𐴌𐴟𐴇𐴥𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕𐴡𐴌 𐴖𐴡𐴌𐴠 𐴎𐴟𐴓𐴟𐴔𐴢 𐴏𐴠𐴃𐴟𐴔𐴡𐴌 𐴈𐴡𐴁𐴡𐴌𐴃𐴡 𐴉𐴡𐴃𐴧𐴞 𐴀𐴠𐴑𐴎𐴡𐴕𐴠 𐴉𐴤𐴟𐴙𐴕𐴧𐴠 𐴀𐴝𐴌 𐴊𐴞𐴑𐴧𐴠𐴊𐴠 𐴘𐴥𐴡 𐴃𐴝𐴑𐴞𐴁𐴝| 𐴀𐴟𐴔𐴧𐴡𐴃𐴠 𐴔𐴟𐴏𐴓𐴞𐴔𐴝 𐴕𐴞𐴎𐴡𐴌 𐴓𐴝𐴔𐴁𐴦𐴝 𐴒𐴤𐴟𐴔𐴢 𐴎𐴡𐴕𐴡𐴌𐴁𐴝𐴊𐴠 𐴎𐴠𐴃𐴧𐴡𐴃𐴢 𐴀𐴠𐴈𐴡𐴕 𐴏𐴠𐴃𐴡𐴕 𐴀𐴥𐴡𐴌 𐴃𐴡𐴘 𐴃𐴝𐴌 𐴃𐴝𐴌𐴞𐴑𐴡𐴌 𐴁𐴠𐴙𐴐𐴝 𐴁𐴠𐴙𐴐𐴞 𐴀𐴥𐴞𐴏𐴧𐴝 𐴀𐴡𐴑𐴧𐴡𐴓𐴢 𐴃𐴝𐴌 𐴘𐴦𐴝𐴊𐴡𐴃𐴧𐴞 𐴔𐴞𐴄𐴞𐴒𐴞𐴘𐴡𐴘| 𐴀𐴝𐴣𐴀𐴃𐴧𐴞 𐴘𐴦𐴝𐴊𐴀𐴝𐴏𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴐𐴥𐴡𐴕 𐴱𐴹𐴹𐴰 𐴎𐴟𐴒𐴡𐴃𐴢 𐴎𐴡𐴈𐴡𐴕 𐴁𐴟𐴏𐴞𐴕𐴞𐴘𐴝𐴃𐴢 𐴎𐴡𐴈𐴡𐴕 𐴓𐴝𐴌𐴥𐴝𐴘 𐴐𐴥𐴟𐴌𐴟 𐴀𐴡𐴘𐴧𐴠 𐴃𐴡𐴘 𐴀𐴝𐴣𐴀𐴌 𐴒𐴤𐴡𐴌𐴡𐴃𐴢 𐴘𐴦𐴝𐴕𐴉𐴤𐴟𐴕𐴞𐴘𐴡𐴌𐴠 𐴃𐴝𐴀𐴅𐴧𐴟𐴉𐴢 𐴀𐴡𐴘𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴘𐴟𐴌𐴡𐴉𐴡𐴌 𐴉𐴠𐴍𐴡𐴌 𐴁𐴥𐴟𐴃𐴡𐴌𐴠𐴘𐴥𐴡 𐴔𐴟𐴏𐴡𐴓𐴔𐴝𐴕𐴡𐴌 𐴁𐴡𐴐𐴡𐴃𐴞 𐴀𐴝𐴏𐴠 𐴀𐴝𐴌 𐴀𐴠𐴈𐴡𐴃𐴝 𐴀𐴝𐴣𐴀𐴌𐴝 𐴕𐴡𐴎𐴝𐴕𐴞| 𐴀𐴥𐴞𐴕𐴋𐴞𐴓𐴧𐴝 𐴒𐴟𐴌𐴝𐴇𐴝𐴓𐴠 𐴀𐴝𐴌𐴝𐴑𐴝𐴕𐴡𐴌 𐴕𐴝𐴔𐴢 𐴉𐴤𐴟𐴙𐴕𐴧𐴞𐴓𐴝𐴔𐴢 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴥𐴠𐴍𐴠 𐴎𐴟𐴓𐴟𐴔𐴢 𐴏𐴠𐴃𐴟𐴔𐴢 𐴒𐴡𐴌𐴝𐴎𐴝𐴌 𐴑𐴞𐴕𐴃𐴟 𐴀𐴝𐴌𐴝𐴑𐴝𐴕 𐴎𐴝𐴒𐴝𐴒𐴝𐴕 𐴇𐴡𐴍𐴥𐴠 𐴘𐴦𐴝𐴕 𐴈𐴦𐴡𐴕𐴧𐴝𐴕 𐴀𐴠𐴒𐴞𐴕 𐴑𐴞𐴏𐴧𐴟 𐴕𐴡𐴎𐴝𐴕𐴞𐴃𐴝𐴔𐴢||

𐴀𐴠𐴈𐴡𐴕 𐴎𐴠𐴃𐴧𐴡𐴃𐴢 𐴒𐴦𐴝𐴃𐴧𐴞 𐴇𐴝𐴉𐴆𐴥𐴟𐴍𐴠𐴊𐴠 𐴖𐴝𐴑𐴞𐴘𐴝 𐴀𐴡𐴑𐴧𐴡𐴓𐴠 𐴊𐴞𐴓𐴡𐴌𐴠 𐴅𐴥𐴝𐴄𐴑𐴝 𐴊𐴞𐴘𐴧𐴠 𐴃𐴡𐴘 𐴕𐴞𐴎𐴡𐴌 𐴔𐴟𐴏𐴡𐴓𐴔𐴝𐴕 𐴌𐴟𐴇𐴥𐴝𐴙𐴚𐴝 𐴁𐴤𐴝𐴘 𐴀𐴡𐴑𐴧𐴡𐴓𐴡𐴌𐴠 𐴎𐴝𐴕𐴞𐴁𐴝𐴌 𐴑𐴟𐴐𐴞𐴐𐴢 𐴒𐴡𐴙𐴅𐴧𐴞| 𐴀𐴠𐴈𐴡𐴕 𐴀𐴝𐴘𐴧𐴡! 𐴀𐴝𐴣𐴀𐴌 𐴏𐴝𐴣𐴀𐴃𐴠 𐴁𐴡𐴌𐴧𐴠𐴏𐴡𐴒𐴞𐴌𐴡𐴌 𐴀𐴠𐴑𐴧𐴝𐴕𐴝 𐴉𐴟𐴑𐴠 𐴎𐴝𐴘𐴏𐴝𐴘 𐴀𐴝𐴌 𐴉𐴟𐴌𐴝𐴕 𐴎𐴡𐴁𐴝𐴕𐴝𐴃𐴧𐴞 𐴀𐴠𐴈𐴡𐴕 𐴉𐴡𐴙𐴅𐴧𐴠𐴕𐴃𐴡 𐴏𐴦𐴝𐴘 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴀𐴝𐴣𐴀𐴌𐴝𐴌 𐴁𐴤𐴝𐴘 𐴀𐴡𐴑𐴧𐴡𐴓𐴡𐴌 𐴇𐴝𐴓𐴡𐴃𐴢 𐴈𐴡𐴕𐴋𐴥𐴞𐴓𐴧𐴝| 𐴃𐴝𐴌𐴝𐴌 𐴃𐴝𐴌𐴞𐴑 𐴎𐴝𐴕𐴝𐴌𐴁𐴝𐴊𐴠 𐴎𐴠𐴇𐴠𐴕𐴡𐴃𐴢 𐴁𐴦𐴡𐴗𐴃𐴢 𐴏𐴟𐴖𐴝𐴓𐴢 𐴀𐴡𐴑𐴧𐴡𐴓𐴢 𐴀𐴟𐴙𐴄𐴧𐴞𐴓𐴢 𐴎𐴠𐴒𐴞𐴕𐴡𐴌𐴠 𐴓𐴦𐴝𐴏𐴡𐴃𐴢 𐴁𐴡𐴘𐴝𐴕 𐴒𐴡𐴌𐴞𐴘𐴟𐴔𐴢| 𐴎𐴠𐴒𐴞𐴕 𐴀𐴞𐴕𐴋𐴞𐴘𐴝𐴃𐴢 𐴀𐴠𐴈𐴡𐴕 𐴏𐴡𐴓𐴠𐴊𐴧𐴠 𐴇𐴞𐴕𐴊𐴟 𐴃𐴡𐴖𐴝 𐴀𐴠𐴕𐴑𐴠𐴓𐴝𐴁𐴢 𐴀𐴝𐴌 𐴁𐴡𐴌𐴧𐴠𐴏𐴡𐴒𐴞𐴌𐴡𐴌 𐴃𐴝𐴔𐴦𐴝𐴔𐴢 𐴀𐴠𐴓𐴝𐴑𐴝𐴓𐴧𐴝𐴘𐴁𐴡𐴓𐴞 𐴁𐴠𐴙𐴐𐴞 𐴀𐴝𐴇𐴝𐴔𐴢| 𐴑𐴞𐴕𐴃𐴟 𐴀𐴠𐴒𐴞𐴕 𐴁𐴠𐴙𐴒𐴧𐴞𐴕𐴡𐴌 𐴏𐴝𐴣𐴀𐴃𐴠 𐴀𐴝𐴓𐴡𐴔𐴞 𐴕𐴠𐴎𐴝𐴔𐴡𐴌 𐴁𐴠𐴙𐴐𐴞 𐴒𐴤𐴠𐴌𐴝𐴘𐴞 𐴃𐴝𐴀𐴓𐴧𐴟𐴑 𐴀𐴝𐴏𐴠| 𐴃𐴡𐴘 𐴀𐴝𐴣𐴀𐴌 𐴁𐴡𐴘𐴝𐴕 𐴁𐴟𐴌𐴔𐴝𐴌 𐴀𐴡𐴎𐴝𐴒𐴝𐴃𐴧𐴞 𐴐𐴥𐴟𐴌𐴟 𐴒𐴡𐴌𐴞𐴌 𐴎𐴠𐴍𐴠 𐴌𐴟𐴇𐴝𐴙𐴚𐴒𐴙𐴝 𐴑𐴡𐴔𐴢 𐴐𐴥𐴡𐴛𐴑𐴝 𐴔𐴡𐴎𐴓𐴟𐴔𐴢 𐴔𐴟𐴏𐴡𐴓𐴔𐴝𐴕 𐴁𐴤𐴝𐴐𐴞𐴕𐴊𐴝 𐴀𐴠𐴈𐴡𐴕 𐴁𐴡𐴐𐴡𐴁𐴝𐴐𐴢 𐴒𐴡𐴌𐴠𐴌 ||

𐴔𐴞𐴙𐴝𐴕𐴔𐴝𐴌 (𐴕𐴡𐴘𐴝 𐴁𐴟𐴌𐴔𐴝)

