𐴔𐴞𐴋𐴞𐴘𐴝𐴌 𐴏𐴝𐴔𐴧𐴠 𐴔𐴡𐴎𐴁𐴟𐴃𐴢 𐴀𐴝𐴌 𐴖𐴡𐴎𐴝𐴇𐴝𐴃𐴢 𐴀𐴠𐴑𐴧𐴝𐴕 𐴎𐴡𐴌𐴟𐴌𐴞 𐴔𐴡𐴗𐴎𐴟| 𐴊𐴟𐴕𐴞𐴘𐴝𐴔𐴧𐴝𐴎𐴠 𐴔𐴞𐴋𐴞𐴘𐴝 𐴀𐴝𐴌 𐴉𐴌𐴟𐴉𐴠𐴒𐴠𐴚𐴋𐴝 𐴉𐴥𐴡𐴙𐴓𐴝𐴘𐴁𐴝𐴌 𐴀𐴝𐴏𐴁𐴝𐴁𐴢 𐴁𐴠𐴙𐴐𐴦𐴝 𐴁𐴠𐴙𐴐𐴞 𐴃𐴡𐴘𐴝𐴌 𐴀𐴡𐴘𐴧𐴠| 𐴑𐴞𐴃𐴝𐴓𐴡𐴌 𐴔𐴡𐴙𐴊𐴝𐴕𐴡𐴃𐴢 𐴔𐴞𐴋𐴞𐴘𐴝 𐴀𐴝𐴌 𐴉𐴌𐴟𐴉𐴠𐴒𐴠𐴕𐴚𐴋𐴝𐴌 𐴀𐴝𐴇𐴝𐴔𐴢 𐴑𐴞𐴌𐴊𐴝𐴌 𐴀𐴝𐴏𐴠| 𐴀𐴠𐴈𐴡𐴃𐴝𐴓𐴧𐴝 𐴀𐴠𐴎𐴡𐴁𐴝𐴕𐴝𐴃𐴢 𐴓𐴝𐴌𐴥𐴝𐴘𐴌 𐴏𐴝𐴔𐴝𐴕𐴡𐴌 𐴁𐴥𐴟𐴃𐴡𐴌𐴠 𐴀𐴠𐴒𐴞𐴕 𐴀𐴠𐴑𐴧𐴝𐴕 𐴁𐴡𐴌𐴡 𐴖𐴡𐴏𐴞𐴓𐴝| 𐴀𐴝𐴣𐴀𐴌𐴝𐴌 𐴊𐴟𐴐𐴧𐴡𐴕 𐴀𐴦𐴡𐴓𐴠 𐴓𐴝𐴌𐴥𐴝𐴘𐴔𐴧𐴝𐴎𐴠 𐴀𐴠𐴃𐴝𐴔𐴦𐴝𐴔𐴢 𐴔𐴞𐴋𐴞𐴘𐴝 𐴀𐴝𐴊𐴧𐴠 𐴉𐴌𐴟𐴉𐴠𐴒𐴠𐴚𐴋𐴝 𐴀𐴡𐴑𐴧𐴡𐴓𐴡𐴌𐴠 𐴁𐴤𐴝𐴓𐴝𐴒𐴡𐴌𐴞 𐴈𐴡𐴔𐴡𐴓𐴧𐴝𐴒𐴝| 𐴀𐴦𐴠𐴕 𐴇𐴝𐴓𐴡𐴃𐴡𐴃𐴢 𐴃𐴝𐴌𐴝𐴌 𐴏𐴝𐴣𐴀𐴃𐴠 𐴀𐴝𐴣𐴀𐴌𐴝𐴌 𐴔𐴝𐴔𐴠𐴓𐴝 𐴇𐴡𐴕𐴋𐴞𐴓𐴧𐴝 𐴀𐴦𐴡𐴕𐴏𐴝؟||

𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌 𐴐𐴡𐴌𐴞𐴘𐴃𐴡𐴌 𐴇𐴠𐴉𐴝𐴎𐴡𐴃𐴢 𐴀𐴡𐴘𐴁𐴡𐴓𐴧𐴝 𐴊𐴟𐴘𐴝𐴕 𐴖𐴡𐴏𐴞𐴓𐴝 𐴁𐴝𐴕𐴝𐴘 𐴊𐴞𐴘𐴧𐴠||

𐴉𐴡𐴘𐴓𐴝 𐴖𐴡𐴏𐴞𐴓𐴝 𐴀𐴡𐴘𐴓𐴊𐴠: 𐴈𐴡𐴁𐴡𐴌 𐴀𐴝𐴕𐴝-𐴕𐴞𐴎𐴝𐴌 𐴁𐴝𐴁𐴡𐴃𐴠| 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝 𐴈𐴡𐴁𐴡𐴌 𐴕𐴡𐴑𐴡𐴓𐴢 𐴒𐴡𐴌𐴡𐴕𐴡𐴃𐴢 𐴑𐴞𐴏𐴧𐴟 𐴇𐴠𐴉𐴝𐴎𐴡𐴃𐴞 𐴕𐴠𐴎𐴝𐴔𐴢 𐴁𐴝𐴕𐴝𐴘 𐴊𐴞𐴘𐴧𐴠| 𐴈𐴡𐴕 𐴏𐴞𐴏𐴠 𐴁𐴡𐴊𐴕𐴝𐴔𐴢 𐴉𐴥𐴡𐴙𐴓𐴝؟ 𐴈𐴡𐴕 𐴏𐴞𐴏𐴠 𐴉𐴌𐴟𐴉𐴠𐴒𐴠𐴚𐴋𐴝 𐴉𐴥𐴡𐴙𐴓𐴝؟ 𐴎𐴟𐴁𐴝𐴕، 𐴔𐴝𐴕𐴥𐴟𐴙𐴐𐴢| 𐴃𐴡 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝 𐴀𐴠 𐴈𐴝𐴔𐴡𐴓𐴧𐴝 𐴁𐴡𐴓𐴞 𐴀𐴠𐴑𐴧𐴝𐴕 𐴑𐴝𐴕𐴟𐴕 𐴁𐴝𐴕𐴝𐴘𐴧𐴠| 𐴎𐴦𐴠𐴕𐴧𐴞𐴑𐴞 𐴕𐴡𐴁𐴠𐴑𐴡𐴌𐴞𐴔𐴢 (𐴏𐴓𐴢)𐴔𐴠 𐴀𐴠𐴌𐴐𐴝𐴊𐴢 𐴉𐴡𐴌𐴔𐴝𐴘𐴧𐴠: 𐴇𐴝𐴊𐴞𐴏𐴢 𐴀𐴞𐴁𐴝 𐴀𐴞𐴔𐴝𐴔𐴢 𐴀𐴝𐴁𐴟 𐴊𐴝𐴖𐴟𐴊𐴢(𐴌𐴇) 𐴘𐴠 𐴕𐴡𐴑𐴡𐴓𐴢 𐴒𐴡𐴙𐴅𐴧𐴠،

” بئس مطية الرجل زعموا”

