴧𐴝 “𐴀𐴞𐴏𐴓𐴝𐴔𐴞 𐴃𐴝𐴇𐴎𐴞𐴁𐴢”𐴀𐴡𐴌𐴠 𐴔𐴝𐴙𐴕𐴐𐴥𐴡𐴌 𐴈𐴝𐴣𐴏𐴠 𐴉𐴡𐴣𐴐𐴠 𐴊𐴞𐴃𐴡||

𐴀𐴝𐴉𐴏𐴦𐴡𐴏𐴢 𐴀𐴝𐴊𐴧𐴠 𐴊𐴟𐴈𐴡𐴌 𐴈𐴡𐴃𐴝 𐴀𐴡𐴘𐴓𐴊𐴠 𐴑𐴞 𐴀𐴡𐴕𐴡𐴌𐴝 𐴕𐴞𐴎𐴡𐴓𐴧𐴝 𐴈𐴡𐴏𐴟𐴌𐴞 𐴒𐴡𐴌𐴡𐴘𐴧𐴝 𐴀𐴝𐴊𐴧𐴠 𐴀𐴝𐴃𐴠𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴡𐴌𐴠 𐴀𐴡𐴕𐴡𐴌𐴝𐴌 𐴓𐴞𐴋𐴝𐴌 𐴁𐴝𐴕𐴝𐴘𐴧𐴡| 𐴀𐴝𐴌 𐴇𐴞𐴃𐴝𐴌𐴝𐴌𐴠 𐴊𐴞𐴐𐴡𐴔𐴧𐴝𐴎𐴠 𐴀𐴠𐴕𐴃𐴠𐴎𐴝𐴔𐴢 𐴀𐴝𐴊𐴧𐴠 𐴀𐴝𐴙𐴕-𐴑𐴝𐴕𐴟𐴕 𐴁𐴝𐴕𐴝𐴘𐴁𐴝𐴌 𐴇𐴥𐴡𐴑 𐴊𐴞𐴘𐴧𐴡| 𐴔𐴡𐴊𐴞 𐴀𐴝𐴊𐴧𐴠 𐴑𐴝𐴉𐴠𐴌𐴡𐴌 𐴉𐴟𐴗𐴝𐴣𐴌 𐴋𐴡𐴙𐴓𐴧𐴝 𐴀𐴞𐴏𐴓𐴝𐴔𐴡𐴌 𐴏𐴡𐴈𐴃𐴡 𐴊𐴟𐴐𐴧𐴝𐴕 𐴀𐴦𐴡𐴓𐴠 𐴈𐴡𐴕𐴡𐴊𐴞𐴕𐴥𐴡 𐴋𐴝𐴀𐴛 𐴀𐴝𐴊𐴧𐴠 𐴊𐴠𐴐𐴡𐴙𐴃𐴧𐴡 𐴀𐴥𐴡𐴑𐴧𐴡𐴓𐴡𐴌𐴠 𐴊𐴡𐴚𐴐𐴥𐴡 𐴏𐴝𐴌𐴝 𐴀𐴝𐴌 𐴑𐴞𐴏𐴧𐴟 𐴊𐴞𐴃𐴡 𐴕𐴡 𐴉𐴝𐴌𐴞𐴁𐴡| 𐴀𐴞𐴃𐴝𐴌𐴝 𐴀𐴝𐴣𐴀𐴌𐴝𐴌 𐴎𐴡𐴁𐴞𐴕𐴡𐴃𐴢 𐴎𐴠 𐴊𐴝𐴕𐴝 𐴐𐴥𐴞𐴣𐴍𐴝𐴘𐴧𐴠 𐴈𐴟𐴁𐴢 𐴅𐴞𐴓𐴊𐴞 𐴇𐴞𐴘𐴝𐴌 𐴕𐴡𐴃𐴞𐴅𐴝 𐴉𐴝𐴘𐴁𐴡| 𐴑𐴞𐴘𐴡𐴓𐴧𐴝 𐴁𐴡𐴓𐴞 