𐴁𐴟𐴌𐴔𐴝 𐴎𐴞𐴘𐴝𐴕𐴡𐴌 𐴕𐴡𐴘𐴝 𐴕𐴝𐴔𐴢 𐴔𐴞𐴙𐴝𐴕𐴔𐴝𐴌، 𐴴 𐴅𐴝𐴕𐴖𐴝𐴌𐴞 𐴱𐴹𐴴𐴸 𐴐𐴥𐴡𐴦𐴕𐴡𐴃𐴢 𐴁𐴞𐴄𐴞𐴕𐴡𐴃𐴧𐴠 𐴀𐴝𐴎𐴝𐴊𐴢 𐴀𐴡𐴘𐴧𐴡𐴌𐴠 𐴀𐴠𐴈𐴡𐴕 𐴀𐴝𐴏𐴠𐴊𐴠 𐴐𐴡𐴑𐴡𐴓𐴡𐴃𐴢 𐴎𐴝𐴇𐴠𐴌 𐴀𐴡𐴘𐴧𐴠| 𐴎𐴡𐴊𐴞𐴘𐴥𐴡𐴁𐴝 𐴃𐴝𐴌𐴞𐴑𐴡𐴌 𐴔𐴞𐴑𐴧𐴝 𐴏𐴝𐴘𐴓𐴠 𐴀𐴥𐴠𐴎𐴝𐴒𐴝𐴒𐴝𐴕 𐴁𐴦𐴡𐴗𐴃𐴧𐴝𐴕 𐴊𐴠𐴐𐴢 𐴀𐴝𐴊𐴧𐴠 𐴔𐴟𐴈𐴃𐴡𐴓𐴞𐴉𐴢 𐴑𐴡𐴗𐴔𐴢 𐴓𐴡𐴘 𐴔𐴞𐴘𐴥𐴝𐴙𐴓𐴧𐴝𐴤 𐴎𐴟𐴗𐴝𐴙𐴓𐴧𐴝 𐴀𐴝𐴙𐴐𐴧𐴞𐴓𐴢| 𐴀𐴠 𐴊𐴠𐴐𐴒𐴝𐴕𐴡𐴌 𐴕𐴝𐴔𐴢 𐴁𐴠𐴙𐴒𐴧𐴞𐴕𐴡𐴃𐴧𐴞 𐴁𐴡𐴌𐴡 𐴑𐴡𐴁𐴞𐴓𐴝 𐴁𐴝𐴔𐴝𐴌𐴡𐴌 𐴕𐴝𐴔𐴡𐴌 𐴖𐴡𐴌𐴠 𐴌𐴝𐴑𐴝𐴒𐴞𐴘𐴧𐴠| 𐴎𐴝𐴌 𐴀𐴝𐴌𐴠𐴑𐴧𐴝𐴕 𐴕𐴝𐴔𐴢 𐴀𐴡𐴘𐴓𐴊𐴠 𐴔𐴞𐴙𐴝𐴕𐴔𐴝𐴌| 𐴊𐴠𐴐𐴒𐴝𐴕𐴡𐴌 𐴕𐴝𐴔𐴡𐴌 𐴎𐴡𐴌𐴞𐴘𐴝 𐴊𐴟𐴏𐴡𐴌𐴝 𐴈𐴡𐴔𐴀𐴝𐴁𐴝𐴊𐴞 𐴑𐴡𐴗𐴔𐴢 𐴀𐴡𐴑𐴧𐴡𐴓𐴡𐴌 𐴇𐴝𐴓𐴡𐴃𐴡𐴌 𐴀𐴝𐴕𐴃𐴝𐴎 𐴓𐴝𐴒𐴝𐴎𐴝𐴘| 𐴀𐴠 𐴑𐴡𐴁𐴞𐴓𐴝𐴗𐴝 𐴁𐴟𐴌𐴔𐴝𐴌 𐴔𐴡𐴌𐴑𐴡𐴏𐴞 𐴀𐴠𐴓𐴝𐴑𐴝 𐴔𐴝𐴕𐴋𐴞𐴓𐴞 (မန္တလေးမြို့) 𐴀𐴝𐴊𐴧𐴠 𐴃𐴝𐴌 𐴀𐴝𐴃𐴠𐴈𐴝𐴣𐴏𐴠 𐴁𐴡𐴐𐴡𐴃𐴞 𐴒𐴡𐴌𐴠𐴌| 𐴀𐴝𐴌 𐴃𐴝𐴌𐴝 𐴕𐴞𐴎𐴠 𐴃𐴞𐴁𐴧𐴡𐴃𐴧𐴞 (တိဗက်) 𐴇𐴤𐴞𐴅𐴌𐴡𐴃𐴢 𐴒𐴡𐴌𐴥𐴞 𐴀𐴥𐴠𐴍𐴠 𐴎𐴝𐴘𐴧𐴡𐴌𐴠 𐴎𐴝𐴉𐴡𐴣𐴀𐴗𐴆𐴧𐴠𐴤| 𐴀𐴥𐴠𐴃𐴝𐴌 𐴕𐴞𐴎𐴡𐴌 𐴏𐴝𐴣𐴃𐴠 𐴁𐴟𐴋𐴧𐴞𐴏𐴢 (ဗုဒ္ဓဘာသာ) 𐴊𐴤𐴡𐴌𐴔𐴡𐴘𐴥𐴡 𐴓𐴡𐴘𐴀𐴝𐴙𐴐𐴧𐴠 𐴎𐴞𐴁𐴝 𐴀𐴠𐴈𐴡𐴕 𐴁𐴟𐴌𐴔𐴞𐴀𐴦𐴡𐴓𐴡𐴌 𐴑𐴡𐴗𐴔𐴞 𐴊𐴤𐴡𐴌𐴔𐴡| 𐴀𐴝𐴀𐴛 𐴔𐴞𐴙𐴝𐴕𐴔𐴝𐴌𐴡𐴌 𐴕𐴡𐴘𐴝 𐴕𐴝𐴔𐴡𐴌 𐴁𐴡𐴊𐴡𐴓𐴝𐴃𐴢 𐴁𐴡𐴌𐴔𐴝 𐴕𐴝𐴔𐴘𐴦𐴝𐴕 𐴀𐴠𐴏𐴃𐴠𐴔𐴝𐴓𐴢 𐴒𐴡𐴙𐴅𐴧𐴟𐴔𐴢 𐴑𐴞𐴘𐴡𐴓𐴧𐴝 𐴁𐴡𐴓𐴞𐴈𐴡𐴘𐴓𐴠 𐴔𐴞𐴙𐴝𐴕𐴔𐴝𐴌 𐴕𐴝𐴔𐴘𐴦𐴝𐴕 𐴖𐴝𐴑𐴞𐴘𐴝 𐴀𐴡𐴑𐴧𐴡𐴓𐴡𐴌 𐴃𐴝𐴌𐴞𐴈𐴢 𐴁𐴡𐴘𐴝𐴕 𐴒𐴡𐴌𐴞𐴁𐴡𐴓𐴧𐴝 𐴀𐴠𐴏𐴃𐴠𐴔𐴝𐴓𐴢 𐴕𐴡𐴀𐴡𐴘𐴁𐴡| 𐴀𐴝𐴌 𐴁𐴟𐴌𐴔𐴞 𐴇𐴡𐴑𐴟𐴔𐴡𐴃𐴠 𐴊𐴟𐴕𐴞 𐴕𐴝𐴔𐴡𐴌𐴠 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴡𐴌𐴕𐴡𐴌𐴠 𐴏𐴥𐴡𐴀𐴞𐴁𐴡𐴓𐴞 𐴈𐴦𐴡𐴀||

𐴁𐴟𐴌𐴔𐴝𐴃𐴢 𐴀𐴞𐴏𐴓𐴝𐴔𐴢

𐴂𐴝𐴒𐴝𐴕(𐴱) 𐴇𐴡𐴑𐴟𐴔𐴡𐴃𐴡𐴌 𐴐𐴥𐴟𐴌𐴟𐴌 𐴎𐴡𐴁𐴝𐴕𐴝𐴃𐴢 (𐴶𐴵𐴲 –𐴶𐴶𐴰 𐴀𐴞) 𐴔𐴧𐴝𐴎𐴠 𐴀𐴝𐴌𐴡𐴁𐴞 𐴔𐴟𐴏𐴓𐴞𐴔𐴢 𐴐𐴤𐴡𐴊𐴡𐴀𐴌 𐴀𐴡𐴑𐴧𐴡𐴓𐴠 𐴁𐴟𐴌𐴔𐴝𐴌 𐴈𐴡𐴘𐴠𐴑𐴧𐴝𐴕 𐴎𐴝𐴣𐴀𐴏𐴢 𐴒𐴥𐴝𐴣𐴄𐴡𐴃𐴢 𐴓𐴝𐴙𐴔𐴧𐴠| 𐴎𐴠𐴍𐴠𐴁𐴥𐴡𐴃𐴡𐴃𐴧𐴞 𐴔𐴡𐴐𐴟𐴌 𐴈𐴡𐴑𐴧𐴝𐴕 𐴀𐴡𐴘𐴓𐴊𐴠 𐴃𐴤𐴝𐴄𐴟𐴕(𐴲) 𐴎𐴝𐴣𐴀𐴏𐴢 𐴒𐴝𐴣𐴄𐴢 (Thaton သထုံမြစ် ကမ်း), 𐴔𐴥𐴟𐴄𐴝𐴔𐴧𐴝(𐴳) 𐴎𐴝𐴣𐴀𐴏𐴢 𐴒𐴝𐴣𐴄𐴢 ((မုတ္တမ မြစ်ကမ်း) 𐴀𐴠 𐴊𐴟𐴘𐴧𐴝𐴕 𐴔𐴡𐴕 𐴀𐴠𐴐𐴄𐴠𐴄𐴡𐴃𐴢 𐴀𐴝𐴙𐴐𐴧𐴞𐴓𐴢 𐴀𐴝𐴌 𐴔𐴞𐴌𐴒𐴟𐴘(𐴴) (Mergui, Myeik –မြိတ် မြစ်ကမ်း) 𐴎𐴞𐴁𐴥𐴝𐴌 𐴀𐴠𐴈𐴡𐴕𐴑𐴝𐴌 𐴕𐴝𐴔 𐴀𐴡𐴘𐴓𐴊𐴠 𐴔𐴝𐴙𐴠𐴑| 𐴀𐴞𐴁𐴥𐴝 𐴊𐴡𐴙𐴀𐴕 𐴁𐴡𐴌𐴔𐴝𐴌 𐴀𐴠𐴑𐴧𐴝𐴕 𐴔𐴡𐴐𐴟𐴌 𐴎𐴝𐴣𐴀𐴏𐴢 𐴒𐴝𐴣𐴄𐴢| 𐴔𐴟𐴏𐴡𐴓𐴔𐴝𐴕 𐴐𐴤𐴡𐴊𐴡𐴀𐴌 𐴀𐴦𐴡𐴓𐴡𐴌 𐴎𐴦𐴝𐴣𐴀𐴏𐴢 𐴀𐴡𐴑𐴧𐴡𐴓𐴢 𐴀𐴝𐴉𐴌𐴞𐴑𐴝𐴌 𐴊𐴞𐴘𐴧𐴝 𐴊𐴠𐴐𐴢 𐴔𐴡𐴊𐴝𐴒𐴡𐴐𐴑𐴡𐴌𐴡𐴃𐴧𐴞 (မဒါဂတ်စကားကျွန်း) 𐴆𐴞𐴕𐴝𐴃𐴢 𐴎𐴝𐴘𐴃𐴠 𐴁𐴟𐴌𐴔𐴝 𐴔𐴧𐴝𐴎𐴠 𐴀𐴦𐴝–𐴎𐴦𐴝𐴃𐴢 𐴀𐴝𐴙𐴐𐴧𐴞𐴓𐴢| 𐴕𐴡𐴖𐴡𐴔𐴢 𐴏𐴡𐴊𐴧𐴞 𐴀𐴞𐴏𐴝𐴀𐴞𐴔𐴧𐴝𐴎𐴠 𐴔𐴟𐴏𐴡𐴓𐴔𐴝𐴕 𐴀𐴡𐴑𐴧𐴡𐴓𐴢 𐴀𐴝𐴘𐴝𐴌 𐴊𐴡𐴌𐴞𐴘𐴝𐴌، 𐴄𐴝𐴕𐴧𐴡𐴏𐴟𐴌𐴝𐴕 𐴀𐴝𐴌 𐴀𐴝𐴌𐴝𐴑𐴝𐴕𐴡 𐴔𐴧𐴝𐴎𐴠 𐴉𐴡𐴣𐴀𐴡𐴙𐴏𐴧𐴙𐴠| 𐴃𐴝𐴌𐴔𐴝𐴕𐴞 𐴁𐴟𐴌𐴔𐴝 𐴔𐴧𐴝𐴎𐴠 𐴔𐴟𐴏𐴡𐴓𐴔𐴝𐴕𐴡𐴌 𐴀𐴝𐴁𐴝𐴊𐴞 𐴱𐴰𐴵𐴵 𐴐𐴥𐴡𐴕𐴡 𐴔𐴧𐴝𐴎𐴠 𐴀𐴝𐴕𐴟𐴌𐴝𐴋𐴝𐴌 𐴉𐴦𐴡𐴘𐴓𐴝 𐴌𐴞𐴘𐴝𐴏𐴡𐴃𐴢 𐴑𐴝𐴘𐴠𐴔𐴢 𐴒𐴡𐴌𐴞𐴁𐴝𐴌 𐴀𐴝𐴒𐴠 𐴓𐴡𐴃𐴞 𐴔𐴡𐴗𐴅𐴟𐴊𐴢 𐴀𐴝𐴙𐴐𐴧𐴞𐴓𐴢| 𐴕𐴡𐴖𐴡𐴔𐴢 𐴏𐴡𐴊𐴧𐴞𐴔𐴧𐴝𐴎𐴠 𐴁𐴟𐴌𐴔𐴝𐴃𐴢 𐴀𐴝𐴌𐴡𐴁𐴞 𐴔𐴟𐴏𐴡𐴓𐴔𐴝𐴕 𐴀𐴡𐴑𐴧𐴡𐴓𐴡𐴌 𐴐𐴥𐴟𐴌𐴟𐴌 𐴀𐴝𐴁𐴝𐴊𐴞 𐴀𐴝𐴊𐴧𐴠 𐴀𐴞𐴏𐴓𐴝𐴔𐴢 𐴉𐴤𐴡𐴘𐴓𐴡𐴕 𐴁𐴝𐴁𐴡𐴃𐴠 𐴀𐴝𐴌𐴡𐴁𐴞 ،𐴉𐴝𐴌𐴠𐴏𐴞، 𐴘𐴟𐴌𐴡𐴉𐴞 𐴀𐴝𐴌 𐴆𐴞𐴕𐴝𐴌 𐴇𐴤𐴝𐴁𐴡𐴏𐴢 𐴉𐴡𐴕𐴧𐴝(𐴊𐴡𐴏𐴃𐴝𐴖𐴞𐴎) 𐴀𐴡𐴑𐴧𐴡𐴓𐴢 𐴒𐴡𐴁𐴤𐴝 𐴀𐴝𐴏𐴠| 𐴀𐴝𐴌 𐴁𐴟𐴌𐴔𐴝𐴌 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴢 𐴀𐴡 𐴀𐴝𐴌𐴡𐴁𐴞 𐴐𐴤𐴡𐴊𐴡𐴌 𐴀𐴥𐴡𐴑𐴧𐴡𐴓𐴡𐴌 𐴉𐴟𐴖𐴝𐴘𐴕, 𐴎𐴝𐴌𐴝 𐴀𐴥𐴠𐴍𐴠 𐴁𐴡𐴐𐴡𐴁𐴝𐴐𐴢 𐴒𐴡𐴙𐴅𐴧𐴠 𐴀𐴝𐴌 𐴊𐴠𐴐𐴥𐴡𐴙𐴃𐴧𐴝 𐴕𐴡𐴏𐴡𐴓𐴡𐴌 𐴏𐴝𐴣𐴃𐴠 𐴁𐴞𐴘𐴝–𐴐𐴤𐴝𐴊𐴞 𐴒𐴡𐴙𐴅𐴧𐴠| 𐴁𐴝𐴒𐴟(𐴂𐴠𐴒𐴟)، 𐴊𐴝𐴓𐴝، 𐴃𐴤𐴝𐴕𐴒𐴓𐴞𐴕 (𐴏𐴞𐴌𐴞𐴘𐴝𐴔𐴢)، 𐴃𐴝𐴕𐴞𐴃𐴝𐴘𐴞 (𐴘𐴡𐴃𐴕𐴝𐴏𐴞𐴌𐴡𐴔𐴢)، 𐴔𐴡𐴄𐴝𐴔𐴝 (𐴔𐴡𐴌𐴃𐴡𐴁𐴝𐴕)، 𐴔𐴞𐴑(𐴔𐴡𐴒𐴟𐴘) 𐴀𐴝𐴌 𐴂𐴝𐴄𐴠𐴕 (𐴂𐴝𐴏𐴞𐴕) 𐴀𐴠 𐴃𐴝𐴔𐴦𐴝𐴔𐴢 𐴐𐴦𐴡𐴀𐴡𐴌 𐴁𐴟𐴌𐴔𐴝𐴌 𐴔𐴟𐴏𐴡𐴓𐴔𐴝𐴕 𐴓𐴡𐴘𐴁𐴤𐴡𐴌𐴂𐴟𐴌 𐴀𐴝𐴙𐴐𐴧𐴞𐴓𐴢| 𐴀𐴝𐴌 𐴀𐴦𐴠𐴕 𐴎𐴡𐴁𐴝𐴕𐴝𐴘𐴥𐴡 𐴒𐴟𐴎𐴡𐴙𐴎𐴧𐴠 𐴎𐴡𐴈𐴡𐴕 𐴃𐴝𐴌𐴝𐴌 𐴁𐴥𐴟𐴃𐴡𐴌𐴠 𐴔𐴟𐴏𐴡𐴓𐴔𐴝𐴕𐴡𐴌 𐴀𐴝𐴁𐴝𐴊𐴞 𐴊𐴠𐴐𐴥𐴡𐴙𐴃𐴧𐴝 𐴁𐴟𐴌𐴔𐴞 𐴀𐴦𐴡𐴓𐴡𐴃𐴧𐴞 𐴁𐴥𐴝𐴌𐴡 𐴁𐴠𐴙𐴐𐴞 𐴀𐴝𐴙𐴐𐴧𐴞𐴓𐴢||