𐴔𐴝𐴙𐴕𐴐𐴥𐴡𐴌 𐴁𐴠𐴙𐴐𐴞 𐴈𐴡𐴌𐴝𐴁𐴢 𐴏𐴡𐴖𐴝𐴌𐴞 𐴀𐴡𐴘𐴓𐴊𐴠 𐴃𐴝𐴌 𐴒𐴟𐴔𐴝𐴕 𐴒𐴡𐴙𐴅𐴧𐴝 𐴈𐴡𐴃𐴝||

𐴔𐴦𐴝𐴕𐴞: 𐴃𐴟𐴀𐴛 𐴈𐴡𐴕𐴡 𐴈𐴡𐴁𐴡𐴌𐴡𐴌 𐴁𐴝𐴁𐴡𐴃𐴠 𐴘𐴠𐴑𐴞𐴕 𐴘𐴝𐴃𐴡 𐴔𐴡𐴎𐴁𐴟𐴃𐴢 𐴕𐴡𐴀𐴡𐴘𐴓𐴠 𐴘𐴝𐴕𐴡𐴌𐴠 𐴕𐴡𐴉𐴥𐴡𐴙𐴓𐴝𐴘𐴁𐴝| 𐴀𐴝𐴔𐴁𐴝𐴉𐴠 𐴔𐴝𐴕𐴥𐴟𐴙𐴐𐴢 𐴒𐴟𐴔𐴝𐴕 𐴒𐴡𐴌𐴠𐴊𐴠، 𐴈𐴝𐴔𐴧𐴝𐴕 𐴀𐴦𐴠𐴕 𐴀𐴦𐴠𐴕 𐴀𐴡𐴘𐴁𐴡، 𐴘𐴝𐴌𐴁𐴝𐴊𐴠 𐴈𐴦𐴡𐴊𐴠 𐴀𐴞𐴕𐴋𐴞𐴓𐴧𐴝 𐴀𐴡𐴘𐴧𐴠| 𐴀𐴠𐴈𐴡𐴃𐴝𐴓𐴧𐴝 𐴘𐴝𐴕 𐴀𐴡𐴘𐴓𐴊𐴠 𐴔𐴝𐴙𐴕𐴐𐴥𐴡𐴌 𐴁𐴠𐴙𐴐𐴞 𐴈𐴡𐴌𐴝𐴁𐴢 𐴏𐴡𐴖𐴝𐴌𐴞 𐴎𐴞𐴘𐴝𐴕 𐴃𐴝𐴌𐴝 𐴉𐴡𐴗𐴓𐴝 𐴒𐴟𐴔𐴝𐴕 𐴒𐴡𐴌𐴠 𐴃𐴝𐴌𐴁𐴝𐴊𐴠 𐴉𐴥𐴡𐴙𐴓𐴝𐴘𐴊𐴠||

𐴀𐴠𐴈𐴡𐴃𐴝𐴓𐴧𐴝 𐴉𐴡𐴙𐴓𐴝 𐴑𐴝𐴕𐴟𐴕 𐴀𐴡𐴘𐴓𐴊𐴠: 𐴈𐴡𐴁𐴡𐴌 𐴕𐴡𐴑𐴡𐴓𐴡𐴌𐴠 𐴔𐴡𐴎𐴁𐴟𐴃𐴢 𐴒𐴡𐴌𐴡| 𐴀𐴡𐴃𐴟𐴑𐴧𐴟𐴕 𐴉𐴡𐴙𐴅𐴧𐴡𐴕𐴃𐴡 𐴃𐴟𐴛 𐴈𐴡𐴕𐴡𐴑𐴞𐴏𐴞𐴔𐴡𐴌 𐴈𐴡𐴁𐴡𐴌 𐴕𐴡𐴉𐴥𐴡𐴙𐴓𐴝𐴘𐴁𐴝| 𐴎𐴠𐴃𐴟𐴑𐴧𐴟𐴕 𐴉𐴡𐴙𐴅𐴧𐴡𐴕𐴃𐴡 𐴃𐴟𐴖𐴝𐴣𐴀𐴌𐴝 𐴈𐴡𐴁𐴡𐴌𐴒𐴝𐴕 𐴏𐴥𐴡𐴀𐴞 𐴀𐴡𐴕𐴡𐴌 𐴁𐴝𐴁𐴡𐴃𐴠 𐴔𐴡𐴎𐴁𐴟𐴃𐴢 𐴘𐴠𐴑𐴞𐴕 𐴇𐴝𐴏𐴠𐴓𐴢 𐴒𐴡𐴙𐴅𐴧𐴝𐴕𐴡| 𐴈𐴡𐴁𐴡𐴌𐴡𐴌 𐴁𐴝𐴁𐴡𐴃𐴠 𐴈𐴡𐴕𐴡𐴑𐴞𐴏𐴞𐴔𐴡𐴌 𐴐𐴥𐴡𐴑-𐴐𐴟𐴁𐴝 𐴀𐴝𐴏𐴠𐴕𐴠 𐴕𐴥𐴝𐴘 𐴃𐴝𐴌𐴝 𐴔𐴟𐴃𐴝𐴀𐴓𐴧𐴠𐴑 𐴘𐴠𐴑𐴞𐴕 𐴀𐴡𐴕𐴉𐴡𐴌𐴞𐴁𐴡𐴈𐴡𐴁𐴡𐴌𐴡𐴌 𐴁𐴝𐴁𐴡𐴃𐴠 𐴔𐴝𐴓𐴟𐴔𐴝𐴕𐴃𐴢 𐴕𐴡𐴌𐴝𐴑𐴞 𐴉𐴥𐴡𐴙𐴓𐴝 𐴕𐴡𐴎𐴝𐴘𐴁𐴡| 𐴀𐴝𐴌 𐴕𐴞𐴎𐴡𐴌𐴠 𐴔𐴝𐴙𐴕𐴐𐴥𐴡𐴌 𐴔𐴝𐴎𐴠 𐴅𐴟𐴄𐴝 𐴉𐴥𐴡𐴙𐴓𐴡𐴕𐴡𐴌 𐴎𐴡𐴌𐴞𐴘𐴝 𐴁𐴝𐴕𐴝 𐴕𐴡𐴎𐴝𐴘𐴁𐴡| 𐴘𐴝𐴕 𐴀𐴡𐴘𐴓𐴊𐴠 𐴉𐴡𐴙𐴓𐴝 𐴈𐴡𐴃𐴝||

𐴊𐴟𐴏𐴡𐴌𐴝 𐴑𐴝𐴕𐴟𐴕 𐴀𐴡𐴓𐴊𐴠: 𐴕𐴡𐴁𐴞𐴑𐴡𐴌𐴞𐴔𐴢 𐴏𐴡𐴓𐴧𐴡𐴓𐴧𐴝𐴇𐴟 𐴀𐴝𐴓𐴝𐴘𐴇𐴠 𐴏𐴡𐴏𐴡𐴓𐴧𐴡𐴔𐴠 ” 𐴈𐴡𐴘𐴧𐴠” 𐴈𐴡𐴗𐴝𐴒𐴞𐴘𐴧𐴠” 𐴀𐴝𐴌 𐴁𐴠𐴙𐴐𐴞 𐴈𐴡𐴃𐴝 𐴈𐴦𐴡𐴕𐴡𐴃𐴧𐴞 𐴔𐴝𐴕𐴥𐴝 𐴒𐴡𐴙𐴅𐴧𐴠||

𐴉𐴝𐴓𐴄𐴟 𐴈𐴡𐴃𐴝 𐴈𐴦𐴡𐴕 𐴀𐴝𐴌 𐴎𐴠 𐴈𐴡𐴃𐴝𐴒𐴝𐴕 𐴏𐴡𐴆𐴧𐴝𐴊𐴠 𐴘𐴝𐴕 𐴘𐴠𐴑𐴞𐴕 𐴕𐴥𐴝𐴘 𐴀𐴞𐴕𐴋𐴞𐴓𐴧𐴝 𐴈𐴡𐴃𐴝 𐴀𐴡𐴑𐴧𐴡𐴓𐴡𐴌 𐴁𐴝𐴁𐴡𐴃𐴠 ” 𐴈𐴡𐴘𐴧𐴠” 𐴀𐴝𐴌 𐴉𐴡𐴓𐴝𐴕𐴝𐴘𐴠 𐴀𐴦𐴠𐴕 𐴈𐴡𐴘𐴧𐴠” 𐴀𐴠𐴑𐴞𐴏𐴞𐴔𐴧𐴝 𐴈𐴡𐴃𐴝𐴁𐴝𐴃𐴧𐴌𐴝 𐴈𐴦𐴡𐴕𐴔𐴝𐴕𐴥𐴝| 𐴈𐴡𐴕𐴥𐴡 𐴈𐴡𐴁𐴡𐴌 𐴘𐴝𐴃𐴥𐴡 𐴈𐴡𐴃𐴝 𐴎𐴞𐴘𐴝𐴕 𐴏𐴥𐴡𐴀𐴞𐴊𐴠 𐴘𐴝𐴕 𐴉𐴟𐴌𐴝𐴉𐴟𐴌𐴞 𐴘𐴠𐴑𐴞𐴕 𐴕𐴡𐴀 𐴀𐴠𐴒𐴞𐴕𐴡𐴌𐴠 𐴁𐴠𐴙𐴐𐴞 𐴈𐴦𐴡𐴕 𐴔𐴡𐴑𐴌𐴟𐴇| 𐴔𐴟𐴃𐴡𐴁𐴡𐴌 𐴏𐴥𐴝𐴌𐴝 𐴔𐴝𐴓𐴟𐴔𐴝𐴃𐴢 𐴀𐴝𐴊𐴧𐴠 𐴈𐴡𐴁𐴡𐴌 𐴕𐴞𐴎𐴠 𐴁𐴡𐴘𐴝𐴕 𐴒𐴡𐴌𐴡𐴘𐴝𐴌𐴠 𐴈𐴡𐴏𐴟𐴌𐴁𐴡𐴕 𐴁𐴝𐴕𐴝𐴘𐴉𐴠𐴓𐴝||