𐴁𐴝𐴀𐴘 𐴎𐴝𐴊𐴧𐴠 𐴓𐴡𐴗 𐴀𐴝𐴈𐴠𐴌𐴡𐴃𐴢 𐴅𐴡𐴔𐴞 𐴎𐴝𐴦𐴀||

 𐴈𐴦𐴟𐴁𐴢 𐴅𐴞𐴓𐴊𐴞 𐴀𐴞𐴃𐴝𐴌𐴝 𐴐𐴡𐴌𐴔𐴞𐴕𐴊𐴤𐴝 𐴀𐴝𐴊𐴧𐴠 𐴀𐴠𐴇𐴏𐴝𐴏𐴢 𐴒𐴡𐴌𐴞 𐴉𐴝𐴌𐴞𐴁𐴡| 𐴃𐴝𐴌𐴝𐴌 𐴇𐴥𐴞𐴚𐴐𐴝𐴘𐴠 𐴃𐴝𐴌𐴝𐴌𐴠 𐴇𐴡𐴃𐴡𐴔𐴢 𐴒𐴡𐴌𐴥𐴞 𐴊𐴞𐴁𐴡| 𐴀𐴞𐴃𐴝𐴌𐴝 𐴀𐴠𐴊𐴧𐴟𐴌 𐴀𐴝𐴕𐴊𐴤𐴝 𐴀𐴡𐴘𐴒𐴞𐴘𐴡𐴘 𐴑𐴞𐴁𐴡𐴓𐴥𐴞 𐴈𐴡𐴘𐴓𐴠 𐴀𐴝𐴘𐴧𐴠𐴊𐴠 𐴎𐴡𐴁𐴝𐴕𐴝 𐴁𐴟𐴎𐴞𐴁𐴡𐴓𐴧𐴝 𐴔𐴠𐴦𐴂𐴢 𐴎𐴝𐴣𐴏𐴝𐴘-𐴁𐴝𐴏𐴝𐴘 𐴒𐴡𐴌𐴡𐴕 𐴀𐴝𐴊𐴧𐴠 𐴃𐴡𐴉𐴏𐴞𐴓𐴞 𐴔𐴡𐴎𐴝𐴑𐴝𐴌𐴝𐴌 𐴎𐴡𐴌𐴞𐴘𐴝 𐴇𐴝𐴑𐴞𐴑𐴡𐴃𐴢 𐴁𐴟𐴎𐴡𐴕𐴡𐴃𐴧𐴟𐴕𐴡 𐴁𐴠𐴈𐴡𐴁𐴥𐴡𐴌 𐴀𐴡𐴘𐴒𐴞𐴘𐴡𐴘| 𐴇𐴞𐴃𐴝𐴌𐴝 𐴑𐴞 𐴀𐴝𐴙𐴅𐴧𐴝 𐴘𐴥𐴡 𐴕𐴡 𐴁𐴟𐴎𐴞 𐴑𐴞 𐴁𐴡𐴓𐴞 𐴈𐴡𐴘𐴓𐴠 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌𐴠 𐴊𐴝𐴁𐴝𐴘 𐴕𐴡 𐴌𐴝𐴑𐴝 𐴎𐴝𐴀| 𐴃𐴝𐴌𐴝𐴌 𐴏𐴤𐴡𐴌𐴤𐴝𐴌 𐴔𐴟𐴀𐴕𐴃𐴟 𐴃𐴞𐴛𐴝𐴘 𐴃𐴤𐴝𐴑𐴞𐴃𐴡 𐴕𐴡 𐴉𐴝𐴌𐴞𐴁𐴝!