𐴁𐴟𐴌𐴔𐴝𐴔𐴧𐴝𐴎𐴠 𐴔𐴟𐴏𐴡𐴓𐴔𐴝𐴕 𐴀𐴡𐴑𐴧𐴡𐴓𐴢 𐴐𐴤𐴡𐴀𐴊𐴡𐴌، 𐴉𐴡𐴗𐴏𐴢، 𐴑𐴡𐴔𐴝𐴕𐴋𐴝𐴌، 𐴓𐴝𐴌𐴥𐴝𐴘𐴌 𐴁𐴡𐴕𐴊𐴞، 𐴉𐴝𐴕𐴥𐴝 𐴓𐴡𐴘𐴝 𐴀𐴝𐴌 𐴒𐴟𐴓𐴝𐴔𐴢 𐴀𐴥𐴞𐴏𐴝𐴉𐴠 𐴀𐴝𐴙𐴐𐴧𐴠| 𐴐𐴥𐴟𐴌𐴟 𐴐𐴥𐴟𐴌𐴟 𐴔𐴟𐴏𐴡𐴓𐴔𐴝𐴕 𐴀𐴡𐴑𐴧𐴡𐴓𐴢 𐴌𐴝𐴎𐴝 𐴁𐴝𐴐𐴧𐴝𐴌 𐴀𐴟𐴎𐴞𐴌، 𐴌𐴝𐴎𐴝 𐴁𐴝𐴐𐴧𐴝𐴌 𐴔𐴟𐴕𐴃𐴡𐴎𐴞𐴔𐴢، 𐴎𐴝𐴣𐴏𐴒𐴝𐴣𐴄𐴡𐴌 𐴀𐴝𐴕𐴎𐴝𐴔𐴢 𐴊𐴠𐴘𐴡𐴘𐴧𐴝, 𐴒𐴡𐴖𐴡𐴌𐴕𐴡𐴌 𐴀𐴝𐴌 𐴇𐴝𐴑𐴠𐴔𐴡 𐴀𐴝𐴙𐴐𐴧𐴞𐴓𐴢| 𐴌𐴟𐴇𐴥𐴝𐴙𐴚𐴝 𐴏𐴥𐴝𐴌𐴝 𐴁𐴡𐴌𐴔𐴝 𐴔𐴧𐴝𐴎𐴠 𐴂𐴝𐴕𐴄𐴠𐴕 𐴀𐴝𐴌 𐴑𐴝𐴔𐴧𐴠𐴣 𐴔𐴟𐴏𐴡𐴓𐴔𐴝𐴕𐴡𐴌 𐴕𐴡𐴏𐴡𐴓𐴥𐴡 𐴁𐴡𐴐𐴥𐴡𐴃𐴞 𐴒𐴡𐴌𐴠| 𐴌𐴟𐴇𐴥𐴝𐴙𐴚𐴝 𐴎𐴝𐴌𐴃𐴞𐴌 𐴖𐴡𐴌𐴠 𐴑𐴤𐴟𐴓𐴝𐴇𐴝𐴓𐴝 𐴒𐴡𐴌𐴞 𐴈𐴡𐴘𐴧𐴟𐴔𐴢 𐴀𐴝𐴌 𐴃𐴝𐴌𐴝𐴌 𐴏𐴝𐴣𐴀𐴃𐴠 𐴑𐴝𐴔𐴧𐴠𐴣 𐴎𐴝𐴃𐴡𐴌 𐴁𐴝𐴁𐴡𐴃𐴠𐴘𐴥𐴡 𐴎𐴞𐴑𐴞𐴌 𐴀𐴥𐴡𐴘𐴎𐴝𐴘𐴁𐴡| 𐴀𐴝𐴌 𐴉𐴤𐴡𐴘𐴓𐴝 𐴂𐴝𐴄𐴠𐴕 𐴔𐴟𐴏𐴡𐴓𐴔𐴝𐴕𐴡𐴌 𐴔𐴡𐴈𐴃𐴡𐴏𐴡𐴌 𐴒𐴡𐴌𐴞 𐴎𐴞𐴑𐴞𐴌 𐴒𐴡𐴌𐴝𐴎𐴝𐴌| |

𐴂𐴝𐴄𐴠𐴕 𐴔𐴟𐴏𐴡𐴓𐴔𐴝𐴕

𐴉𐴝𐴌𐴏𐴞 𐴔𐴟𐴏𐴡𐴓𐴔𐴝𐴕 𐴀𐴡𐴑𐴧𐴡𐴓𐴠 𐴁𐴟𐴌𐴔𐴝𐴌 𐴀𐴟𐴃𐴧𐴡𐴌 𐴂𐴟𐴑 𐴀𐴝𐴊𐴧𐴠 𐴃𐴝𐴌𐴏𐴝𐴣𐴀𐴃𐴠 𐴁𐴝𐴎𐴝𐴘𐴧𐴝 𐴆𐴞𐴕𐴡𐴌 𐴀𐴠𐴓𐴝𐴑𐴝 𐴘𐴝𐴕𐴝𐴕𐴡𐴃𐴢 𐴸𐴶𐴰 𐴐𐴥𐴡𐴕𐴡𐴃𐴢 𐴀𐴝𐴙𐴐𐴧𐴠𐴊𐴠 𐴀𐴥𐴞𐴕𐴋𐴞𐴓𐴧𐴝 𐴏𐴥𐴟𐴁𐴟𐴃𐴢 𐴀𐴡𐴑𐴧𐴡𐴓𐴢 𐴉𐴦𐴝𐴎𐴝| 𐴘𐴦𐴝𐴕𐴝𐴕𐴡𐴃𐴧𐴞 𐴁𐴟𐴌𐴔𐴝 𐴔𐴧𐴝𐴎𐴠 𐴀𐴞𐴏𐴓𐴔𐴝𐴔𐴢 𐴊𐴝𐴈𐴠𐴓𐴢 𐴀𐴥𐴡𐴘𐴧𐴠𐴊𐴠 𐴘𐴦𐴝𐴕𐴝𐴕𐴡𐴌 𐴒𐴡𐴖𐴡𐴌𐴕𐴡𐴌 𐴐𐴥𐴡𐴔𐴏𐴟 𐴊𐴧𐴞𐴕𐴡𐴌 𐴎𐴡𐴁𐴝𐴕𐴝𐴃𐴢 𐴱𐴲𐴷𐴴–𐴱𐴲𐴷𐴹 𐴐𐴥𐴡𐴕𐴡 𐴔𐴧𐴝𐴎𐴠| 𐴃𐴝𐴌 𐴉𐴟𐴗𐴝 𐴕𐴡𐴏𐴞𐴌𐴟𐴊𐴧𐴞𐴕 𐴁𐴟𐴌𐴔𐴝𐴃𐴢 𐴱𐴲𐴷𐴷–𐴱𐴲𐴷𐴸 𐴐𐴥𐴡𐴕𐴡𐴃𐴢 𐴉𐴦𐴡𐴘𐴓𐴝 𐴇𐴝𐴔𐴓𐴝𐴌 𐴑𐴡𐴔𐴝𐴕𐴋𐴝𐴌 𐴀𐴝𐴙𐴐𐴧𐴞𐴓𐴢| 𐴀𐴠𐴈𐴡𐴕 𐴉𐴡𐴙𐴅𐴧𐴡𐴕𐴃𐴡 𐴁𐴟𐴌𐴔𐴝𐴌 𐴔𐴟𐴏𐴡𐴓𐴔𐴝𐴕𐴡𐴌 𐴎𐴟𐴁𐴝𐴕𐴡𐴃𐴢 (𐴂𐴝𐴃𐴥𐴞) 𐴈𐴦𐴡𐴗𐴝𐴎𐴝| 𐴎𐴞𐴘𐴝𐴕 𐴀𐴝𐴏𐴡𐴓𐴡 𐴔𐴧𐴝𐴎𐴠 𐴓𐴡𐴏𐴎𐴡 “𐴉𐴝𐴌𐴏𐴞“𐴞𐴌 𐴁𐴡𐴊𐴡𐴓𐴞𐴒𐴞𐴘𐴡𐴘𐴊𐴠 𐴏𐴦𐴟𐴌𐴡𐴃𐴢||