𐴀𐴠𐴏𐴝𐴌𐴝 𐴏𐴥𐴡𐴀𐴞 𐴔𐴟𐴏𐴓𐴞𐴔𐴃𐴢 𐴇𐴡𐴎𐴌𐴡𐴃𐴢 𐴀𐴝𐴁𐴟 𐴇𐴟𐴌𐴝𐴘𐴌𐴝 𐴌𐴡𐴎𐴞𐴘𐴡𐴓𐴧𐴝𐴇𐴟 𐴀𐴝𐴕𐴇𐴟𐴃𐴧𐴞 𐴌𐴡𐴖𐴝𐴘𐴡𐴃𐴢 𐴀𐴝𐴏𐴠 𐴕𐴡𐴁𐴞 𐴀𐴝𐴓𐴝𐴘𐴇𐴞𐴏𐴧𐴡𐴓𐴝𐴔𐴠 𐴀𐴠𐴌𐴐𐴝𐴊𐴢 𐴉𐴡𐴌𐴔𐴝𐴘𐴥𐴠:

كفى بالمرأ كذبا أن يحدث بكل ماسمع

” 𐴈𐴡𐴕𐴡 𐴔𐴝𐴕𐴥𐴟𐴙𐴐𐴢 𐴅𐴥𐴟𐴄𐴝𐴁𐴝𐴎 𐴀𐴡𐴘𐴁𐴡𐴓𐴧𐴝 𐴏𐴞𐴌𐴞𐴉𐴢 𐴘𐴝𐴕𐴠 𐴑𐴝𐴉𐴞 𐴑𐴞𐴁𐴡𐴓𐴞 𐴈𐴡𐴘𐴓𐴠، 𐴀𐴞𐴁𐴝 𐴎𐴞𐴘𐴝𐴕 𐴉𐴥𐴟𐴕𐴠 𐴘𐴝𐴕 𐴀𐴝𐴌𐴠𐴑𐴎𐴡𐴕𐴡𐴌𐴠 𐴈𐴦𐴡𐴘𐴊𐴠” ||

𐴔𐴦𐴝𐴕𐴞: 𐴈𐴡𐴕𐴡 𐴔𐴝𐴕𐴥𐴟𐴙𐴐𐴢 𐴎𐴠 𐴔𐴝𐴓𐴟𐴔𐴝𐴃𐴢 𐴀𐴡𐴑𐴧𐴡𐴓𐴢 𐴉𐴝 𐴀𐴠𐴒𐴞𐴕𐴡𐴌𐴠 𐴃𐴝𐴇𐴝𐴑𐴞𐴑 𐴒𐴡𐴌𐴡𐴕 𐴏𐴥𐴝𐴌𐴝 𐴀𐴝𐴌𐴠𐴑𐴎𐴡𐴕𐴡𐴌𐴠 𐴁𐴡𐴘𐴝𐴕 𐴒𐴡𐴌𐴠 𐴃𐴡𐴘𐴓𐴠 𐴀𐴞𐴁𐴝𐴌 𐴈𐴡𐴃𐴝𐴔𐴧𐴝𐴎𐴠 𐴅𐴥𐴟𐴄𐴝 𐴃𐴝𐴑𐴡𐴕𐴧𐴝𐴕 𐴁𐴠𐴙𐴐𐴞 𐴀𐴠𐴔𐴑𐴝𐴕 𐴃𐴝𐴑𐴠| 𐴎𐴡𐴊𐴞𐴘𐴡 𐴀𐴞𐴁𐴝𐴌 𐴈𐴡𐴃𐴝 𐴇𐴥𐴝𐴣𐴏𐴝 𐴀𐴝𐴌 𐴎𐴦𐴠𐴕 𐴉𐴥𐴟𐴙𐴕𐴧𐴠 𐴀𐴦𐴠𐴕 𐴕𐴡𐴑𐴡𐴓𐴢 𐴒𐴡𐴌𐴡𐴑| 𐴘𐴝𐴌𐴁𐴝𐴊𐴠𐴘𐴡 𐴀𐴞𐴁𐴝 𐴔𐴟𐴙𐴕𐴐𐴥𐴡𐴌 𐴏𐴝𐴔𐴧𐴠 𐴕𐴡𐴑𐴡𐴓𐴢 𐴒𐴡𐴌𐴡𐴕𐴡𐴃𐴢 𐴁𐴠𐴙𐴐𐴝 𐴁𐴠𐴙𐴐𐴞 𐴔𐴞𐴏𐴝 𐴔𐴞𐴘𐴝𐴓𐴢 𐴃𐴝𐴑𐴡𐴕𐴡𐴌 𐴀𐴠𐴔𐴑𐴝𐴕 𐴃𐴝𐴑𐴠||

𐴇𐴝𐴊𐴞𐴏𐴡𐴃𐴢 𐴀𐴠𐴈𐴡𐴃𐴝𐴒𐴝𐴕 𐴁𐴡𐴘𐴝𐴕 𐴒𐴡𐴌𐴝 𐴒𐴞𐴘𐴧𐴠𐴊𐴠:

كفى بالمرأ كذبا أن يحدث بكل ماسمع

𐴔𐴝𐴕𐴥𐴟𐴙𐴐𐴢 𐴀𐴦𐴡𐴓𐴠 𐴔𐴟𐴈𐴃𐴡𐴓𐴞𐴉𐴢 𐴃𐴡𐴌𐴞𐴑𐴝𐴓𐴡𐴘 𐴈𐴡𐴁𐴡𐴌𐴝 𐴈𐴡𐴁𐴡𐴌 𐴇𐴝𐴏𐴠𐴓𐴢 𐴒𐴡𐴌𐴠، 𐴀𐴠𐴒𐴞𐴕 𐴘𐴝𐴃𐴥𐴡 𐴀𐴠𐴓𐴠𐴄𐴌𐴟𐴕𐴞𐴑 𐴔𐴞𐴋𐴞𐴘𐴝، 𐴔𐴝𐴕𐴥𐴟𐴙𐴐𐴢 𐴘𐴝𐴃𐴡 𐴉𐴌𐴠𐴣𐴄 𐴔𐴞𐴋𐴞𐴘𐴝| 𐴀𐴠𐴒𐴞𐴕 𐴁𐴝𐴊𐴠𐴘𐴡 𐴀𐴝𐴌𐴡 𐴎𐴠𐴃𐴡 𐴎𐴡𐴌𐴞𐴘𐴝 𐴀𐴝𐴏𐴠| 𐴀𐴞𐴕𐴋𐴞𐴓𐴧𐴡 𐴁𐴦𐴡𐴗𐴃𐴢 𐴃𐴡𐴌𐴞𐴑𐴝𐴌 𐴊𐴝𐴌𐴝𐴘𐴡 𐴈𐴡𐴁𐴡𐴌𐴝 𐴈𐴡𐴁𐴡𐴌 𐴇𐴡𐴏𐴠𐴓𐴢 𐴒𐴡𐴌𐴠||