𐴎𐴝𐴘𐴡𐴕𐴁𐴝𐴊𐴞 𐴀𐴝𐴊𐴧𐴠 𐴏𐴡𐴓𐴞𐴁𐴞 𐴃𐴝𐴁𐴠𐴊𐴝𐴌 𐴐𐴥𐴡𐴌𐴑𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴋𐴟𐴉𐴝𐴘 𐴊𐴞𐴁𐴡𐴓𐴧𐴝 𐴔𐴟𐴏𐴓𐴞𐴔𐴢 𐴀𐴟𐴔𐴧𐴝𐴃𐴡𐴌 𐴀𐴠 𐴃𐴝𐴥𐴕 𐴑𐴝𐴉𐴞 𐴀𐴡𐴘𐴁𐴡| 𐴀𐴞𐴚𐴐𐴦𐴝 𐴀𐴝𐴓𐴧𐴝𐴦𐴇| 𐴀𐴝𐴌 𐴀𐴠 𐴃𐴥𐴝𐴕 𐴁𐴠𐴐𐴥𐴞 𐴅𐴡𐴓𐴊𐴞 𐴀𐴝𐴘𐴧𐴠𐴌| 𐴀𐴝𐴌 𐴇𐴠 𐴊𐴞𐴕 𐴀𐴠 𐴀𐴟𐴔𐴧𐴝𐴃𐴠 𐴁𐴝𐴒𐴡𐴌 𐴋𐴡𐴙𐴓𐴧𐴝 𐴒𐴟𐴐𐴧𐴝 𐴓𐴡𐴘𐴧𐴝𐴌𐴠 𐴃𐴝𐴒𐴟𐴃𐴢 𐴋𐴝𐴀𐴛𐴡𐴌 𐴖𐴝𐴌𐴠 𐴉𐴤𐴝𐴓𐴢 𐴔𐴝𐴌𐴞 𐴇𐴥𐴝𐴔𐴓𐴝 𐴒𐴡𐴌𐴞𐴁𐴡| 𐴃𐴝𐴌𐴝𐴌 𐴖𐴝𐴌𐴠 𐴈𐴡𐴕𐴡 𐴊𐴡𐴘𐴝 𐴕𐴡 𐴊𐴠𐴈𐴝𐴘𐴁𐴡| 𐴀𐴝𐴌 𐴇𐴥𐴠 𐴀𐴡𐴑𐴃𐴡𐴃𐴢 𐴀𐴟𐴔𐴧𐴝𐴃𐴠 𐴔𐴟𐴏𐴓𐴞𐴔𐴝𐴌 𐴔𐴧𐴝𐴎𐴠 𐴀𐴠𐴇𐴏𐴝𐴕 𐴀𐴝𐴊𐴧𐴠 𐴌𐴡𐴇𐴡𐴔𐴢 𐴒𐴡𐴌𐴡𐴕𐴡𐴌 𐴈𐴡𐴃𐴝 𐴈𐴡𐴘𐴁𐴡𐴓𐴧𐴝 𐴈𐴡𐴕𐴞𐴑𐴧𐴝𐴙 𐴕𐴡 𐴃𐴤𐴝𐴑𐴞𐴁𐴡||

𐴅𐴡𐴓𐴋𐴞 𐴀𐴠 𐴎𐴡𐴈𐴡𐴔𐴢 𐴔𐴟𐴕𐴝𐴉𐴠𐴑 𐴇𐴡𐴑𐴟𐴔𐴌𐴝𐴕 𐴀𐴝𐴊𐴧𐴠 𐴃𐴝𐴒𐴟𐴃𐴢 𐴒𐴟𐴐𐴧𐴞𐴌𐴠 𐴐𐴠𐴑𐴝𐴏𐴃𐴡 𐴒𐴡𐴌𐴝𐴘𐴁𐴡| 𐴀𐴝𐴌 𐴀𐴝𐴣𐴌𐴝𐴌 𐴉𐴟𐴣𐴖𐴝𐴣𐴃𐴞 𐴀𐴝𐴏𐴠 𐴀𐴟𐴀 𐴀𐴞𐴓𐴦𐴝𐴇 𐴎𐴞𐴁𐴥𐴝 𐴁𐴠𐴒𐴧𐴟𐴕𐴡𐴃𐴧𐴟 𐴃𐴝𐴑𐴡𐴃𐴢 𐴀𐴦𐴡𐴓𐴝 𐴀𐴝𐴊𐴧𐴠 𐴀𐴞𐴕𐴏𐴝𐴉𐴒𐴝𐴌| 𐴃𐴝𐴀𐴛 𐴔𐴝𐴙𐴕𐴐𐴥𐴡𐴌𐴠 𐴔𐴡𐴖𐴑𐴝 𐴊𐴠𐴀 𐴑𐴞𐴕𐴃𐴟 𐴀𐴠𐴑𐴞𐴁𐴝𐴌𐴠 𐴏𐴝𐴌𐴞 