𐴁𐴡𐴌𐴔𐴝𐴌 𐴊𐴦𐴡𐴙𐴕 𐴀𐴠𐴓𐴝𐴑𐴝𐴃𐴢 𐴈𐴦𐴝𐴏𐴒𐴡𐴌𐴞 𐴁𐴦𐴡𐴗𐴃𐴢 𐴀𐴝𐴁𐴝𐴊𐴞 𐴀𐴡𐴑𐴧𐴡𐴓𐴢 𐴔𐴟𐴏𐴡𐴓𐴔𐴝𐴕𐴡𐴌 𐴀𐴝𐴙𐴐𐴧𐴞𐴓𐴢 𐴎𐴠𐴒𐴞𐴕𐴡𐴃𐴢 𐴔𐴟𐴏𐴡𐴓𐴔𐴝𐴕𐴡𐴌 𐴒𐴡𐴕𐴃𐴞 𐴁𐴟𐴋𐴧𐴞𐴏𐴢 𐴀𐴡𐴑𐴧𐴡𐴓𐴡𐴃𐴧𐴞 𐴁𐴥𐴝𐴌𐴡 𐴁𐴠𐴙𐴐𐴞 𐴀𐴝𐴙𐴐𐴧𐴞𐴓𐴢| 𐴀𐴠𐴑 𐴃𐴝𐴌𐴞𐴑 𐴔𐴡𐴃𐴝𐴁𐴠𐴑 𐴂𐴝𐴄𐴞𐴕𐴡𐴌 Pathein 𐴐𐴦𐴡𐴀𐴌 𐴀𐴥𐴠 𐴂𐴝𐴃𐴤𐴞 𐴀𐴡𐴑𐴧𐴡𐴓𐴠 𐴀𐴝𐴁𐴝𐴊𐴢 𐴒𐴡𐴙𐴅𐴧𐴠𐴊𐴠 𐴀𐴝𐴌 𐴀𐴠𐴕𐴝𐴔𐴓𐴡𐴘 𐴐𐴦𐴡𐴀𐴌𐴡𐴌 𐴕𐴝𐴔𐴢 𐴀𐴥𐴡𐴘𐴒𐴞𐴘𐴡𐴘| 𐴀𐴠𐴈𐴡𐴕𐴥𐴡 𐴉𐴡𐴙𐴅𐴧𐴡𐴕𐴃𐴡 𐴂𐴝𐴄𐴠𐴕 𐴔𐴟𐴏𐴡𐴓𐴔𐴝𐴕 𐴇𐴝𐴓𐴖𐴝𐴓𐴧𐴝𐴘𐴁𐴡𐴓𐴞 𐴔𐴡𐴐𐴦𐴟𐴌 𐴎𐴠𐴒𐴞𐴕𐴡𐴌𐴠 𐴁𐴟𐴌𐴔𐴝𐴌 𐴊𐴠𐴐𐴥𐴡𐴙𐴃𐴧𐴞 𐴇𐴝𐴕𐴝𐴁𐴡𐴓𐴞 𐴁𐴟𐴎𐴝𐴎𐴝| 𐴐𐴦𐴡𐴀𐴌 𐴘𐴥𐴝𐴕 𐴱𐴳 𐴏𐴡𐴊𐴧𐴞 𐴀𐴞𐴏𐴡𐴗𐴞𐴔𐴧𐴝𐴎𐴠 𐴇𐴞𐴕𐴊𐴟𐴏𐴃𐴝𐴕𐴡𐴌 𐴃𐴞𐴕𐴎𐴡𐴕 𐴔𐴟𐴏𐴡𐴓𐴔𐴝𐴕 𐴌𐴝𐴎𐴝𐴌 𐴇𐴡𐴑𐴟𐴔𐴡𐴃𐴡𐴌 𐴔𐴝𐴃𐴝𐴇𐴝𐴃𐴢 𐴀𐴝𐴙𐴐𐴧𐴞𐴓𐴢||

𐴎𐴠𐴃𐴧𐴡𐴃𐴢 𐴔𐴞𐴋𐴠𐴓𐴢 𐴁𐴟𐴌𐴔𐴝𐴌 𐴔𐴠𐴕𐴋𐴝𐴓𐴝𐴟𐴡𐴌 (Mandalay) 𐴌𐴝𐴎𐴝 𐴔𐴞𐴕𐴋𐴥𐴟𐴕 (Mindon) 𐴕𐴠 𐴆𐴞𐴕𐴝𐴃𐴧𐴞 𐴀𐴝𐴘𐴧𐴡𐴙𐴕𐴧𐴝 𐴇𐴥𐴞𐴘𐴟(𐴵) 𐴔𐴟𐴏𐴡𐴓𐴔𐴝𐴕 𐴔𐴟𐴇𐴝𐴅𐴠𐴌 𐴀𐴡𐴑𐴧𐴡𐴓𐴠 𐴇𐴥𐴞𐴅𐴌𐴡𐴃𐴢 𐴒𐴡𐴌𐴥𐴠 𐴁𐴡𐴌𐴔𐴝𐴃𐴢 𐴀𐴝𐴙𐴐𐴧𐴠 𐴀𐴠𐴃𐴧𐴡𐴃𐴢 𐴃𐴝𐴀𐴛 𐴃𐴝𐴌𐴝𐴌𐴠 𐴀𐴠𐴅𐴝𐴎𐴡𐴃𐴢 𐴊𐴞𐴘𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴃𐴝𐴌𐴝 𐴌𐴝𐴎𐴊𐴝𐴕𐴞 𐴔𐴠𐴋𐴞𐴓𐴞 𐴔𐴧𐴝𐴎𐴠 𐴔𐴡𐴏𐴡𐴙𐴃𐴢 𐴁𐴝𐴕𐴝𐴘𐴉𐴝𐴌𐴞𐴁𐴡| 𐴔𐴠𐴕𐴋𐴞𐴓𐴞𐴌 𐴆𐴞𐴕𐴝 𐴔𐴟𐴏𐴡𐴓𐴔𐴝𐴕 𐴀𐴡𐴑𐴧𐴡𐴓𐴠 𐴕𐴞𐴎𐴡𐴌 𐴀𐴝𐴏𐴡𐴓𐴞 𐴀𐴠𐴓𐴝𐴑𐴝 𐴘𐴝𐴕𐴧𐴝𐴕𐴡𐴌 (Yannan) 𐴌𐴝𐴎𐴝 𐴏𐴟𐴓𐴝𐴘𐴔𐴝𐴕𐴡𐴃𐴧𐴞 𐴔𐴡𐴊𐴡𐴃𐴢 𐴏𐴝𐴘𐴧𐴠| 𐴁𐴝𐴇𐴝𐴌𐴇𐴝𐴓𐴢 𐴱𐴸𐴶𐴸 𐴐𐴥𐴡𐴕𐴡 𐴔𐴧𐴝𐴎𐴠 𐴏𐴟𐴓𐴃𐴝𐴕 𐴏𐴟𐴓𐴝𐴘𐴔𐴝𐴕𐴠 𐴕𐴞𐴎𐴡𐴌 𐴎𐴞𐴔𐴧𐴝𐴊𐴝𐴌𐴞𐴃𐴢 𐴔𐴡𐴏𐴡𐴙𐴃𐴢 𐴘𐴥𐴝𐴕 𐴁𐴠𐴕𐴝𐴒𐴡𐴙𐴅𐴧𐴠 𐴎𐴞𐴘𐴝𐴕 𐴀𐴠𐴈𐴡𐴕 𐴉𐴡𐴙𐴅𐴧𐴡𐴕𐴃𐴡 𐴁𐴝𐴑𐴞𐴀𐴝𐴏𐴠| 𐴀𐴥𐴠 𐴆𐴞𐴕𐴝𐴌 𐴔𐴟𐴏𐴡𐴓𐴔𐴝𐴕𐴡𐴌𐴠 𐴁𐴟𐴌𐴔𐴝 𐴔𐴧𐴝𐴎𐴠 𐴂𐴝𐴕𐴃𐴤𐴞 Panthay 𐴁𐴡𐴓𐴞𐴈𐴦𐴡𐴘 𐴋𐴝𐴑𐴝𐴎𐴝| 𐴎𐴝𐴌𐴝𐴕𐴞𐴑𐴞 𐴁𐴟𐴌𐴝𐴔𐴢 𐴔𐴧𐴝𐴎𐴠 𐴆𐴞𐴕𐴝𐴌 𐴀𐴝𐴁𐴝𐴊𐴞 𐴀𐴡𐴑𐴧𐴡𐴓𐴡𐴌 𐴁𐴥𐴟𐴃𐴡𐴌𐴡𐴃𐴧𐴞 𐴁𐴠𐴙𐴒𐴧𐴞𐴕𐴡𐴃𐴧𐴞 𐴁𐴡𐴌𐴡 𐴕𐴡𐴏𐴡𐴓𐴢 𐴁𐴡𐴓𐴞 𐴐𐴟𐴔𐴝𐴌 𐴒𐴡𐴌𐴝𐴎𐴝|𐴀𐴝𐴌 𐴃𐴝𐴌𐴝 𐴁𐴟𐴌𐴔𐴝𐴌 𐴀𐴟𐴃𐴧𐴡𐴌𐴠 𐴁𐴡𐴐𐴤𐴡𐴃𐴞 𐴒𐴡𐴌𐴠𐴌| 𐴂𐴝𐴕𐴃𐴤𐴞 𐴓𐴡𐴉𐴎𐴡 𐴀𐴞𐴁𐴥𐴝𐴘𐴥𐴡 𐴉𐴝𐴌𐴠𐴏𐴞𐴃𐴧𐴞 𐴁𐴡𐴊𐴡𐴓𐴞 𐴀𐴝𐴙𐴐𐴧𐴠𐴊𐴠 𐴏𐴦𐴟𐴌𐴡𐴃𐴢||

𐴌𐴟𐴇𐴥𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕

𐴌𐴟𐴇𐴥𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴀𐴥𐴡𐴘𐴓𐴊𐴠 𐴇𐴞𐴕𐴊𐴞 𐴀𐴦𐴝𐴌𐴞𐴘𐴝 𐴕𐴡𐴏𐴡𐴓𐴡𐴌 𐴔𐴟𐴏𐴡𐴓𐴔𐴝𐴕 𐴑𐴡𐴗𐴔𐴢 𐴎𐴝𐴌𐴝 𐴁𐴟𐴕𐴞𐴘𐴝𐴊𐴞 𐴃𐴡𐴗𐴌𐴡𐴌 𐴖𐴡𐴌𐴠 𐴁𐴟𐴌𐴔𐴝𐴌 𐴀𐴝𐴌𐴝𐴑𐴝𐴕 𐴀𐴠𐴏𐴄𐴠𐴄𐴡𐴃𐴢 (𐴀𐴠𐴈𐴡𐴕 𐴌𐴝𐴑𐴧𐴝𐴘𐴛) 𐴔𐴧𐴝𐴎𐴠 𐴉𐴟𐴌𐴝𐴕 𐴎𐴡𐴁𐴝𐴕𐴝𐴃𐴧𐴞 𐴁𐴡𐴐𐴤𐴡𐴃𐴞 𐴒𐴡𐴌𐴞𐴀𐴝𐴘𐴧𐴠𐴌 𐴀𐴝𐴌 𐴀𐴝𐴌𐴝𐴑𐴝𐴕 𐴀𐴡𐴘𐴓𐴊𐴠 𐴃𐴝𐴌𐴝 𐴀𐴝𐴏𐴡𐴓𐴞 𐴖𐴡𐴃𐴡𐴕 𐴀𐴝𐴊𐴧𐴠 𐴊𐴠𐴐𐴢| 𐴎𐴡𐴊𐴞𐴘𐴥𐴡 𐴃𐴝𐴌𐴝𐴌 𐴁𐴥𐴟𐴃𐴡𐴌𐴠 𐴀𐴦𐴠𐴕 𐴔𐴟𐴏𐴡𐴓𐴔𐴝𐴕𐴥𐴡 𐴀𐴝𐴏𐴠 𐴎𐴝𐴌𐴝 𐴁𐴞𐴌𐴄𐴞𐴐𐴥𐴡𐴌 𐴑𐴟𐴓𐴟𐴕𐴞𐴘𐴝𐴓𐴢 𐴎𐴡𐴁𐴝𐴕𐴝𐴃𐴢 𐴀𐴠𐴍𐴠 𐴀𐴦𐴝𐴘𐴡𐴌𐴠 𐴀𐴝𐴁𐴝𐴊𐴢 𐴀𐴡𐴘𐴧𐴠| 𐴑𐴞𐴕𐴃𐴟 𐴁𐴟𐴌𐴔𐴝𐴌 𐴇𐴡𐴑𐴟𐴔𐴡𐴃𐴡𐴌 𐴊𐴝𐴁𐴞 𐴀𐴡𐴘𐴓𐴊𐴠 𐴘𐴦𐴝𐴕 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴌𐴟𐴇𐴥𐴝𐴙𐴚𐴒𐴙 𐴀𐴥𐴡𐴑𐴧𐴡𐴓𐴠 𐴁𐴠𐴑𐴝𐴕𐴟𐴕𐴞 𐴁𐴤𐴝𐴉𐴠 𐴱𐴹𐴴𐴸 𐴐𐴥𐴡𐴕𐴡𐴃𐴢 𐴁𐴟𐴌𐴔𐴝𐴌 𐴀𐴝𐴎𐴝𐴊𐴞𐴌 𐴁𐴝𐴊𐴠 𐴀𐴝𐴌𐴕𐴥𐴡𐴘𐴓𐴠 𐴱𐴹𐴷𐴱 𐴐𐴥𐴡𐴕𐴡𐴃𐴢 𐴁𐴝𐴚𐴓𐴝𐴊𐴠𐴐𐴤𐴡𐴌 𐴀𐴝𐴎𐴝𐴊𐴞𐴌 𐴓𐴝𐴌𐴥𐴝𐴘𐴌 𐴁𐴝𐴊𐴠 𐴀𐴠𐴍𐴠 𐴀𐴦𐴝𐴘𐴡𐴌𐴠 𐴀𐴝𐴁𐴝𐴊𐴢 𐴀𐴡𐴘𐴧𐴠𐴊𐴠| 𐴑𐴞𐴕𐴃𐴟 𐴃𐴝𐴌𐴞𐴑𐴡𐴌 𐴇𐴝𐴑𐴞𐴑𐴡𐴃𐴢 𐴀𐴡𐴘𐴓𐴊𐴠 𐴎𐴞𐴕𐴋𐴞𐴓𐴧𐴝 𐴀𐴝𐴀𐴛 𐴁𐴡𐴘𐴝𐴕 𐴒𐴡𐴙𐴅𐴧𐴞| 𐴀𐴝𐴌 𐴏𐴠𐴔𐴧𐴠𐴘𐴥𐴡 𐴘𐴦𐴝𐴕 𐴓𐴡𐴘 𐴃𐴡𐴉𐴏𐴞𐴓𐴞 𐴁𐴡𐴘𐴝𐴕 𐴒𐴡𐴙𐴅𐴧𐴟𐴔𐴢||