𐴎𐴡𐴈𐴡𐴕 𐴀𐴞𐴁𐴝 𐴀𐴠𐴒𐴞𐴕𐴡𐴌 𐴎𐴡𐴌𐴞𐴘𐴝 𐴔𐴝𐴓𐴟𐴔𐴝𐴃𐴢 𐴇𐴝𐴏𐴠𐴓𐴢 𐴒𐴡𐴌𐴞 𐴀𐴝𐴌𐴠𐴑 𐴔𐴞𐴑𐴧𐴝 𐴉𐴥𐴡𐴙𐴓𐴝، 𐴀𐴝𐴔𐴁𐴝𐴉𐴠 𐴀𐴠𐴍𐴠 𐴁𐴦𐴡𐴗𐴃𐴢 𐴅𐴥𐴟𐴄𐴝 𐴃𐴝𐴑𐴞𐴃𐴢 𐴉𐴝𐴌𐴠| 𐴎𐴡𐴈𐴡𐴕 𐴀𐴞𐴁𐴝 𐴀𐴠 𐴈𐴡𐴁𐴡𐴌𐴒𐴞𐴕 𐴕𐴡𐴑𐴡𐴓𐴢 𐴒𐴡𐴌𐴠𐴌، 𐴃𐴡𐴈𐴡𐴕 𐴀𐴞𐴁𐴝 𐴀𐴠𐴑𐴌𐴝𐴌 𐴒𐴡𐴌𐴡𐴑 𐴘𐴝𐴃𐴡 𐴕𐴡𐴒𐴡𐴌𐴡𐴑، 𐴀𐴞𐴁𐴝 𐴔𐴞𐴏𐴝 𐴈𐴡𐴃𐴝𐴌𐴠 𐴉𐴥𐴡𐴙𐴓𐴝𐴘𐴧𐴠||

𐴀𐴠𐴑𐴎𐴡𐴕 𐴔𐴝𐴕𐴥𐴟𐴙𐴐𐴢 𐴀𐴝𐴌𐴠𐴑 𐴎𐴡𐴕𐴡𐴓𐴧𐴝 𐴌𐴠𐴑𐴡𐴋𐴝𐴌 𐴘𐴝𐴃𐴡𐴁𐴝 𐴃𐴡𐴌𐴅𐴡𐴔𐴝𐴕 𐴀𐴡𐴘𐴕𐴡𐴉𐴝𐴌𐴠| 𐴁𐴝𐴎𐴠 𐴀𐴡𐴃𐴧𐴡𐴃𐴢 𐴔𐴝𐴕𐴥𐴟𐴙𐴐𐴢 𐴀𐴡𐴎𐴝𐴕𐴝𐴃𐴢 𐴀𐴝𐴌𐴠𐴑 𐴎𐴡𐴕𐴡𐴌 𐴈𐴝𐴃𐴠𐴌𐴠 𐴌𐴠𐴑𐴡𐴋𐴝𐴌 𐴁𐴡𐴕𐴞𐴎𐴝𐴒𐴡𐴘| 𐴀𐴞𐴁𐴝 𐴀𐴡𐴎𐴝𐴕𐴝𐴃𐴢 𐴀𐴦𐴠𐴕 𐴈𐴡𐴁𐴡𐴌 𐴕𐴡𐴈𐴡𐴓𐴢 𐴒𐴡𐴌𐴠 𐴎𐴝𐴌𐴎𐴡𐴌𐴘𐴝 𐴅𐴥𐴟𐴄𐴝 𐴈𐴡𐴁𐴡𐴌 𐴐𐴝𐴘𐴠 𐴒𐴡𐴌𐴝𐴌 𐴎𐴡𐴌𐴘𐴝 𐴁𐴡𐴕𐴞𐴎𐴝𐴒𐴡𐴘| 𐴀𐴠𐴈𐴡𐴃𐴝𐴓𐴧𐴝 𐴕𐴡𐴁𐴞 𐴀𐴝𐴓𐴝𐴘𐴇𐴞𐴏𐴧𐴝𐴓𐴝𐴔𐴢 𐴀𐴠𐴌𐴐𐴝𐴊𐴢 𐴒𐴡𐴌𐴠𐴌:

كفى بالمرأ كذبا أن يحدث بكل ماسمع

𐴘𐴝𐴕 𐴁𐴠𐴙𐴐𐴞 𐴀𐴝𐴇𐴝𐴔𐴢 𐴔𐴡𐴗𐴎𐴟||

𐴀𐴞𐴔𐴝𐴔𐴢 𐴕𐴡𐴖𐴧𐴞 𐴌𐴡𐴇𐴞𐴔𐴝𐴇𐴟𐴓𐴧𐴝𐴇 𐴏𐴥𐴡𐴀𐴞 𐴔𐴟𐴏𐴓𐴞𐴔𐴡𐴌 𐴐𐴡𐴌𐴝𐴃𐴢 𐴈𐴦𐴡𐴊𐴧𐴠: 𐴇𐴝𐴊𐴞𐴏𐴢 𐴀𐴝𐴌 𐴃𐴝𐴔𐴦𐴝𐴔𐴢 𐴀𐴝𐴏𐴝𐴌 𐴀𐴡𐴑𐴧𐴡𐴓𐴡𐴃𐴢 𐴀𐴠𐴔𐴡𐴗𐴎𐴟𐴌 𐴁𐴝𐴁𐴡𐴃𐴠 𐴎𐴠𐴈𐴡𐴃𐴝 𐴁𐴡𐴘𐴝𐴕 𐴒𐴡𐴌𐴝𐴒𐴞𐴘𐴧𐴠 𐴀𐴠𐴒𐴞𐴕 𐴀𐴡𐴘𐴓𐴊𐴠 𐴔𐴝𐴕𐴥𐴟𐴙𐴐𐴢 𐴀𐴡𐴑𐴧𐴡𐴓𐴞 𐴉𐴥𐴟𐴙𐴕𐴧𐴝 𐴈𐴡𐴃𐴝 𐴁𐴡𐴘𐴝𐴕 𐴒𐴡𐴌𐴡𐴕𐴡𐴌 𐴁𐴝𐴁𐴡𐴃𐴠 𐴖𐴝𐴌𐴞𐴚 𐴊𐴞𐴘𐴝𐴒𐴞𐴘𐴧𐴠| 𐴑𐴞𐴘𐴡𐴓𐴧𐴝 𐴁𐴡𐴓𐴞 𐴈𐴡𐴘𐴓𐴠 𐴔𐴝𐴕𐴥𐴟𐴙𐴐𐴡𐴌 𐴇𐴥𐴝𐴣𐴏𐴝 𐴔𐴞𐴏𐴝 𐴉𐴥𐴟𐴕𐴡𐴕𐴡𐴌 𐴀𐴝𐴊𐴡𐴃𐴢 𐴀𐴝𐴏𐴠| 𐴎𐴡𐴊𐴞 𐴃𐴝𐴌𐴝 𐴎𐴞𐴘𐴝𐴕 𐴉𐴥𐴟𐴕𐴠 𐴘𐴝𐴕 𐴕𐴡𐴑𐴡𐴓𐴢 𐴒𐴡𐴌𐴝𐴃𐴧𐴝𐴑𐴠 𐴃𐴡𐴘𐴓𐴠 𐴃𐴝𐴌𐴝 𐴀𐴦𐴠𐴕𐴈𐴡𐴃𐴝𐴌 𐴁𐴝𐴁𐴡𐴃𐴠𐴘𐴡 𐴅𐴥𐴟𐴄𐴝 𐴈𐴡𐴘𐴁𐴡، 𐴎𐴞𐴘𐴝𐴕 𐴇𐴝𐴑𐴞𐴑𐴡𐴃𐴡𐴃𐴢 𐴀𐴠𐴈𐴡𐴕𐴡 𐴖𐴡𐴅𐴟𐴊𐴢 𐴕𐴡𐴀𐴡||