𐴕𐴡 𐴊𐴠𐴀| 𐴀𐴝𐴌 𐴎𐴝𐴓𐴞𐴔𐴢 𐴋𐴝𐴀𐴛𐴡𐴌𐴠 𐴊𐴡𐴚𐴐𐴥𐴡 𐴒𐴡𐴌𐴡𐴕 𐴃𐴝𐴀𐴛𐴌 𐴏𐴟𐴕𐴧𐴝𐴃𐴢| 𐴀𐴝𐴌 𐴈𐴡𐴏𐴟𐴌𐴞 𐴒𐴡𐴌𐴡𐴘𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴃𐴝𐴀𐴛 𐴊𐴟𐴕𐴞𐴘𐴝𐴌 𐴔𐴝𐴙𐴕𐴐𐴥𐴠𐴓𐴧𐴝 𐴕𐴡𐴏𐴞𐴘𐴡𐴃𐴢 𐴀𐴞𐴏𐴝𐴉𐴠 𐴂𐴠𐴐𐴢 𐴒𐴡𐴌𐴠|  𐴀𐴝𐴌 𐴀𐴝𐴈𐴠𐴌𐴡𐴃𐴢 𐴃𐴝𐴌𐴝𐴌𐴠 𐴉𐴝𐴕𐴝𐴉𐴝𐴕𐴝 𐴒𐴡𐴌𐴠 𐴉𐴠𐴓𐴝| 𐴀𐴝𐴓𐴧𐴝𐴦𐴇 𐴃𐴝𐴀𐴝𐴓𐴝 𐴀𐴠𐴌𐴐𐴦𐴝𐴊𐴢 𐴒𐴡𐴙𐴅𐴧𐴠

وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ ۚ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ‏
𐴃𐴟𐴗𐴝𐴣𐴌𐴝 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌𐴠 𐴎𐴝𐴓𐴠𐴔𐴢 𐴀𐴦𐴡𐴓𐴡𐴌 𐴈𐴝𐴔𐴢-𐴈𐴡𐴌𐴡𐴎𐴡𐴃𐴧𐴞 𐴒𐴝𐴉𐴠𐴓𐴢 𐴁𐴡𐴓𐴞 𐴒𐴟𐴔𐴝𐴕 𐴕𐴡 𐴒𐴙𐴅𐴧𐴡، 𐴃𐴝𐴌𐴝𐴌𐴠 𐴀𐴡𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴋𐴠𐴓𐴊𐴞 𐴌𐴝𐴙𐴑𐴧𐴠 𐴎𐴠𐴊𐴞𐴕 𐴏𐴡𐴗𐴑 𐴀𐴥𐴡𐴑𐴧𐴡𐴓𐴢 𐴖𐴡𐴌𐴔𐴞𐴑𐴧𐴝 𐴀𐴥𐴡𐴘𐴃𐴝𐴑𐴞𐴁𐴡| ( 𐴏𐴟𐴌𐴝 𐴀𐴞𐴁𐴌𐴝𐴇𐴞𐴔𐴢-𐴴𐴲 )