𐴀𐴞𐴚𐴌𐴝𐴎𐴞 𐴎𐴟𐴁𐴝𐴕𐴡𐴃𐴢 𐴌𐴟𐴇𐴥𐴝𐴙𐴚𐴒𐴙𐴝 (𐴘𐴥𐴝𐴌𐴟𐴖𐴝𐴙𐴣𐴒𐴝) 𐴕𐴝𐴔𐴠 𐴁𐴠𐴙𐴒𐴧𐴞𐴕𐴡𐴌 𐴀𐴝𐴒𐴠 𐴱𐴷𐴹𐴹 𐴐𐴥𐴡𐴕𐴡𐴃𐴢 𐴁𐴞𐴌𐴄𐴞𐴐𐴡𐴌 𐴀𐴠𐴑 𐴔𐴡𐴗𐴎𐴟𐴔𐴧𐴝𐴎𐴠 𐴀𐴝𐴙𐴐𐴧𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴓𐴡𐴉𐴎𐴡 𐴀𐴞𐴁𐴝 𐴀𐴝𐴌𐴝𐴑𐴝𐴕𐴡𐴌 𐴊𐴠𐴐𐴥𐴡𐴙𐴃𐴧𐴝 𐴔𐴟𐴏𐴡𐴓𐴔𐴝𐴕 𐴀𐴡𐴑𐴧𐴡𐴓𐴠 𐴕𐴞𐴎𐴡𐴓𐴧𐴝𐴘𐴁𐴡𐴓𐴞 𐴀𐴠𐴏𐴃𐴠𐴔𐴝𐴓𐴢 𐴒𐴡𐴙𐴃𐴧𐴡| 𐴌𐴟𐴇𐴥𐴝𐴙𐴚𐴒𐴙𐴝 𐴔𐴦𐴝𐴕𐴞 𐴀𐴡𐴘𐴓𐴊𐴠 𐴌𐴡𐴇𐴝𐴙𐴚𐴘𐴝 𐴀𐴠𐴓𐴝𐴑𐴝𐴃𐴢 𐴃𐴝𐴑𐴡𐴙𐴕𐴧𐴝 𐴔𐴝𐴕𐴥𐴟𐴐𐴢 𐴀𐴦𐴡𐴓𐴢، 𐴀𐴝𐴌 𐴌𐴟𐴇𐴥𐴝𐴚 𐴀𐴡𐴘𐴓𐴊𐴠 𐴀𐴝𐴌𐴝𐴑𐴝𐴕𐴡𐴌 𐴉𐴟𐴌𐴝𐴕𐴝 𐴀𐴞𐴏𐴓𐴝𐴔𐴞 𐴕𐴝𐴔𐴢| 𐴱𐴹𐴹𐴰 𐴐𐴥𐴡𐴕𐴡𐴃𐴢 𐴌𐴟𐴇𐴥𐴝𐴙𐴚𐴒𐴙𐴝𐴌 𐴃𐴝𐴇𐴌𐴞𐴑𐴡𐴌 𐴎𐴡𐴌𐴞𐴘𐴝 𐴓𐴡𐴉𐴎𐴡 𐴀𐴞𐴁𐴥𐴝 𐴁𐴠𐴙𐴐𐴞 𐴔𐴡𐴐𐴦𐴟𐴌 𐴀𐴡𐴘𐴧𐴠| 𐴀𐴝𐴌 𐴲𐴰𐴱𐴲 𐴐𐴥𐴡𐴕𐴡𐴃𐴢 𐴀𐴝𐴌𐴝𐴑𐴝𐴕𐴡𐴃𐴢 𐴉𐴡𐴏𐴝𐴊𐴡𐴌 𐴁𐴝𐴊𐴠 𐴉𐴟𐴌𐴝𐴊𐴟𐴕𐴞𐴘𐴝𐴃𐴢 𐴓𐴡𐴘𐴉𐴎𐴡 𐴀𐴞𐴁𐴥𐴝 𐴀𐴦𐴝𐴔𐴢 𐴀𐴡𐴘𐴒𐴞𐴘𐴡𐴘| 𐴎𐴡𐴊𐴞𐴘𐴥𐴡 𐴀𐴝𐴌𐴝𐴑𐴝𐴕𐴡𐴌 𐴁𐴠𐴙𐴐𐴀𐴥𐴞𐴏𐴧𐴝 𐴔𐴟𐴏𐴡𐴓𐴔𐴝𐴕𐴡𐴌 𐴈𐴝𐴣𐴏𐴠 𐴀𐴠 𐴓𐴡𐴉𐴎𐴡 𐴀𐴡𐴎𐴝𐴕𐴝||

𐴀𐴝𐴁𐴝𐴊𐴞

𐴲𐴰𐴱𐴴 𐴐𐴥𐴡𐴕𐴡𐴌 𐴀𐴝𐴊𐴡𐴔𐴢 𐴐𐴟𐴔𐴝𐴌𐴞𐴌 𐴔𐴡𐴃𐴝𐴁𐴠𐴑 𐴁𐴟𐴌𐴔𐴝𐴌 𐴉𐴟𐴌𐴝 𐴀𐴝𐴁𐴝𐴊𐴞 𐴵 𐴑𐴟𐴄𐴞 𐴱𐴵 𐴓𐴝𐴑𐴤 𐴀𐴝𐴙𐴐𐴧𐴞𐴓𐴢 𐴎𐴠𐴍𐴠𐴌 𐴁𐴥𐴟𐴃𐴡𐴌𐴠 𐴀𐴝𐴑𐴏𐴡𐴌 𐴀𐴡𐴘𐴓𐴊𐴠 (𐴶𐴸 𐴁𐴤𐴝𐴑) 𐴁𐴝𐴔𐴝𐴌 𐴁𐴟𐴋𐴧𐴞𐴏𐴢 𐴑𐴡𐴗𐴔𐴡𐴌 𐴀𐴝𐴙𐴐𐴧𐴞𐴓𐴢| 𐴀𐴠𐴓𐴝𐴑𐴝𐴀𐴞 𐴀𐴝𐴊𐴧𐴠 𐴀𐴠𐴐𐴞𐴘𐴝𐴌 𐴊𐴟𐴏𐴡𐴌𐴝 𐴊𐴠𐴐𐴢 𐴀𐴡𐴑𐴧𐴡𐴓𐴡𐴌 𐴔𐴠𐴏𐴝𐴓𐴡𐴃𐴢 𐴁𐴟𐴌𐴔𐴝𐴌 𐴀𐴝𐴁𐴝𐴊𐴞 𐴒𐴟𐴔𐴝𐴕𐴡𐴃𐴧𐴞 𐴁𐴥𐴝𐴌𐴡 𐴁𐴠𐴙𐴐𐴞 𐴈𐴡𐴔𐴢| 𐴎𐴝𐴌 𐴀𐴠𐴑𐴧𐴝𐴕 𐴁𐴡𐴌𐴡 𐴖𐴡𐴅𐴥𐴝 𐴀𐴡𐴘𐴓𐴊𐴠 𐴁𐴟𐴋𐴧𐴞𐴏𐴢 𐴊𐴤𐴡𐴌𐴔𐴡𐴌 𐴌𐴟𐴇𐴁𐴝𐴕𐴞𐴘𐴡𐴃𐴡𐴌 𐴀𐴠𐴑𐴧𐴝𐴕 𐴀𐴝𐴑𐴞𐴊𐴤𐴝– 𐴁𐴞𐴏𐴧𐴝𐴐𐴢|𐴎𐴞𐴘𐴝𐴕 𐴀𐴡𐴘𐴓𐴊𐴠 𐴊𐴟𐴕𐴞𐴘𐴝𐴌 𐴃𐴝𐴔𐴦𐴝𐴔𐴢 𐴐𐴟𐴒𐴟𐴓𐴡𐴃𐴧𐴞 𐴀𐴝𐴓𐴡𐴒 𐴀𐴥𐴡𐴘 𐴈𐴡𐴕𐴥𐴡 𐴎𐴡𐴣𐴓𐴡𐴃𐴢 𐴘𐴥𐴝 𐴉𐴦𐴝𐴀𐴌𐴡𐴃𐴢 𐴎𐴞𐴕𐴊𐴞𐴒𐴞 𐴒𐴟𐴎𐴝𐴌𐴡𐴕، 𐴊𐴟𐴕𐴞𐴘𐴝 𐴀𐴝𐴌𐴝𐴔𐴡𐴌𐴠 𐴏𐴥𐴝𐴌𐴞𐴊𐴡𐴕 𐴀𐴝𐴌 𐴁𐴞𐴘𐴝𐴐𐴤𐴝𐴊𐴞 𐴒𐴡𐴌𐴡𐴕𐴡𐴃𐴧𐴞 𐴊𐴟𐴌𐴠 𐴃𐴝𐴑𐴡𐴕| 𐴀𐴝𐴌 𐴁𐴠𐴘𐴝 𐴐𐴝𐴊𐴞 𐴕𐴡 𐴒𐴡𐴌𐴡𐴕𐴡𐴌𐴠 𐴃𐴝𐴌𐴝 𐴌𐴟𐴇𐴝𐴕𐴞 𐴃𐴡𐴌𐴑𐴥𐴞𐴓𐴧𐴝𐴘 𐴓𐴦𐴝𐴎𐴠𐴔𐴢 𐴁𐴡𐴓𐴞 𐴁𐴟𐴎𐴠||