𐴘𐴝𐴌𐴁𐴝𐴊𐴠 𐴃𐴝𐴛 𐴈𐴦𐴡𐴊𐴧𐴠: 𐴘𐴝𐴌𐴀𐴝𐴒𐴠 𐴁𐴡𐴘𐴝𐴕 𐴒𐴡𐴌𐴝𐴒𐴞𐴘𐴧𐴠، 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴈𐴡𐴕𐴡 𐴔𐴡𐴗𐴎𐴟𐴌 𐴁𐴝𐴁𐴡𐴃𐴠 𐴀𐴡𐴏𐴡𐴓𐴡𐴌 𐴈𐴠𐴓𐴝𐴉𐴢 𐴈𐴡𐴁𐴡𐴌 𐴊𐴡𐴕𐴧𐴝𐴕𐴡𐴌𐴠 𐴅𐴥𐴟𐴄𐴝 𐴁𐴡𐴓𐴞𐴈𐴡𐴗𐴝𐴎𐴝| 𐴀𐴠𐴎𐴝𐴒𐴝𐴃𐴢 𐴀𐴠𐴌𐴝𐴊𐴝 𐴃𐴝𐴑𐴡𐴕𐴡𐴌 𐴐𐴡𐴌𐴃𐴡 𐴕𐴥𐴝𐴘| 𐴑𐴞𐴕𐴃𐴟 𐴒𐴟𐴕𐴥𐴝 𐴀𐴡𐴘𐴁𐴡𐴓𐴧𐴝 𐴁𐴡𐴓𐴞 𐴀𐴠𐴌𐴝𐴊𐴝 𐴃𐴡𐴑𐴡𐴕𐴡𐴌 𐴐𐴡𐴌𐴃𐴡 𐴓𐴝𐴒𐴝𐴒𐴞𐴘𐴧𐴠| 𐴖𐴡𐴓𐴧𐴝𐴇𐴟 𐴀𐴝𐴀𐴓𐴡𐴔𐴢| 𐴀𐴠 𐴉𐴡𐴙𐴅𐴧𐴡𐴕𐴃𐴡 𐴀𐴞𐴔𐴝𐴔𐴢 𐴕𐴡𐴖𐴧𐴞 𐴌𐴡𐴇𐴞𐴔𐴝𐴇𐴟𐴓𐴧𐴝𐴇𐴌 𐴈𐴡𐴃𐴝||

𐴘𐴝𐴕 𐴀𐴡𐴘𐴓𐴊𐴠 𐴈𐴡𐴁𐴡𐴌 𐴀𐴝𐴉𐴡𐴏𐴡𐴃𐴢 𐴃𐴡𐴑𐴏𐴞𐴔𐴢 𐴀𐴡𐴕𐴡𐴃𐴧𐴞 𐴌𐴟𐴑𐴡𐴕 𐴉𐴡𐴙𐴓𐴝 𐴎𐴡𐴌𐴞𐴘𐴝 𐴉𐴡𐴙𐴓𐴝 𐴖𐴡𐴏𐴞𐴓𐴝 𐴀𐴝𐴌 𐴃𐴡𐴌𐴞𐴑𐴝| 𐴀𐴠𐴈𐴡𐴃𐴝𐴓𐴧𐴝 𐴈𐴡𐴁𐴡𐴌𐴝 𐴈𐴡𐴁𐴡𐴌 𐴊𐴡𐴕𐴡𐴔𐴧𐴝 𐴘𐴠𐴑𐴞𐴕 𐴃𐴝𐴑𐴡 𐴎𐴡𐴌𐴟𐴌𐴞||

𐴊𐴟𐴏𐴡𐴌𐴝 𐴖𐴡𐴏𐴞𐴓𐴝 𐴀𐴡𐴘𐴓𐴊𐴠: 𐴎𐴠 𐴈𐴡𐴕𐴡 𐴔𐴟𐴗𐴎𐴟𐴌𐴠 𐴀𐴠 𐴔𐴡𐴗𐴎𐴟𐴌 𐴔𐴟𐴃𐴝𐴀𐴓𐴧𐴠𐴑 𐴔𐴝𐴇𐴠𐴌𐴡𐴌 𐴈𐴝𐴣𐴏𐴠 𐴇𐴝𐴖𐴝𐴓𐴝 𐴒𐴡𐴌𐴡𐴕 𐴏𐴦𐴝| 𐴐𐴝𐴘𐴈𐴢 𐴀𐴝𐴁𐴊𐴟𐴓𐴧𐴝𐴇 𐴀𐴝𐴎𐴧𐴝𐴔𐴢 (𐴌𐴇) 𐴈𐴦𐴡𐴊𐴧𐴠: 𐴃𐴟𐴛 𐴕𐴞𐴎𐴡𐴌𐴠 𐴀𐴠𐴏𐴓𐴝𐴇 𐴒𐴡𐴌𐴡، 𐴎𐴡𐴁𐴝𐴕𐴡𐴌𐴠 𐴇𐴠𐴉𐴝𐴎𐴡𐴃𐴢 𐴒𐴡𐴌𐴡 𐴀𐴝𐴌 𐴃𐴟𐴛 𐴀𐴝𐴊𐴧𐴠 𐴃𐴟𐴖𐴝𐴣𐴀𐴌 𐴌𐴡𐴁𐴡𐴌 𐴀𐴝𐴉𐴡𐴏𐴡𐴃𐴢 𐴀𐴠𐴏𐴓𐴝𐴇 𐴒𐴡𐴌𐴞𐴉𐴠𐴓𐴡| 𐴀𐴡𐴘𐴃𐴡𐴉𐴝𐴌𐴠 𐴃𐴟𐴛 𐴎𐴝𐴘𐴝𐴕 𐴊𐴠𐴑𐴡𐴌 𐴘𐴝𐴕 𐴏𐴥𐴡𐴀𐴞 𐴕𐴡𐴀𐴡| 𐴀𐴦𐴠𐴕𐴈𐴡𐴕𐴊𐴞𐴕 𐴔𐴝𐴓𐴟𐴔𐴝𐴃𐴢 𐴎𐴠𐴒𐴞𐴕 𐴃𐴟𐴖𐴝𐴣𐴀𐴌𐴝 𐴀𐴝𐴇𐴓𐴠 𐴀𐴠𐴓𐴔𐴡𐴃𐴧𐴞 𐴉𐴟𐴏𐴝𐴌 𐴒𐴡𐴌𐴞 𐴎𐴝𐴕𐴞𐴓𐴡𐴕 𐴎𐴡𐴌𐴟𐴌𐴞| 𐴀𐴝𐴌 𐴓𐴝𐴌𐴥𐴝𐴘𐴌 𐴔𐴡𐴙𐴊𐴝𐴕𐴡𐴃𐴢 𐴅𐴥𐴟𐴄𐴝 𐴈𐴡𐴁𐴡𐴌 𐴁𐴞𐴙𐴐𐴝 𐴁𐴠𐴙𐴐𐴞 𐴉𐴥𐴡𐴙𐴓𐴠||

𐴀𐴝𐴓𐴧𐴝𐴇 𐴃𐴝𐴀𐴝𐴓𐴝 𐴀𐴠𐴌𐴠𐴐𐴝𐴊𐴢 𐴒𐴡𐴌𐴠𐴌:

وَإِذَا جَاءهُمْ أَمْرٌ مِّنَ الأَمْنِ أَوِ الْخَوْفِ أَذَاعُواْ بِهِ

𐴎𐴡𐴈𐴡𐴕 𐴃𐴝𐴌𐴝𐴌 𐴈𐴝𐴣𐴏𐴠 𐴐𐴝𐴕𐴃𐴞 𐴀𐴡𐴐𐴝𐴕𐴃𐴞𐴌 𐴈𐴡𐴕𐴡 𐴑𐴞𐴏𐴞𐴔𐴡𐴌 𐴈𐴡𐴁𐴡𐴌 𐴉𐴡𐴣𐴏𐴠، 𐴃𐴡𐴈𐴡𐴕 𐴃𐴝𐴌𐴝 𐴀𐴠𐴒𐴞𐴕𐴡𐴌𐴠 𐴀𐴠𐴒𐴞𐴕𐴡𐴌𐴠 𐴔𐴡𐴐𐴟𐴌 𐴒𐴡𐴌𐴞𐴊𐴠| (𐴏𐴟𐴌𐴝 𐴕𐴠𐴏𐴝: 𐴸𐴳)