وَكَذَٰلِكَ أَخْذُ رَبِّكَ إِذَا أَخَذَ الْقُرَىٰ وَهِيَ ظَالِمَةٌ ۚ إِنَّ أَخْذَهُ أَلِيمٌ شَدِيدٌ
𐴀𐴝𐴌 𐴀𐴠𐴕𐴋𐴞𐴓𐴧𐴝 𐴀𐴡𐴘𐴓𐴊𐴠 𐴃𐴟𐴖𐴝𐴣𐴌 𐴌𐴡𐴁𐴡𐴌 𐴏𐴥𐴝𐴣𐴎𐴝| 𐴎𐴠𐴃𐴧𐴡𐴃𐴢 𐴈𐴡𐴕𐴡 𐴎𐴝𐴓𐴠𐴔𐴢 𐴑𐴡𐴖𐴔𐴡𐴌𐴠 𐴏𐴥𐴝𐴣𐴎𐴝 𐴊𐴞𐴘| 𐴁𐴠𐴐𐴥𐴡𐴑 𐴃𐴟𐴖𐴝𐴣𐴌 𐴌𐴡𐴁𐴡𐴌 𐴊𐴥𐴡𐴌𐴝 𐴁𐴠𐴐𐴥𐴞 𐴑𐴡𐴄𐴞𐴕| ( 𐴏𐴟𐴌𐴝 𐴇𐴦𐴟𐴊𐴢-𐴱𐴰𐴲 )

𐴀𐴝𐴒𐴡𐴌 𐴔𐴡𐴗𐴎𐴟𐴃𐴢 𐴉𐴞𐴌𐴞 𐴀𐴝𐴘𐴧𐴞| 𐴀𐴝𐴣𐴀𐴌𐴝 𐴀𐴞𐴊𐴟𐴓𐴢 𐴉𐴞𐴃𐴞𐴌𐴡𐴌 𐴔𐴟𐴕𐴏𐴡𐴁𐴡𐴃𐴢 𐴓𐴡𐴘 𐴊𐴡𐴁𐴝𐴌𐴤𐴝 𐴀𐴟𐴔𐴧𐴡𐴃𐴞 𐴔𐴟𐴏𐴓𐴞𐴔𐴝𐴌𐴠 𐴔𐴟𐴁𐴝𐴌𐴡𐴑𐴁𐴝𐴊𐴢 𐴎𐴝𐴕𐴝𐴘𐴌| 𐴀𐴝𐴌 𐴃𐴝𐴌𐴝𐴌𐴠 𐴀𐴠𐴃𐴧𐴠𐴉𐴝𐴑 𐴀𐴝𐴊𐴧𐴠 𐴌𐴡𐴁𐴡𐴌 𐴔𐴡𐴏𐴧𐴟𐴊𐴡𐴌𐴠 𐴕𐴝𐴉𐴠𐴎 𐴒𐴡𐴌𐴞𐴁𐴝𐴌 𐴔𐴞𐴑𐴧𐴝 𐴊𐴝𐴖𐴡𐴃𐴢𐴊𐴞𐴌| 𐴃𐴝𐴑𐴠𐴤 𐴀𐴠 𐴀𐴟𐴔𐴧𐴡𐴃𐴡𐴌 𐴃𐴡𐴌𐴡𐴑𐴧𐴞 𐴀𐴞𐴏𐴓𐴝𐴔𐴡𐴌 𐴏𐴝𐴣𐴃𐴠 𐴀𐴡𐴉𐴝𐴕| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴈𐴡𐴘𐴓𐴠 𐴀𐴞𐴏𐴓𐴝𐴔𐴡𐴌 𐴕𐴦𐴟𐴌 𐴏𐴥𐴝𐴌𐴝 𐴀𐴝𐴙𐴐𐴞-𐴈𐴤𐴟𐴐𐴞، 𐴀𐴝𐴎𐴝𐴊𐴞، 𐴀𐴝𐴊𐴡𐴓𐴢 𐴀𐴝𐴊𐴧𐴠 𐴀𐴞𐴕𐴏𐴝𐴉𐴡𐴌 𐴈𐴡𐴕𐴥𐴡 𐴊𐴝𐴔𐴕𐴥𐴝𐴘||