𐴁𐴡𐴌𐴔𐴞𐴏𐴢 𐴇𐴡𐴑𐴟𐴔𐴡𐴃𐴠 𐴔𐴝𐴕𐴞𐴓𐴡𐴘𐴧𐴠𐴊𐴠 𐴑𐴞 𐴁𐴡𐴓𐴞 𐴈𐴡𐴘𐴓𐴠 𐴁𐴡𐴌𐴔𐴝𐴃𐴢 𐴱𐴳𐴵 𐴔𐴟𐴈𐴃𐴡𐴓𐴞𐴉𐴢 𐴕𐴡𐴏𐴡𐴓𐴢 𐴁𐴡𐴐𐴥𐴡𐴃𐴞 𐴒𐴡𐴌𐴠𐴌 𐴑𐴞𐴕𐴃𐴟 𐴑𐴞𐴕𐴃𐴟 𐴀𐴠𐴒𐴞𐴕𐴡𐴌 𐴁𐴟𐴃𐴥𐴡𐴌𐴠 𐴌𐴡𐴇𐴝𐴙𐴚𐴒𐴙𐴝 𐴀𐴡𐴑𐴧𐴡𐴓𐴢 𐴐𐴝𐴔𐴠𐴓𐴢 𐴕𐴝𐴘| 𐴎𐴝𐴌𐴝𐴌 𐴀𐴝𐴁𐴝𐴊𐴞 𐴁𐴟𐴌𐴔𐴝𐴌 𐴁𐴥𐴟𐴃𐴡𐴌𐴠 𐴲𐴰𐴱𐴷 𐴐𐴥𐴡𐴕𐴡𐴌 𐴀𐴝𐴒𐴠 𐴱𐴳𐴓𐴝𐴑𐴤 𐴀𐴝𐴙𐴐𐴧𐴞𐴓𐴢 𐴀𐴝𐴌 𐴁𐴟𐴌𐴔𐴝𐴌 𐴁𐴦𐴝𐴘𐴌𐴠 𐴱𐴰 𐴓𐴝𐴑𐴤 𐴀𐴝𐴙𐴐𐴧𐴞𐴓𐴢| 𐴀𐴥𐴠 𐴱𐴰 𐴓𐴝𐴑𐴤𐴡𐴌 𐴁𐴥𐴟𐴃𐴡𐴌𐴠 𐴁𐴠𐴙𐴐𐴢 𐴀𐴥𐴞𐴏𐴧𐴝 𐴔𐴝𐴙𐴕𐴐𐴥𐴡𐴌𐴠 𐴁𐴡𐴌𐴔𐴞 𐴇𐴡𐴑𐴟𐴔𐴡𐴃𐴠 𐴊𐴠𐴐𐴥𐴡𐴃𐴧𐴞 𐴁𐴦𐴝𐴘𐴌 𐴀𐴦𐴡𐴕𐴡𐴌 𐴖𐴡𐴌𐴠 𐴔𐴡𐴅𐴁𐴟𐴌 𐴒𐴡𐴙𐴅𐴧𐴠 𐴀𐴝𐴌 𐴇𐴡𐴑𐴟𐴔𐴡𐴃𐴡𐴌 𐴔𐴟𐴏𐴃𐴡𐴑𐴞𐴓𐴢 𐴏𐴤𐴞𐴘𐴝𐴏𐴡𐴃𐴢 𐴀𐴝𐴙𐴐𐴧𐴞𐴓𐴊𐴠 𐴑𐴞𐴁𐴡𐴓𐴞 𐴈𐴡𐴘𐴓𐴠 𐴃𐴝𐴌𐴝𐴌 𐴎𐴝𐴒𐴝𐴃𐴢 𐴁𐴝𐴔𐴝𐴌 𐴑𐴡𐴗𐴔𐴡𐴌𐴠 𐴀𐴝𐴁𐴝𐴊𐴢 𐴒𐴡𐴌𐴞𐴁𐴡| 𐴉𐴟𐴌𐴝 𐴁𐴟𐴌𐴔𐴝𐴌 𐴔𐴞𐴑𐴧𐴝 𐴏𐴝𐴘𐴓𐴠 𐴊𐴠𐴈𐴝𐴎𐴝 𐴃𐴡𐴈𐴡𐴕 𐴃𐴡𐴑𐴌𐴞𐴁𐴝𐴕 𐴲.𐴵 𐴁𐴤𐴝𐴑 𐴀𐴝𐴌 𐴎𐴡𐴊𐴞 𐴁𐴟𐴌𐴔𐴝𐴌 𐴁𐴦𐴝𐴘𐴌𐴡𐴌 𐴌𐴥𐴠𐴉𐴟𐴎𐴞 𐴀𐴡𐴑𐴧𐴡𐴓𐴥𐴡 𐴔𐴞𐴓𐴝𐴘𐴓𐴠 𐴃𐴡𐴈𐴡𐴕 𐴴 𐴁𐴤𐴝𐴑𐴡𐴃𐴧𐴞 𐴑𐴞𐴏𐴧𐴟 𐴁𐴠𐴙𐴐𐴞 𐴀𐴥𐴡||

𐴌𐴟𐴇𐴥𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴏𐴞𐴌𐴞𐴉𐴢 𐴀𐴝𐴌𐴑𐴝𐴕 𐴀𐴠𐴏𐴄𐴠𐴄𐴡𐴌 𐴀𐴟𐴃𐴧𐴡𐴌𐴠 𐴁𐴡𐴐𐴥𐴡𐴃𐴞 𐴒𐴡𐴌𐴞 𐴎𐴝𐴌 𐴉𐴟𐴌𐴝 𐴀𐴝𐴁𐴝𐴊𐴞 𐴃𐴡𐴑𐴌𐴞𐴁𐴝𐴕 𐴳𐴲 𐴓𐴝𐴑𐴤| 𐴁𐴟𐴌𐴔𐴝𐴃𐴢 𐴀𐴝𐴌𐴑𐴝𐴕𐴞 𐴕𐴡𐴏𐴡𐴓𐴡𐴌 𐴁𐴟𐴋𐴧𐴞𐴏𐴢 𐴏𐴞𐴌𐴞𐴉𐴢 𐴴 𐴁𐴤𐴝𐴑 𐴎𐴝𐴌𐴝𐴌𐴠 𐴌𐴝𐴑𐴝𐴛 𐴘𐴥𐴡 𐴈𐴡𐴗𐴎𐴝| 𐴀𐴝𐴌 𐴀𐴠𐴕𐴝𐴔𐴢 𐴘𐴦𐴝𐴕 𐴀𐴠𐴈𐴡𐴕 𐴀𐴝𐴌𐴝𐴑𐴕𐴡𐴌 𐴕𐴡𐴘𐴧𐴝𐴕𐴝𐴔𐴢(𐴶)| 𐴀𐴞𐴕𐴋𐴞𐴘𐴝 𐴔𐴧𐴝𐴎𐴠 𐴃𐴝𐴑𐴡𐴘𐴝 𐴌𐴝𐴑𐴝𐴛 𐴕𐴡𐴏𐴡𐴓𐴡𐴌 𐴔𐴝𐴙𐴕𐴐𐴥𐴡𐴌𐴠 𐴀𐴦𐴝𐴔𐴢 𐴁𐴤𐴝𐴉𐴠 𐴔𐴡𐴑 𐴀𐴝𐴌 𐴔𐴝𐴒 𐴈𐴡𐴗𐴝𐴎𐴝 𐴀𐴝𐴌 𐴌𐴟𐴇𐴥𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴀𐴡𐴑𐴧𐴡𐴓𐴠𐴘𐴥𐴡 𐴃𐴝𐴌𐴝𐴌𐴠 𐴀𐴥𐴠𐴕𐴝𐴔𐴡𐴃𐴢 𐴋𐴝𐴑𐴠| 𐴀𐴝𐴌𐴝𐴑𐴝𐴕𐴡𐴌 𐴴𐴰 𐴁𐴤𐴝𐴑 𐴀𐴥𐴡𐴘𐴓𐴊𐴠 𐴌𐴟𐴇𐴥𐴝𐴙𐴚𐴒𐴙𐴝| 𐴀𐴝𐴌 𐴎𐴡𐴊𐴞 𐴁𐴦𐴝𐴘𐴌𐴡𐴌 𐴌𐴥𐴠𐴉𐴟𐴎𐴞 𐴀𐴡𐴑𐴧𐴡𐴓𐴡 𐴊𐴤𐴡𐴌𐴝𐴎𐴝 𐴃𐴡𐴘𐴓𐴠 𐴶𐴰 𐴀𐴥𐴞𐴏𐴧𐴝 𐴀𐴡𐴘𐴁𐴡| 𐴘𐴦𐴝𐴕𐴞 𐴃𐴝𐴌𐴝𐴀𐴡𐴘𐴓𐴊𐴠 𐴀𐴝𐴌𐴑𐴝𐴕 𐴀𐴠𐴏𐴄𐴞𐴄𐴡𐴌 𐴀𐴝𐴑𐴏𐴡𐴌𐴞𐴘𐴡𐴃𐴢 𐴀𐴡𐴓𐴝 𐴑𐴡𐴗𐴔𐴢 𐴀𐴝𐴌 𐴀𐴠𐴀𐴥𐴞𐴏𐴝𐴉𐴠 𐴀𐴠𐴏𐴄𐴠𐴄𐴡𐴌 𐴕𐴝𐴔𐴢 𐴌𐴟𐴇𐴥𐴝𐴙𐴚𐴒𐴙𐴝 𐴀𐴦𐴡𐴕𐴀𐴝𐴙𐴐𐴧𐴞𐴓𐴢||

𐴇𐴡𐴑𐴟𐴔𐴡𐴃𐴡𐴌 𐴒𐴡𐴕𐴃𐴞𐴌 𐴔𐴡𐴃𐴝𐴁𐴠𐴑 𐴁𐴟𐴌𐴔𐴝𐴃𐴢 𐴔𐴟𐴏𐴡𐴓𐴔𐴝𐴕 𐴁𐴠𐴙𐴒𐴧𐴞𐴕 𐴔𐴞𐴓𐴝𐴘 𐴴 𐴁𐴤𐴝𐴑𐴡𐴃𐴧𐴞 𐴑𐴞𐴏𐴧𐴟 𐴁𐴠𐴙𐴐𐴞| 𐴑𐴞𐴕𐴃𐴟 𐴎𐴡𐴈𐴡𐴕 𐴇𐴡𐴑𐴟𐴔𐴡𐴃𐴠 𐴌𐴟𐴇𐴥𐴝𐴙𐴚𐴒𐴙𐴝 𐴀𐴡𐴑𐴧𐴡𐴓𐴡𐴌𐴠 𐴊𐴠𐴐𐴥𐴡𐴙𐴃𐴧𐴝 𐴕𐴡𐴔𐴝𐴕𐴠 𐴀𐴠𐴈𐴡𐴃𐴝𐴓𐴧𐴝 𐴀𐴥𐴠𐴍𐴠 𐴌𐴟𐴇𐴥𐴝𐴙𐴚𐴒𐴙𐴝 𐴀𐴦𐴡𐴓𐴡𐴌 𐴒𐴡𐴕𐴃𐴞 𐴐𐴝𐴔𐴠𐴓𐴢 𐴕𐴥𐴝𐴘| 𐴎𐴡𐴊𐴞 𐴌𐴟𐴇𐴥𐴝𐴙𐴚𐴝 𐴀𐴡𐴑𐴧𐴡𐴓𐴡𐴌𐴠𐴘𐴥𐴡 𐴐𐴝𐴔𐴠𐴓𐴢 𐴒𐴡𐴙𐴃𐴧𐴡 𐴃𐴡𐴘𐴓𐴠 𐴃𐴡𐴑𐴌𐴞𐴁𐴝𐴕 𐴸 𐴁𐴤𐴝𐴑 𐴀𐴡𐴘𐴃𐴡| 𐴊𐴞𐴏𐴡𐴔𐴁𐴡𐴌 𐴲𐴰𐴱𐴷 𐴐𐴥𐴡𐴕𐴡𐴃𐴢 𐴘𐴟𐴀𐴠𐴕𐴡𐴌 𐴀𐴠𐴑 𐴌𐴠𐴉𐴟𐴄𐴡𐴃𐴢 𐴓𐴞𐴙𐴑𐴧𐴠𐴊𐴠 𐴔𐴡𐴃𐴝𐴁𐴠𐴑 𐴉𐴟𐴌𐴝 𐴊𐴟𐴕𐴞𐴘𐴝𐴃𐴢 𐴊𐴠𐴐𐴢 𐴏𐴥𐴝𐴌𐴝 𐴉𐴡𐴃𐴧𐴞 𐴷 𐴎𐴡𐴕𐴡𐴌 𐴁𐴥𐴟𐴌𐴡𐴃𐴠 𐴀𐴠𐴑𐴎𐴡𐴕 𐴌𐴟𐴇𐴥𐴝𐴙𐴚𐴝||

𐴌𐴟𐴇𐴥𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴝𐴑𐴏𐴡𐴌 𐴌𐴥𐴠𐴉𐴟𐴎𐴞 𐴁𐴝𐴚𐴓𐴝𐴊𐴠𐴐𐴥𐴡𐴃𐴢 𐴑𐴞𐴕𐴃𐴟 𐴃𐴡𐴑𐴌𐴞𐴁𐴝𐴕 𐴴 𐴓𐴝𐴑𐴤 𐴏𐴡𐴀𐴊𐴞 𐴀𐴝𐴌𐴡𐴁𐴡𐴃𐴢، 𐴲 𐴓𐴝𐴑𐴤𐴡𐴌 𐴑𐴡𐴌𐴞𐴁𐴢 𐴉𐴝𐴑𐴞𐴏𐴃𐴝𐴕𐴡𐴃𐴢 𐴀𐴝𐴌 𐴀𐴠𐴑 𐴓𐴝𐴑𐴤 𐴄𐴝𐴘𐴓𐴠𐴣𐴋𐴡𐴃𐴢 𐴌𐴠𐴉𐴟𐴎𐴞 𐴁𐴡𐴕𐴞 𐴀𐴝𐴏𐴠| 𐴀𐴠𐴒𐴞𐴕 𐴁𐴝𐴊𐴠𐴘𐴥𐴡 𐴑𐴞𐴏𐴧𐴟 𐴔𐴝𐴓𐴞𐴐𐴥𐴞𐴘𐴝𐴃𐴢، 𐴀𐴞𐴕𐴋𐴞𐴘𐴝𐴃𐴢، 𐴀𐴞𐴕𐴋𐴟𐴕𐴞𐴐𐴥𐴞𐴘𐴝𐴃𐴢 𐴀𐴝𐴌 𐴕𐴠𐴂𐴝𐴓𐴡 𐴔𐴧𐴝𐴎𐴠 𐴁𐴡𐴐𐴥𐴡𐴃𐴞 𐴒𐴡𐴌𐴠𐴌| 𐴉𐴝𐴑𐴞𐴏𐴃𐴝𐴕𐴡𐴃𐴢 𐴀𐴝𐴏𐴠𐴊𐴠 𐴌𐴟𐴇𐴥𐴝𐴙𐴚𐴒𐴙𐴝 𐴀𐴡𐴑𐴧𐴡𐴓𐴢 𐴁𐴡𐴌𐴔𐴞 𐴁𐴡𐴓𐴞𐴈𐴦𐴡𐴘 𐴔𐴡𐴐𐴦𐴟𐴌 𐴀𐴝𐴌 𐴁𐴠𐴙𐴒𐴧𐴞𐴕 𐴑𐴡𐴌𐴝𐴆𐴞، 𐴕𐴝𐴒𐴞، 𐴑𐴡𐴌𐴡𐴚𐴞 𐴀𐴝𐴌 𐴓𐴝𐴕𐴋𐴤𐴞 𐴀𐴠𐴓𐴝𐴑𐴝 𐴀𐴡𐴑𐴧𐴡𐴓𐴡𐴃𐴢 𐴁𐴡𐴐𐴥𐴡𐴃𐴞 𐴒𐴡𐴌𐴠𐴌||