𐴘𐴝𐴕𐴞 𐴃𐴝𐴌𐴝𐴌 𐴈𐴝𐴣𐴏𐴠 𐴎𐴡𐴈𐴡𐴕 𐴈𐴡𐴕𐴡 𐴑𐴞𐴏𐴞𐴔𐴡𐴌 𐴈𐴡𐴁𐴡𐴌 𐴉𐴡𐴣𐴏𐴠 𐴘𐴝𐴕 𐴐𐴝𐴣𐴃𐴞𐴌 𐴀𐴥𐴡𐴑 𐴘𐴝𐴃𐴡 𐴀𐴡𐴐𐴝𐴕𐴃𐴞𐴌 𐴀𐴥𐴡𐴑، 𐴃𐴝𐴌𐴝 𐴘𐴝𐴕𐴡𐴌𐴠 𐴃𐴝𐴀𐴑𐴞𐴑 𐴕𐴡𐴒𐴡𐴌𐴞 𐴔𐴡𐴐𐴟𐴌 𐴒𐴡𐴌𐴝 𐴐𐴥𐴟𐴌𐴟 𐴒𐴡𐴌𐴞𐴊𐴠| 𐴉𐴡𐴓𐴝𐴕 𐴔𐴝𐴕𐴥𐴟𐴙𐴐𐴧𐴗𐴝 𐴀𐴞𐴕𐴋𐴞𐴓𐴧𐴝 𐴑𐴞𐴘𐴡𐴓𐴧𐴝 𐴒𐴡𐴙𐴓𐴧𐴡؟ 𐴑𐴞𐴘𐴡𐴓𐴧𐴝 𐴉𐴡𐴓𐴝𐴕𐴝 𐴔𐴟𐴕𐴥𐴟𐴙𐴐𐴧𐴗𐴝 𐴀𐴡𐴕𐴋𐴞𐴓𐴧𐴝 𐴒𐴡𐴙𐴓𐴧𐴡؟ 𐴀𐴝𐴌𐴥𐴡 𐴀𐴝𐴌𐴥𐴡||

𐴀𐴝𐴘𐴝𐴃𐴢 𐴀𐴞𐴁𐴝𐴌 𐴁𐴝𐴊𐴡𐴌 𐴀𐴥𐴞𐴏𐴧𐴝𐴃𐴢 𐴀𐴝𐴓𐴧𐴝𐴇 𐴃𐴝𐴀𐴝𐴓𐴝 𐴀𐴠𐴌𐴐𐴝𐴊𐴢 𐴒𐴡𐴌𐴠𐴌:

وَلَوْ رَدُّوهُ إِلَى الرَّسُولِ وَإِلَى أُوْلِي الأَمْرِ مِنْهُمْ لَعَلِمَهُ الَّذِينَ يَسْتَنبِطُونَهُ مِنْهُمْ

𐴀𐴝𐴌 𐴃𐴝𐴌𐴝𐴎𐴡𐴊𐴞 𐴀𐴠𐴈𐴡𐴁𐴡𐴌𐴒𐴝𐴕 𐴀𐴝𐴓𐴧𐴝𐴇𐴌 𐴌𐴡𐴏𐴟𐴓𐴢 𐴘𐴝𐴃𐴡 𐴎𐴝𐴌𐴝 𐴎𐴞𐴔𐴧𐴝𐴊𐴝𐴌 𐴀𐴦𐴡𐴓𐴀𐴝𐴏𐴠 𐴃𐴝𐴌𐴝𐴌 𐴈𐴣𐴏𐴠 𐴓𐴡𐴘𐴎𐴝𐴘𐴃𐴡، 𐴃𐴡𐴈𐴡𐴕 𐴃𐴝𐴌𐴝𐴌 𐴁𐴥𐴟𐴃𐴡𐴌𐴠 𐴎𐴝𐴌 𐴃𐴝𐴑𐴞𐴑 𐴒𐴡𐴌𐴡𐴘𐴧𐴝 𐴀𐴝𐴏𐴠 𐴃𐴝𐴌𐴝 𐴘𐴝𐴕𐴡𐴌 𐴉𐴝𐴙𐴏𐴝𐴓𐴢 𐴃𐴝𐴓𐴝𐴐𐴢 𐴒𐴡𐴌𐴞𐴓𐴡𐴘𐴃𐴡| 𐴏𐴟𐴌𐴝 𐴕𐴠𐴏𐴝: 𐴸𐴳)

𐴀𐴝𐴓𐴧𐴝𐴇 𐴃𐴝𐴀𐴝𐴓𐴝 𐴀𐴝𐴣𐴀𐴌𐴝𐴌𐴠 𐴐𐴥𐴞𐴑𐴝𐴘𐴊𐴠𐴌 𐴑𐴦𐴠𐴕𐴒𐴡𐴌𐴞 𐴓𐴝𐴌𐴥𐴝𐴘𐴌 𐴔𐴡𐴙𐴊𐴝𐴕𐴡𐴃𐴢 𐴀𐴠𐴃𐴝𐴔𐴦𐴝𐴔𐴢 𐴀𐴝𐴉𐴖𐴝 𐴀𐴡𐴑𐴧𐴡𐴓𐴡𐴌 𐴏𐴝𐴣𐴃𐴠 𐴔𐴟𐴑𐴝𐴁𐴠𐴓𐴢 𐴒𐴡𐴌𐴞𐴁𐴡| 𐴀𐴝𐴌 𐴎𐴞𐴔𐴧𐴝𐴊𐴝𐴌 𐴏𐴝𐴣𐴃𐴞𐴌 𐴈𐴝𐴣𐴏𐴠 𐴉𐴟𐴏𐴝𐴌 𐴒𐴡𐴌𐴞 𐴎𐴝𐴕𐴞𐴓𐴡𐴘𐴁𐴝𐴌 𐴈𐴡𐴃𐴝𐴘𐴡 𐴈𐴡𐴗𐴝𐴒𐴞𐴘𐴧𐴠| 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴉𐴡𐴓𐴝𐴕 𐴔𐴝𐴀𐴔𐴠𐴓𐴝𐴒𐴝𐴕 𐴀𐴝𐴏𐴡𐴓𐴡𐴃𐴢 𐴇𐴡𐴕𐴋𐴞𐴓𐴧𐴝؟||

𐴀𐴠𐴈𐴡𐴃𐴝𐴓𐴧𐴝 𐴀𐴡𐴕𐴡𐴌𐴝 𐴕𐴞𐴎𐴡𐴌 𐴀𐴝𐴊𐴧𐴠 𐴀𐴝𐴓𐴧𐴝𐴇𐴌 𐴊𐴡𐴌𐴔𐴞𐴘𐴝𐴕 𐴀𐴝𐴉𐴡𐴏𐴃𐴢 𐴀𐴠𐴏𐴓𐴝𐴇 𐴒𐴡𐴌𐴞𐴉𐴠𐴓𐴡، 𐴃𐴝𐴑𐴠 𐴃𐴟𐴖𐴝𐴣𐴀𐴌𐴝 𐴃𐴝𐴌𐴝𐴌 𐴏𐴡𐴖𐴝𐴁𐴡𐴌𐴠 𐴇𐴠𐴉𐴝𐴎𐴡𐴃𐴢 𐴒𐴡𐴌𐴞𐴉𐴝𐴌𐴡|
𐴀𐴠𐴊𐴧𐴟𐴌𐴡𐴃𐴢 𐴐𐴝𐴘𐴈𐴢 𐴀𐴝𐴁𐴊𐴟𐴓𐴧𐴝𐴇 𐴀𐴝𐴎𐴧𐴝𐴔𐴡𐴌 𐴈𐴡𐴃𐴝 𐴉𐴥𐴟𐴌𐴝𐴘𐴒𐴞𐴘𐴡𐴘||