𐴀𐴦𐴡 𐴀𐴞𐴎𐴧𐴡𐴃𐴡𐴌 𐴓𐴝𐴘𐴠𐴑 𐴔𐴟𐴏𐴓𐴞𐴔𐴢 𐴀𐴟𐴔𐴧𐴝𐴤!
𐴀𐴠 𐴈𐴡𐴃𐴝 𐴎𐴝𐴕𐴞𐴌𐴝𐴑𐴡𐴕 𐴎𐴡𐴌𐴟𐴌𐴞، 𐴀𐴝𐴎𐴞𐴘𐴝 𐴁𐴦𐴝𐴎𐴡𐴑𐴞𐴘𐴠 𐴀𐴞𐴏𐴓𐴝𐴔𐴡𐴌𐴠 𐴀𐴠𐴏𐴓𐴝𐴇 𐴒𐴡𐴌𐴞𐴁𐴡𐴓𐴧𐴝 𐴊𐴝𐴖𐴝𐴃𐴢 𐴊𐴠, 𐴀𐴠𐴒𐴞𐴕 𐴑𐴞؟ 𐴀𐴠𐴒𐴞𐴕 𐴊𐴟𐴑𐴤𐴝 𐴀𐴝𐴌 𐴆𐴝𐴓𐴁𐴝𐴎𐴞 𐴏𐴥𐴝𐴌𐴝 𐴀𐴝𐴌𐴑𐴞𐴏𐴟 𐴕𐴡𐴀| 𐴘𐴟𐴇𐴟𐴊𐴞 𐴏𐴝𐴇𐴘𐴟𐴕𐴞 𐴀𐴞𐴃𐴧𐴠𐴇𐴝𐴊𐴢 𐴀𐴝𐴌 𐴃𐴝𐴌𐴝𐴌 𐴃𐴝𐴁𐴠𐴊𐴝𐴌 𐴇𐴡𐴑𐴟𐴔𐴡𐴃𐴢 𐴀𐴥𐴡𐴑𐴧𐴡𐴓𐴢 𐴃𐴝𐴌𐴝𐴌 𐴔𐴝𐴓𐴠𐴑𐴡𐴌 𐴉𐴝𐴙𐴊𐴝𐴌 𐴈𐴝𐴃𐴠𐴌𐴠 𐴀𐴠 𐴈𐴝𐴔𐴒𐴞𐴕 𐴒𐴡𐴌𐴠𐴌| 𐴃𐴝𐴌𐴝 𐴀𐴦𐴠𐴕 𐴈𐴝𐴣𐴏𐴝𐴌 𐴁𐴥𐴟𐴃𐴡𐴌𐴠 𐴒𐴟𐴌𐴞𐴌 𐴎𐴝𐴌 𐴈𐴡𐴕𐴥𐴡 𐴑𐴟𐴓𐴢-𐴑𐴞𐴕𐴝𐴌𐴝 𐴕𐴥𐴝𐴘||

𐴀𐴟𐴔𐴧𐴡𐴃𐴞 𐴔𐴟𐴏𐴓𐴞𐴔𐴝𐴌 𐴀𐴝𐴎𐴝𐴊𐴞 𐴀𐴝𐴊𐴧𐴠 𐴀𐴞𐴎𐴧𐴡𐴃𐴢 𐴖𐴝𐴉𐴠𐴏𐴢 𐴀𐴝𐴕𐴞𐴁𐴡𐴓𐴧𐴝 𐴏𐴞𐴌𐴥𐴞𐴉𐴢 𐴀𐴠𐴑𐴧𐴝𐴕 𐴌𐴝𐴏𐴧𐴝 𐴀𐴝𐴌 𐴘𐴦𐴝𐴕 𐴀𐴥𐴡𐴘𐴓𐴊𐴠- 𐴀𐴝𐴓𐴧𐴝𐴇 𐴌𐴡𐴁𐴧𐴟𐴓𐴢 𐴀𐴝𐴓𐴡𐴔𐴞𐴕𐴡𐴌 𐴔𐴡𐴕𐴐𐴥𐴝𐴌𐴠 𐴕𐴝𐴉𐴠𐴎 𐴒𐴡𐴌𐴡𐴕| 𐴀𐴝𐴌 𐴇𐴞𐴘𐴝𐴕 𐴉𐴟𐴌𐴝 𐴀𐴥𐴡𐴘𐴁𐴡𐴊𐴠 𐴀𐴠 𐴃𐴝𐴔𐴦𐴝𐴔𐴢 𐴕𐴝𐴉𐴡𐴌𐴔𐴝𐴕 𐴀𐴝𐴊𐴧𐴠 𐴃𐴝𐴒𐴟𐴃𐴢 𐴀𐴦𐴡𐴓𐴡𐴌 𐴕𐴠𐴎𐴝𐴔𐴡𐴌𐴠 𐴀𐴝𐴌 𐴁𐴝𐴘𐴕𐴡𐴓𐴢 𐴀𐴝𐴑𐴖𐴝𐴔𐴞 𐴕𐴞𐴘𐴡𐴔𐴢 𐴑𐴝𐴕𐴟𐴕 𐴀𐴥𐴡𐴑𐴧𐴡𐴓𐴢 𐴁𐴡𐴊𐴡𐴓𐴞 𐴉𐴥𐴠𐴓𐴡𐴕𐴡𐴌 𐴎𐴡𐴌𐴞𐴘𐴝| 𐴀𐴝𐴌 𐴀𐴠𐴈𐴝𐴔𐴒𐴝𐴕 𐴀𐴠𐴁𐴧𐴠𐴌𐴠 𐴉𐴡𐴘𐴓𐴝 𐴔𐴡𐴌𐴇𐴝𐴓𐴝𐴃𐴧𐴞 𐴐𐴥𐴟𐴌𐴟 𐴒𐴡𐴌𐴡𐴕 𐴉𐴡𐴌𐴞𐴁𐴡||

𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌 𐴈𐴝𐴣𐴏𐴠 𐴊𐴟𐴗𐴝 𐴒𐴡𐴌𐴞، 𐴀𐴝𐴘𐴁𐴡𐴊𐴠 𐴀𐴞𐴊𐴢 𐴀𐴥𐴡𐴑𐴧𐴡𐴓𐴡𐴃𐴢 𐴊𐴟𐴐𐴧𐴡𐴕𐴡𐴌 𐴈𐴠𐴓𐴝𐴉𐴢 𐴑𐴝𐴔𐴠𐴓𐴁𐴥𐴝𐴉𐴠 𐴑𐴝𐴔𐴞𐴘𐴝𐴁𐴞 𐴀𐴝𐴌 𐴉𐴡𐴃𐴝𐴤 𐴕𐴡𐴏𐴞𐴁𐴢 𐴒𐴡𐴌𐴟𐴑! 𐴀𐴝𐴌 𐴁𐴠𐴙𐴒𐴧𐴞𐴕𐴡𐴌𐴠 𐴏𐴥𐴡𐴀𐴞 𐴀𐴝𐴊𐴧𐴠 𐴀𐴟𐴎𐴟 𐴌𐴝𐴏𐴧𐴝 𐴊𐴝𐴕 𐴒𐴡𐴌𐴟𐴑! 𐴁𐴠𐴙𐴒𐴧𐴞𐴕𐴡𐴌𐴠 𐴏𐴠𐴌𐴝𐴃𐴠 𐴔𐴟𐴏𐴃𐴡𐴑𐴞𐴔𐴡𐴌 𐴖𐴡𐴌𐴠 𐴏𐴡𐴓𐴝𐴌 𐴃𐴡𐴗𐴉𐴞𐴑 𐴊𐴡𐴗𐴑! 𐴁𐴠𐴙𐴒𐴧𐴞𐴕𐴡𐴌𐴠 𐴀𐴞𐴏𐴓𐴝𐴔𐴢 𐴀𐴝𐴊𐴧𐴠 𐴔𐴟𐴏𐴡𐴓𐴔𐴝𐴕𐴡𐴌 𐴉𐴝𐴙𐴊𐴝 𐴀𐴥𐴡𐴊𐴠 𐴀𐴦𐴠𐴕 𐴉𐴝𐴙𐴏𐴓𐴝 𐴀𐴥𐴡𐴑𐴧𐴡𐴓𐴢 𐴒𐴡𐴌𐴞𐴁𐴡𐴓𐴧𐴝 𐴃𐴡𐴗𐴉𐴞𐴑 𐴊𐴡𐴑!!

𐴀𐴝𐴣𐴀𐴌𐴝 𐴏𐴞𐴌𐴞𐴉𐴢 𐴀𐴠𐴑 𐴀𐴝𐴓𐴧𐴝𐴇𐴌 𐴈𐴝𐴣𐴏𐴠 𐴔𐴡𐴊𐴡𐴃𐴢 𐴏𐴝𐴘𐴧𐴟𐴔𐴢! 𐴀𐴝𐴌 𐴏𐴞𐴌𐴞𐴉𐴢 𐴀𐴥𐴞𐴁𐴝𐴌 𐴖𐴡𐴌𐴠 𐴃𐴡𐴗𐴝𐴑𐴧𐴟𐴓𐴢 𐴒𐴡𐴙𐴅𐴧𐴟𐴔𐴢! 𐴀𐴝𐴌 𐴏𐴞𐴌𐴞𐴉𐴢 𐴀𐴥𐴞𐴁𐴝𐴘𐴠 𐴀𐴝𐴣𐴌𐴝𐴌𐴠 𐴉𐴝𐴕𐴝 𐴊𐴞𐴃𐴉𐴝𐴌𐴞𐴁𐴡𐴊𐴠!! ولاحول ولاقوة الابالله العلي العظيم

𐴐𐴝𐴖𐴧𐴝𐴓𐴢 – 𐴱𐴴𐴴𐴴 𐴇𐴞𐴅𐴌𐴞
𐴀𐴠𐴂𐴌𐴞𐴓𐴢 -𐴲𐴰𐴲𐴳  𐴀𐴞𐴏𐴝𐴀𐴞