𐴀𐴠𐴑 𐴓𐴝𐴑𐴤𐴡𐴃𐴧𐴞 𐴁𐴠𐴙𐴐𐴞 𐴌𐴟𐴇𐴥𐴝𐴙𐴚𐴒𐴙𐴝 𐴁𐴟𐴌𐴔𐴝𐴌 𐴁𐴥𐴟𐴃𐴡𐴌𐴡𐴌 𐴑𐴠𐴀𐴔𐴡𐴔𐴧𐴝𐴎𐴠 𐴀𐴝𐴘 𐴋𐴞 𐴂𐴞 (internally displaced persons 𐴔𐴦𐴝𐴕𐴞 𐴀𐴡𐴘𐴓𐴊𐴠 𐴊𐴠𐴐𐴥𐴡𐴌 𐴁𐴥𐴟𐴃𐴡𐴌𐴠 𐴒𐴤𐴡𐴌𐴏𐴥𐴝𐴌𐴝 𐴌𐴥𐴞𐴉𐴟𐴎𐴞) 𐴀𐴞𐴏𐴝𐴉𐴥𐴠 𐴒𐴤𐴠𐴌𐴒𐴟𐴗𐴝𐴓𐴡𐴃𐴢 𐴀𐴝𐴏𐴠 𐴎𐴞𐴕𐴃𐴞 𐴀𐴠𐴅𐴝𐴎𐴡𐴃𐴢 𐴏𐴥𐴝𐴌𐴝 𐴕𐴞𐴙𐴓𐴞 𐴕𐴡𐴉𐴝𐴌𐴠||

𐴀𐴞𐴌𐴞𐴘𐴝

𐴁𐴟𐴌𐴔𐴝 𐴊𐴟𐴕𐴞𐴘𐴝𐴌 𐴴𐴰 𐴀𐴡𐴔𐴢 𐴁𐴡𐴌𐴡𐴊𐴠𐴐𐴢| 𐴃𐴝𐴌 𐴀𐴞𐴌𐴘𐴝 𐴀𐴡𐴘𐴓𐴊𐴠 𐴂𐴝𐴑𐴞𐴏𐴃𐴝𐴕𐴡𐴌 𐴏𐴝𐴙𐴌 𐴁𐴤𐴝𐴑𐴡𐴌 𐴃𐴞𐴕 𐴁𐴤𐴝𐴑 𐴀𐴝𐴌 𐴁𐴝𐴚𐴓𐴝𐴊𐴠𐴐𐴥𐴡𐴌 𐴵 𐴒𐴟𐴕𐴝 𐴁𐴡𐴌𐴡| 𐴁𐴟𐴌𐴔𐴝𐴌 𐴉𐴟𐴑𐴡𐴌 𐴁𐴦𐴡𐴗𐴋𐴝𐴌 𐴊𐴦𐴡𐴙𐴕𐴡𐴃𐴧𐴞 𐴀𐴟𐴃𐴧𐴡𐴌 𐴔𐴞𐴑𐴧𐴝 𐴄𐴝𐴘𐴓𐴠𐴣𐴋، 𐴓𐴝𐴖𐴟𐴏𐴢 𐴀𐴝𐴌 𐴆𐴞𐴕𐴝𐴌 𐴏𐴝𐴣𐴀𐴃𐴠 𐴔𐴞𐴓𐴝𐴘𐴧𐴝| 𐴀𐴝𐴌 𐴉𐴡𐴏𐴞𐴔𐴡𐴌 𐴁𐴦𐴡𐴗𐴋𐴝𐴌𐴡𐴃𐴢 𐴀𐴟𐴃𐴧𐴡𐴌𐴡𐴃𐴧𐴞 𐴊𐴦𐴡𐴙𐴕 𐴔𐴞𐴑𐴧𐴝 𐴁𐴤𐴝𐴌𐴡𐴃𐴢 𐴀𐴝𐴌 𐴁𐴝𐴚𐴓𐴝𐴊𐴠𐴐𐴢| 𐴁𐴟𐴌𐴔𐴝𐴌 𐴌𐴝𐴎𐴊𐴤𐴝𐴕𐴞 𐴀𐴡𐴘𐴓𐴊𐴠 𐴕𐴠𐴂𐴠𐴋𐴡 𐴀𐴝𐴌 𐴁𐴡𐴌𐴡 𐴐𐴦𐴡𐴀𐴌 𐴀𐴡𐴘𐴓𐴊𐴠 𐴘𐴠𐴚𐴒𐴟𐴕 𐴎𐴞𐴁𐴥𐴝𐴌 𐴀𐴝𐴒𐴡𐴌 𐴕𐴝𐴔𐴢 𐴀𐴝𐴙𐴐𐴧𐴞𐴓𐴢 𐴌𐴠𐴕𐴒𐴟𐴕||

𐴔𐴞𐴙𐴝𐴕𐴔𐴝𐴌 𐴷 𐴀𐴠𐴐𐴄𐴠𐴄𐴢 𐴀𐴝𐴌 𐴷 𐴄𐴥𐴝𐴚𐴡𐴃𐴢 𐴃𐴡𐴑𐴏𐴞𐴔𐴢 𐴒𐴡𐴙𐴅𐴧𐴝| 𐴄𐴥𐴝𐴚 𐴀𐴡𐴑𐴧𐴡𐴓𐴡𐴃𐴢 𐴀𐴝𐴑𐴏𐴡𐴌𐴞𐴘𐴡𐴃𐴢 𐴁𐴝𐴔𐴝𐴌 𐴀𐴦𐴡𐴓𐴡𐴌| 𐴑𐴞𐴕𐴃𐴟 𐴂𐴌𐴠𐴕𐴞 𐴀𐴡𐴑𐴧𐴡𐴓𐴡𐴔𐴧𐴝𐴎𐴠 𐴈𐴡𐴕𐴈𐴦𐴝𐴏𐴢 𐴀𐴠𐴑 𐴈𐴡𐴔𐴀𐴝𐴁𐴝𐴊𐴞𐴌 𐴀𐴝𐴑𐴏𐴡𐴌𐴞𐴘𐴡𐴃𐴢| 𐴀𐴠𐴐𐴄𐴠𐴄𐴢 𐴀𐴥𐴡𐴑𐴧𐴡𐴓𐴢 𐴀𐴡𐴘𐴓𐴊𐴠 𐴆𐴥𐴡𐴚، 𐴑𐴝𐴘𐴧𐴝، 𐴑𐴝𐴆𐴠𐴚، 𐴀𐴝𐴌𐴑𐴝𐴕، 𐴑𐴝𐴌𐴠𐴕، 𐴔𐴟𐴗𐴠𐴣، 𐴆𐴥𐴠𐴣| 𐴀𐴝𐴌 𐴀𐴠𐴒𐴞𐴕 𐴁𐴠𐴙𐴒𐴧𐴞𐴕 𐴀𐴡𐴘𐴓𐴊𐴠 𐴈𐴡𐴕𐴡 𐴈𐴡𐴔𐴐𐴤𐴡𐴚𐴑𐴝 𐴕𐴡𐴏𐴡𐴓𐴡𐴌 𐴕𐴝𐴔𐴥𐴡| 𐴄𐴥𐴝𐴛 𐴀𐴡𐴑𐴧𐴡𐴓𐴢 𐴀𐴡𐴘𐴓𐴊𐴠 𐴔𐴝𐴕𐴋𐴞𐴓𐴠، 𐴔𐴡𐴒𐴟𐴗𐴠، 𐴀𐴞𐴌𐴝𐴖𐴡𐴋𐴧𐴞، 𐴌𐴠𐴚𐴒𐴟𐴕، 𐴄𐴝𐴕𐴡𐴎𐴝𐴌𐴞، 𐴏𐴠𐴒𐴝𐴙𐴚||

𐴀𐴝𐴌𐴝𐴑𐴝𐴕 𐴀𐴠𐴏𐴄𐴠𐴄𐴡𐴌 𐴱𐴵 𐴖𐴝𐴕 𐴎𐴞𐴓𐴝𐴌 𐴁𐴥𐴟𐴃𐴡𐴌𐴠 𐴏𐴞𐴌𐴞𐴉𐴢 𐴀𐴟𐴃𐴧𐴡𐴌𐴡𐴌 𐴏𐴥𐴞𐴃𐴧𐴟𐴗𐴠 (Sittwe) 𐴎𐴞𐴓𐴝, 𐴎𐴞𐴁𐴥𐴝𐴌 𐴀𐴝𐴒𐴡𐴌 𐴕𐴝𐴔𐴢 𐴀𐴝𐴙𐴐𐴧𐴞𐴓𐴢 𐴀𐴝𐴑𐴘𐴝𐴁𐴢 𐴀𐴠 𐴎𐴞𐴓𐴝𐴔𐴧𐴝𐴎𐴠 𐴀𐴝𐴑𐴏𐴡𐴌𐴞𐴘𐴡𐴃𐴢 𐴌𐴟𐴇𐴥𐴝𐴙𐴚𐴒𐴙𐴝 𐴁𐴡𐴐𐴥𐴡𐴃𐴞 𐴒𐴡𐴌𐴠| 𐴏𐴥𐴞𐴃𐴧𐴟𐴗𐴠 𐴐𐴦𐴡𐴀𐴌𐴧𐴝𐴕 𐴀𐴡𐴘𐴓𐴊𐴠 𐴀𐴝𐴌𐴝𐴑𐴝𐴕𐴡𐴌 𐴌𐴝𐴎𐴊𐴝𐴕𐴞| 𐴀𐴝𐴑𐴏𐴥𐴡𐴌 𐴒𐴟𐴓𐴞 𐴔𐴝𐴌𐴝𐴔𐴝𐴌𐴞 𐴔𐴡𐴚𐴋𐴟 (Maungdaw) 𐴎𐴞𐴓𐴝𐴃𐴢 𐴖𐴦𐴝𐴃𐴧𐴝𐴑𐴠 𐴎𐴞𐴘𐴝𐴕 𐴁𐴝𐴚𐴓𐴝𐴊𐴠𐴐𐴥𐴡𐴌 𐴁𐴡𐴗𐴋𐴝𐴌𐴡𐴌 𐴏𐴝𐴙𐴃𐴠 𐴁𐴝𐴎𐴝𐴘𐴧𐴝||

𐴔𐴡𐴎𐴇𐴝𐴁𐴢–𐴊𐴤𐴡𐴌𐴔𐴡

𐴁𐴡𐴌𐴔𐴝𐴌 𐴸𐴸 𐴁𐴤𐴝𐴑 𐴁𐴟𐴋𐴧𐴞𐴏𐴡𐴌 𐴁𐴡𐴐𐴥𐴡𐴃𐴞، 𐴶 𐴁𐴤𐴝𐴑 𐴀𐴦𐴞𐴏𐴝𐴘𐴞، 𐴃𐴠𐴑𐴌𐴞𐴁𐴝𐴕 𐴴 𐴁𐴤𐴝𐴑 𐴔𐴟𐴏𐴡𐴓𐴔𐴝𐴕 𐴀𐴝𐴌 𐴀𐴠𐴑 𐴁𐴤𐴝𐴑𐴡𐴃𐴧𐴞 𐴈𐴡𐴔𐴢 𐴀𐴡𐴘𐴓𐴊𐴠 𐴇𐴞𐴕𐴊𐴟| 𐴁𐴝𐴑𐴞𐴒𐴞𐴕 𐴊𐴟𐴏𐴡𐴌𐴝 𐴊𐴤𐴡𐴌𐴔𐴡 𐴔𐴝𐴕𐴡𐴘𐴝 𐴀𐴡𐴑𐴧𐴡𐴓𐴢| 𐴌𐴟𐴇𐴥𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴁𐴠𐴙𐴒𐴧𐴞𐴕 𐴀𐴡𐴘𐴓𐴊𐴠 𐴏𐴟𐴕𐴧𐴞 𐴀𐴝𐴌 𐴃𐴝𐴌𐴝𐴌 𐴁𐴠𐴙𐴐𐴢 𐴀𐴥𐴞𐴏𐴧𐴝 𐴒𐴠𐴌𐴝𐴔𐴡𐴃𐴢 𐴔𐴡𐴏𐴞𐴃𐴢 𐴀𐴝𐴌 𐴔𐴡𐴊𐴡𐴌𐴡𐴏𐴝 𐴀𐴡𐴑𐴧𐴡𐴓𐴢 𐴀𐴝𐴏𐴠||