𐴃𐴡𐴘𐴓𐴠 𐴈𐴟𐴓𐴝𐴏𐴝 𐴈𐴡𐴃𐴝 𐴀𐴡𐴘𐴓𐴊𐴠: 𐴇𐴝𐴌𐴀𐴠𐴑𐴧𐴝𐴕 𐴔𐴡𐴗𐴎𐴟𐴌𐴠 𐴃𐴝𐴌𐴁𐴝𐴁𐴡𐴃𐴠 𐴔𐴝𐴇𐴠𐴌𐴊𐴠 𐴃𐴝𐴌𐴝𐴌 𐴈𐴝𐴣𐴏𐴠 𐴇𐴝𐴖𐴝𐴓𐴝 𐴒𐴡𐴌𐴡 𐴀𐴝𐴌 𐴔𐴝𐴀𐴓𐴟𐴔𐴝𐴕𐴃𐴡𐴌𐴠 𐴀𐴝𐴇𐴝𐴔𐴞𐴘𐴡𐴃𐴡𐴌 𐴏𐴝𐴣𐴏𐴃𐴠 𐴎𐴝𐴕𐴡𐴕||

𐴀𐴝𐴌 𐴒𐴡𐴓𐴡𐴃𐴢 𐴈𐴡𐴁𐴡𐴌𐴡𐴌 𐴕𐴟𐴏𐴧𐴝𐴕𐴞 𐴀𐴡𐴘𐴓𐴊𐴠: 𐴒𐴡𐴓𐴡𐴃𐴢 𐴈𐴡𐴁𐴡𐴌𐴠 𐴉𐴦𐴝𐴄𐴝 𐴉𐴦𐴝𐴄𐴞 𐴀𐴝𐴌 𐴊𐴞𐴓𐴡𐴃𐴢 𐴑𐴠𐴕𐴝 𐴉𐴡𐴙𐴊𐴝 𐴒𐴡𐴌𐴠| 𐴊𐴟𐴐𐴧𐴡𐴕 𐴀𐴦𐴡𐴓𐴠 𐴓𐴡𐴐𐴑𐴡𐴌 𐴀𐴝𐴊𐴧𐴠 𐴀𐴝𐴔𐴞𐴌𐴡𐴌 𐴔𐴝𐴎𐴠 𐴃𐴝𐴌𐴝𐴌 𐴖𐴝𐴏𐴠𐴃𐴝 𐴁𐴝𐴕𐴝𐴘𐴁𐴡𐴓𐴧𐴝 𐴁𐴠𐴙𐴐𐴞𐴏𐴦𐴝| 𐴎𐴝𐴌 𐴎𐴡𐴌𐴞𐴘𐴝 𐴀𐴝𐴔𐴞𐴌𐴡𐴌 𐴈𐴡𐴃𐴝 𐴁𐴡𐴊𐴡𐴓𐴝 𐴏𐴡𐴊𐴡𐴓𐴝𐴒𐴡𐴌𐴞 𐴔𐴝𐴙𐴕𐴐𐴥𐴡𐴌𐴠 𐴈𐴡𐴘𐴁𐴡 𐴀𐴝𐴌 𐴔𐴝𐴙𐴕𐴐𐴥𐴡𐴌 𐴈𐴡𐴃𐴝 𐴌𐴡𐴊𐴧𐴠𐴁𐴡𐴊𐴡𐴓𐴢 𐴒𐴡𐴌𐴞 𐴀𐴝𐴔𐴞𐴌𐴡𐴌𐴠 𐴉𐴥𐴟𐴕𐴝𐴘𐴁𐴡| 𐴃𐴝𐴌𐴝𐴌 𐴀𐴝𐴏𐴡𐴓𐴢 𐴔𐴡𐴏𐴧𐴟𐴊𐴢 𐴘𐴝𐴕| 𐴀𐴞𐴕𐴋𐴞𐴓𐴧𐴝 𐴒𐴡𐴌𐴞 𐴃𐴝𐴌𐴝 𐴔𐴝𐴔𐴟𐴌 𐴀𐴦𐴡𐴓𐴡𐴌𐴠 𐴃𐴝𐴌𐴝𐴌 𐴀𐴝𐴔𐴞𐴌𐴡𐴃𐴧𐴞 𐴊𐴟𐴌𐴠 𐴒𐴡𐴌𐴞𐴉𐴠𐴓𐴝| 𐴀𐴝𐴌 𐴀𐴠𐴒𐴞𐴕 𐴀𐴡𐴘𐴓𐴊𐴠 𐴔𐴡𐴐𐴟𐴌 𐴀𐴝𐴌 𐴁𐴠𐴙𐴒𐴧𐴞𐴕𐴠 𐴎𐴝𐴕𐴠𐴊𐴠 𐴈𐴡𐴃𐴝| 𐴈𐴡𐴃𐴝𐴌𐴠 𐴁𐴝𐴌𐴝𐴘 𐴏𐴝𐴌𐴝𐴘 𐴈𐴡𐴕𐴡𐴌 𐴈𐴡𐴕 𐴎𐴡𐴌𐴟𐴌𐴡𐴃𐴢 𐴕𐴥𐴝𐴘||

𐴀𐴟𐴏𐴃𐴝𐴊𐴢 𐴀𐴝𐴁𐴟𐴓𐴧𐴝 𐴀𐴝𐴓𐴢 𐴀𐴝𐴊𐴡𐴔𐴢 (𐴌𐴇) 𐴈𐴦𐴡𐴊𐴧𐴠: 𐴅𐴞𐴇𐴝𐴊𐴢 𐴀𐴝𐴊𐴧𐴠 𐴔𐴟𐴅𐴝𐴇𐴞𐴊𐴞𐴕 𐴀𐴦𐴡𐴓𐴡𐴓𐴧𐴝 𐴁𐴠𐴙𐴒𐴧𐴞𐴕𐴡𐴃𐴧𐴞 𐴁𐴝𐴌𐴡 𐴈𐴡𐴃𐴡𐴌𐴝 𐴀𐴡𐴘𐴓𐴊𐴠، 𐴀𐴡𐴃𐴝𐴔𐴦𐴝𐴔𐴢 𐴁𐴝𐴃𐴠𐴓𐴠 𐴉𐴌𐴟𐴉𐴠𐴒𐴠𐴚𐴋𐴝 𐴎𐴠𐴒𐴞𐴕 𐴅𐴞𐴇𐴝𐴊𐴡𐴃𐴢 𐴎𐴡𐴘𐴝 𐴀𐴦𐴡𐴓𐴡𐴓𐴧𐴝 𐴈𐴦𐴝𐴏𐴒𐴡𐴌𐴞 𐴀𐴝𐴔𐴞𐴌 𐴀𐴡𐴑𐴧𐴡𐴓𐴡𐴓𐴧𐴝| 𐴀𐴠𐴑𐴞𐴏𐴞𐴔𐴡𐴌 𐴉𐴌𐴟𐴉𐴠𐴒𐴞𐴚𐴋𐴝 𐴎𐴞𐴔𐴧𐴝𐴊𐴝𐴌𐴞𐴌𐴠 𐴊𐴥𐴡𐴚𐴐𐴡 𐴒𐴡𐴌𐴞𐴊𐴠 𐴀𐴝𐴌 𐴀𐴝𐴔𐴞𐴌 𐴀𐴝𐴊𐴧𐴠 𐴓𐴡𐴐𐴑𐴡𐴌𐴡𐴌 𐴔𐴝𐴎𐴠 𐴉𐴝𐴏𐴝𐴓𐴝 𐴃𐴡𐴘𐴧𐴝𐴌 𐴒𐴡𐴌𐴠| 𐴀𐴠𐴈𐴡𐴃𐴝𐴓𐴧𐴝 𐴃𐴝𐴌𐴝 𐴑𐴡𐴔𐴎𐴟𐴌 𐴊𐴞𐴓𐴢 𐴀𐴡𐴑𐴧𐴡𐴓𐴡𐴔𐴧𐴝𐴎𐴠 𐴁𐴠𐴖𐴡𐴉𐴝 𐴀𐴝𐴌 𐴊𐴟𐴐𐴧𐴡𐴕𐴞 𐴋𐴝𐴓𐴞𐴊𐴠 𐴀𐴝𐴌 𐴁𐴟𐴌𐴝𐴘𐴞 𐴀𐴡𐴑𐴧𐴡𐴓𐴡𐴌 𐴁𐴝𐴌𐴝𐴘𐴊𐴠| 𐴘𐴝𐴌𐴁𐴝𐴊𐴠 𐴀𐴠𐴌𐴝𐴏𐴧𐴝𐴃𐴧𐴞 𐴑𐴞𐴘𐴡 𐴏𐴥𐴟𐴌𐴞𐴕𐴡𐴉𐴝𐴌𐴠||