𐴎𐴟𐴁𐴝𐴕–𐴁𐴤𐴝𐴐𐴝

𐴁𐴡𐴌𐴔𐴞𐴏𐴢 𐴀𐴡𐴘𐴓𐴊𐴠 𐴁𐴟𐴌𐴔𐴝𐴌 𐴉𐴞𐴐𐴞𐴘𐴝𐴓𐴢 𐴁𐴤𐴝𐴐𐴝 𐴎𐴞𐴁𐴝 𐴀𐴡𐴏𐴡𐴓𐴡𐴃𐴢 𐴁𐴝𐴔𐴝𐴌 𐴑𐴡𐴗𐴔𐴡𐴌 𐴎𐴟𐴁𐴝𐴕 𐴀𐴝𐴌 𐴆𐴞𐴕𐴝𐴌 𐴃𐴞𐴁𐴡𐴃𐴧𐴞 𐴀𐴦𐴡𐴓𐴡𐴌 𐴎𐴟𐴁𐴝𐴕𐴡𐴃𐴧𐴠 𐴀𐴠𐴑𐴧𐴝𐴕 𐴀𐴡𐴘𐴓𐴊𐴠 𐴀𐴠 𐴁𐴡𐴌𐴔𐴞𐴏𐴢 𐴎𐴟𐴁𐴝𐴕| 𐴂𐴝𐴑𐴞𐴏𐴃𐴝𐴕𐴡𐴌 𐴌𐴟𐴇𐴥𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕𐴡𐴌𐴠 𐴁𐴟𐴌𐴔𐴞 𐴈𐴡𐴗𐴝𐴎𐴝 𐴀𐴠𐴃𐴡𐴓𐴧𐴝 𐴃𐴝𐴌𐴝𐴌 𐴁𐴤𐴝𐴐𐴝𐴌𐴠𐴘𐴥𐴡 𐴁𐴟𐴌𐴔𐴞 𐴁𐴡𐴓𐴞 𐴈𐴡𐴖𐴝𐴎𐴝 𐴑𐴞𐴕𐴃𐴟 𐴀𐴠 𐴔𐴟𐴏𐴡𐴓𐴔𐴝𐴕 𐴒𐴞𐴕 𐴁𐴟𐴌𐴔𐴞 𐴕𐴡𐴏𐴡𐴓𐴡𐴃𐴧𐴞𐴘𐴥𐴡 𐴕𐴡𐴀𐴡 𐴀𐴝𐴌 𐴃𐴝𐴌𐴝𐴌 𐴎𐴟𐴁𐴝𐴕𐴡 𐴁𐴟𐴌𐴔𐴞𐴏𐴢 𐴎𐴟𐴁𐴝𐴕 𐴕𐴡𐴀𐴡| 𐴁𐴤𐴡𐴓𐴑𐴠 𐴁𐴠𐴙𐴐𐴢 𐴀𐴥𐴞𐴏𐴧𐴝 𐴌𐴟𐴇𐴥𐴝𐴙𐴚𐴝 𐴀𐴡𐴑𐴧𐴡𐴓𐴡𐴃𐴧𐴞 𐴁𐴟𐴌𐴔𐴞𐴏𐴢 𐴁𐴤𐴝𐴐𐴢 𐴕𐴡𐴀𐴝𐴘𐴧𐴠| 𐴁𐴡𐴓𐴑𐴠 𐴌𐴟𐴇𐴥𐴝𐴚𐴒𐴙𐴝 𐴀𐴦𐴡𐴓𐴡𐴌 𐴎𐴟𐴁𐴝𐴕𐴡𐴌𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝 𐴁𐴡𐴓𐴞 𐴈𐴡𐴗𐴝𐴎𐴝 𐴎𐴞𐴁𐴝 𐴁𐴝𐴚𐴓𐴝𐴊𐴠𐴐𐴡𐴌 𐴆𐴞𐴄𐴝𐴒𐴡𐴚𐴡𐴌 𐴎𐴟𐴁𐴝𐴕𐴡𐴌 𐴏𐴝𐴣𐴀𐴃𐴠 𐴔𐴞𐴓𐴝𐴘𐴧𐴝 𐴎𐴟𐴓𐴝𐴘𐴧𐴝| 𐴀𐴝𐴌 𐴁𐴝𐴚𐴝𐴓𐴞 𐴀𐴠𐴓𐴝𐴑𐴝𐴀𐴞 𐴎𐴟𐴁𐴝𐴕𐴡𐴌 𐴁𐴥𐴟𐴃𐴡𐴌𐴃𐴞 𐴀𐴠𐴑𐴒𐴟𐴗𐴝 𐴎𐴟𐴁𐴝𐴕| 𐴌𐴟𐴇𐴝𐴚𐴙𐴒𐴝 𐴎𐴟𐴁𐴝𐴕𐴡𐴌𐴠 𐴀𐴝𐴌𐴡𐴁𐴞، 𐴁𐴟𐴌𐴔𐴞𐴏𐴢 𐴀𐴝𐴌 𐴌𐴟𐴔𐴡𐴕 𐴇𐴡𐴌𐴡𐴉𐴢 𐴀𐴡𐴑𐴧𐴡𐴓𐴡𐴌 𐴏𐴝𐴣𐴀𐴃𐴠 𐴓𐴠𐴙𐴑𐴝𐴎𐴝𐴘𐴃𐴡 𐴑𐴞𐴕𐴃𐴟 𐴀𐴠𐴈𐴡𐴕 𐴌𐴟𐴇𐴥𐴝𐴚𐴒𐴙𐴝 𐴎𐴟𐴁𐴝𐴕𐴡𐴌 𐴀𐴝𐴓𐴡𐴒 𐴀𐴠𐴑𐴧𐴝𐴕 𐴓𐴠𐴑𐴝𐴎𐴝𐴊𐴠 𐴐𐴠𐴑𐴡𐴓𐴢 𐴀𐴝𐴏𐴠| 𐴎𐴞𐴘𐴝𐴕𐴡𐴌𐴠 𐴇𐴝𐴕𐴞𐴉𐴞 𐴌𐴟𐴇𐴥𐴝𐴚𐴒𐴙𐴝 𐴁𐴡𐴓𐴞 𐴈𐴡𐴎𐴝||

=============

𐴕𐴟𐴄 𐴀𐴥𐴡𐴑𐴧𐴡𐴓𐴢

𐴱– Bagan 𐴎𐴞𐴘𐴝𐴕𐴡𐴌𐴠 𐴀𐴝𐴒𐴠 Pagan 𐴈𐴦𐴡𐴗𐴝𐴎𐴝𐴘𐴃𐴡 𐴀𐴠𐴑𐴧𐴝𐴕 𐴉𐴟𐴌𐴝𐴕𐴝 𐴐𐴦𐴡𐴀𐴡𐴌 𐴎𐴞𐴘𐴝𐴕 𐴁𐴟𐴌𐴔𐴝𐴌 𐴔𐴝𐴕𐴋𐴠𐴓𐴞 𐴋𐴠𐴏𐴄𐴞𐴑𐴡𐴃𐴢 𐴀𐴝𐴏𐴠| 𐴘𐴥𐴝𐴕𐴀𐴡𐴘𐴓𐴊𐴠 𐴂𐴝𐴒𐴝𐴕 𐴌𐴝𐴎𐴝𐴌 𐴌𐴝𐴎𐴊𐴝𐴕𐴞 𐴀𐴝𐴙𐴐𐴧𐴞𐴓𐴢| 𐴀𐴥𐴞𐴁𐴝 𐴀𐴡𐴘𐴓𐴊𐴠 𐴉𐴦𐴡𐴘𐴓𐴝 𐴌𐴝𐴎𐴝 𐴎𐴞𐴁𐴝𐴘𐴠 𐴀𐴠𐴓𐴝𐴑𐴝 𐴀𐴡𐴑𐴧𐴡𐴓𐴡𐴌𐴠 𐴀𐴠𐴑 𐴒𐴡𐴙𐴅𐴧𐴠 𐴀𐴝𐴌 𐴕𐴡𐴘𐴝 𐴔𐴞𐴙𐴔𐴧𐴝𐴌 𐴊𐴠𐴐𐴢 𐴀𐴥𐴞𐴃𐴝𐴌 𐴁𐴟𐴕𐴞𐴘𐴝𐴊𐴡𐴌𐴠 𐴖𐴡𐴌𐴠 𐴑𐴝𐴘𐴠𐴔𐴢 𐴀𐴡𐴘𐴧𐴠||

𐴲– 𐴊𐴦𐴡𐴙𐴕 𐴔𐴞𐴙𐴔𐴧𐴝𐴌𐴡𐴌 𐴔𐴟𐴗𐴠𐴣 𐴋𐴠𐴏𐴄𐴞𐴑𐴡𐴌 𐴑𐴡𐴏𐴄𐴀𐴓𐴢 𐴏𐴞𐴄𐴞(𐴏𐴝𐴇𐴠𐴓𐴞 𐴐𐴦𐴡𐴀𐴌)

𐴳– 𐴀𐴠𐴈𐴡𐴕𐴡𐴌 Mottama 𐴘𐴥𐴡 𐴔𐴟𐴗𐴠𐴣 𐴋𐴠𐴏𐴄𐴞𐴑𐴡𐴌 𐴑𐴡𐴏𐴄𐴝𐴀𐴓𐴢 𐴏𐴞𐴄𐴞||

𐴴– 𐴀𐴠𐴈𐴡𐴕 𐴘𐴦𐴝𐴕𐴡𐴌 𐴕𐴝𐴔𐴢 𐴀𐴡𐴘𐴓𐴊𐴠 Myeik||

𐴵-(𐴀𐴝𐴌𐴡𐴁𐴞 𐴔𐴧𐴝𐴎𐴠 𐴈𐴟𐴖𐴠𐴎𐴟) 𐴎𐴝𐴌 𐴔𐴦𐴝𐴕𐴞 𐴆𐴞𐴕𐴝𐴁𐴥𐴝𐴐𐴝𐴃𐴢 𐴔𐴟𐴏𐴡𐴓𐴔𐴝𐴕|

𐴶– 𐴀𐴝𐴌𐴝𐴑𐴝𐴕 𐴌𐴝𐴑𐴧𐴝𐴛𐴕𐴡𐴃𐴧𐴞 𐴁𐴡𐴊𐴡𐴓𐴞 𐴀𐴝𐴙𐴐𐴧𐴠𐴊𐴠 𐴐𐴡𐴑𐴡𐴓𐴢| 𐴎𐴞𐴘𐴝𐴕𐴡𐴌 𐴀𐴠𐴏𐴃𐴠𐴔𐴝𐴓𐴢 𐴑𐴟𐴓𐴟𐴕𐴞𐴘𐴝𐴓𐴢 𐴎𐴡𐴁𐴝𐴕𐴝 𐴔𐴧𐴝𐴎𐴠 𐴔𐴡𐴐𐴦𐴟𐴌 𐴀𐴡𐴘𐴧𐴠| 𐴎𐴡𐴊𐴞𐴘𐴥𐴡 𐴌𐴝𐴑𐴧𐴝𐴛 𐴀𐴥𐴠 𐴀𐴠𐴏𐴄𐴠𐴄𐴡𐴌 𐴁𐴟𐴋𐴧𐴞𐴏𐴢 𐴑𐴡𐴗𐴔𐴡𐴌 𐴕𐴝𐴔𐴥𐴡 𐴘𐴦𐴝𐴕 𐴑𐴞𐴕𐴃𐴟 𐴎𐴡𐴈𐴡𐴕 𐴀𐴝𐴌𐴝𐴑𐴝𐴕𐴡𐴃𐴢 𐴌𐴟𐴇𐴥𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕𐴥𐴡 𐴁𐴡𐴐𐴥𐴡𐴃𐴞 𐴒𐴡𐴌𐴠 𐴀𐴠𐴈𐴡𐴃𐴝𐴓𐴧𐴝 𐴀𐴠𐴍𐴠 𐴀𐴝𐴌𐴝𐴑𐴝𐴕 𐴕𐴝𐴔𐴢 𐴀𐴠𐴏𐴃𐴠𐴔𐴝𐴓𐴢 𐴒𐴡𐴙𐴅𐴧𐴟𐴔𐴢||