𐴁𐴠𐴙𐴐𐴡𐴑 𐴘𐴝𐴕 𐴅𐴞𐴇𐴝𐴊𐴞 𐴑𐴝𐴉𐴠𐴓𐴝𐴓𐴧𐴝𐴘 𐴁𐴠𐴙𐴐𐴝 𐴁𐴠𐴙𐴐𐴞 𐴕𐴟𐴏𐴧𐴝𐴕 𐴒𐴡𐴌𐴡𐴘𐴧𐴝 𐴈𐴝𐴔𐴢| 𐴀𐴠𐴈𐴡𐴃𐴝𐴓𐴧𐴝 𐴇𐴝𐴌𐴀𐴠𐴑𐴎𐴡𐴕 𐴔𐴟𐴅𐴝𐴇𐴞𐴊𐴡𐴃𐴧𐴞 𐴀𐴠𐴒𐴞𐴕𐴡𐴌 𐴁𐴝𐴁𐴡𐴃𐴠 𐴇𐴟𐴐𐴞𐴘𐴝𐴌 𐴃𐴝𐴑𐴡𐴕 𐴎𐴡𐴌𐴟𐴌𐴞| 𐴀𐴝𐴌 𐴀𐴡𐴃𐴝𐴔𐴦𐴝𐴔𐴢 𐴅𐴡𐴔𐴝𐴃𐴡𐴃𐴧𐴞 𐴁𐴝𐴏𐴞 𐴃𐴝𐴑𐴡𐴕𐴏𐴦𐴝، 𐴎𐴝𐴌𐴝𐴌 𐴅𐴞𐴇𐴞𐴊𐴞 𐴓𐴠𐴙𐴋𐴝𐴌 𐴁𐴡𐴕𐴞𐴁𐴝𐴌 𐴓𐴝𐴓𐴏𐴞 𐴀𐴝𐴌 𐴒𐴡𐴓𐴡𐴃𐴢 𐴈𐴡𐴁𐴡𐴌 𐴀𐴡𐴑𐴧𐴡𐴓𐴡𐴌𐴠 𐴔𐴡𐴐𐴟𐴌 𐴒𐴡𐴌𐴡𐴕 𐴏𐴥𐴝𐴌𐴝 𐴀𐴝𐴌𐴈𐴡𐴕 𐴈𐴝𐴔𐴕𐴡𐴃𐴝𐴑𐴠| 𐴏𐴝𐴘 𐴒𐴡𐴓𐴡𐴃𐴢 𐴈𐴡𐴁𐴡𐴌 𐴊𐴡𐴘𐴝 𐴅𐴞𐴇𐴝𐴊𐴞 𐴇𐴝𐴃𐴝𐴌𐴡𐴌 𐴁𐴥𐴟𐴃𐴡𐴌𐴡𐴌 𐴀𐴥𐴡𐴑 𐴘𐴝𐴃𐴡 𐴁𐴝𐴘𐴌𐴡𐴌| 𐴊𐴟𐴐𐴧𐴡𐴕 𐴁𐴝𐴎𐴡𐴔𐴡𐴃𐴧𐴡 𐴇𐴝𐴃𐴝𐴌𐴡𐴌 𐴁𐴝𐴘𐴌𐴡𐴌 𐴀𐴡𐴘𐴁𐴡 𐴀𐴝𐴁𐴝𐴌 𐴁𐴝𐴎𐴡𐴔𐴡𐴃𐴧𐴡 𐴇𐴃𐴝𐴌𐴡𐴌 𐴁𐴥𐴟𐴃𐴡𐴌𐴡𐴌 𐴀𐴡𐴘𐴁𐴡| 𐴁𐴝𐴎𐴡𐴔𐴡𐴃𐴧𐴡 𐴊𐴦𐴞𐴕𐴡𐴌 𐴀𐴠𐴃𐴠𐴁𐴝𐴌𐴠، 𐴊𐴞𐴓𐴡𐴌 𐴀𐴠𐴃𐴠𐴁𐴝𐴌𐴠 𐴘𐴝𐴃𐴡𐴁𐴝 𐴀𐴝𐴑𐴡𐴓𐴡𐴌 𐴀𐴠𐴃𐴠𐴁𐴝𐴌𐴠 𐴑𐴡𐴔𐴎𐴟𐴌𐴊𐴠 𐴀𐴞𐴕𐴋𐴞𐴓𐴧𐴝 𐴈𐴡𐴕𐴡𐴑𐴞𐴘𐴝 𐴀𐴡𐴘𐴃𐴉𐴝𐴌𐴠| 𐴎𐴠𐴕𐴞𐴑𐴞 𐴊𐴟𐴐𐴧𐴡𐴕𐴡𐴌 𐴈𐴡𐴃𐴝 𐴊𐴤𐴞𐴘𐴝𐴕𐴊𐴞 𐴉𐴥𐴟𐴕𐴠، 𐴀𐴡𐴎𐴝𐴕𐴃𐴠 𐴃𐴝𐴌𐴝 𐴉𐴥𐴝𐴣𐴊𐴡𐴃𐴢 𐴉𐴡𐴌𐴞𐴎𐴝𐴒𐴡𐴘| 𐴏𐴞𐴕𐴃𐴝-𐴉𐴞𐴑𐴞𐴌𐴡𐴃𐴢 𐴑𐴡𐴔𐴎𐴟𐴌 𐴔𐴝𐴕𐴥𐴟𐴙𐴐𐴢 𐴈𐴡𐴁𐴡𐴌 𐴉𐴥𐴟𐴕𐴝𐴌 𐴏𐴝𐴣𐴃𐴠 𐴏𐴝𐴣𐴃𐴠 𐴉𐴡𐴙𐴓𐴝𐴃𐴧𐴝𐴑𐴠، 𐴎𐴡𐴊𐴞𐴘𐴡 𐴀𐴞𐴁𐴝 𐴕𐴡𐴎𐴝𐴕𐴠 𐴘𐴝𐴕𐴡𐴌 𐴎𐴡𐴌𐴞𐴘𐴝 𐴇𐴡𐴃𐴡𐴁𐴡𐴌𐴡 𐴉𐴡𐴏𐴝𐴊𐴢 𐴉𐴡𐴙𐴊𐴝 𐴀𐴡𐴘𐴁𐴡||

𐴀𐴝𐴓𐴧𐴝𐴇 𐴃𐴝𐴀𐴝𐴓𐴝𐴌 𐴈𐴝𐴣𐴏𐴠 𐴊𐴟𐴖𐴝𐴒𐴡𐴌𐴞𐴌 𐴃𐴝𐴑𐴠 𐴃𐴝𐴛 𐴀𐴝𐴣𐴀𐴌𐴝𐴌𐴠 𐴀𐴝𐴣𐴀𐴌𐴝𐴌 𐴕𐴡𐴉𐴏𐴡𐴌 𐴉𐴞𐴃𐴕𐴝𐴃𐴧𐴞 𐴁𐴝𐴏𐴝𐴘𐴌𐴝𐴑𐴠||

𐴀𐴦𐴝𐴔𐴞𐴕

والسلام عليكم ورحمة الله وبركاته